Ma‸htehˍ li‸ 21
21
Piˉ laˬ hta‸ ciˇ leh Yeˍruˆsaˍlehnˍ venˇ hkʼaw lo lo‸-e ve
1Yawˇ hui Yeˍruˆsaˍlehnˍ venˇ awˬ paˇ lo gaˬ la leh, Shaˍlonˍ hkʼaw hta‸ neˇ ve Behˆhpaˍgeˍ hkʼaˆ lo gaˬ la ve teˇ yanˇ, Yeˍsuˆ lehˬ awˬ la‸ gʼawˇ nyiˇ gʼaˇ hta‸ kʼai tcuh leh kʼoˆ ve, 2Nawˬ huiˉ maˬ awˬ gʼuˇ suhˍ cawˬ ve hkʼaˆ hkʼaw lo kʼai-o. Oˇ kaˬ lo hpeh taˍ ve piˉ laˬ awˬ ma peuˍ leh awˬ yehˇ hta‸ teˇ cawˬ haˉ gʼa mawˬ tuˬ yoˬ. Hpui leh ngaˬ geh sheh veu laˇ-oˆ. 3Chaw teˇ gʼaˇ gʼaˇ nawˬ huiˉ maˬ hta‸ teˇ ceuˬ ceuˬ kʼoˆ ve kʼo, Jawˇmawˇ loˍ ve yoˬ teh‸ kʼaw‸ kʼoˆ piˇ-oˆ. Yawˇ teˇ cawˬ haˉ pe‸ laˇ tuˬ yoˬ teh‸ kʼoˆ piˇ ve yoˬ.
4Awˬ lawn chi ve lehˬ, Gʼuiˬsha ve tcuh kaˍ paˍ kʼoˆ taˍ ve tawˇ hkawˇ hta‸ biˇ la tuˬ awˬ pon hpeh‸ ve yoˬ. Yawˇ kʼoˆ ve, 5Ziˉonˍ ve yaˇ miˇ hta‸ chi hkʼe hto piˇ-oˆ.
Nyi loˬ, nawˬ ve hkunˉ hawˉ hkanˇ lehˬ,
nyi ma nuˇ nehˬ ve awˬ hkʼaw lo
piˉ laˬ awˬ ma peuˍ leh awˬ yehˇ hta‸ ciˇ leh nawˬ geh laˬ ve yoˬ,
teh‸ kʼoˆ taˍ ve yoˬ. #Isy 62:11, Zhk 9:9
6Awˬ la‸ gʼawˇ oˇ ve nyiˇ gʼaˇ kʼai leh, Yeˍsuˆ yawˇ huiˉ maˬ hta‸ tcuh ve hkʼe te ve yoˬ. 7Yawˇ huiˉ maˬ lehˬ, piˉ laˬ awˬ ma peuˍ leh awˬ yehˇ hta‸ sheh veu laˇ leh, piˉ laˬ oˇ ve nyiˇ hkeh awˬ hkʼoˆ hta‸ yawˇ hui ve veu‸ kʼaˇ hkʼawˇ piˇ peuˬ hkʼaw‸ nawˉ, Yeˍsuˆ taˆ ciˇ ve yoˬ. 8Chaw awˬ moˍ lonˉ awˬ hkʼaw lo, chaw maˇ-awˍ ve a shu yawˇ ve veu‸ kʼaˇ hta‸ ya‸ kʼaw hpuiˇ lo hkʼawˇ piˇ leh, teˇ hpaˍ hpaˍ suhˆ hpa‸ chaw leh ya‸ kʼaw hpuiˇ lo hkʼawˇ piˇ ve yoˬ. 9Yawˇ awˬ gʼuˇ suhˍ leh awˬ hkʼaw‸ nawˉ kʼai ve chaw awˬ moˍ lonˉ teˇ hpaˍ kuˬ leh, Daˍviˆ ve Yaˇ hpu hta‸ Hoˍsaˍnaˍ hpeh‸ piˇ-oˆ. Jawˇmawˇ Gʼuiˬsha ve awˬ meh awˬ hawˉ lo laˬ ve chaw lehˬ, awˬ bon uiˍ piˇ-oˆ. Mvuhˇ naw ma lo htawˇ, Hoˍsaˍnaˍ#21:9 Hoˍsaˍnaˍ teh‸ k’oˆ ve tawˇ teˇ hkawˇ lehˬ, Heˍbrehˇ hkawˇ hpeh‸ ve yoˬ. Tcuhˉ kuiˬ lehˬ, chi beu‸ Htaiˍ hk’aw‸ laˇ-oˆ teh‸ k’oˆ ve yoˬ. hpeh‸ piˇ-oˆ teh‸ kʼoˆ ve yoˬ. #Chi 118:26
10Yawˇ Yeˍruˆsaˍlehnˍ venˇ hkʼaw lo‸-e ve teˇ yanˇ, venˇ yaˇ hkʼa peu-eˬ duiˆ-ehˍ shaˇ-ehˍ te leh, Chi hpaˇ lehˬ a shu le teh‸ na nyi ve yoˬ.
