Roˉma‸ li‸ 6
6
Venˇbaˆ hpawˇ suh peuˬ ve
1Hkʼe te leh, ngaˬ hui hkʼaˬ hkʼe kʼoˆ tuˬ cawˬ le. Awˬ bon maˇ la tuˬ ngaˬ hui venˇbaˆ awˬ hkʼaˇ suh kʼaw‸ kʼai tuˬ sheˍ laˇ. Maˇ kʼai taˬ. 2Ngaˬ hui venˇbaˆ hpawˇ suh peuˬ ve chaw hui lehˬ, venˇbaˆ awˬ hkʼaw lo hkʼaˬ hkʼe te kʼaw‸ te‸ chehˇ hpeh‸ tuˬ le. 3Ngaˬ hui Yeˍsuˆ Hkri‸ awˬ hkʼaw lo baˆtiˆsaˬ hkanˍ yuˬ peuˬ ve chaw hkʼa peu-eˬ lehˬ, yawˇ suh ve awˬ hkʼaw lo baˆtiˆsaˬ hkanˍ taˍ peuˬ ve hta‸ nawˬ hui maˇ shiˍ laˇ. 4Hkʼe te leh, baˆtiˆsaˬ hta‸ ngaˬ hui hkanˍ htaˇ, yawˇ geh teˇ geh suh leh tuˍ taˍ ve hta‸ ngaˬ hui hkanˍ taˍ ve yoˬ. Hkri‸ lehˬ, Awˬ pa ve awˬ me‸ awˬ hponˇ hta‸ pa taw suh kuiˬ lo kʼaw‸ te‸ tu la ve hkʼa shuˍ shuˍ, ngaˬ hui htawˇ te‸ la leh chaw awˬ suhˉ hpeh‸ la ve yoˬ.
5Awˬ lawn kʼo, ngaˬ hui yawˇ geh teˇ geh suh ve kʼo, ngaˬ hui yawˇ geh teˇ geh kʼaw‸ te‸ tu la tuˬ yoˬ. 6Ngaˬ hui venˇbaˆ ve awˬ ceˬ maˇ gʼa kʼaw‸ te leh, venˇbaˆ ve awˬ to luˬ kʼai tuˬ, ngaˬ hui ve nyi ma awˬ piˍ lehˬ, yawˇ geh teˇ geh la‸ ka hkʼoˆ lo hkanˍ suh peuˬ ve hta‸ ngaˬ hui shiˍ ve yoˬ. 7Suh peuˬ ve chaw teˇ gʼaˇ lehˬ, venˇbaˆ awˬ hkʼaw lo ponˬ tawˆ la peuˬ. 8Ngaˬ hui Hkri‸ geh teˇ geh suh ve kʼo, yawˇ geh teˇ geh te‸ chehˇ tuˬ yoˬ teh‸ ngaˬ hui yonˍ ve yoˬ. 9Hkri‸ lehˬ, suh kuiˬ lo kʼaw‸ te‸ tu la peuˬ ve pa taw, awˬ hkʼaw‸ nawˉ teˇ pawˆ ka‸ yawˇ maˇ kʼaw‸ suh leh, suh ve teˇ ceuˬ yawˇ hta‸ maˇ kʼaw‸ uˉ peunˍ ve teh‸ ngaˬ hui shiˍ ve yoˬ. 10Yawˇ hkanˍ suh ve lehˬ, venˇbaˆ hpawˇ teˇ pawˆ ceh tiˉ hkanˍ suh leh, yawˇ te‸ chehˇ ve lehˬ, Gʼuiˬsha hpawˇ te‸ chehˇ ve yoˬ. 11Chi hkʼa shuˍ shuˍ, nawˬ hui htawˇ venˇbaˆ hpawˇ suh peuˬ ve chaw hpeh‸ leh, Yeˍsuˆ Hkri‸ hta‸ pa taw Gʼuiˬsha hpawˇ te‸ chehˇ ve chaw hpeh‸ ve teh‸ shawˍ taˍ-o‸.
12Venˇbaˆ ve a loˍ awˬ hkʼaˇ suh maˇ gʼa kʼai tuˬ, nawˬ hui suh puiˉ ve awˬ to awˬ hkʼaw lo venˇ baˆ hta‸ taˇ uˉ peunˍ tcuh. 13Nawˬ hui ve awˬ to awˬ hkʼeun teˇ hpaˍ lehˬ, haiˬ ve awˬ pon la‸ caˉ hkʼe yehˇ tuˬ, venˇbaˆ hta‸ taˇ a‸ piˇ. Ya‸ hkʼaˇ, nawˬ hui suh kuiˬ lo kʼaw‸ te‸ tu la peuˬ ve chaw hui hpeh‸ ve pa taw, a shu yawˇ awˬ to Gʼuiˬsha hta‸ a‸ piˇ-oˆ. Nawˬ hui ve awˬ to awˬ hkʼeun teˇ hpaˍ htawˇ, hteˇ ve cawˇ ve awˬ pon la‸ caˉ hkʼe yehˇ tuˬ Gʼuiˬsha hta‸ a‸ piˇ-oˆ. 14Awˬ lawn kʼo, nawˬ hui lehˬ awˬliˇtawˇhkawˇ awˬ hawˉ lo chehˇ ve maˇ heˆ. Awˬ bon awˬ hawˉ lo chehˇ ve pa taw, venˇbaˆ nawˬ hui hta‸ kʼaw‸ uˉ peunˍ tuˬ maˇ heˆ.
