Oˉ kʼoˍ pui ve li‸ 25
25
Suhˍ hkʼaw‸ teˇ hkʼaw‸
1Siˉnaˆ hkʼaw hkʼoˆ lo, Gʼuiˬsha Moˉseˍ hta‸ cuˇ leh Iˉsaˍreˍlaˆ chaw hui hta‸ chi hkʼe kʼaw‸ kʼoˆ piˇ ve yoˬ. 2Gʼuiˬsha nawˬ hui hta‸ piˇ laˇ tuˬ ve mvuhˇmiˬ hkʼaw nawˬ hui gaˬ ve teˇ yanˇ, nawˬ hui Gʼuiˬsha hta‸ yawˆ yan ve hkʼaw, suhˍ hkʼaw‸ teˇ hkʼaw‸ hta‸ te‸ chiˉ maˇ gʼa ti caˇ. 3Nawˬ hui hkaw‸ hkʼaw‸ hkʼa gaˬ muiˬ caˇ hpeh‸ ve yoˬ. Iˉ shiˍ hko te caˇ hpeh‸ ve yoˬ. 4Ya‸ hkʼaˇ, suhˍ hkʼaw‸ teˇ hkʼaw‸ gaˬ la ve teˇ yanˇ, miˬguiˬ hta‸ gʼaˇ gʼa jehˇ piˇ ve yoˬ. Chi ve lehˬ, Gʼuiˬsha hta‸ chiˇ a‸ taˍ ve awˬ hkʼaw‸ teˇ hkʼaw‸ hpeh‸ ve yoˬ. Ti mi maˇ gʼa te. Iˉ shiˍ hko ka‸ maˇ gʼa te. 5Yawˇ hkʼaˇ yawˇ yeˬ tawˆ la ve awˬ shiˍ awˬ nu teˇ hpaˍ hta‸ ka‸ maˇ gʼa gʼeu‸ caˇ. Oˇ ve hkʼa shuˍ, a pehˉ meuˇ shiˍ teˇ hpaˍ hta‸ ka‸ maˇ gʼa shaˉ caˇ. Chi ve lehˬ, miˬguiˬ hta‸ gʼaˇ jehˇ piˇ ve awˬ hkʼaw‸ hpeh‸ ve yoˬ. 6Chi ve teˇ hkʼaw‸ awˬ hkʼaw lo nawˬ hui maˇ muiˬ caˇ ve htawˇ, nawˬ hui awˬ pon leh nawˬ hui ve awˬ ceˬ teˇ hpaˍ, nawˬ hui geh ca chehˇ la taˍ ve awˬ nu ve chaw teˇ hpaˍ, 7nawˬ hui ve ceˇ teˇ hpaˍ leh, haiˬ ve to nuˇ to shaˆ teˇ hpaˍ awˬ pon loˍ ve caˇ tuˬ hkʼa law‸ cawˬ tuˬ yoˬ.
