Yaˍkoˆ li‸ 2

Shu ve mehˆ hpfuhˇ hta‸ maˇ gʼa nyi ve awˬ lawn

1Ngaˬ ve awˬ viˉ awˬ nyi teˇ hpaˍ-oˬ, awˬ me‸ awˬ hponˇ uiˍ ve ngaˬ hui ve Jawˇmawˇ Yeˍsuˆ Hkri‸ hta‸ yonˍ ve awˬ hkʼaw lo, chaw yaˇ mehˆ hpfuhˇ hta‸ taˇ nyi. 2Awˬ lawn kʼo, shi la‸ peˍ tcuhˉ leh da‸ ve veu‸ kʼaˇ veu‸ deh ve chaw teˇ gʼaˇ leh, maˇ da‸ ve veu‸ kʼaˇ veu‸ deh ve haˍ yaˇ gʼawˇ yaˇ teˇ gʼaˇ, yawˇ hui nyiˇ gʼaˇ nawˬ hui ve hpawnˬ da‸ kuiˬ lo lo‸ la htaˇ, 3da‸ ve veu‸ kʼaˇ veu‸ deh ve chaw teˇ gʼaˇ hta‸ nawˬ hui nyi leh kʼoˆ piˇ ve, Da‸ ve mui kuiˬ chi hta‸ mui-o. Peuˬ leh haˍ yaˇ gʼawˇ yaˇ teˇ gʼaˇ hta‸ kʼoˆ piˇ ve, Oˇ kaˬ lo huˉ taˍ-o‸, maˇ heˆ kʼo, Ngaˬ ve hkui paˇ lo mui taˍ-o‸ teh‸ nawˬ hui kʼoˆ ve kʼo, 4nawˬ hui teˇ gʼaˇ peuˬ teˇ gʼaˇ hta‸ pehˬ da‸ fuiˍ da‸ leh, haiˬ ve dawˇ hkʼaˇ awˬ hkʼaw lo shu hta‸ suhˉ jehˬ ve chaw hpeh‸ ve maˇ heˆ laˇ.

5Ngaˬ ha‸ ve awˬ viˉ awˬ nyi teˇ hpaˍ-oˬ, hkʼa deh‸ na sheˍ. Yonˍ ve teˇ ceuˬ awˬ hkʼaw lo paw sha la tuˬ, haˍ ve gʼawˇ ve miˬguiˬ yaˇ hui hta‸ Gʼuiˬsha leuˆ yuˬ ve maˇ heˆ laˇ. Gʼuiˬsha hta‸ ha‸ ve chaw hui hta‸ yawˇ ve mvuhˇmiˬ piˇ tuˬ yoˬ teh‸ kʼoˆ taˍ ve hkʼe, yawˇ hui lehˬ mvuhˇmiˬ awˬ shinˉ caˇ shehˍ hpaˇ hpeh‸ ve yoˬ. 6Ya‸ hkʼaˇ, nawˬ hui lehˬ haˍ ve gʼawˇ ve chaw hui hta‸ maˇ shawˍ maˇ caˆ te ve yoˬ. Nawˬ hui hta‸ fawˉ mehˍ leh suhˉ jehˬ tuˬ shaˉ nanˉ lo gʼawˬ kʼai ve chaw hui lehˬ, paw sha ve chaw hui maˇ heˆ laˇ. 7Nawˬ hui gʼa taˍ ve da‸ ve awˬ meh hta‸ maˇ shawˍ maˇ caˆ kʼoˆ chehˇ ve chaw hui lehˬ, paw sha ve chaw hui maˇ heˆ laˇ.