Hteˇ ve cawˇ ve teˇ ceuˬ awˬ hawˉ lo awˬ ceˬ te ve
15Hkʼe te leh hkʼaˬ hkʼe le. Awˬliˇtawˇhkawˇ awˬ hawˉ maˇ kʼaw‸ chehˇ leh awˬ bon awˬ hawˉ lo chehˇ ve pa taw, ngaˬ hui venˇbaˆ kʼaw‸ te tuˬ laˇ. Maˇ heˆ taˬ. 16Chaw teˇ gʼaˇ gʼaˇ ve hkawˇ hta‸ na yuˬ leh, yawˇ ve awˬ ceˬ te tuˬ nawˬ hui ve awˬ to yawˇ hta‸ a‸ piˇ ve kʼo, nawˬ hui lehˬ nawˬ hui na yuˬ chehˇ ve chaw oˇ ve teˇ gʼaˇ ve awˬ ceˬ hpeh‸ ve hta‸ nawˬ hui maˇ shiˍ laˇ. Venˇbaˆ teˇ ceuˬ awˬ hawˉ lo awˬ ceˬ te ve kʼo, gʼa suh tuˬ yoˬ. Maˇ heˆ kʼo, na yuˬ ve teˇ ceuˬ awˬ hawˉ lo awˬ ceˬ te ve kʼo, hteˇ ve cawˇ ve chaw hpeh‸ tuˬ yoˬ. 17Nawˬ hui lehˬ venˇbaˆ ve awˬ ceˬ hpeh‸ jaw htawˇ, nawˬ hui gʼa henˇ ve awˬ liˇ awˬ hkʼaˇ teˇ hpaˍ hta‸ nyi ma awˬ tawˬ hkʼa gaˬ na yuˬ ve pa taw, Gʼuiˬsha ve awˬ bon hta‸ chiˇ uiˍ chiˇ mvuh piˇ-oˆ. 18Nawˬ hui venˇbaˆ awˬ hkʼaw lo ponˬ tawˆ la peuˬ leh, hteˇ ve cawˇ ve teˇ ceuˬ awˬ hawˉ lo awˬ ceˬ hpeh‸ la peuˬ. 19Nawˬ hui awˬ suhˍ awˬ shaˍ hpawˇ ceh dawˇ pawnˍ puiˉ ve pa taw, chaw yaˇ hui shiˍ hpeh‸ ve tawˇ chi teˇ hpaˍ ngaˬ nawˬ hui hta‸ kʼoˆ laˇ ve yoˬ. Awˬ lawn kʼo, ponˬ laˬ htaˇ nawˬ hui ve awˬ to awˬ hkʼeun teˇ hpaˍ lehˬ, cha‸ chiˆ ve hta‸ te tuˬ leh, haiˬ ve awˬ hkʼoˆ haiˬ ve hta‸ te tuˬ a‸ piˇ jaw ve hkʼa shuˍ shuˍ, chi beu‸ nawˬ hui da‸ la kehˬ la tuˬ awˬ pon, hteˇ ve cawˇ ve teˇ ceuˬ awˬ hawˉ lo awˬ ceˬ te tuˬ, nawˬ hui ve awˬ to awˬ hkʼeun teˇ hpaˍ hta‸ a‸ piˇ-oˆ.
20Nawˬ hui venˇbaˆ ve awˬ ceˬ hpeh‸ chehˇ ve teˇ yanˇ, nawˬ hui lehˬ hteˇ ve cawˇ ve teˇ ceuˬ awˬ hawˉ lo awˬ ceˬ maˇ hpeh‸. 21Oˇ ve teˇ hpaˍ hta‸ nawˬ hui te ve pa taw, awˬ bon hkʼaˬ hkʼe gʼa le. Chi beu‸ nawˬ hui awˬ pon ya‸ taw tuˬ ceh tiˉ hpeh‸ ve yoˬ. Oˇ ve teˇ hpaˍ ve awˬ leh meuˇ lehˬ, suh ve teˇ ceuˬ yoˬ. 22Ya‸ hkʼaˇ chi beu‸ nawˬ hui lehˬ, venˇbaˆ awˬ hkʼaw lo ponˬ tawˆ la peuˬ leh, Gʼuiˬsha ve awˬ ceˬ hpeh‸ la peuˬ ve pa taw, naw hui da‸ ve kehˬ ve awˬ bon hta‸ gʼa ve yoˬ. Awˬ bon oˇ ve awˬ leh meuˇ lehˬ, co ti‸ ha ti‸ teˇ ceuˬ hpeh‸ ve yoˬ. 23Awˬ lawn kʼo, venˇbaˆ te leh gʼa ve awˬ hpfuhˇ lehˬ, suh ve teˇ ceuˬ yoˬ. Ya‸ hkʼaˇ, Gʼuiˬsha ngaˬ hui hta‸ hkʼe leˇ pe‸ laˇ ve awˬ bon lehˬ, ngaˬ hui ve Jawˇmawˇ Yeˍsuˆ Hkri‸ hta‸ pa taw, co co taiˍ taiˍ te‸ ve teˇ ceuˬ yoˬ.
Currently Selected:
Roˉma‸ li‸ 6: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
