Yaˍkoˆ li‸ 4

Miˬguiˬ awˬ liˇ hta‸ awˬ chawˇ te ve awˬ lawn

1Nawˬ hui awˬ hkʼaw lo canˇ da‸ ve leh ya‸ da‸ jiˆ da‸ ve teˇ hpaˍ aˬ hto‸ ma pa taw tawˆ la ve le. Nawˬ hui awˬ suhˍ awˬ shaˍ nyi hkʼaˇ suh tuˬ te gaˇ ve teˇ hpaˍ lehˬ, nawˬ hui awˬ to awˬ hkʼaw lo bawˆ da‸ chehˇ ve hta‸ pa taw tawˆ la ve maˇ heˆ laˇ. 2Nawˬ hui heuˆ gaˇ jaˇ ve hkʼe maˇ gʼa ve pa taw, shu hta‸ tiˇ pehˍ ve yoˬ. Nawˬ hui shu mawˇ shu jeˬ hta‸ sheˉ lai ve hkʼe maˇ gʼa ve pa taw, shu hta‸ ya‸ da‸ jiˆ da‸ ve yoˬ. Nawˬ hui maˇ lawˬ ve pa taw nawˬ hui maˇ gʼa. 3Nawˬ hui lawˬ htawˇ maˇ gʼa. Awˬ lawn kʼo, nawˬ hui awˬ suhˍ awˬ shaˍ hpawˇ nyi hkʼaˇ suh tuˬ ceh te gaˇ ve pa taw, nawˬ hui lawˬ ya‸ ve yoˬ. 4Haˉ chawˇ haˉ paˆ te shehˍ ma hta‸ shuˍ ve chaw teˇ hpaˍ-oˬ, miˬguiˬ awˬ liˇ hta‸ awˬ chawˇ te ve chaw teˇ hpaˍ lehˬ, Gʼuiˬsha ve canˇ paˍ hpeh‸ ve hta‸ nawˬ hui maˇ shiˍ laˇ. Miˬguiˬ awˬ liˇ hta‸ awˬ chawˇ te gaˇ ve chaw hkʼaˬ ve teˇ gʼaˇ maˇ kʼoˆ, Gʼuiˬsha ve canˇ paˍ hpeh‸ ve yoˬ. 5Li‸ hpu awˬ hkʼaw lo bvuh‸ taˍ ve, Ngaˬ hui awˬ hkʼaw lo yawˇ keu laˇ ve co ha hta‸ yawˇ sheˉ lai jaˇ ve yoˬ teh‸ kʼoˆ ve tawˇ chi lehˬ, hkʼe leˇ bvuh‸ taˍ ve teh‸ dawˇ ve laˇ. 6Yawˇ lehˬ awˬ bon leuˉ leh piˇ ve yoˬ. Li‸ hpu hkʼaw bvuh‸ taˍ ve hkʼe, Gʼuiˬsha lehˬ nyi ma uiˍ ve mvuh ve chaw hui hta‸ tawˍ taˍ leh, nyi ma nuˇ nehˬ ve chaw hui hta‸ awˬ bon piˇ ve yoˬ teh‸ bvuh‸ taˍ ve yoˬ.#Tna 3:34

7Chi hta‸ pa taw, Gʼuiˬsha uˉ peunˍ ve awˬ hawˉ lo hkʼa deh‸ chehˇ-oˆ. Neˇhaiˬ hta‸ tawˍ taˍ-o‸. Nawˬ hui lo yawˇ hpaw tawˆ-e tuˬ yoˬ. 8Gʼuiˬsha geh jiˆ laˬ-o‸. Hkʼe te kʼo, yawˇ nawˬ hui geh jiˆ laˬ tuˬ yoˬ. Venˇbaˆ yaˇ hui-oˬ, nawˬ hui ve la‸ sheh hta‸ tsuhˇ hpu tsuhˇ kehˬ-o‸. Nyi ma nyiˇ hkʼaˇ dawˇ ve chaw hui-oˬ, nawˬ hui ve nyi ma hta‸ da‸ la kehˬ la piˇ-oˆ. 9Nyi ma hkʼaw tu‸ hkanˍ chehˇ-oˆ. Nyi ma hkʼaw dawˇ haˍ leh hkʼanˇ chehˇ-oˆ. Paˆ hawˬ kehˇ hawˬ chehˇ-oˆ. Nawˬ hui gʼuiˬ yawˬ ve lehˬ, nyi ma hkʼaw dawˇ haˍ leh hkʼanˇ ve hta‸ kʼaw‸ hpeh‸ la piˇ-oˆ. Nawˬ hui ve ha lehˬ tuˬ lehˬ, dawˇ haˍ tuˬ hta‸ kʼaw‸ pa piˇ-oˆ. 10Jawˇmawˇ Gʼuiˬsha mehˆ gʼuˇ suhˍ nyi ma nehˬ lehˍ taˍ-o‸. Yawˇ nawˬ hui hta‸ chiˇ taˆ laˇ tuˬ yoˬ.

