Heˍbrehˇ li‸ 9

1Awˉ lawˉ peuˇ ve ka ti‸ shaˉ caˆ lehˬ, oˉ kʼoˍ pui ve hta‸ caˉ da‸ ve awˬ liˇ awˬ hkʼaˇ teˇ hpaˍ leh, miˬguiˬ hta‸ caˉ da‸ ve da‸ kehˬ ve yehˬ teˇ yehˬ cawˬ ve yoˬ. 2Awˬ lawn kʼo, aˉ po kʼo bon yehˬ hta‸ te taˍ leh, awˉ lawˉ teˇ tawn awˬ hkʼaw lo kawˆ faiˇ taˍ kuiˬ, hpui lawˇ leh, tanˇ taˍ ve hkaoˍmonˇ cawˬ ve yoˬ. Chehˇ kuiˬ oˇ ve teˇ tawn hta‸ da‸ kehˬ ve chehˇ kuiˬ teh‸ kʼoˆ ve yoˬ. 3Hpaˬ kaˍ nyiˇ maˬ teˇ maˬ awˬ hkʼaw hpawˇ lo, da‸ kehˬ jaˇ ve chehˇ kuiˬ teh‸ kʼoˆ ve aˉ po kʼo bon yehˬ teˇ tawn cawˬ sheˍ ve yoˬ. 4Oˇ ve awˬ hkʼaw lo shi oˍ taˍ ve sha tuˉ tanˇ kuiˬ leh, shi hkʼa caw zuhˇ oˍ taˍ ve ka ti‸ shaˉ caˆ ta kʼoˍ cawˬ taˍ ve yoˬ. Ta kʼoˍ oˇ ve awˬ hkʼaw lo, maˍnaˆ shiˍ keu taˍ ve shi mu‸ hkʼu, awˬ tuˍ tuˍ ve Aˍronˍ ve juˇ fuiˍ leh, ka ti‸ shaˉ caˆ awˬ liˇ bvuh‸ taˍ ve haˉ pui baˉ teˇ hpaˍ cawˬ taˍ ve yoˬ. 5Ta kʼoˍ oˇ ve awˬ hkʼoˆ hta‸ awˬ me‸ awˬ hponˇ cawˬ ve hkeˍruˆbenˍ nyiˇ maˬ lehˬ, venˇbaˆ hpehˇ kuiˬ awˬ hoˆ hta‸ beh taˍ ve yoˬ. Awˬ lawn oˇ ve teˇ hpaˍ, teˇ ceuˬ le le hta‸ chi beu‸ kʼoˆ maˇ tanˇ sheˍ.

