Ma‸htehˍ li‸ 22

Hkehˉ caˇ ve awˬ lawn tawˇ pa haˉ te maˍ ve

1Peuˬ leh, Yeˍsuˆ tawˇ pa haˉ teˇ pawˆ kʼaw‸ te leh yawˇ hui hta‸ kʼoˆ piˇ ve, 2Mvuhˇ naw ma mvuhˇmiˬ lehˬ, yawˇ ve yaˇ paˍ awˬ pon hkehˉ caˇ tuˬ gu taˍ ve hkunˉ hawˉ hkanˇ teˇ gʼaˇ hta‸ shuˍ ve yoˬ. 3Hkehˉ caˇ la tuˬ kuˬ taˍ peuˬ ve chaw teˇ hpaˍ hta‸, Laˬ-o‸ teh‸ ca kʼoˆ piˇ tuˬ, yawˇ ve awˬ ceˬ teˇ hpaˍ hta‸ yawˇ kʼai tcuh ve htawˇ, chaw oˇ ve teˇ hpaˍ maˇ laˬ. 4Teˇ pawˆ awˬ kaˍ awˬ nu awˬ ceˬ teˇ hpaˍ hta‸ yawˇ kʼaw‸ kʼai tcuh leh, Caˇ tuˬ dawˬ tuˬ hta‸ ngaˬ hkʼa deh‸ gu taˍ peuˬ. Ngaˬ ve nuˇ leh chu ve ceˇ caˬ teˇ hpaˍ hta‸ tiˇ pehˍ peuˬ leh, hkʼa peu-eˬ hkʼa deh‸ gu taˍ peuˬ. Hkehˉ caˇ la-o teh‸, kuˬ taˍ peuˬ ve chaw teˇ hpaˍ hta‸ ca hto piˇ-oˆ teh‸, yawˇ kʼoˆ piˇ ve yoˬ. 5Ya‸ hkʼaˇ, awˬ lawn oˇ ve hta‸ yawˇ hui te‸ chiˉ maˇ dawˇ leh, teˇ gʼaˇ heh hkʼaw kʼai leh, teˇ gʼaˇ tanˇ kaˬ ca te kʼai ve yoˬ. 6Awˬ kaˍ awˬ nu teˇ hpaˍ lehˬ, yawˇ ve awˬ ceˬ teˇ hpaˍ hta‸ hpeh yuˬ leh, yawˇ hui hta‸ maˇ shawˍ maˇ caˆ te leh tiˇ pehˍ sheˬ ve yoˬ. 7Hkunˉ hawˉ hkanˇ nyi ma zuhˆ jaˇ leh, yawˇ ve ma‸ yaˇ teˇ hpaˍ hta‸ hpehˇ kʼai ve yoˬ. Shu hta‸ tiˇ pehˍ ve chaw hui hta‸ yawˇ te luˬ leh, yawˇ hui ve venˇ hta‸ htawˇ aˬ miˍ tuˉ baˬ ve yoˬ. 8Oˇ htaˇ, yawˇ ve awˬ ceˬ teˇ hpaˍ hta‸ yawˇ kʼoˆ piˇ ve, Hkehˉ caˇ tuˬ ve hta‸ ngaˬ hkʼa deh‸ gu taˍ peuˬ. Ya‸ hkʼaˇ, kuˬ taˍ peuˬ ve chaw teˇ hpaˍ lehˬ laˬ maˇ keunˍ. 9Hkʼe te leh, ya‸ kʼaw lonˉ ceh da‸ kuiˬ teˇ hpaˍ lo kʼai leh, hkʼa mawˬ ve chaw teˇ hpaˍ hta‸ hkehˉ caˇ kuiˬ lo kuˬ veu laˇ-oˆ teh‸ kʼoˆ piˇ ve yoˬ. 10Hkʼe te leh, awˬ ceˬ oˇ ve teˇ hpaˍ ya‸ kʼaw lonˉ teˇ hpaˍ lo kʼai leh, hkʼa mawˬ ve chaw hkʼa peu-eˬ, maˇ da‸ ve chaw maˇ kʼoˆ, da‸ ve chaw maˇ kʼoˆ, kuˬ hpawnˬ leh, hkehˉ caˇ kuiˬ lo chaw hkʼa biˇ cawˬ ve yoˬ.