Juˇbiˍliˍ hkʼaw‸
8Suhˍ hkʼaw‸ suhˍ pawˆ teh‸ kʼoˆ ve 49 hkʼaw‸ ve awˬ yanˇ hta‸ gʼaw nyi taˍ-o‸. 9Chaw yaˇ teˇ hpaˍ ve venˇbaˆ hta‸ yuˬ baˬ ve awˬ nyi hpeh‸ ve ha pa suhˍ maˬ teˇ maˬ, teˇ chi nyi htaˇ chaw teˇ gʼaˇ hta‸ hpehˇ leh mvuhˇmiˬ hkʼaˬ ti chi lo behˬ heh ma ca meuˆ toˇ tcuh-o. 10Oˇ hkʼe te ve hkʼaw, nawˬ hui lehˬ ngaˇ chi hkʼaw‸ biˇ ve teˇ hkʼaw‸ hta‸ da‸ kehˬ ve awˬ hkʼaw‸ teh‸ gʼa shawˍ taˍ ve yoˬ. Chi ve teˇ hkʼaw‸ awˬ hkʼaw lo, ponˬ laˬ htaˇ hkʼa hawˇ taˍ ve mawˇ jeˬ teˇ hpaˍ awˬ shehˍ hpaˇ, maˇ heˆ kʼo yawˇ ve awˬ ceuˬ awˬ hkʼaˇ teˇ hpaˍ hta‸ gʼa kʼaw‸ hkʼaw‸ piˇ ve yoˬ. Shu ve awˬ ceˬ te chehˇ ve chaw lehˬ, a shu yawˇ ve yehˬ lo kʼaw‸ kʼo‸-e hpeh‸ ve yoˬ. 11Chi ve teˇ hkʼaw‸ htawˇ, nawˬ hui maˇ gʼa muiˬ caˇ. Iˉ shiˍ hko hkʼaw ve iˉ shiˍ hta‸ htawˇ maˇ gʼa shaˉ caˇ. 12Chi ve teˇ hkʼaw‸ ka‸, da‸ kehˬ ve awˬ hkʼaw‸ hpeh‸ ve yoˬ. Yawˇ hkʼaˇ yawˇ yeˬ tawˆ la ve awˬ shiˍ awˬ nu teˇ hpaˍ hta‸ nawˬ hui caˇ hpeh‸ ve yoˬ.
13Chi teˇ hkʼaw‸ awˬ hkʼaw lo, ponˬ laˬ htaˇ hkʼa hawˇ piˇ taˍ ve mawˇ hkʼa peu-eˬ, awˬ shehˍ hpaˇ hta‸ gʼa kʼaw‸ hkʼaw‸ piˇ ve yoˬ. 14Chi hta‸ pa taw, nawˬ hui awˬ chawˇ chawˇ miˬguiˬ hawˇ da‸ vuiˬ da‸ ve kʼo, maˇ hteˇ maˇ cawˇ ve taˇ te da‸. 15Hawˇ da‸ vuiˬ da‸ ve awˬ hpfuhˇ chi teˇ hpaˍ, awˬ hkʼaw‸ nawˉ teˇ pawˆ Juˇbiˍliˍ kʼaw‸ gaˬ ve awˬ yanˇ hta‸ shawˍ nyi leh gʼa kʼoˆ cheˆ da‸ ve yoˬ. 16Juˇbiˍliˍ maˇ gaˬ taˬ sheˍ ve kʼo, miˬguiˬ awˬ hpfuhˇ hkʼaˆ tuˬ yoˬ. Juˇbiˍliˍ gaˬ la paˇ neˇ ve kʼo, awˬ hpfuhˇ pawˇ tuˬ yoˬ. Awˬ lawn kʼo, Juˇbiˍliˍ gaˬ htaˇ miˬguiˬ oˇ ve awˬ shehˍ hpaˇ hta‸ gʼa kʼaw‸ hkʼaw‸ piˇ tuˬ ve pa taw, miˬguiˬ oˇ ve hta‸ yawˇ hkʼaˬ maw te caˇ hpeh‸ ve hta‸ shawˍ nyi leh awˬ hpfuhˇ gʼa piˇ tuˬ ve hta‸ pa taw yoˬ. 17Nawˬ hui awˬ chawˇ chawˇ teˇ gʼaˇ hta‸ teˇ gʼaˇ heˍ caˇ da‸ ve taˇ te. Nawˬ hui ve Gʼuiˬsha hta‸ kawˆ-oˆ.
Suhˍ hkʼaw‸ teˇ hkʼaw‸ awˬ lawn
18Nawˬ hui ve mvuhˇmiˬ hkʼaw gawˬ lehˍ gʼa chehˇ hpeh‸ tuˬ, Gʼuiˬsha ve awˬliˇtawˇhkawˇ hkʼa peu-eˬ ve hta‸ hkʼa deh‸ na yuˬ-o‸. 19Miˬguiˬ lehˬ awˬ shiˍ awˬ nu maˇ maˇ naw‸ la leh, nawˬ hui hkʼa bvuhˆ gʼa caˇ gʼa dawˬ leh gawˬ lehˍ gʼa chehˇ tuˬ yoˬ.