8Nawˬ awˬ to hta‸ ha‸ ve hkʼe, nawˬ awˬ paˇ awˬ kui chehˇ ve chaw hui hta‸ ha‸-o‸ teh‸, Li‸ hpu hkʼaw bvuh‸ taˍ ve yoˬ.#Okʼo 19:18 Hkunˉ hawˉ hkanˇ ve awˬliˇtawˇhkawˇ chi hta‸ nawˬ hui te biˇ ve kʼo, da‸ ve hta‸ nawˬ hui te peuˬ. 9Shu mehˆ hpfuhˇ hta‸ nawˬ hui nyi chehˇ ve kʼo, nawˬ hui venˇbaˆ te chehˇ leh, nawˬ hui te ponˬ te leuˉ ve chaw teˇ hpaˍ hpeh‸ ve yoˬ teh‸, awˬliˇtawˇhkawˇ hpeu‸ maˍ laˇ ve. 10Awˬ lawn kʼo, hkʼaˬ ve chaw teˇ gʼaˇ maˇ kʼoˆ, awˬliˇtawˇhkawˇ hkʼa peu-eˬ hta‸ te ve awˬ hkʼaw lo, awˬ liˇ teˇ maˬ hta‸ ceh te ya‸ ve ka‸, hkʼa peu-eˬ hta‸ ya‸ ve chaw hpeh‸ ve yoˬ. 11Haˉ chawˇ haˉ paˆ taˇ te teh‸ kʼoˆ shehˍ hpaˇ teˇ gʼaˇ lehˬ, Shu hta‸ taˇ tiˇ pehˍ ka‸ kʼoˆ ve yoˬ. #Taw 20:13-14, Bon 5:17-18 Hkʼe te leh, nawˬ haˉ chawˇ haˉ paˆ maˇ te htawˇ shu hta‸ tiˇ pehˍ ve kʼo, awˬliˇtawˇhkawˇ hta‸ nawˬ te ponˬ te leuˉ ve chaw hpeh‸ ve yoˬ. 12Ponˬ piˇ ve awˬliˇtawˇhkawˇ hta‸ cuˇ leh, nawˬ hui hta‸ suhˉ gʼa jehˬ tuˬ ve pa taw, nawˬ hui tawˇ yaw ve maˇ kʼoˆ, kanˉ te ve maˇ kʼoˆ, hkʼa deh‸ te-o. 13Awˬ lawn kʼo, shu hta‸ maˇ ha kʼaˉ puiˉ ve chaw teˇ gʼaˇ suhˉ jehˬ ve hta‸ gʼa hkanˍ htaˇ, Suhˉ jehˬ shehˍ hpaˇ yawˇ hta‸ maˇ ha kʼaˉ piˇ. Ha kʼaˉ puiˉ ve teˇ ceuˬ lehˬ, suhˉ jehˬ ve hta‸ gʼaˇ veyoˬ.

Yonˍ ve lehˬ kanˉ maˇ te ve kʼo, suh ve awˬ lawn

14Ngaˬ awˬ viˉ awˬ nyi teˇ hpaˍ-oˬ, chaw teˇ gʼaˇ gʼaˇ, Ngaˬ lehˬ yonˍ ve yoˬ teh‸ kʼoˆ htawˇ, kanˉ maˇ te ve kʼo, aˬ hto‸ ma awˬ bon cawˬ le. Yonˍ ve oˇ ve lehˬ, yawˇ hta‸ htaiˍ hkʼaw‸ piˇ hpeh‸-aw laˇ. 15Awˬ viˉ awˬ nyi teˇ gʼaˇ gʼaˇ veu‸ kʼaˇ maˇ cawˬ leh, teˇ nyi pon teˇ nyi caˇ tuˬ maˇ cawˬ ve kʼo, 16nawˬ hui awˬ hkʼaw lo chaw teˇ gʼaˇ gʼaˇ kʼoˆ ve, Dawˇ sha ve awˬ hkʼaw lo kʼo‸-e loˬ. Nawˬ awˬ to hta‸ lehˬ la piˆ, bvuhˆ la piˆ teh‸ kʼoˆ piˇ ve htawˇ, yawˇ hui awˬ to pon loˍ ve hta‸ nawˬ hui maˇ piˇ ve kʼo, aˬ hto‸ ma awˬ bon cawˬ le. 17Oˇ ve hkʼa shuˍ shuˍ, yonˍ ve teˇ ceuˬ lehˬ, kanˉ maˇ te ve kʼo, yonˍ ve oˇ ve suh taˍ ve yoˬ.