11Chi hpaˇ lehˬ, Gaˍliˍlehˇ mvuhˇmiˬ Naˍzaˍrehˆ venˇ yaˇ, Gʼuiˬsha ve tcuh kaˍ paˍ Yeˍsuˆ yoˬ teh‸, chaw awˬ moˍ lonˉ teˇ hpaˍ kʼoˆ ve yoˬ.
Bon yehˬ lonˉ hta‸ da‸ piˇ kehˬ piˇ ve
12Oˇ htaˇ Yeˍsuˆ bon yehˬ lonˉ awˬ hkʼaw lo‸-e leh, bon yehˬ lonˉ awˬ hkʼaw lo mawˇ vuiˬ mawˇ hawˇ ve chaw hkʼa peu-eˬ hta‸ gʼa‸ kʼoˬ leh, hpu pa shehˍ hpaˇ hui ve hpui lawˇ teˇ hpaˍ hta‸ maˇ kʼoˆ, aˉ pui kʼaˍ hawˇ shehˍ hpaˇ hui ve mui hkʼawˇ teˇ hpaˍ hta‸ maˇ kʼoˆ, yawˇ hpfuhˆ baˬ ve yoˬ. 13Ngaˬ ve yehˬ hta‸ bon lawˬ kuiˬ yehˬ gʼa kʼoˆ tuˬ yoˬ teh‸ bvuh‸ taˍ ve htawˇ, nawˬ hui lehˬ, yehˬ chi hta‸ chaw hkʼawˇ chehˇ kuiˬ hpeh‸ la piˇ peuˬ teh‸, yawˇ yawˇ hui hta‸ kʼoˆ piˇ ve yoˬ. #Isy 56:7, Yrm 7:11
14Mehˆ cuˉ paˍ hui leh hkui luˬ paˍ hui, bon yehˬ lonˉ hkʼaw yawˇ geh laˬ leh, yawˇ yawˇ hui hta‸ gu na-e piˇ ve yoˬ. 15Paw hkuˇ lonˉ hui leh li‸ bvuh‸ paˍ teˇ hpaˍ lehˬ, yawˇ te ve anˇ tuˬ teˇ hpaˍ hta‸ maˇ kʼoˆ, bon yehˬ lonˉ awˬ hkʼaw lo yaˇ ehˉ teˇ hpaˍ lehˬ, Daˍviˆ ve Yaˇ hpu hta‸ Hoˍsaˍnaˍ hpeh‸ piˇ-oˆ teh‸ kuˬ chehˇ ve hta‸ maˇ kʼoˆ, yawˇ hui gʼa mawˬ ve teˇ yanˇ, nyi ma zuhˆ jaˇ ve yoˬ. 16Chaw chi teˇ hpaˍ hkʼaˬ hkʼe kʼoˆ chehˇ ve hta‸ nawˬ kaˇ-aw laˇ teh‸ yawˇ hta‸ na nyi htaˇ, Yeˍsuˆ lehˬ, Ngaˬ kaˇ ve yoˬ.