11Hkehˉ caˇ la ve chaw teˇ hpaˍ hta‸ hkunˉ hawˉ hkanˇ ca lo‸ nyi la ve teˇ yanˇ, hkehˉ caˇ ve veu‸ kʼaˇ maˇ veu‸ ve chaw teˇ gʼaˇ hta‸ yawˇ gʼa mawˬ ve yoˬ. 12Hkʼe te leh yawˇ kʼoˆ piˇ ve, Awˬ chawˇ-oˬ, hkehˉ caˇ ve veu‸ kʼaˇ hta‸ maˇ veu‸ leh, hkʼaˬ hkʼe te leh nawˬ choˬ kaˬ lo‸ la ve le teh‸ na nyi htaˇ, chaw oˇ ve lehˬ, te‸ chiˉ kʼaw‸ kʼoˆ maˇ gʼa. 13Oˇ htaˇ, awˬ ceˬ teˇ hpaˍ hta‸ hkunˉ hawˉ hkanˇ kʼoˆ piˇ ve, Yawˇ ve hkui sheh la‸ sheh hta‸ hpeh tsuh‸ leh, awˬ baˬ hpawˇ naˆ ho‸ kuiˬ lo baˬ keu-o. Oˇ kaˬ lo hkʼa chehˇ ve chaw hui hawˬ leh ciˬ geu‸ tuˬ yoˬ teh‸ kʼoˆ piˇ ve yoˬ.

14Awˬ lawn kʼo, kuˬ yuˬ ve chaw maˇ maˇ cawˬ ve htawˇ, leuˆ yuˬ ve chaw a ciˉ ceh tiˉ cawˬ ve yoˬ teh‸ Yeˍsuˆ kʼoˆ ve yoˬ.

Jawˇmawˇ Kehˉsaˍ hta‸ a moˇ keu ve awˬ lawn

15Oˇ htaˇ, Hpaˍriˍsehˇ teˇ hpaˍ tawˆ kʼai leh, Yeˍsuˆ tawˇ yaw ve awˬ hkʼaw lo hkʼaˬ hkʼe te leh yawˇ hta‸ tawˇ yaw ya‸ piˇ lawˬ tuˬ, yawˇ hui jehˬ da‸ ve yoˬ. 16Hkʼe te leh, yawˇ hui ve awˬ la‸ gʼawˇ teˇ hpaˍ leh Heˍroˆ chaw teˇ hpaˍ hta‸ Yeˍsuˆ geh kʼai tcuh ve yoˬ. Yawˇ hui kʼai leh kʼoˆ ve, Saˍ la‸-oˬ, nawˬ lehˬ hteˇ ve cawˇ ve chaw hpeh‸ leh, Gʼuiˬsha ve ya‸ kʼaw hta‸ hteˇ lehˍ maˍ piˇ ve yoˬ. Nawˬ chaw teˇ gʼaˇ hta‸ ka‸ maˇ kawˆ leh, shu ve mehˆ hpfuhˇ hta‸ maˇ nyi ve teh‸ ngaˬ hui shiˍ ve yoˬ. 17Hkʼe te leh, nawˬ hkʼaˬ hkʼe dawˇ taˍ ve ngaˬ hui hta‸ a ciˉ hto laˇ-oˆ. Jawˇmawˇ Kehˉsaˍ hta‸ a moˇ keu piˇ cawˇ laˇ, maˇ keu piˇ cawˇ laˇ teh‸ na nyi ve yoˬ.

18Yawˇ hui nyi ma kʼaw‸ ve hta‸ Yeˍsuˆ gʼa shiˍ leh, Chaw heˍ paˍ teˇ hpaˍ-oˬ, nawˬ hui aˬ hto‸ ma te ngaˬ hta‸ lawˇ nyi ve le. 19A moˇ hpu teˇ hteh‸ ngaˬ hta‸ maˍ laˇ-oˆ teh‸ kʼoˆ leh,

yawˇ hui yawˇ hta‸ hpu teˇ hteh‸ yuˬ maˍ piˇ ve yoˬ. 20Yeˍsuˆ yawˇ hui hta‸ kʼoˆ piˇ ve, A shu ve awˬ han, a shu ve awˬ meh cawˬ le teh‸ na nyi htaˇ, Jawˇmawˇ Kehˉsaˍ ve yoˬ teh‸ yawˇ hui kʼaw‸ kʼoˆ piˇ ve yoˬ.

21Oˇ htaˇ Yeˍsuˆ yawˇ hui hta‸ kʼaw‸ kʼoˆ piˇ ve, Hkʼe te leh, jawˇmawˇ Kehˉsaˍ ve mawˇ jawˇmawˇ Kehˉsaˍ hta‸ piˇ-oˆ. Gʼuiˬsha ve mawˇ Gʼuiˬsha hta‸ piˇ-oˆ.

22Tawˇ oˇ ve hta‸ yawˇ hui gʼa kaˇ htaˇ, anˇ leh yawˇ hui tawˆ kʼai ve yoˬ.