18Ya‸ hkʼaˇ, nawˬ hui teˇ gʼaˇ gʼaˇ kʼoˆ ve, Nawˬ lehˬ yonˍ ve yoˬ. Ngaˬ lehˬ kanˉ te ve yoˬ teh‸ kʼoˆ tuˬ yoˬ. Kanˉ maˇ te leh, nawˬ yonˍ ve maˍ laˇ-oˆ. Ngaˬ lehˬ, kanˉ te ve awˬ hkʼaw lo, ngaˬ yonˍ ve nawˬ hta‸ maˍ laˇ tuˬ yoˬ. 19Gʼuiˬsha teˇ gʼaˇ tiˉ cawˬ ve hta‸ nawˬ yonˍ ve leˇ. Nawˬ yonˍ ve lehˬ cawˇ ve yoˬ. Neˇ teˇ hpaˍ htawˇ yonˍ leh kawˆ cheˇ chehˇ ve yoˬ. 20Maˇ dawˇ nyi puiˉ ve chaw-oˬ, yonˍ leh kanˉ maˇ te ve teˇ ceuˬ lehˬ, te‸ chiˉ awˬ bon maˇ cawˬ ve hta‸ nawˬ hkʼa deh‸ shiˍ gaˇ laˇ. 21Ngaˬ hui ve awˬ pa Aˍbraˍhanˍ lehˬ, yawˇ ve yaˇ paˍ Iˉcaˆ hta‸ tanˇ kuiˬ hkʼoˆ tanˇ ve teˇ yanˇ, kanˉ te ve pa taw yawˇ hteˇ ve cawˇ ve chaw hpeh‸ la ve maˇ heˆ laˇ. 22Yawˇ te ve kanˉ geh hkʼa geh yonˍ ve ka‸ cawˬ leh, kanˉ hta‸ pa taw yawˇ yonˍ ve biˇ la ve hta‸ nawˬ gʼa mawˬ ve yoˬ. 23Aˍbraˍhanˍ Gʼuiˬsha hta‸ yonˍ ve pa taw, Gʼuiˬsha yawˇ hta‸ hteˇ ve cawˇ ve chaw teh‸ shawˍ taˍ ve yoˬ teh‸ kʼoˆ taˍ ve Li‸ hpu tawˇ hkawˇ chi teˇ hkawˇ biˇ la ve yoˬ.#Ahkp 15:6 Chi hkʼoˆ ka‸, Gʼuiˬsha ve awˬ chawˇ yoˬ teh‸ kʼoˆ ve yoˬ. 24Hkʼe te leh, chaw teˇ gʼaˇ yonˍ ve hta‸ pa taw ceh tiˉ hteˇ ve cawˇ ve chaw hpeh‸ la ve maˇ heˆ. Kanˉ ka‸ te ve hta‸ pa taw hteˇ ve cawˇ ve chaw hpeh‸ la ve hta‸ nawˬ gʼa mawˬ ve yoˬ.

25Chi hkʼa shuˍ shuˍ, Raˍhaˆ meh ve meh maˬ lanˉ teˇ gʼaˇ lehˬ, tcuh peu ve chaw hta‸ ha‸ yuˬ leh, awˬ kaˍ awˬ nu ya‸ kʼaw teˇ caˆ hta‸ kʼo‸-e tcuh ve pa taw, kanˉ te leh hteˇ ve cawˇ ve chaw hpeh‸ la ve maˇ heˆ laˇ.

26Awˬ lawn kʼo, awˬ to awˬ hkʼaw lo co ha maˇ cawˬ kʼo suh ve yoˬ. Chi hkʼa shuˍ shuˍ, yonˍ ve teˇ ceuˬ htawˇ kanˉ maˇ te ve kʼo, suh taˍ ve yoˬ.

Currently Selected:

Yaˍkoˆ li‸ 2: LHBE

Highlight

Copy