20Ya‸ hkʼaˇ, nawˬ hui teˇ gʼaˇ gʼaˇ chi hkʼe na nyi gaˇ tuˬ yoˬ. Suhˍ hkʼaw‸ teˇ hkʼaw‸ htaˇ, te‸ chiˉ maˇ ti maˇ gʼeu‸ ve kʼo aˬ hto‸ ma yuˬ caˇ tuˬ le, teh‸ kʼoˆ gaˇ tuˬ yoˬ 21Gʼuiˬsha lehˬ, hkaw‸ hkʼaw‸ teˇ hkʼaw‸ hta‸ awˬ bon na‸ piˇ leh, laˬ tuˬ ve nyiˇ hkʼaw‸ awˬ pon awˬ shiˍ awˬ nu maˇ maˇ cawˬ laˬ piˇ tuˬ yoˬ. 22Hiˉ hkʼaw‸ teˇ hkʼaw‸ gaˬ leh nawˬ hui kʼaw‸ muiˬ caˇ chehˇ ve teˇ yanˇ, nawˬ hui leh hkaw‸ hkʼaw‸ teˇ hkʼaw‸ htaˇ muiˬ keu taˍ ve hta‸ ceh tiˉ gʼa caˇ chehˇ tuˬ sheˍ ve yoˬ.
Mawˇ jeˬ teˇ hpaˍ kʼaw‸ hkʼaw‸ piˇ ve
23Nawˬ ve miˬguiˬ hta‸ teˇ co nawˬ ve mawˇ yoˬ, teh‸ shawˍ leh maˇ gʼa hawˇ caˇ. Awˬ lawn kʼo, miˬguiˬ oˇ ve lehˬ nawˬ ve maˇ heˆ. Gʼuiˬsha ve miˬguiˬ hpeh‸ ve yoˬ. Nawˬ lehˬ hkehˉ chaw hkʼe hpeh‸ leh teˇ hkui teˇ yanˇ muiˬ caˇ tuˬ awˬ pon ceh nawˬ hta‸ a‸ laˇ taˍ ve yoˬ.
24Miˬguiˬ hta‸ hawˇ ve teˇ yanˇ, awˬ shehˍ hpaˇ lehˬ miˬguiˬ oˇ ve hta‸ kʼaw‸ vuiˬ hkʼaw‸ tuˬ a hkaw-anˬ cawˬ ve yoˬ. 25Iˉsaˍreˍlaˆ chaw teˇ gʼaˇ haˍ gʼawˇ la leh yawˇ ve miˬguiˬ hta‸ gʼa hawˇ cawˇ ve kʼo, yawˇ ve awˬ viˉ awˬ nyi teˇ hpaˍ hta‸ ceh tiˉ gʼa hawˇ piˇ ve yoˬ. 26Awˬ viˉ awˬ nyi maˇ cawˬ ve chaw lehˬ, miˬguiˬ oˇ ve shu hta‸ hawˇ piˇ peuˬ hkʼaw‸ nawˉ, yawˇ kʼaw‸ paw sha la ve kʼo, 27miˬguiˬ oˇ ve hta‸ kʼaw‸ vuiˬ hkʼaw‸ hpeh‸ ve yoˬ. Yawˇ lehˬ miˬguiˬ oˇ ve hta‸ vuiˬ shehˍ hpaˇ geh Juˇbiˍliˍ gaˬ tuˬ ve awˬ yanˇ hta‸ shawˍ nyi leh, keunˍ da‸ ve awˬ hpfuhˇ gʼa shawˍ piˇ ve yoˬ. 28Ya‸ hkʼaˇ, yawˇ lehˬ miˬguiˬ oˇ ve hta‸ kʼaw‸ vuiˬ hkʼaw‸ tuˬ hpu maˇ cawˬ ve kʼo, Juˇbiˍliˍ maˇ gaˬ sheˍ ve ceh ceh, miˬguiˬ oˇ ve lehˬ vuiˬ shehˍ hpaˇ ve mawˇ hpeh‸ ve yoˬ. Juˇbiˍliˍ gaˬ ve kʼo, miˬguiˬ oˇ ve awˬ shehˍ hpaˇ hta‸ gʼa kʼaw‸ hkʼaw‸ piˇ ve yoˬ.
