Oˉ kʼoˍ pui ve li‸ 26
26
Na yuˬ puiˉ ve chaw awˬ bon gʼa ve
1Gʼuiˬsha kʼoˆ ve, Nawˬ hui oˉ kʼoˍ pui tuˬve shaˉ ho‸, haˉ pui hkuiˉ daw leh awˬ nu ve awˬ ceuˬ teˇ hpaˍ hta‸ maˇ gʼa te. Ngaˬ lehˬ nawˬ hui ve Gʼuiˬsha hpeh‸ ve yoˬ. 2Bon pawehˇ teˇ hpaˍ hta‸ hkʼa deh‸ te leh, ngaˬ hta‸ oˉ kʼoˍ pui kuiˬ hta‸ yawˆ yan-o. Ngaˬ lehˬ Gʼuiˬsha hpeh‸ ve yoˬ.
3Nawˬ hui lehˬ ngaˬ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ leh te chehˇ ve kʼo, 4awˬ shiˍ awˬ nu teˇ hpaˍ da‸ la tuˬ leh, iˉ shiˍ cehˬ teˇ hpaˍ iˉ shiˍ maˇ maˇ naw‸ la tuˬ, ngaˬ lehˬ awˬ yanˇ cawˇ cawˇ mvuhˇ yeˬ laˬ piˇ tuˬ yoˬ. 5Nawˬ hui ve awˬ shiˍ awˬ nu teˇ hpaˍ cawˬ maˇ jaˇ ve pa taw, awˬ shiˍ awˬ nu oˇ ve teˇ hpaˍ hta‸ gʼeu‸ jaw‸ maˇ peuˬ sheˍ ka‸, a pehˉ meuˇ shiˍ kʼaw‸ shaˉ yanˇ gaˬ la tuˬ yoˬ. A pehˉ meuˇ shiˍ shaˉ maˇ peuˬ sheˍ ka‸, caˬ ti ve awˬ yanˇ kʼaw‸ gaˬ la tuˬ yoˬ. Nawˬ hui hkʼa bvuhˆ gʼa caˇ gʼa dawˬ leh, mvuhˇmiˬ hkʼaw gawˬ lehˍ gʼa chehˇ tuˬ yoˬ.
6Ngaˬ lehˬ nawˬ hui ve mvuhˇmiˬ hta‸ gawˬ lehˍ cawˬ la piˇ leh, nawˬ hui zuh‸ mehˬ kʼa mehˬ cawˬ tuˬ yoˬ. Nawˬ hui ve mvuhˇmiˬ hkʼaw chehˇ ve haiˬ ve to nuˇ to shaˆ teˇ hpaˍ hta‸ ngaˬ gʼa‸ kʼoˬ piˇ leh, mvuhˇmiˬ gawˬ lehˍ cawˬ tuˬ yoˬ. 7Nawˬ hui ve canˇ paˍ teˇ hpaˍ hta‸ nawˬ hui bawˆ gʼaˇ tuˬ yoˬ. 8Nawˬ hui chaw ngaˇ gʼaˇ tiˉ cawˬ ve htawˇ, chaw teˇ ha gʼaˇ hta‸ bawˆ gʼaˇ leh, chaw teˇ ha gʼaˇ tiˉ cawˬ ve htawˇ canˇ paˍ teˇ meunˍ gʼaˇ hta‸ bawˆ gʼaˇ tuˬ yoˬ. 9Ngaˬ nawˬ hui hta‸ awˬ bon na‸ laˇ leh, nawˬ hui awˬ yaˇ awˬ duˬ maˇ maˇ cawˬ la tuˬ yoˬ. Ngaˬ nawˬ hui hta‸ te piˇ taˍ ve ka ti‸ hta‸ ngaˬ hkʼaˬ htaˆ ka‸ dawˇ nawˇ chehˇ tuˬ yoˬ. 10Nawˬ hui awˬ shiˍ awˬ nu gʼa maˇ jaˇ leh, teˇ hkʼaw‸ awˬ pon caˇ law‸ tuˬ yoˬ. Awˬ shiˍ awˬ nu awˬ suhˉ kʼaw‸ gʼeu‸ jaw‸ ve pa taw, caˬ piˍ teˇ hpaˍ hta‸ gʼa yuˬ baˬ tuˬ yoˬ. 11Ngaˬ lehˬ da‸ kehˬ ve aˉ po kʼo bon yehˬ hkʼaw chehˇ taˍ ve yoˬ. Nawˬ hui hta‸ teˇ pawˆ ka‸ baˬ taˉ laˇ tuˬ ve maˇ heˆ. 12Ngaˬ nawˬ hui geh chehˇ taˍ ve yoˬ. Ngaˬ lehˬ nawˬ hui ve Gʼuiˬsha hpeh‸ leh, nawˬ hui lehˬ ngaˬ ve chaw hpeh‸ ve yoˬ. 13Nawˬ hui shu ve awˬ ceˬ maˇ gʼa kʼaw‸ te tuˬ ngaˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ taˍ peuˬ ve yoˬ. Nawˬ hui hta‸ nyiˉ tiˍ taˍ ve kanˇ paˆ hta‸ ngaˬ te luˬ leh, nawˬ hui hta‸ awˬ me‸ awˬ hponˇ kʼaw‸ cawˬ la piˇ taˍ peuˬ ve yoˬ, teh‸ Gʼuiˬsha kʼoˆ ve yoˬ.
Maˇ na yuˬ ve chaw ciˍ yanˍ ve hta‸ gʼa hkanˍ ve
14Gʼuiˬsha kʼoˆ ve, Nawˬ hui ngaˬ ve awˬliˇtawˇhkawˇ teˇ hpaˍ hta‸ maˇ na yuˬ ve kʼo, ciˍ yanˍ ve hta‸ gʼa hkanˍ tuˬ yoˬ. 15Nawˬ hui ngaˬ ve awˬliˇtawˇhkawˇ teˇ hpaˍ hta‸ maˇ na yuˬ leh, ngaˬ piˇ taˍ ve ka ti‸ hta‸ te luˬ ve kʼo, 16ngaˬ nawˬ hui hta‸ ciˍ yanˍ laˇ tuˬ yoˬ. Gu leh maˇ na-e la puiˉ ve a naˍ teˇ hpaˍ, mehˆ cuˉ kʼai puiˉ ve a naˍ teˇ hpaˍ, leh naˬ paˆ ku ve a naˍ teˇ hpaˍ, ngaˬ nawˬ hui awˬ hkʼoˆ gaˬ la piˇ tuˬ yoˬ. Nawˬ hui awˬ yawˇ sheˍ ve htawˇ, te‸ chiˉ awˬ bon tawˆ la tuˬ ve maˇ heˆ. Awˬ lawn kʼo, canˇ paˍ teˇ hpaˍ nawˬ hui hta‸ ca bawˆ la leh, nawˬ hui ti taˍ hkʼa taˍ ve teˇ hpaˍ hta‸ yawˇ hui caˇ peuˬ tuˬ yoˬ. 17Ngaˬ nawˬ hui geh tawˆ kʼai leh, nawˬ hui lehˬ canˇ paˍ teˇ hpaˍ ve la‸ sheh hkʼaw lo gʼa gaˬ tuˬ yoˬ. Nawˬ hui hta‸ canˇ ve chaw teˇ hpaˍ nawˬ hui hta‸ uˉ peunˍ tuˬ yoˬ. Nawˬ hui kawˆ jaˇ leh, chaw teˇ gʼaˇ ka‸ nawˬ hui hta‸ maˇ gʼa‸ yuˬ ve htawˇ, nawˬ hui gʼa hpaw toˇ chehˇ tuˬ yoˬ.