Awˬ viˉ awˬ nyi hta‸ venˇbaˆ taˍ ve awˬ lawn

11Awˬ viˉ awˬ nyi teˇ hpaˍ-oˬ, teˇ gʼaˇ hta‸ teˇ gʼaˇ taˇ hkʼaiˉ da‸. Awˬ viˉ awˬ nyi hta‸ hkʼaiˉ ve maˇ kʼoˆ, venˇbaˆ taˍ ve maˇ kʼoˆ, yawˇ lehˬ awˬ liˇ tawˇ hkawˇ hta‸ hkʼaiˉ leh venˇbaˆ taˍ ve chaw hpeh‸ ve yoˬ. Awˬliˇtawˇhkawˇ hta‸ nawˬ venˇbaˆ taˍ ve kʼo, nawˬ lehˬ awˬ liˇ tawˇ hkawˇ hta‸ na yuˬ shehˍ hpaˇ maˇ heˆ. Awˬliˇtawˇhkawˇ hta‸ nawˬ venˇbaˆ taˍ shehˍ hpaˇ hpeh‸ ve yoˬ. 12Awˬliˇtawˇhkawˇ teh taˍ shehˍ hpaˇ leh suhˉ jehˬ shehˍ hpaˇ teˇ gʼaˇ tiˉ cawˬ ve yoˬ. Yawˇ lehˬ, ponˬ piˇ tuˬ ka‸, te luˬ tuˬ ka‸ kanˇ paˆ cawˬ ve yoˬ. Hkʼe te leh, nawˬ awˬ paˇ awˬ kui chehˇ ve chaw awˬ hkʼoˆ venˇ baˆ taˍ ve chaw-oˬ, nawˬ lehˬ hkʼaˬ hkʼe ve chaw le.

Awˬ gʼuˇ suhˍ hpawˇ awˬ pon nyi ma maˇ gʼa uiˍ ve awˬ lawn

13Nawˬ hui teˇ hpaˍ hpaˍ kʼoˆ ve, Ya‸ nyi shawˉ pawˍ ngaˬ hui venˇ teˇ venˇ venˇ lo teˇ hkʼaw‸ ca chehˇ tuˬ yoˬ. Oˇ kaˬ lo tanˇ kaˬ te leh, awˬ yawˬ gʼa tuˬ yoˬ teh‸ kʼoˆ ve yoˬ. Chi hkʼe kʼoˆ ve chaw hui-oˬ, hkʼa deh‸ dawˇ nyi sheˍ. 14Shawˉ pawˍ hkʼaˬ hkʼe hpeh‸ la tuˬ ve hta‸ nawˬ hui maˇ shiˍ. Nawˬ ve a sha‸ aˬ hto‸ ma hta‸ shuˍ da‸ le. Teˇ hkui tiˉ gʼa mawˬ taˉ leh, mehˉ kʼai ve iˉ kaˆ shaˉ hta‸ shuˍ da‸ ve yoˬ. 15Nawˬ hui kʼoˆ cawˇ ve lehˬ, Jawˇmawˇ Gʼuiˬ sha nyi ma cawˇ ve kʼo, ngaˬ hui a sha‸ te‸ leh, chi hkʼe oˇ hkʼe te tuˬ yoˬ teh‸ kʼoˆ cawˇ ve yoˬ. 16Ya‸ hkʼaˇ, chi beu‸ nawˬ hui nyi ma uiˍ leh caˆ muiˬ puiˉ ve yoˬ. Nyi ma uiˍ ve chi hkʼe ve hkʼa peu-eˬ lehˬ haiˬ ve yoˬ.

17Hkʼe te leh, da‸ ve hta‸ te tuˬ shiˍ taˍ htawˇ maˇ te ve chaw lehˬ, yawˇ awˬ pon venˇbaˆ hpeh‸ ve yoˬ.

Currently Selected:

Yaˍkoˆ li‸ 4: LHBE

Highlight

Copy