Roˉma‸ li‸ 5

Hteˇ ve cawˇ ve chaw hui awˬ bon hkʼaˬ hkʼe gʼa ve

1Ngaˬ hui yonˍ ve awˬ hkʼaw lo hteˇ ve cawˇ ve chaw hpeh‸ la peuˬ ve hta‸ pa taw, ngaˬ hui ve Jawˇmawˇ Yeˍsuˆ Hkri‸ awˬ hkʼaw lo, Gʼuiˬsha hta‸ kʼaw‸ cawˇ da‸ hui da‸ ve yoˬ. 2Jawˇmawˇ Yeˍsuˆ Hkri‸ hta‸ pa taw awˬ bon chi awˬ hkʼaw lo ngaˬ hui gʼa lo‸ la leh gʼa chehˇ taˍ ve yoˬ. Gʼuiˬsha ve awˬ me‸ awˬ hponˇ hta‸ ngaˬ hui dawˇ law leh, ha lehˬ chiˇ mvuh chehˇ ve yoˬ. 3Chi hkʼoˆ ka‸, tu‸ ve hkanˍ ve hta‸ ngaˬ hui gʼa hkanˍ ve teˇ yanˇ, ha lehˬ chiˇ mvuh chehˇ ve yoˬ. Awˬ lawn kʼo, tu‸ ve hkanˍ ve hta‸ pa taw ngaˬ hui yeunˇ hkanˍ puiˉ la ve yoˬ. 4Yeunˇ hkanˍ puiˉ ve hta‸ pa taw da‸ ve hta‸ te puiˉ la ve yoˬ. Da‸ ve hta‸ te puiˉ ve pa taw ngaˬ hui dawˇ law puiˉ la ve hta‸ shiˍ ve yoˬ. 5Dawˇ law puiˉ ve hta‸ pa taw gʼa ya‸ taw tuˬ ve maˇ heˆ. Awˬ lawn kʼo, ngaˬ hui hta‸ pe‸ laˇ peuˬ ve da‸ ve kehˬ ve Awˬ ha hpu lehˬ, ngaˬ hui ve nyi ma awˬ hkʼaw lo Gʼuiˬsha ve ha‸ pehnˇ ve teˇ ceuˬ ngeuˍ keu laˇ peuˬ.

6Ngaˬ hui gʼaˇ nuˇ jaˇ ve teˇ yanˇ, awˬ yanˇ cawˇ ve awˬ hkʼaw lo, chaw haiˬ hui awˬ pon Hkri‸ hkanˍ suh ve yoˬ. 7Hteˇ ve cawˇ ve chaw awˬ pon hkanˍ suh tuˬ ve chaw ca haˍ jaˇ ve yoˬ. Teˇ pawˆ pawˆ chaw da‸ awˬ pon hkanˍ suh haˆ ve chaw teˇ gʼaˇ gʼaˇ cawˬ tuˬ yoˬ hehˉ. 8Ya‸ hkʼaˇ, ngaˬ hui venˇbaˆ yaˇ hpeh‸ chehˇ ve teˇ yanˇ htaˇ, Hkri‸ ngaˬ hui awˬ pon hkanˍ suh leh, Gʼuiˬsha yawˇ ngaˬ hui hta‸ hkʼaˬ ma ha‸ ve hkʼa tawˍ lehˆ maw laˇ ve yoˬ. 9Hkri‸ ve awˬ suhˍ hta‸ pa taw, chi beu‸ ngaˬ hui hteˇ ve cawˇ ve chaw hpeh‸ la peuˬ. Hkʼe te leh, yawˇ hta‸ pa taw Gʼuiˬsha nyi ma zuhˆ ve hta‸ chi a‸ kehˉ leuˉ leh ngaˬ hui gʼa ponˬ tuˬ yoˬ. 10Awˬ lawn kʼo, ngaˬ hui yawˇ ve canˇ paˍ hpeh‸ chehˇ ve teˇ yanˇ, yawˇ ve Yaˇ hpu hkanˍ suh ve hta‸ pa taw, ngaˬ hui Gʼuiˬsha hta‸ kʼaw‸ cawˇ da‸ hui da‸ la ve yoˬ. Ngaˬ hui chi hkʼe yawˇ hta‸ cawˇ da‸ hui da‸ la peuˬ ve kʼo, Yaˇ hpu te‸ chehˇ ve hta‸ pa taw, chi a‸ kehˉ leuˉ leh ngaˬ hui hta‸ htaiˍ hkʼaw‸ laˇ tuˬ yoˬ. 11Chi ceh tiˉ maˇ heˆ sheˍ. Ngaˬ hui ve Jawˇ mawˇ Yeˍsuˆ Hkri‸ hta‸ pa taw Gʼuiˬsha hta‸ ha lehˬ chiˇ mvuh chehˇ ve yoˬ. Yawˇ hta‸ pa taw ngaˬ hui Gʼuiˬsha hta‸ kʼaw‸ cawˇ da‸ hui da‸ la peuˬ.

