Yaˍkoˆ li‸ 3

Ha tehˍ awˬ lawn

1Ngaˬ awˬ viˉ awˬ nyi teˇ hpaˍ-oˬ, nawˬ hui laiˉ gʼaˇ maˍ piˇ shehˍ hpaˇ taˇ te. Awˬ lawn kʼo, maˍ piˇ shehˍ hpaˇ teˇ hpaˍ lehˬ, shu a‸ kehˉ leuˉ leh suhˉ jehˬ ve hta‸ gʼa hkanˍ tuˬ ve hta‸ nawˬ hui shiˍ chehˇ ve yoˬ. 2Awˬ lawn kʼo, ngaˬ hui hkʼa peu-eˬ laiˉ ceuˬ te ya‸ ve yoˬ. Chaw teˇ gʼaˇ gʼaˇ, yawˇ tawˇ teˇ pawˆ ka‸ maˇ yaw ya‸ jaw kʼo, yawˇ biˇ ve chaw hpeh‸ leh, awˬ to teˇ to hkʼa peu-eˬ hta‸ gʼaˇ ve chaw hpeh‸ ve yoˬ. 3Iˉ mvuhˇ hta‸ ngaˬ hui gʼaˇ tuˬ yawˇ ve maw‸ kʼaw awˬ hkʼaw lo sho caˆ keu ve kʼo, yawˇ awˬ to hkʼa peu-eˬ hta‸ ngaˬ hui gʼawˬ caw hpeh‸ ve yoˬ. 4Haw lo‸ kʼoˍ lonˉ teˇ hpaˍ hta‸ nyi sheˍ. Uiˍ jaˇ ve haw lo‸ kʼoˍ teˇ hpaˍ hta‸ mvuhˇ haw lonˉ meuˆ kʼai ve htawˇ, haw lo‸ kʼoˍ gʼa‸ shehˍ hpaˇ lehˬ, i jaˇ ve caˉ behˆ ehˉ hta‸ yehˇ leh, yawˇ dawˇ taˍ ve hkʼe haw lo‸ kʼoˍ lonˉ hta‸ suhˉ caw piˇ gʼa ve yoˬ. 5Chi hkʼa shuˍ shuˍ ha tehˍ lehˬ, awˬ to awˬ hkʼaw lo i jaˇ ve awˬ hkʼeun hpeh‸ ve htawˇ uiˍ jaˇ ve awˬ lawn teˇ hpaˍ hta‸ tawˇ uiˍ tawˇ mvuh yaw puiˉ ve yoˬ. I jaˇ ve aˬ miˍ lehˬ, uiˍ jaˇ ve heh puiˉ hkʼaw hta‸ to‸ baˬ gʼa ve hta‸ nyi sheˍ.

6Ha tehˍ lehˬ, aˬ miˍ hkʼe hpeh‸ ve yoˬ. Ngaˬ hui ve awˬ to awˬ hkʼaw lo, ha tehˍ lehˬ venˇbaˆ ve mvuhˇmiˬ htawˇ hpeh‸ ve yoˬ. Ngaˬ hui ve awˬ to hkʼa peu-eˬ hta‸ cha‸ chiˆ tuˬ te ve yoˬ. Nyi ma awˬ hkʼaw lo haiˬ ve awˬ ceuˬ maˇ maˇ hpehˇ tawˆ la piˇ leh, shaˬ te shaˬ maˇ la tcuhˉ taˍ ve yoˬ. Moˬ naˆ ho‸ lehˬ, ha tehˍ hta‸ aˬ miˍ tuˉ piˇ ve yoˬ. 7Awˬ lawn kʼo, to nuˇ to shaˆ, ngaˆ, loˇ kʼai gaˆ kʼai puiˉ ve awˬ ceuˬ, iˉ kaˆ hkʼaw chehˇ ve awˬ ceuˬ, teˇ ceuˬ le le hta‸ chaw yaˇ meuˇ la tuˬ te gʼa leh, te meuˇ taˍ peuˬ ve yoˬ. 8Ya‸ hkʼaˇ, chaw yaˇ lehˬ, ha tehˍ hta‸ meuˇ la tuˬ te maˇ gʼa. Ha tehˍ lehˬ, ta‸ iˉ maˇ chehˇ puiˉ ve haiˬ ve awˬ ceuˬ hpeh‸ ve yoˬ. Suh piˇ puiˉ ve awˬ taw‸ ma htawˇ, yawˇ awˬ hkʼaw lo hkʼa biˇ cawˬ ve yoˬ. 9Ngaˬ hui ha tehˍ hta‸ yehˇ leh ngaˬ hui ve Awˬ pa hpeh‸ ve Jawˇmawˇ Gʼuiˬsha hta‸ chiˇ mvuh ve yoˬ. Peuˬ leh, Gʼuiˬsha ve awˬ ho‸ awˬ han hkʼa shuˍ shuˍ te hpanˍ taˍ ve chaw yaˇ hta‸ ngaˬ hui ha tehˍ hta‸ yehˇ leh kʼaw‸ hkeu piˇ sheˍ ve yoˬ. 10Maw‸ kʼaw teˇ maˬ tiˉ awˬ hkʼaw lo, chiˇ mvuh ve hkawˇ ka‸, hkeu ve hkawˇ ka‸ tawˆ la ve yoˬ. Ngaˬ awˬ viˉ awˬ nyi teˇ hpaˍ-oˬ, chi hkʼe te maˇ cawˇ ve yoˬ. 11Gʼuiˬ tuˇ teˇ maˬ tiˉ awˬ hkʼaw lo mehˬ ve iˉ kaˆ leh hkʼaˇ ve iˉ kaˆ teˇ geh tawˆ la tuˬ laˇ. 12Ngaˬ awˬ viˉ awˬ nyi teˇ hpaˍ-oˬ, maˉ nawˆ cehˬ hta‸ shaˍlonˍ shiˍ naw‸ hpeh‸-aw laˇ. A pehˉ meuˇ te hta‸ maˉ nawˆ shiˍ naw‸ hpeh‸-aw laˇ. Oˇ hkʼe naw‸ maˇ hpeh‸ ve hkʼa shuˍ shuˍ, hkʼaˇ ve gʼuiˬ tuˇ lehˬ, mehˬ ve iˉ kaˆ hta‸ tawˆ la piˇ maˇ hpeh‸.