Yaˇ ehˉ teˇ hpaˍ leh cuˉ dawˬ ve
yaˇ ehˉ teˇ hpaˍ ve maw‸ kʼaw awˬ hkʼaw lo
da‸ jaˇ biˇ jaˇ ve chiˇ mvuh hkawˇ nawˬ keu piˇ taˍ peuˬ,
teh‸ bvuh‸ taˍ ve hta‸ nawˬ hui teˇ pawˆ ka‸ maˇ gʼaw jaw laˇ teh‸, yawˇ yawˇ hui hta‸ kʼoˆ piˇ ve yoˬ. #Chi 8:2
17Yawˇ yawˇ hui hta‸ hpaˆ da‸ taˉ leh, venˇ awˬ hkʼaw lo tawˆ kʼai leh Beˍtaˍniˆ hkʼaˆ hkʼaw lo ca haˉ ve yoˬ.
Maˉ nawˆ cehˬ hta‸ hkeu piˇ ve
18Mvuhˇ htiˇ la leh venˇ hkʼaw kʼaw‸ kʼo‸-e htaˇ, yawˇ awˍ meu‸ ve yoˬ. 19Ya‸ kʼaw paˇ lo cawˬ ve maˉ nawˆ cehˬ teˇ cehˬ hta‸ gʼa mawˬ leh, yawˇ ca nyi htaˇ awˬ hpa‸ hta‸ ceh tiˉ gʼa mawˬ ve yoˬ. Oˇ htaˇ Yeˍsuˆ lehˬ, Ya‸ nyi hkʼaw‸ nawˉ kʼo, nawˬ awˬ shiˍ teˇ pawˆ ka‸ taˇ kʼaw‸ naw‸ teh‸, maˉ nawˆ cehˬ hta‸ yawˇ kʼoˆ piˇ ve teˇ yanˇ, maˉ nawˆ cehˬ oˇ ve teˇ cawˬ haˉ nawˍ kʼai goˇ kʼai ve yoˬ.
20Awˬ la‸ gʼawˇ teˇ hpaˍ oˇ ve hta‸ gʼa mawˬ htaˇ anˇ leh, Maˉ nawˆ cehˬ chi, aˬ hto‸ ma te teˇ cawˬ haˉ nawˍ kʼai goˇ kʼai ve le teh‸ kʼoˆ ve yoˬ.
21Yeˍsuˆ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, nawˬ hui yonˍ leh nyi ma htawˇdawˇnawˬdawˇ maˇ te ve kʼo, maˉ nawˆ cehˬ chi hta‸ ngaˬ te piˇ ve hkʼe nawˬ hui te hpeh‸ ve awˬ hkʼoˆ ka‸, hkʼaw chi teˇ shiˍ hta‸, Jiˆ tawˆ-e leh laˇ tsuhˇ gʼuiˬ hkʼaw lo ca ce lo‸-e loˬ teh‸ kʼoˆ piˇ ve kʼo, oˇ hkʼe hpeh‸ la tuˬ yoˬ. 22Nawˬ hui yonˍ ve awˬ hkʼaw lo bon lawˬ ve kʼo, nawˬ hui hkʼa lawˬ ve hkʼa peu-eˬ hta‸ gʼa tuˬ yoˬ teh‸ yawˇ hui hta‸ kʼoˆ piˇ ve yoˬ.
Yeˍsuˆ kanˇ paˆ gʼa ve awˬ lawn shu yawˇ hta‸ na nyi ve
23Bon yehˬ lonˉ awˬ hkʼaw lo yawˇ lo‸-e leh maˍ piˇ chehˇ ve teˇ yanˇ, paw hkuˇ lonˉ teˇ hpaˍ leh mvuhˇmiˬ yaˇ hui ve awˬ hoˉ chaw mawˇ teˇ hpaˍ yawˇ geh laˬ leh, Nawˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve le. Kanˇ paˆ chi a shu nawˬ hta‸ pe‸ laˇ ve le teh‸ na nyi ve yoˬ.
