Ma‸htehˍ li‸ 23
23
Li‸ bvuh‸ paˍ leh Hpaˍriˍsehˇ hui hta‸ Yeˍsuˆ deˇ maˍ piˇ ve
1Oˇ htaˇ Yeˍsuˆ lehˬ, chaw awˬ moˍ lonˉ teˇ hpaˍ leh yawˇ ve awˬ la‸ gʼawˇ hui hta‸ kʼoˆ piˇ ve, 2Li‸ bvuh‸ paˍ hui leh Hpaˍriˍsehˇ hui lehˬ, Moˉseˍ ve mui kuiˬ lo mui ve yoˬ. 3Hkʼe te leh yawˇ hui lehˬ, nawˬ hui hta‸ hkʼa kʼoˆ laˇ ve teˇ hpaˍ hta‸ na yuˬ leh te-o. Ya‸ hkʼaˇ, yawˇ hui te ve hkʼe taˇ te. Awˬ lawn kʼo, yawˇ hui kʼoˆ ve hkʼe yawˇ hui maˇ te. 4Hawˇ jaˇ ve mawˇ hta‸ yawˇ hui tsuh‸ taˍ leh, chaw yaˇ hui ve la‸ hpeh kʼaˉ hkʼoˆ lo taˍ piˇ ve yoˬ. Ya‸ hkʼaˇ yawˇ hui lehˬ, gu jiˆ pfuhˍ piˇ tuˬ a shu yawˇ ve la‸ naw meuˇ ceh ka‸ maˇ htawˇ. 5Yawˇ hui hkʼa te ve kanˉ hkʼa peu-eˬ lehˬ, chaw yaˇ hui gʼa mawˬ tuˬ ceh te ve yoˬ. Li‸ hpu awˬ tawn ehˉ doˆ pfuhˇ kuiˬ hta‸ yawˇ hui uiˍ chaweh te leh, aˉ po‸ awˬ caˍ zuhˬ chaweh te ve yoˬ. 6Yawˇ hui lehˬ, hti caˇ hti dawˬ kuiˬ lo awˬ me‸ awˬ hponˇ cawˬ ve mui kuiˬ hta‸ maˇ kʼoˇ, bon yehˬ awˬ hkʼaw lo awˬ me‸ awˬ hponˇ cawˬ ve mui hkʼawˇ hta‸ maˇ kʼoˆ, yawˇ hui heuˆ gaˇ ve yoˬ. 7Tcuh hkʼaw lo shu yawˇ hui hta‸ yawˆ yan laˇ ve hta‸ maˇ kʼoˆ, shu yawˇ hui hta‸ saˍ la‸ teh‸ kʼoˆ laˇ ve hta‸ maˇ kʼoˆ, yawˇ hui heuˆ gaˇ ve yoˬ. 8Shu nawˬ hui hta‸ saˍ la‸ teh‸ taˇ kʼoˆ tcuh. Awˬ lawn kʼo, nawˬ hui saˍ la‸ teˇ gʼaˇ tiˉ cawˬ leh, nawˬ hui hkʼa peu-eˬ awˬ viˉ awˬ nyi hpeh‸ ve yoˬ. 9Miˬguiˬ hkʼoˆ lo teˇ gʼaˇ hta‸ ka‸ awˬ pa teh‸ taˇ kʼoˆ. Awˬ lawn kʼo, mvuhˇ naw ma hkʼoˆ chehˇ ve nawˬ hui Awˬ pa teˇ gʼaˇ tiˉ cawˬ ve yoˬ. 10Shu nawˬ hui hta‸ sheh kʼai shehˍ hpaˇ teh‸ taˇ kʼoˆ tcuh. Awˬ lawn kʼo, Hkri‸ teˇ gʼaˇ ceh tiˉ nawˬ hui ve sheh kʼai shehˍ hpaˇ hpeh‸ ve yoˬ. 11Nawˬ hui awˬ hkʼaw lo shu a‸ kehˉ uiˍ ve teˇ gʼaˇ lehˬ, nawˬ hui ve awˬ ceˬ gʼa te ve yoˬ. 12A shu yawˇ awˬ to hta‸ taˍ uiˍ ve chaw hkʼaˬ ve teˇ gʼaˇ maˇ kʼoˆ, taˍ i ve hta‸ gʼa hkanˍ tuˬ yoˬ. A shu yawˇ awˬ to hta‸ taˍ i ve chaw hkʼaˬ ve teˇ gʼaˇ maˇ kʼoˆ, taˍ uiˍ ve hta‸ gʼa hkanˍ tuˬ yoˬ.
13Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, chaw yaˇ teˇ hpaˍ mvuhˇ naw ma mvuhˇmiˬ awˬ hkʼaw lo maˇ gʼa lo‸-e tuˬ, nawˬ hui yehˬ miˉ hta‸ hoˆ tiˍ taˍ ve yoˬ. Nawˬ hui maˇ lo‸-e ve awˬ hkʼoˆ, lo‸-e gaˇ ve chaw hui hta‸ htawˇ nawˬ hui tawˍ taˍ ve yoˬ.#23:13 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -14 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, mehˇ chawˇ ma ve yehˬ hta‸ nawˬ hui hiˉ yuˬ leh, nawˬ hui ve venˇbaˆ maˇ gʼa tawˆ la tuˬ maw chaweh bon lawˬ ve yoˬ. Hkʼe te leh, shu a‸ kehˉ leuˉ leh uiˍ jaˇ ve ciˍ yanˍ ve hta‸ nawˬ hui gʼa hkanˍ tuˬ yoˬ.
15Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, chaw teˇ gʼaˇ nawˬ hui ve awˬ la‸ gʼawˇ hpeh‸ la tuˬ, miˬguiˬ hkʼoˆ leh laˇ tsuhˇ gʼuiˬ hkʼoˆ nawˬ hui teˇ kaˬ peuˬ teˇ kaˬ lo kʼai ve yoˬ. Chaw teˇ gʼaˇ nawˬ hui ve awˬ la‸ gʼawˇ hpeh‸ la ve teˇ yanˇ, nawˬ hui a‸ kehˉ nyiˇ pun yawˇ hta‸ moˬ naˆ ho‸ ve awˬ yaˇ hpeh‸ piˇ lawˬ ve yoˬ.
16Ya‸ kʼaw maˍ shehˍ hpaˇ mehˆ cuˉ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Nawˬ hui kʼoˆ ve, Chaw teˇ gʼaˇ gʼaˇ bon yehˬ lonˉ hta‸ cuˇ leh hkanˍ ve kʼo, yawˇ hkanˍ ve hkʼe maˇ te htawˇ te‸ chiˉ maˇ heˆ. Ya‸ hkʼaˇ, bon yehˬ lonˉ ve shi hta‸ cuˇ leh hkanˍ ve kʼo, yawˇ hkanˍ taˍ ve hkʼe gʼa te ve yoˬ teh‸ nawˬ hui kʼoˆ ve yoˬ. 17Mehˆ cuˉ ve chaw luˬ paˍ teˇ hpaˍ-oˬ, hkʼaˬ ve teˇ ceuˬ uiˍ ve le. Shi uiˍ ve laˇ, maˇ heˆ kʼo shi hta‸ da‸ piˇ kehˬ piˇ lawˬ ve bon yehˬ lonˉ uiˍ ve laˇ. 18Nawˬ hui kʼoˆ ve, Chaw teˇ gʼaˇ gʼaˇ tanˇ kuiˬ hta‸ cuˇ leh hkanˍ ve kʼo, yawˇ hkanˍ ve hkʼe maˇ te htawˇ te‸ chiˉ maˇ heˆ. Ya‸ hkʼaˇ, tanˇ kuiˬ awˬ hkʼoˆ lo cawˬ ve tanˇ tuˬ hta‸ cuˇ leh hkanˍ ve kʼo, yawˇ hkanˍ taˍ ve hkʼe gʼa te ve yoˬ teh‸ nawˬ hui kʼoˆ ve yoˬ. 19Mehˆ cuˉ paˍ teˇ hpaˍ-oˬ, hkʼaˬ ve teˇ ceuˬ uiˍ ve le. Tanˇ tuˬ uiˍ ve laˇ, maˇ heˆ kʼo, tanˇ tuˬ hta‸ da‸ piˇ kehˬ piˇ lawˬ ve tanˇ kuiˬ uiˍ ve laˇ. 20Hkʼe te leh tanˇ kuiˬ hta‸ cuˇ leh hkanˍ ve chaw lehˬ, tanˇ kuiˬ hta‸ ka‸, oˇ ve awˬ hkʼoˆ hkʼa cawˬ ve hkʼa peu-eˬ hta‸ ka‸ cuˇ leh hkanˍ ve yoˬ. 21Bon yehˬ lonˉ hta‸ cuˇ leh hkanˍ ve chaw lehˬ, bon yehˬ lonˉ hta‸ ka‸, oˇ ve awˬ hkʼaw lo chehˇ shehˍ hpaˇ hta‸ ka‸ cuˇ leh hkanˍ ve yo‸. 22Mvuhˇ naw ma hta‸ cuˇ leh hkanˍ ve chaw lehˬ, Gʼuiˬsha ve kʼaw jaw hta‸ ka‸, oˇ ve awˬ hkʼoˆ mui shehˍ hpaˇ hta‸ ka‸ cuˇ leh hkanˍ ve yoˬ.
23Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, nawˬ hui lehˬ i hkinˇ, hawˉ loˍ leh gʼaˆ shaweh teˇ hpaˍ hta‸ teˇ chi pun teˇ pun yuˬ leh tanˇ piˇ ve htawˇ, awˬliˇtawˇhkawˇ awˬ hkʼaw lo leuˉ leh uiˍ ve teˇ hpaˍ, hteˇ lehˍ cawˇ lehˍ te ve, ha kʼaˉ ve leh yonˍ ve, chi teˇ hpaˍ hta‸ naw hui maˇ te. Chi teˇ hpaˍ hta‸ nawˬ hui te cawˇ ve awˬ hkʼoˆ, awˬ kaˍ awˬ nu ve teˇ hpaˍ hta‸ ka‸ nawˬ hui maˇ teh taˉ cawˇ ve yoˬ. 24Ya‸ kʼaw maˍ shehˍ hpaˇ mehˆ cuˉ paˍ teˇ hpaˍ-oˬ, nawˬ hui lehˬ puiˉ suhˆ naˆ teˇ hpaˍ hta‸ che baˬ leh, kaˍlaˍoˆ hta‸ hehˆ dawˬ ve yoˬ.
25Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, nawˬ hui lehˬ hkehˇ leh kawˆ teˇ hpaˍ awˬ baˬ hpawˇ lo tsuhˇ kehˬ ve htawˇ, awˬ hkʼaw hpawˇ lehˬ hiˉ yuˬ lu yuˬ ve teˇ ceuˬ leh te ponˬ te leuˉ ve teˇ ceuˬ hkʼa biˇ cawˬ ve yoˬ. 26Mehˆ cuˉ ve Hpaˍriˍsehˇ-oˬ, hkehˇ leh kawˆ teˇ hpaˍ awˬ baˬ hpawˇ lo da‸ kehˬ la tuˬ, awˬ hkʼaw hpawˇ lo awˉ lawˉ tsuhˇ kehˬ-o‸.
27Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, nawˬ hui lehˬ, hpuˉ lehˍ shehˍ taˍ ve chaw tuˍ hpfuh hta‸ shuˍ ve yoˬ. Tuˍ hpfuh oˇ ve awˬ baˬ hpawˇ lo nyi sha ve htawˇ, awˬ hkʼaw hpawˇ lo chaw awˬ mu‸ ku leh cha‸ chiˆ ve teˇ ceuˬ le le hkʼa biˇ cawˬ ve yoˬ. 28Chi hkʼa shuˍ shuˍ, nawˬ hui lehˬ awˬ hta‸ hpawˇ chaw yaˇ mehˆ gʼuˇ suhˍ lo hteˇ ve cawˇ ve chaw hpeh‸ ve hta‸ shuˍ ve yoˬ. Ya‸ hkʼaˇ, awˬ hkʼaw hpawˇ lo heˍ ve leh haiˬ ve awˬ ceuˬ hkʼa biˇ cawˬ ve yoˬ.
29Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Awˬ lawn kʼo, nawˬ hui lehˬ Gʼuiˬsha ve tcuh kaˍ paˍ hui ve tuˍ hpfuh teˇ hpaˍ hta‸ gu te leh, hteˇ ve cawˇ ve chaw hui ve kawˍ taˍ ve tuˍ hpfuh teˇ hpaˍ hta‸ nyi sha tuˬ te ve yoˬ. 30Ngaˬ hui lehˬ, awˬ puˍ awˬ pi co-e htaˇ gʼa chehˇ ve hkʼe kʼo, yawˇ hui geh teˇ geh Gʼuiˬsha ve tcuh kaˍ paˍ hui hta‸ ngaˬ hui tiˇ pehˍ tuˬ maˇ heˆ teh‸ nawˬ hui kʼoˆ ve yoˬ. 31Chi hkʼe kʼoˆ ve lehˬ, Gʼuiˬsha ve tcuh kaˍ paˍ hui hta‸ tiˇ pehˍ shehˍ hpaˇ hui ve awˬ yaˇ awˬ duˬ hpeh‸ ve yoˬ teh‸, nawˬ hui a shu yawˇ awˬ to awˬ lawn shaˉ hkiˆ hkanˍ ve yoˬ. 32Nawˬ hui awˬ puˍ awˬ pi te ve hta‸ biˇ la tuˬ te-o. 33Vuiˬ haiˬ awˬ yaˇ teˇ hpaˍ-oˬ, suhˉ taˆ ve teˇ yanˇ, nawˬ hui moˬ naˆ ho‸ awˬ hkʼaw lo gʼa geh tuˬ ve hta‸ hkʼaˬ hkʼe te ponˬ hpeh‸ tuˬ le. 34Chi hta‸ pa taw, ngaˬ lehˬ tcuh kaˍ paˍ, cuˇ yiˍ cawˬ paˍ leh li‸ bvuh‸ paˍ teˇ hpaˍ hta‸ nawˬ hui geh lo peu laˇ tuˬ yoˬ. Nawˬ hui lehˬ, teˇ hpaˍ hpaˍ hta‸ tiˇ pehˍ leh, la‸ ka hkʼoˆ lo hta‸ pehˍ tuˬ yoˬ. Teˇ hpaˍ hpaˍ hta‸ nawˬ hui ve bon yehˬ awˬ hkʼaw lo jaw‸ leh, teˇ venˇ peuˬ teˇ venˇ lo nawˬ hui kʼai leh fawˉ mehˍ tuˬ yoˬ. 35Hkʼe te leh, hteˇ ve cawˇ ve Aˍbeˍlaˆ ve awˬ suhˍ hta‸ te leh, bon yehˬ lonˉ leh tanˇ kuiˬ awˬ kaˍ lo nawˬ hui tiˇ pehˍ ve aˍraˍhkiˆ yaˇ paˍ Zaˍhkaˍriˆ ve awˬ suhˍ hkʼa gaˬ, miˬguiˬ hkʼoˆ lo hkʼa sheˆ peuˬ ve hteˇ ve cawˇ ve chaw teˇ hpaˍ ve awˬ suhˍ hkʼa peu-eˬ nawˬ hui awˬ hkʼoˆ gaˬ la tuˬ yoˬ. 36Ngaˬ nawˬ hui hta‸ awˬ tehˬ awˬ na kʼoˆ laˇ ve, chi teˇ hpaˍ hkʼa peu-eˬ chaw chi teˇ co awˬ hkʼoˆ gaˬ la tuˬ yoˬ.
Yeˍruˆsaˍlehnˍ venˇ awˬ pon Yeˍsuˆ dawˇ haˍ jaˇ ve
37Yeˍruˆsaˍlehnˍ venˇ-oˬ, Yeˍruˆsaˍlehnˍ venˇ-oˬ, hkʼaˬ htaˆ ka‸ Gʼuiˬsha ve tcuh kaˍ paˍ teˇ hpaˍ hta‸ nawˬ tiˇ pehˍ leh, nawˬ geh peu laˇ ve chaw teˇ hpaˍ hta‸ haˉ pui baˬ pehˍ ve yoˬ. Gʼaˆ ma peuˍ lehˬ, yawˇ ve awˬ yehˇ teˇ hpaˍ hta‸ toˍ la‸ kʼuˉ awˬ hawˉ lo hpoˆ chehˇ piˇ lawˬ ve hkʼe, nawˬ ve awˬ yaˇ awˬ duˬ teˇ hpaˍ hta‸ ngaˬ awˬ hawˉ lo hkʼaˬ nyiˇ pawˆ hpoˆ chehˇ piˇ lawˬ gaˇ ve htawˇ, nawˬ maˇ te. 38Nyi loˬ, nawˬ hui ve chehˇ kuiˬ lehˬ, gawˬ cu gawˬ pehˆ te teh taˉ tuˬ yoˬ. 39Awˬ lawn kʼo, ngaˬ nawˬ hui hta‸ kʼoˆ laˇ ve, Jawˇmawˇ Gʼuiˬsha ve awˬ meh awˬ hawˉ lo laˬ ve chaw teˇ gʼaˇ awˬ bon uiˍ piˇ-oˆ teh‸, nawˬ hui maˇ kʼoˆ ve ceh ceh, nawˬ hui ngaˬ hta‸ maˇ gʼa kʼaw‸ mawˬ teh‸ kʼoˆ ve yoˬ. #Chi 118:26
Currently Selected:
Ma‸htehˍ li‸ 23: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.