Mvuhˇ naw ma lo ya‸ la ve cuˇ yiˍ awˬ lawn

13Nawˬ hui awˬ hkʼaw lo, cuˇ yiˍ cawˬ leh shiˍ puiˉ ve chaw a shu le. Chaw oˇ ve lehˬ, cuˇ yiˍ maˍ yiˍ cawˬ ve hkʼe, nyi ma nuˇ nehˬ ve awˬ hkʼaw lo, da‸ ve awˬ liˇ awˬ hkʼaˇ teˇ hpaˍ hta‸ te leh, yawˇ ve kanˉ teˇ hpaˍ hta‸ hpeu‸ maˍ piˇ lawˬ-o‸. 14Ya‸ hkʼaˇ, nawˬ hui hkawehˉ puiˉ jaˇ ve nyi ma cawˬ leh, nyi ma uiˍ ve awˬ hkʼaw lo awˬ moˍ shawˍ da‸ pehˬ da‸ gaˇ ve nyi ma cawˬ ve kʼo, nawˬ hui a shu yawˇ awˬ to hta‸ chiˇ uiˍ chiˇ mvuh leh, hteˇ ve cawˇ ve tawˇ hkawˇ hta‸ gʼawˬ hkʼaˆ ve taˇ te. 15Chi hkʼe ve cuˇ yiˍ lehˬ, mvuhˇ naw ma lo ya‸ la ve cuˇ yiˍ maˇ heˆ. Miˬguiˬ ve cuˇ yiˍ, awˬ suhˍ awˬ shaˍ hpawˇ ve cuˇ yiˍ leh, neˇhaiˬ ve cuˇ yiˍ hpeh‸ ve yoˬ. 16Awˬ lawn kʼo, hkawehˉ puiˉ ve nyi ma cawˬ leh, nyi ma uiˍ ve awˬ hkʼaw lo awˬ moˍ shawˍ da‸ pehˬ da‸ puiˉ ve nyi ma cawˬ ve kʼo, sho‸ sha‸ ve awˬ ceuˬ leh haiˬ ve awˬ ceuˬ hkʼa biˇ cawˬ ve yoˬ. 17Mvuhˇ naw ma lo ya‸ la ve cuˇ yiˍ lehˬ, awˉ lawˉ da‸ ve kehˬ ve, hkʼaw‸ nawˉ cawˇ da‸ hui da‸ ve, nyi ma nuˇ nehˬ ve, na yuˬ puiˉ ve leh, ha kʼaˉ ve teˇ ceuˬ ka‸, da‸ ve awˬ shiˍ ka‸, hkʼa biˇ cawˬ ve yoˬ. Htawˇ hpfuhˆ nawˬ hpfuhˆ te ve nyi ma leh, heˍ ve nyi ma maˇ cawˬ ve yoˬ. 18Cawˇ da‸ hui da‸ tuˬ te ve chaw hui lehˬ, dawˇ sha ve awˬ hkʼaw lo sheˍ leh, hteˇ ve cawˇ ve awˬ shiˍ hta‸ gʼa ve yoˬ.

Currently Selected:

Yaˍkoˆ li‸ 3: LHBE

Highlight

Copy