18Chi hkʼe hpeh‸ chehˇ ve ka‸, nawˬ hui ngaˬ ve tawˇ hta‸ maˇ na yuˬ sheˍ ve kʼo chi a‸ kehˉ suhˍ pun hehnˇ ve ciˍ yanˍ tuˬ ngaˬ nawˬ hui awˬ hkʼoˆ lo kʼaw‸ gaˬ la piˇ tuˬ yoˬ. 19Nawˬ hui caˆ muiˬ puiˉ ve nyi ma hta‸ ngaˬ te luˬ leh, mvuhˇ yeˬ laˬ piˇ tuˬ ve maˇ heˆ. Nawˬ hui ve miˬguiˬ lehˬ sho hkʼa shuˍ heh la tuˬ yoˬ. 20Nawˬ hui kanˉ hkʼaˬ ma te hkeu‸ ve htawˇ, awˬ bon tawˆ la tuˬ ve maˇ heˆ. Awˬ shiˍ awˬ nu maˇ tawˆ la ve awˬ hkʼoˆ, iˉ shiˍ cehˬ teˇ hpaˍ htawˇ awˬ shiˍ naw‸ tuˬ ve maˇ heˆ.
21Chi hkʼe hpeh‸ chehˇ ve ka‸ nawˬ hui ngaˬ ve tawˇ hta‸ maˇ na yuˬ sheˍ ve kʼo, chi a‸ kehˉ suhˍ pun hehnˇ ve ciˍ yanˍ tuˬ ngaˬ nawˬ hui awˬ hkʼoˆ lo kʼaw‸ gaˬ la piˇ tuˬ yoˬ. 22Haiˬ ve to nuˇ to shaˆ teˇ hpaˍ hta‸ ngaˬ nawˬ hui ve mvuhˇmiˬ lo peu laˇ tuˬ yoˬ. Yawˇ hui lehˬ, nawˬ hui ve yaˇ teˇ hpaˍ leh nawˬ hui ve ceˇ teˇ hpaˍ hta‸ te luˬ tuˬ yoˬ. Nawˬ hui a ciˉ ceh tiˉ cawˬ taˉ ve pa taw, ya‸ kʼaw teˇ hpaˍ gawˬ cu gawˬ pehˆ hpeh‸ kʼai tuˬ yoˬ.
23Ngaˬ nawˬ hui hta‸ chi hkʼe ciˍ yanˍ piˇ chehˇ ve ka‸, nawˬ hui nyi ma heh chehˇ sheˍ ve kʼo, 24chi a‸ kehˉ suhˍ pun kʼaw‸ hehnˇ ve ciˍ yanˍ tuˬ ngaˬ nawˬ hui awˬ hkʼoˆ lo kʼaw‸ gaˬ la piˇ tuˬ yoˬ. 25Nawˬ hui ve mvuhˇmiˬ hkʼaw lo ngaˬ ma‸ lonˉ keuˆ la piˇ tuˬ yoˬ. Nawˬ hui gʼa ponˬ tuˬ venˇ hkʼaw hpoˆ chehˇ taˍ ve teˇ yanˇ, gu leh maˇ na-e puiˉ ve a naˍ teˇ hpaˍ ngaˬ nawˬ hui awˬ hkʼoˆ lo gaˬ la piˇ leh, nawˬ hui hta‸ canˇ paˍ teˇ hpaˍ ve la‸ sheh hkʼaw lo chiˇ a‸ piˇ tuˬ yoˬ. 26Nawˬ hui ve caˇ tuˬ teˇ hpaˍ hta‸ ngaˬ i la piˇ tuˬ yoˬ. Yaˇ miˇ teˇ chi gʼaˇ lehˬ mu‸ hkʼu ehˉ teˇ shiˍ hkʼaw te taˍ ve awˍ hta‸ gʼa pehˬ caˇ tuˬ yoˬ. Nawˬ hui awˍ caˇ peuˬ ve ka‸, awˍ meu‸ jaˇ tuˬ sheˍ ve yoˬ.