6Oˇ ve teˇ hpaˍ hta‸ chi hkʼe te peuˬ hkʼaw‸ nawˉ, paw hkuˇ teˇ hpaˍ lehˬ, a shu yawˇ ve kanˉ hta‸ te tuˬ, aˉ po kʼo bon yehˬ awˉ lawˉ peuˇ ve teˇ tawn awˬ hkʼaw lo hkʼaˬ htaˆ ka‸ lo‸-e chehˇ ve yoˬ. 7Ya‸ hkʼaˇ, nyiˇ tawn teˇ tawn awˬ hkʼaw lo paw hkuˇ lonˉ teˇ gʼaˇ ceh tiˉ lo‸-e hpeh‸ ve yoˬ. Yawˇ lo‸-e ve teˇ yanˇ, yawˇ awˬ to awˬ pon maˇ kʼoˆ, chaw yaˇ hui ve venˇbaˆ awˬ pon maˇ kʼoˆ, tanˇ piˇ tuˬ awˬ suhˍ yuˬ leh, teˇ hkʼaw‸ teˇ pawˆ ceh tiˉ gʼa lo‸-e ve yoˬ. 8Aˉ po kʼo bon yehˬ awˉ lawˉ peuˇ ve teˇ tawn cawˬ chehˇ sheˍ ve ceh ceh, da‸ kehˬ ve chehˇ kuiˬ awˬ hkʼaw lo lo‸-e tuˬ ve ya‸ kʼaw maˇ pawnˍ sheˍ teh‸, da‸ ve kehˬ ve Awˬ ha hpu hpeu‸ maˍ laˇ ve yoˬ. 9Awˬ lawn chi lehˬ, chi teˇ co-e awˬ pon tawˇ pa haˉ hpeh‸ ve yoˬ. Oˇ kaˬ lo la‸ shawnˍ leh tanˇ tuˬ teˇ hpaˍ tanˇ piˇ chehˇ ve htawˇ, la‸ shawnˍ leh tanˇ tuˬ oˇ ve teˇ hpaˍ lehˬ, oˉ kʼoˍ pui la ve chaw teˇ gʼaˇ ve shiˍ puiˉ ve nyi ma hta‸ biˇ la tuˬ te maˇ gʼa. 10Awˬ ceuˬ chi teˇ hpaˍ lehˬ, caˇ tuˬ dawˬ tuˬ maˇ kʼoˆ, tsuhˇ baˬ ve laiˉ ceuˬ maˇ kʼoˆ, awˬ to hta‸ caˉ da‸ ve awˬ liˇ awˬ hkʼaˇ teˇ hpaˍ ceh tiˉ hpeh‸ leh kʼaw‸ gu hteˇ ve awˬ yanˇ hkʼa gaˬ ceh tiˉ teh taˍ ve yoˬ.

11Pawˇ hkuˇ lonˉ te leh da‸ ve awˬ ceuˬ te laˇ tuˬ awˬ pon Hkri‸ gaˬ la htaˇ, leuˉ leh uiˍ jaˇ biˇ jaˇ ve aˉ po kʼo bon yehˬ teˇ yehˬ awˬ hkʼaw lo yawˇ hpanˍ kʼai leh, da‸ kehˬ ve chehˇ kuiˬ awˬ hkʼaw lo teˇ pawˆ ceh tiˉ lo‸-e ve yoˬ. Awˬ hkʼaw‸ nawˉ teˇ pawˆ ka‸ kʼaw‸ lo‸-e tuˬ maˇ loˍ. Aˉ po kʼo bon yehˬ oˇ ve lehˬ, la‸ sheh te taˍ ve maˇ heˆ, miˬguiˬ chi hta‸ caˉ da‸ ve ka‸ maˇ heˆ. 12Da‸ kehˬ ve chehˇ kuiˬ awˬ hkʼaw lo yawˇ lo‸-e ve teˇ yanˇ, aˉ che‸ leh nuˇ ehˉ awˬ suhˍ hta‸ yuˬ lo‸-e ve maˇ heˆ. Yawˇ ve awˬ suhˍ hta‸ yuˬ lo‸-e ve pa taw, ngaˬ hui co co taiˍ taiˍ htaiˍ hkʼaw‸ ve teˇ ceuˬ hta‸ gʼa tuˬ yawˇ te ve yoˬ. 13Awˬ lawn kʼo, aˉ che‸ leh nuˇ paˍ ve awˬ suhˍ ka‸, nuˇ ma haˉ hta‸ tuˉ tanˇ ve hkʼaw‸ laˉ ka‸, awˬ liˇ awˬ hkʼaˇ hpawˇ maˇ da‸ maˇ kehˬ ve chaw hui hta‸ hpeh‸ pfuhˍ piˇ ve teˇ yanˇ, awˬ suhˍ awˬ shaˍ hpawˇ da‸ piˇ kehˬ piˇ tuˬ te gʼa ve kʼo, 14Hkri‸ ve awˬ suhˍ lehˬ, nawˬ hui ve shiˍ puiˉ ve nyi ma awˬ hkʼaw lo suh taˍ ve kanˉ teˇ hpaˍ hta‸ tsuhˇ baˬ piˇ leh, te‸ chehˇ ve Gʼuiˬsha awˬ pon kanˉ te hpeh‸ tuˬ, chi a‸ kehˉ leuˉ leh hkʼaˬ ma te gʼa tuˬ le. Yawˇ lehˬ, co co taiˍ taiˍ te‸ chehˇ ve Awˬ ha hpu hta‸ cuˇ leh, awˬ kuiˉ awˬ haiˇ a ciˉ ka‸ maˇ cawˬ ve awˬ hkʼaw lo, yawˇ ve awˬ to Gʼuiˬ sha hta‸ tanˇ piˇ ve yoˬ.