Kʼaw‸ te‸ tu la ve awˬ lawn shu yawˇ hta‸ na nyi ve

23Kʼaw‸ te‸ tu la ve maˇ cawˬ teh‸ kʼoˆ ve Saˍduˆkehˇ chaw teˇ hpaˍ, oˇ ve teˇ nyi yawˇ geh laˬ leh kʼoˆ ve, 24Saˍ la‸-oˬ, Moˉseˍ kʼoˆ ve, Chaw teˇ gʼaˇ yaˇ maˇ cawˬ leh suh ve kʼo, awˬ nyi paˍ lehˬ yawˇ ve awˬ miˇ ma hta‸ kʼaw‸ heuˆ leh, awˬ viˉ paˍ awˬ pon awˬ ceuˬ awˬ hkʼaˇ gʼa cawˬ piˇ ve yoˬ teh‸ kʼoˆ taˍ ve yoˬ. 25Ponˬ laˬ htaˇ ngaˬ hui geh awˬ viˉ awˬ nyi suhˍ gʼaˇ cawˬ ve yoˬ. Awˉ lawˉ teˇ gʼaˇ lehˬ, awˬ miˇ ma hta‸ heuˆ leh, yaˇ maˇ cawˬ sheˍ htaˇ suh leh, awˬ nyi paˍ hta‸ yawˇ ve awˬ miˇ ma teh taˉ piˇ ve yoˬ. 26Chi hkʼa shuˍ shuˍ, nyiˇ gʼaˇ teˇ gʼaˇ, shehˆ gʼaˇ teˇ gʼaˇ, leh suhˍ gʼaˇ teˇ gʼaˇ hkʼa gaˬ, chi hkʼe teh taˉ piˇ ve yoˬ. 27Yawˇ hui hkʼa peu-eˬ suh peuˬ hkʼaw‸ nawˉ, yaˇ miˇ oˇ ve htawˇ suh ve yoˬ. 28Hkʼe te leh, kʼaw‸ te‸ tu la ve teˇ yanˇ, chaw oˇ ve suhˍ gʼaˇ awˬ hkʼaw lo, yaˇ miˇ oˇ ve hkʼaˬ ve teˇ gʼaˇ ve awˬ miˇ ma hpeh‸ tuˬ ve le. Awˬ lawn kʼo, yawˇ hui hkʼa peu-eˬ yawˇ hta‸ heuˆ peuˬ ve yoˬ teh‸ na nyi ve yoˬ.

29Yeˍsuˆ yawˇ hui hta‸ kʼaw‸ kʼoˆ piˇ ve, Li‸ hpu hta‸ ka‸, Gʼuiˬsha ve kanˇ paˆ hta‸ ka‸ nawˬ hui maˇ shiˍ ve pa taw nawˬ hui dawˇ ya‸ ve yoˬ. 30Awˬ lawn kʼo, kʼaw‸ te‸ tu la ve teˇ yanˇ, awˬ hpawˇ awˬ miˇ heuˆ da‸ ve maˇ kʼoˆ, ka piˇ ve maˇ kʼoˆ, maˇ te. Mvuhˇ naw ma hkʼoˆ chehˇ ve mvuhˇ naw ma tcuh yaˇ hui hkʼe hpeh‸ tuˬ yoˬ. 31Suh ve chaw hui kʼaw‸ te‸ tu la ve teˇ ceuˬ awˬ lawn, Gʼuiˬsha nawˬ hui hta‸ kʼoˆ piˇ taˍ ve hta‸ nawˬ hui maˇ gʼaw jaw laˇ. 32Ngaˬ lehˬ Aˍbraˍhanˍ ve Gʼuiˬsha, Iˉcaˆ ve Gʼuiˬsha leh Yaˍkoˆ ve Gʼuiˬsha hpeh‸ ve yoˬ teh‸ yawˇ kʼoˆ taˍ ve yoˬ. Yawˇ lehˬ, suh ve chaw hui ve Gʼuiˬsha hpeh‸ ve maˇ heˆ. Te‸ chehˇ ve chaw hui ve Gʼuiˬsha hpeh‸ ve yoˬ teh‸, Yeˍsuˆ yawˇ hui hta‸ kʼoˆ piˇ ve yoˬ. #Taw 3:6

33Tawˇ oˇ ve hta‸ chaw awˬ moˍ lonˉ gʼa kaˇ htaˇ, yawˇ maˍ piˇ ve hta‸ yawˇ hui anˇ ve yoˬ.

Awˬliˇtawˇhkawˇ awˬ hkʼaw lo hkʼa peu-eˬ a‸ kehˉ uiˍ ve tawˇ teˇ hkawˇ

34Saˍduˆkehˇ hui Yeˍsuˆ hta‸ tawˇ kʼaw‸ yaw hkʼaw‸ maˇ gʼa ve awˬ lawn Hpaˍriˍsehˇ teˇ hpaˍ gʼa kaˇ htaˇ, yawˇ hui teˇ geh hpawnˬ la ve yoˬ. 35Yawˇ hui awˬ hkʼaw lo awˬliˇtawˇhkawˇ shiˍ paˍ teˇ gʼaˇ, Yeˍsuˆ hta‸ lawˇ nyi tuˬ chi hkʼe kʼoˆ piˇ ve, 36Saˍ la‸-oˬ, awˬliˇtawˇhkawˇ awˬ hkʼaw lo piˇ taˍ ve tawˇ hkʼaˬ ve teˇ hkawˇ hkʼa peu-eˬ a‸ kehˉ uiˍ ve le teh‸, yawˇ hta‸ na nyi ve yoˬ.