29Chaw teˇ gʼaˇ lehˬ, venˇ hkʼaw cawˬ ve yawˇ ve yehˬ hta‸ hawˇ ve kʼo, teˇ hkʼaw‸ maˇ biˇ sheˍ ve ceh ceh yehˬ oˇ ve hta‸ kʼaw‸ vuiˬ hkʼaw‸ tuˬ a hkaw-anˬ cawˬ ve yoˬ. 30Teˇ hkʼaw‸ hpaˆ peuˬ ve kʼo, kʼaw‸ vuiˬ hkʼaw‸ tuˬ a hkaw-anˬ maˇ cawˬ. Yehˬ oˇ ve lehˬ, vuiˬ shehˍ hpaˇ ve mawˇ hpeh‸ kʼai ve yoˬ. Juˇbiˍliˍ hkʼaw‸ gaˬ ve ka‸ yehˬ oˇ ve awˬ shehˍ hpaˇ hta‸ kʼaw‸ hkʼaw‸ piˇ tuˬ a hkaw-anˬ maˇ cawˬ. 31Ya‸ hkʼaˇ, hkʼaˆ hkʼaw cawˬ ve yehˬ teˇ hpaˍ hta‸ oˇ hkʼe te maˇ hpeh‸. Awˬ shehˍ hpaˇ lehˬ hkʼaˬ htaˆ kʼaw‸ vuiˬ hkʼaw‸ gaˇ ka‸ gʼa ve yoˬ. Juˇbiˍliˍ hkʼaw‸ gaˬ ve kʼo, awˬ shehˍ hpaˇ hta‸ gʼa kʼaw‸ hkʼaw‸ piˇ ve yoˬ. 32Ya‸ hkʼaˇ, Leˍviˆ chaw teˇ hpaˍ lehˬ yawˇ hui hta‸ piˇ taˍ ve venˇ teˇ hpaˍ hkʼaw cawˬ ve a shu yawˇ ve yehˬ hta‸ hkʼaˬ htaˆ teˇ yanˇmaˇ kʼoˆ, kʼaw‸ vuiˬ hkʼaw‸ hpeh‸ ve yoˬ. 33Leˍviˆ chaw teˇ gʼaˇ lehˬ, yawˇ ve yehˬ hta‸ hawˇ peuˬ ve htawˇ, Juˇbiˍliˍ hkʼaw‸ gaˬ ve kʼo yehˬ oˇ ve hta‸ kʼaw‸ hkʼaw‸ gʼa ve yoˬ. Awˬ lawn kʼo, Leˍviˆ chaw hui lehˬ awˬ nu ve Iˉsaˍreˍlaˆ chaw hui hkʼa shuˍ miˬguiˬ leh ti mi maˇ cawˬ. Chehˇ kuiˬ yehˬ ceh tiˉ cawˬ ve pa taw yoˬ. 34Ya‸ hkʼaˇ, Leˍviˆ chaw hui lehˬ a shu yawˇ gʼa taˍ ve venˇ awˬ paˇ awˬ kui lo cawˬ ve ti mi teˇ hpaˍ hta‸ hawˇ tuˬ a hkaw-anˬ maˇ cawˬ. Oˇ ve teˇ hpaˍ lehˬ, yawˇ hui ve mawˇ hpeh‸ ve yoˬ.