24Yeˍsuˆ kʼaw‸ kʼoˆ piˇ ve, Ngaˬ htawˇ nawˬ hui hta‸ tawˇ teˇ hkawˇ na nyi shaˍ. Nawˬ hui yaw hkʼaw‸ laˇ ve kʼo, ngaˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve awˬ lawn nawˬ hui hta‸ hto laˇ tuˬ yoˬ. 25Yoˇhanˬ yawˇ baˆtiˆsaˬ piˇ ve teˇ ceuˬ lehˬ, hkʼaˬ lo gʼa ve le. Mvuhˇ naw ma lo laˇ, chaw yaˇ hui geh lo laˇ teh‸, yawˇ hui hta‸ na nyi ve yoˬ. Yawˇ hui teˇ gʼaˇ leh teˇ gʼaˇ jehˬ da‸ leh kʼoˆ ve, Mvuhˇ naw ma lo gʼa ve teh‸ ngaˬ hui kʼoˆ ve kʼo,
Hkʼe te leh nawˬ hui aˬ hto‸ ma te yawˇ hta‸ maˇ yonˍ ve le teh‸, yawˇ ngaˬ hui hta‸ kʼaw‸ kʼoˆ laˇ tuˬ yoˬ. 26Chaw yaˇ hui geh gʼa ve teh‸ kʼoˆ ve kʼo, chaw chi ma ve hta‸ ngaˬ hui kawˆ tuˬ cawˬ ve yoˬ. Awˬ lawn kʼo Yoˇhanˬ lehˬ, Gʼuiˬsha ve tcuh kaˍ paˍ hpeh‸ ve hta‸ chaw hkʼa peu-eˬ shawˍ taˍ ve yoˬ teh‸, yawˇ hui kʼoˆ da‸ ve yoˬ, 27Hkʼe te leh, Ngaˬ hui maˇ shiˍ teh‸ yawˇ hui Yeˍsuˆ hta‸ kʼaw‸ kʼoˆ piˇ ve yoˬ.
Yeˍsuˆ kʼoˆ ve, Chi hkʼa shuˍ shuˍ, ngaˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve, ngaˬ nawˬ hui hta‸ maˇ hto laˇ.
Yaˇ paˍ nyiˇ gʼaˇ awˬ lawn tawˇ pa haˉ te maˍ ve
28Ya‸ hkʼaˇ nawˬ hui hkʼaˬ hkʼe dawˇ ve le. Chaw teˇ gʼaˇ, yawˇ yaˇ paˍ nyiˇ gʼaˇ cawˬ ve yoˬ. Awˬ viˉ paˍ teˇ gʼaˇ geh yawˇ kʼai leh, Yaˇ paˍoˬ, ya‸ nyi a pehˉ meuˇ hko awˬ hkʼaw lo nawˬ kanˉ ca te-o teh‸ kʼoˆ piˇ htaˇ, 29Ngaˬ maˇ kʼai teh‸ yawˇ kʼaw‸ kʼoˆ piˇ ve yoˬ. Ya‸ hkʼaˇ, awˬ hkʼaw‸ nawˉ yawˇ kʼaw‸ dawˇ hpfuhˆ leh kʼai ve yoˬ. 30Peuˬ leh, awˬ nyi paˍ teˇ gʼaˇ geh awˬ pa kʼaw‸ kʼai leh, oˇ ve hkʼa shuˍ shuˍ kʼoˆ piˇ ve yoˬ. Awˬ nyi paˍ lehˬ, Ngaˬ pa-oˬ, ngaˬ kʼai tuˬ yoˬ teh‸ kʼoˆ ve htawˇ, yawˇ maˇ kʼai. 31Yaˇ paˍ oˇ ve nyiˇ gʼaˇ awˬ hkʼaw lo, hkʼaˬ ve teˇ gʼaˇ awˬ pa ve a loˍ hta‸ te ve le teh‸ na nyi htaˇ, Awˬ viˉ paˍ teˇ gʼaˇ yoˬ teh‸, yawˇ hui kʼaw‸ kʼoˆ piˇ ve yoˬ.