27Chi hkʼe hpeh‸ chehˇ ve ka‸, nawˬ hui ngaˬ ve tawˇ hta‸ maˇ na yuˬ sheˍ ve kʼo, 28nyi ma zuhˆ jaˇ ve hkʼaw ngaˬ lehˬ chi a‸ kehˉ suhˍ pun hehnˇ ve ciˍ yanˍ tuˬ nawˬ hui awˬ hkʼoˆ lo kʼaw‸ gaˬ la piˇ tuˬ yoˬ. 29Nawˬ hui meu‸ jaˇ kaˆjaˇ ve pa taw, a shu yawˇ ve yaˇ hta‸ gʼa tiˇ caˇ tuˬ yoˬ. 30Hkʼaw hkʼoˆ lo te taˍ ve nawˬ hui ve oˉ kʼoˍ pui kuiˬ leh sha hawnˉ tuˉ tanˇ kuiˬ teˇ hpaˍ hta‸ ngaˬ te luˬ piˇ leh, nawˬ hui ve suh taˍ ve awˬ to teˇ hpaˍ hta‸ shaˉ ho‸ oˇ ve teˇ hpaˍ geh baˬ keu laˇ tuˬ yoˬ. 31Nawˬ hui ve venˇ teˇ hpaˍ leh nawˬ hui ve oˉ kʼoˍ pui kuiˬ teˇ hpaˍ hta‸ ngaˬ te luˬ piˇ leh, nawˬ hui ve tuˉ tanˇ tu teˇ hpaˍ hta‸ ngaˬ ha‸ yuˬ laˇ tuˬ ve maˇ heˆ. 32Ngaˬ lehˬ nawˬ hui ve mvuhˇmiˬ hta‸ htawˇ te luˬ piˇ leh, nawˬ hui ve mvuhˇmiˬ hkʼaw chehˇ taˍ ve canˇ paˍ teˇ hpaˍ kawˆ jaˇ tuˬ yoˬ. 33Nawˬ hui ve mvuhˇmiˬ hkʼaw ngaˬ ma‸ lonˉ keuˆ la piˇ leh, nawˬ hui hta‸ awˬ nu ve mvuhˇmiˬ teˇ hpaˍ lo hpaˆ da‸ kʼai piˇ lawˬ tuˬ yoˬ. Nawˬ hui ve venˇ teˇ hpaˍ luˬ kʼai leh, mvuhˇmiˬ gawˬ cu gawˬ pehˆ hpeh‸ kʼai tuˬ yoˬ. 34Oˇ htaˇ mvuhˇmiˬ lehˬ, gawˬ lehˍ gʼaˇ gʼa jehˇ tuˬ yoˬ. 35Nawˬ hui lehˬ, canˇ paˍ hui ve mvuhˇmiˬ lo shu ve awˬ ceˬ ca te chehˇ htaˇ, nawˬ hui ve mvuhˇmiˬ lehˬ gawˬ cu gawˬ pehˆ hpeh‸ kʼai tuˬ yoˬ.
36Shu ve mvuhˇmiˬ lo awˬ ceˬ gʼa ca te chehˇ ve nawˬ hui teˇ hpaˍ hta‸ ngaˬ kawˆ puiˉ ve nyi ma cawˬ la piˇ leh, suhˆ hpa‸ hta‸ mvuhˇ haw meuˆ ve awˬ hkawˇ gʼa kaˇ ve ceh ka‸ hpaw-e gaˇ ve nyi ma cawˬ la tuˬ yoˬ. Ma‸ bawˆ kuiˬ lo canˇ paˍ gʼa‸ yuˬ chehˇ ve chaw hkʼe nawˬ hui gʼuiˇ hpaw-e leh, canˇ paˍ maˇ chehˇ ve htawˇ nawˬ hui paiˍ tuˬ yoˬ. 37Chaw teˇ gʼaˇ ka‸ nawˬ hui hta‸ maˇ gʼa‸ yuˬ ve htawˇ, nawˬ hui teˇ gʼaˇ hta‸ teˇ gʼaˇ hkui htiˇ poˬ toˇ chehˇ leh, canˇ paˍ hta‸ bawˆ da‸ hpeh‸ tuˬ ve maˇ heˆ. 38Nawˬ hui lehˬ shu mvuhˇmiˬ lo awˬ ceˬ gʼa te suh-e leh, nawˬ hui ve canˇ paˍ teˇ hpaˍ ve mvuhˇmiˬ hehˆ dawˬ ve hta‸ gʼa hkanˍ tuˬ yoˬ. 39Cawˬ taˉ sheˍ ve chaw teˇ hpaˍ htawˇ, a shu yawˇ ve venˇbaˆ leh awˬ puˍ awˬ pi hui ve venˇbaˆ hta‸ pa taw, gʼaˇ nuˇ kʼai tuˬ yoˬ.