Haˍ gʼawˇ ve chaw hta‸ chiˇ piˇ ngaˍ piˇ ve
35Nawˬ awˬ paˇ awˬ kui lo chehˇ ve chaw teˇ gʼaˇ gʼaˇ, haˍ gʼawˇ jaˇ leh te‸ chiˉ caˇ tuˬ maˇ cawˬ ve kʼo, nawˬ ve awˬ ceˬ paˍ hta‸ caˍ piˇ taw piˇ ve hkʼe, chaw oˇ ve hta‸ htawˇ gʼa caˍ piˇ ve yoˬ. Oˇ hkʼe te piˇ ve kʼo, yawˇ nawˬ paˇ lo kʼaw‸ caˉ chehˇ hpeh‸ tuˬ yoˬ. 36Nawˬ yawˇ hta‸ chiˇ piˇ ve hpu hta‸ awˬ yawˬ maˇ gʼa yuˬ. Gʼuiˬsha hta‸ kawˆ leh yawˇ hta‸ nawˬ paˇ lo chehˇ tcuh piˇ-oˆ. 37Yawˇ hta‸ chiˇ piˇ ve hpu leh yawˇ hta‸ hawˇ piˇ ve caˇ tuˬ awˬ pon, nawˬ awˬ yawˬ maˇ gʼa lawˬ yuˬ. 38Chi ve lehˬ, nawˬ ve Gʼuiˬsha ve tawˇ hkawˇ hpeh‸ve yoˬ. Yawˇ lehˬ nawˬ hta‸ Eˇjiˇtu‸ mvuhˇmiˬ hkʼaw shiˍ tawˆ laˇ leh, Hkaˍnanˍ mvuhˇmiˬ piˇ laˇ taˍ ve yoˬ.
Awˬ ceˬ hta‸ hpehˇ piˇ ve
39Nawˬ awˬ paˇ awˬ kui lo chehˇ ve chaw teˇ gʼaˇ haˍ gʼawˇ jaˇ leh, nawˬ ve awˬ ceˬ te tuˬ yawˇ ve awˬ to nawˬ hta‸ chiˇ hawˇ laˇ ve kʼo, nawˬ yawˇ hta‸ awˬ ceˬ hkʼe maˇ gʼa shawˍ taˍ. 40Juˇbiˍliˍ hkʼaw‸ gaˬ htaˇ hkʼa gaˬ, yawˇ hta‸ gʼaˇ ga caˇ paˍ hkʼe gʼa shawˍtaˍ piˇ ve yoˬ. 41Juˇbiˍliˍ hkʼaw‸ gaˬ la ve teˇ yanˇ, chaw oˇ ve lehˬ a shu yawˇ miˇ yaˇ hta‸ shiˍ leh yawˇ ve yehˬ lo kʼaw‸ kʼo‸-e hpeh‸ ve yoˬ. 42Iˉsaˍreˍlaˆ chaw lehˬ, Gʼuiˬsha ve awˬ ceˬ hpeh‸ leh yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ. Yawˇ hui hta‸ awˬ ceˬ hkʼe shawˍ leh maˇ gʼa hawˇ caˇ. 43Yawˇ hui hta‸ hehnˇ chaweh maˇ gʼa te piˇ. Nawˬ ve Gʼuiˬsha hta‸ kawˆ-oˆ. 44Nawˬ awˬ ceˬ loˍ ve kʼo, awˬ nu ve chaw teˇ hpaˍ hta‸ gʼa vuiˬ yuˬ ve yoˬ. 45Nawˬ hui geh ca chehˇ la taˍ ve awˬ nu ve chaw ceuˬ teˇ hpaˍ ve yaˇ hta‸ htawˇ vuiˬ yuˬ hpeh‸ve yoˬ. Nawˬ hui ve mvuhˇmiˬ hkʼaw paw la taˍ ve yaˇ oˇ ve teˇ hpaˍ hta‸ nawˬ hui ve mawˇ hkʼe shawˍ hpeh‸ ve yoˬ. 46Nawˬ hui ve yaˇ teˇ hpaˍ htawˇ, yawˇ hui hta‸ awˬ ceˬ hkʼe shawˍ leh kanˉ te tcuh hpeh‸ ve yoˬ. Ya‸ hkʼaˇ, Iˉsaˍreˍlaˆ chaw hta‸ hehnˇ chaweh maˇ gʼa te piˇ.