Yeˍsuˆ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, awˬ hkawnˍ shaw paˍ hui leh meh maˬ lanˉ teˇ hpaˍ, nawˬ hui awˬ gʼuˇ suhˍ Gʼuiˬsha ve mvuhˇmiˬ awˬ hkʼaw lo lo‸-e ve yoˬ. 32Awˬ lawn kʼo, Yoˇhanˬ lehˬ hteˇ ve cawˇ ve ya‸ kʼaw hta‸ toˇ leh nawˬ hui geh lo laˬ ve htawˇ, nawˬ hui yawˇ hta‸ maˇ yonˍ. Ya‸ hkʼaˇ, awˬ hkawnˍ shaw paˍ hui leh meh maˬ lanˉ hui yawˇ hta‸ yonˍ ve yoˬ. Nawˬ hui chi hta‸ gʼa mawˬ ve htawˇ, venˇbaˆ hta‸ ka‸ maˇ dawˇ hpfuhˆ, yawˇ hta‸ ka‸ maˇ yonˍ.
A pehˉ meuˇ hko leh hko te paˍ teˇ hpaˍ awˬ lawn tawˇ pa haˉ te maˍ ve
33Awˬ kaˍ awˬ nu tawˇ pa haˉ hta‸ na sheˍ. Yehˬ shehˍ hpaˇ teˇ gʼaˇ lehˬ, a pehˉ meuˇ hko te leh ti taˍ peuˬ hkʼaw‸ nawˉ, hkʼa deh‸ ko taˍ leh, a pehˉ meuˇ shiˍ nyiˉ kuiˬ duˇ taˍ ve yoˬ. Shaw kuiˬ yehˬ mvuh ve hta‸ htawˇ te taˍ leh, hko te paˍ teˇ hpaˍ hta‸ ngaˍ piˇ taˉ leh, awˬ kaˍ awˬ nu mvuhˇmiˬ lo yawˇ kʼai ve yoˬ. 34Awˬ shiˍ meh ve awˬ yanˇ gaˬ la paˇ neˇ htaˇ, awˬ shiˍ hta‸ gʼa tuˬ hko te paˍ hui geh yawˇ ve awˬ ceˬ teˇ hpaˍ hta‸ kʼai tcuh ve yoˬ. 35Ya‸ hkʼaˇ, hko te paˍ teˇ hpaˍ lehˬ, yawˇ ve awˬ ceˬ teˇ hpaˍ hta‸ yuˬ leh, teˇ gʼaˇ hta‸ dawˆ ve, teˇ gʼaˇ hta‸ tiˇ pehˍ leh, teˇ gʼaˇ hta‸ haˉ pui baˬ ve yoˬ. 36Awˬ hkʼaw‸ nawˉ teˇ pawˆ lehˬ, awˉ lawˉ teˇ pawˆ a‸ kehˉ awˬ ceˬ maˇ chaweh hta‸ yawˇ kʼaw‸ kʼai tcuh ve htawˇ, hko te paˍ hui lehˬ, awˉ lawˉ htaˇ hkʼa shuˍ shuˍ yawˇ hui hta‸ ka‸ te piˇ ve yoˬ. 37Awˬ leh meuˇ teˇ pawˆ, Ngaˬ ve yaˇ paˍ hta‸ yawˇ hui yawˆ yan tuˬ yoˬ teh‸ yawˇ kʼoˆ leh, yawˇ ve yaˇ paˍ hta‸ yawˇ hui geh kʼai tcuh ve yoˬ. 38Ya‸ hkʼaˇ, hko te paˍ teˇ hpaˍ lehˬ, yaˇ paˍ oˇ ve hta‸ gʼa mawˬ htaˇ, Chaw chi lehˬ, awˬ shinˉ gʼa shehˍ hpaˇ hpeh‸ ve yoˬ. Laˬ-o‸, yawˇ hta‸ tiˇ pehˍ leh yawˇ ve awˬ shinˉ hta‸ ngaˬ hui yuˬ-a veuˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ. 39Oˇ htaˇ yawˇ hui yawˇ hta‸ yuˬ leh, hko awˬ baˬ hpawˇ lo chiˇ baˬ leh tiˇ pehˍ ve yoˬ.