40-41Ya‸ hkʼaˇ, awˬ leh meuˇ gaˬ kʼo nawˬ hui ve awˬ ceuˬ awˬ hkʼaˇ teˇ hpaˍ lehˬ, a shu yawˇ ve te ya‸ kuiˬ leh, awˬ puˍ awˬ pi hui ve te ya‸ kuiˬ hta‸ kʼaw‸ shiˍ kʼaw‸ nawˇ la tuˬ yoˬ. (Yawˇ hui ngaˬ hta‸ kʼaw‸ hpfuhˆ ve pa taw, ngaˬ yawˇ hui hta‸ nyi ma zuhˆ leh shu mvuhˇmiˬ lo gʼa‸ kʼoˬ piˇ taˍ ve yoˬ.) Yawˇ hui oˇ hkʼe ngaˬ mehˆ gʼuˇ suhˍ lo nyi ma nehˬ lehˍ kʼaw‸ taˍ leh venˇbaˆ dawˇ hpfuhˆ ve kʼo, 42ngaˬ lehˬ Yaˍkoˆ, Iˉcaˆ leh Aˍbraˍhanˍ hui hta‸ te piˇ taˍ ve ka ti‸ hta‸ kʼaw‸ dawˇ nawˇ piˇ tuˬ yoˬ. 43Ya‸ hkʼaˇ, mvuhˇmiˬ oˇ ve gawˬ lehˍ gʼaˇ jehˇ hpeh‸ tuˬ, mvuhˇmiˬ oˇ ve hkʼaw lo chaw teˇ gʼaˇ hta‸ ka‸ ngaˬ chehˇ tcuh piˇ tuˬ ve maˇ heˆ. Oˇ ve hkʼaw‸ nawˉ, chaw oˇ ve teˇ hpaˍ lehˬ ngaˬ ve awˬliˇtawˇhkawˇ hta‸ te ya‸ ve pa taw, ciˍ yanˍ piˇ ve hta‸ gʼa hkanˍ tuˬ yoˬ. 44Ya‸ hkʼaˇ, shu mvuhˇmiˬ lo awˬ ceˬ gʼa ca te chehˇ ve chaw oˇ ve hkʼa peu-eˬ hta‸ ngaˬ te luˬ piˇ tuˬ ve maˇ heˆ. Oˇ hkʼe te piˇ ve kʼo, ngaˬ yawˇ hui hta‸ te piˇ taˍ ve ka ti‸ hta‸ ngaˬ te luˬ piˇ chehˇ ve hkʼe hpeh‸ tuˬ yoˬ. Awˬ lawn kʼo, ngaˬ lehˬ yawˇ hui ve Gʼuiˬsha hpeh‸ ve yoˬ. 45Ngaˬ lehˬ yawˇ hui ve Gʼuiˬsha hpeh‸ la tuˬ, awˬ nu ve chaw ceuˬ teˇ hpaˍ hta‸ ngaˬ ve kanˇ paˆ hpeu‸ maˍ piˇ leh, yawˇ hui ve awˬ puˍ awˬ pi hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ chehˇ htaˇ, yawˇ hui hta‸ te piˇ taˍ peuˬ ve ka ti‸ hta‸ awˬ suhˉ teˇ pawˆ kʼaw‸ gu te piˇ tuˬ yoˬ, teh‸ Gʼuiˬsha kʼoˆ ve yoˬ.
46Gʼuiˬsha lehˬ, Siˉnaˆ hkʼaw hkʼoˆ lo Moˉseˍ hta‸ cuˇ leh awˬliˇtawˇhkawˇ chi teˇ hpaˍ Iˉsaˍreˍlaˆ chaw hui hta‸ kʼoˆ piˇ ve yoˬ.
Currently Selected:
Oˉ kʼoˍ pui ve li‸ 26: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