47Nawˬ hui ve mvuhˇmiˬ hkʼaw ca chehˇ la taˍ ve awˬ nu ve chaw teˇ gʼaˇ gʼaˇ paw sha la leh, haˍ gʼawˇ jaˇ ve Iˉsaˍreˍlaˆ chaw teˇ gʼaˇ hta‸ vuiˬ yuˬ taˍ ve kʼoˆ loˬ. 48Yawˇ hta‸ kʼaw‸ vuiˬ hkʼaw‸ tuˬ a hkaw-anˬ cawˬ ve yoˬ. 49Yawˇ ve awˬ viˉ awˬ nyi, maˇ heˆ kʼo yawˇ ve aˉ shuˍ paˍ, maˇ heˆ kʼo yawˇ ve awˬ ceuˬ awˬ hkʼaˇ teˇ gʼaˇ gʼaˇ yawˇ hta‸ kʼaw‸ vuiˬ hkʼaw‸ hpeh‸ ve yoˬ. Maˇ heˆ leh awˬ hkʼaw‸ nawˉ yawˇ hpu cawˬ la ve kʼo, yawˇ hkʼaˇ yawˇ kʼaw‸ vuiˬ hkʼaw‸ hpeh‸ ve yoˬ. 50Yawˇ lehˬ awˬ shehˍ hpaˇ geh jehˬ da‸ leh, Juˇbiˍliˍ hkʼaw‸ hkʼaˬ htaˆ gaˬ tuˬ ve hta‸ gʼa shawˍ nyi ve yoˬ. Oˇ hkʼe te peuˬ hkʼaw‸ nawˉ, piˇ cawˇ ve awˬ hpfuhˇ gʼa piˇ ve yoˬ. 51Juˇbiˍliˍ hkʼaw‸ gaˬ tuˬ ve awˬ yanˇ maw chehˇ sheˍ ve kʼo, awˬ hpfuhˇ gʼa piˇ maˇ tuˬ yoˬ. 52Juˇbiˍliˍ hkʼaw‸ gaˬ la paˇ neˇ ve kʼo, awˬ hpfuhˇ gʼa piˇ i tuˬ yoˬ. 53Yawˇ hta‸ gʼaˇ ga caˇ paˍ hkʼe ceh gʼa shawˍ taˍ piˇ leh, hehnˇ chaweh maˇ gʼa te piˇ. 54Yawˇ hta‸ vuiˬhkʼaw‸ piˇ paˍ maˇ cawˬ ve kʼo, Juˇbiˍliˍ hkʼaw‸ gaˬ htaˇ, yawˇ hta‸ gʼa hpehˇ piˇ ve yoˬ. 55Iˉsaˍreˍlaˆ chaw teˇ gʼaˇ lehˬ, hkʼaˬ htaˆ ka‸ shu ve awˬ ceˬ ceh tiˉ maˇ gʼa hpeh‸ chehˇ piˇ. Awˬ lawn kʼo, Iˉsaˍreˍlaˆ chaw lehˬ Gʼuiˬsha ve awˬ ceˬ hpeh‸ ve yoˬ. Yawˇ lehˬ yawˇ hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ. Yawˇ lehˬ yawˇ hui ve Gʼuiˬsha hpeh‸ ve yoˬ.
Currently Selected:
Oˉ kʼoˍ pui ve li‸ 25: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