40Hkʼe te leh hko awˬ shehˍ hpaˇ gaˬ la ve teˇ yanˇ, hko te paˍ teˇ hpaˍ hta‸ yawˇ hkʼaˬ hkʼe te piˇ tuˬ le teh‸, Yeˍsuˆ yawˇ hui hta‸ na nyi ve yoˬ.
41Yawˇ hui yawˇ hta‸ kʼaw‸ kʼoˆ piˇ ve, Haiˬ ve chaw oˇ ve teˇ hpaˍ hta‸ yawˇ gʼaˇ hte‸ te luˬ te sheˆ piˇ leh, awˬ shiˍ meh la htaˇ yawˇ hta‸ awˬ shiˍ kʼaw‸ piˇ tuˬ ve awˬ kaˍ awˬ nu hko te paˍ hui hta‸ kʼaw‸ ngaˍ piˇ tuˬ yoˬ.
42Yeˍsuˆ yawˇ hui hta‸ kʼoˆ piˇ ve,
Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ,
awˬ hkuiˉ puiˍ awˬ ceˍ kʼaweh‸ lo kawˍ taˍ ve haˉ pui shiˍ hpeh‸ la peuˬ.
Chi lehˬ Jawˇmawˇ Gʼuiˬsha te taˍ ve kanˉ hpeh‸ leh,
ngaˬ hui mehˆ gʼuˇ suhˍ anˇ tu hpeh‸ ve yoˬ,
teh‸ Li‸ hpu awˬ hkʼaw lo nawˬ hui teˇ pawˆ ka‸ maˇ gʼaw jaw laˇ, #Chi 118:22,23 43Hkʼe te leh ngaˬ nawˬ hui hta‸ kʼoˆ laˇ ve, Gʼuiˬsha ve mvuhˇmiˬ hta‸ nawˬ hui geh yuˬ tawˆ leh, mvuhˇmiˬ oˇ ve hta‸ caˉ da‸ ve awˬ shiˍ naw‸ la puiˉ ve chaw ceuˬ hta‸ kʼaw‸ piˇ tuˬ yoˬ.#21:43 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -44 Haˉ pui oˇ ve awˬ hkʼoˆ paiˍ ve chaw lehˬ, hteh kʼai tuˬ yoˬ. Chaw hkʼaˬ ve teˇ gʼaˇ awˬ hkʼoˆ hta‸ maˇ kʼoˆ, haˉ pui oˇ ve ce teˍ ve kʼo, chaw oˇ ve meu-e tuˬ yoˬ teh‸ kʼoˆ ve yoˬ.
45Yawˇ kʼoˆ ve tawˇ pa haˉ teˇ hpaˍ hta‸ paw hkuˇ lonˉ hui leh Hpaˍriˍsehˇ hui gʼa kaˇ htaˇ, yawˇ yawˇ hui awˬ lawn kʼoˆ chehˇ ve hta‸ yawˇ hui gʼa shiˍ ve yoˬ. 46Yawˇ hui yawˇ hta‸ hpeh yuˬ gaˇ ve htawˇ, chaw awˬ moˍ lonˉ hta‸ kawˆ ve yoˬ. Awˬ lawn kʼo, Yeˍsuˆ lehˬ Gʼuiˬsha ve tcuh kaˍ paˍ hpeh‸ ve hta‸ chaw chi ma ve shawˍ taˍ ve pa taw yoˬ.
Currently Selected:
Ma‸htehˍ li‸ 21: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