Aˍdanˍ leh Hkri‸ awˬ lawn

12Chaw teˇ gʼaˇ hta‸ pa taw miˬguiˬ hkʼoˆ lo venˇbaˆ lo‸ la leh, venˇbaˆ hta‸ pa taw suh ve teˇ ceuˬ cawˬ la ve yoˬ. Hkʼe te leh, chaw hkʼa peu-eˬ venˇbaˆ te peuˬ ve pa taw, chaw hkʼa peu-eˬ awˬ hkʼoˆ hta‸ suh ve teˇ ceuˬ gaˬ la ve yoˬ. 13Awˬliˇtawˇhkawˇ maˇ taˍ sheˍ htaˇ ka‸, miˬguiˬ hkʼoˆ lo venˇbaˆ cawˬ taˍ peuˬ. Ya‸ hkʼaˇ, awˬliˇtawˇhkawˇ maˇ cawˬ sheˍ ve awˬ yanˇ awˬ hkʼaw lo, venˇbaˆ maˇ taˍ sheˍ. 14Ya‸ hkʼaˇ, Aˍdanˍ hta‸ tanˬ leh Moˉseˍ ve awˬ co-e hkʼa gaˬ, suh ve teˇ ceuˬ uˉ peunˍ chehˇ ve yoˬ. Chaw oˇ ve teˇ hpaˍ te ya‸ ve lehˬ, Aˍdanˍ te ya‸ ve hta‸ maˇ shuˍ da‸ htawˇ, suh ve teˇ ceuˬ yawˇ hui hta‸ uˉ peunˍ chehˇ ve yoˬ.

Aˍdanˍ oˇ ve teˇ gʼaˇ lehˬ, awˬ hkʼaw‸ nawˉ laˬ tuˬ ve chaw teˇ gʼaˇ ve awˬ heˆ hpeh‸ ve yoˬ. 15Ya‸ hkʼaˇ, te ya‸ ve oˇ ve lehˬ hkʼe leˇ piˇ ve awˬ bon hta‸ maˇ shuˍ da‸. Awˬ lawn kʼo, chaw teˇ gʼaˇ te ya‸ ve pa taw, chaw maˇ maˇ gʼa suh ve kʼo, Gʼuiˬsha ve awˬ bon ka‸, Yeˍsuˆ Hkri‸ teh‸ kʼoˆ ve chaw teˇ gʼaˇ ve awˬ bon hta‸ pa taw hkʼe leˇ piˇ ve awˬ bon ka‸, chaw maˇ ve awˬ pon leuˉ leh kʼaw‸ maˇ la ve yoˬ. 16Chi hkʼoˆ ka‸, chaw teˇ gʼaˇ teˇ ya‸ ve hta‸ pa taw hpeh‸ la ve teˇ ceuˬ lehˬ, hkʼe leˇ piˇ ve awˬ bon hta‸ maˇ shuˍ da‸. Awˬ lawn kʼo, teˇ pawˆ ceh tiˉ te ya‸ ve ka‸, suhˉ jehˬ leh ciˍ yanˍ ve hta‸ gʼa hkanˍ ve yoˬ. Ya‸ hkʼaˇ, te ya‸ maˇ ve ka‸, hkʼe leˇ piˇ ve awˬ bon hta‸ pa taw hteˇ ve cawˇ ve chaw hpeh‸ la ve yoˬ. 17Chi hkʼoˆ ka‸, chaw teˇ gʼaˇ te ya‸ leh, te ya‸ shehˍ hpaˇ oˇ ve teˇ gʼaˇ hta‸ pa taw suh ve teˇ ceuˬ uˉ peunˍ ve kʼo, maˇ jaˇ ve awˬ bon hta‸ ka‸, hteˇ ve cawˇ ve la‸ shawnˍ hta‸ ka‸ gʼa ve chaw hui lehˬ, Yeˍsuˆ Hkri‸ teˇ gʼaˇ hta‸ pa taw te‸ ve awˬ hkʼaw lo leuˉ leh gʼa uˉ peunˍ tuˬ yoˬ.

18Hkʼe te leh, chaw teˇ gʼaˇ te ya‸ ve hta‸ pa taw, chaw hkʼa peu-eˬ ciˍ yanˍ ve hta‸ gʼa hkanˍ ve yoˬ. Chi hkʼa shuˍ shuˍ, chaw teˇ gʼaˇ hteˇ ve cawˇ ve hta‸ te ve pa taw, chaw hkʼa peu-eˬ hteˇ ve cawˇ ve chaw hpeh‸ la leh, co ha gʼa te‸ ve yoˬ. 19Awˬ lawn kʼo, chaw teˇ gʼaˇ maˇ na yuˬ ve hta‸ pa taw, chaw maˇ maˇ venˇbaˆ yaˇ hpeh‸ la ve yoˬ. Chi hkʼa shuˍ shuˍ, chaw teˇ gʼaˇ na yuˬ ve hta‸ pa taw, chaw maˇ maˇ hteˇ ve cawˇ ve chaw hpeh‸ la tuˬ yoˬ. 20Ya‸ ve jiˆ ve teˇ hpaˍ maˇ la tuˬ, awˬ liˇ tawˇ hkawˇ lo‸ la ve yoˬ. Ya‸ hkʼaˇ venˇbaˆ maˇ la ve teˇ kaˬ lo awˬ bon leuˉ leh kʼaw‸ maˇ la ve yoˬ. 21Chi hta‸ pa taw, venˇbaˆ teˇ ceuˬ lehˬ, suh ve hta‸ cuˇ leh uˉ peunˍ ve hkʼa shuˍ shuˍ, awˬ bon teˇ ceuˬ lehˬ ngaˬ hui ve Jawˇmawˇ Yeˍsuˆ Hkri‸ hta‸ pa taw ngaˬ hui co co taiˍ taiˍ te‸ hpeh‸ tuˬ, hteˇ ve cawˇ ve hta‸ cuˇ leh uˉ peunˍ chehˇ ve yoˬ.

Currently Selected:

Roˉma‸ li‸ 5: LHBE

Highlight

Compare

Copy