37Yeˍsuˆ yawˇ hta‸ kʼoˆ piˇ ve, Nawˬ ve nyi ma hkʼa peu-eˬ, nawˬ ve co ha hkʼa peu-eˬ leh nawˬ ve dawˇ hkʼaˇ hkʼa peu-eˬ nawˬ ve Jawˇmawˇ Gʼuiˬsha hta‸ gʼa ha‸ ve yoˬ. #Bon 6:5 38Piˇ taˍ ve tawˇ chi teˇ hkawˇ lehˬ, hkʼa peu-eˬ a‸ kehˉ uiˍ leh awˉ lawˉ peuˇ ve teˇ hkawˇ hpeh‸ ve yoˬ. 39Nyiˇ hkawˇ teˇ hkawˇ htawˇ, awˉ lawˉ teˇ hkawˇ hta‸ shuˍ da‸ ve yoˬ. Nawˬ awˬ to hta‸ ha‸ ve hkʼe, nawˬ awˬ paˇ awˬ kui chehˇ ve chaw hta‸ gʼa ha‸ ve yoˬ. #Okʼo 19:18 40Awˬ liˇ tawˇ hkawˇ hkʼa peu-eˬ leh Gʼuiˬsha ve tcuh kaˍ paˍ hui ve tawˇ hkawˇ hkʼa peu-eˬ, piˇ taˍ ve tawˇ chi nyiˇ hkawˇ hta‸ tcuhˉ naw‸ taˍ ve yoˬ teh‸, kʼaw‸ kʼoˆ piˇ ve yoˬ.

Daˍviˆ ve Yaˇ hpu awˬ lawn Yeˍsuˆ yawˇ hui hta‸ na nyi ve

41Hpaˍriˍsehˇ hui hpawnˬ da‸ chehˇ htaˇ, Yeˍsuˆ yawˇ hui hta‸ tawˇ teˇ hkawˇ na nyi ve, 42Hkri‸ ve awˬ lawn hta‸ nawˬ hui hkʼaˬ hkʼe dawˇ ve le. Yawˇ a shu ve yaˇ hpu hpeh‸ ve le teh‸ na nyi ve yoˬ.

Yawˇ lehˬ Daˍviˆ ve yaˇ hpu hpeh‸ ve yoˬ teh‸, yawˇ hui yawˇ hta‸ kʼaw‸ kʼoˆ piˇ ve yoˬ. 43Yawˇ kʼaw‸ kʼoˆ ve, Hkʼe te leh, Awˬ ha hpu Daˍviˆ hta‸ dawˇ pawnˍ piˇ ve awˬ hkʼaw lo, aˬ hto‸ ma pa taw yawˇ hta‸ Jawˇmawˇ teh‸ kʼoˆ ve le. 44Awˬ lawn kʼo Daˍviˆ kʼoˆ ve,

Jawˇmawˇ Gʼuiˬsha lehˬ ngaˬ ve Jawˇmawˇ hta‸ kʼoˆ piˇ ve,

Nawˬ ve canˇ paˍ teˇ hpaˍ hta‸

nawˬ ve hkui sheh awˬ hawˉ lo ngaˬ taˍ htaˇ hkʼa gaˬ

ngaˬ ve la‸ sha paˉ lo mui chehˇ-oˆ,

teh‸ kʼoˆ taˍ ve yoˬ. #Chi 110:1

45Daˍviˆ yawˇ hta‸ Jawˇmawˇ teh‸ kʼoˆ ve kʼo, yawˇ lehˬ hkʼaˬ hkʼe te leh Daˍviˆ ve yaˇ hpu hpeh‸ tuˬ ve le teh‸, yawˇ hui hta‸ na nyi ve yoˬ.

46Chaw teˇ gʼaˇ ka‸ yawˇ hta‸ tawˇ teˇ peu-eˬ ka‸ kʼaw‸ yaw hkʼaw‸ maˇ hpeh‸ leh, oˇ ve teˇ nyi hta‸ tanˬ leh, yawˇ hta‸ tawˇ teˇ peu-eˬ ka‸ shu kʼaw‸ na nyi maˇ haˆ ve yoˬ.

Currently Selected:

Ma‸htehˍ li‸ 22: LHBE

Highlight

Copy