15Chi hta‸ pa taw, awˉ lawˉ peuˇ ve ka ti‸ shaˉ caˆ awˬ hawˉ lo te ya‸ ve teˇ hpaˍ hta‸ ponˬ piˇ tuˬ awˬ pon, Yeˍsuˆ hkanˍ suh peuˬ ve yoˬ. Hkʼe te leh, kuˬ yuˬ taˍ ve chaw teˇ hpaˍ lehˬ, Gʼuiˬsha yawˇ hui hta‸ piˇ tuˬ yoˬ teh‸ kʼoˆ taˍ ve co co taiˍ taiˍ ve awˬ shinˉ hta‸ gʼa tuˬ, Yeˍsuˆ lehˬ, ka ti‸ shaˉ caˆ awˬ suhˉ awˬ pon awˬ kaˍ te shehˍ hpaˇ hpeh‸ ve yoˬ.

16Awˬ shinˉ piˇ tuˬ awˬ pon li‸ bvuh‸ teh taˍ ve teˇ ceuˬ cawˬ ve kʼo, awˬ shinˉ piˇ shehˍ hpaˇ awˬ tehˬ awˬ na suh peuˬ ve hta‸ awˉ lawˉ gʼa shiˍ ve yoˬ. 17Awˬ lawn kʼo, awˬ shinˉ piˇ tuˬ awˬ pon li‸ bvuh‸ taˍ ve hkʼe, awˬ shehˍ hpaˇ suh peuˬ htaˇ heh‸ awˬ shinˉ pehˬ piˇ hpeh‸ ve yoˬ. Awˬ shehˍ hpaˇ te‸ chehˇ ve ceh ceh, bvuh‸ taˍ ve hkʼe awˬ shinˉ pehˬ piˇ maˇ hpeh‸ sheˍ. 18Awˉ lawˉ peuˇ ve ka ti‸ shaˉ caˆ teˇ maˬ ka‸, awˬ suhˍ maˇ yehˇ leh tanˬ te laˬ ve maˇ heˆ. 19Awˬ lawn kʼo, awˬliˇtawˇhkawˇ awˬ hkʼaw lo piˇ taˍ ve tawˇ teˇ hkawˇ le le Moˉseˍ chaw chi ma ve hta‸ kʼoˆ piˇ peuˬ hkʼaw‸ nawˉ, nuˇ ehˉ awˬ suhˍ leh aˉ che‸ awˬ suhˍ hta‸ iˉ kaˆ hkaw‸ da‸ leh, nyiˉ-ehˍ ve yawˬ mvuh leh huˇsoˆ teh‸ kʼoˆ ve mvuh‸ teˇ tsuh‸ hta‸ yehˇ leh, li‸ hta‸ maˇ kʼoˆ, chaw hkʼa peu-eˬ hta‸ maˇ kʼoˆ, yawˇ hpeh‸ pfuhˍ piˇ ve yoˬ. 20Oˇ htaˇ yawˇ kʼoˆ ve, Awˬ suhˍ chi lehˬ, Gʼuiˬsha nawˬ hui hta‸ tawˇ piˇ taˍ ve ka ti‸ shaˉ caˆ ve awˬ suhˍ hpeh‸ ve yoˬ teh‸ kʼoˆ ve yoˬ.#Taw 24:8 21Aˉ po kʼo bon yehˬ leh oˇ kaˬ lo yehˇ ve awˬ hkʼeun hkʼa peu-eˬ hta‸ htawˇ, oˇ ve hkʼa shuˍ shuˍ yawˇ awˬ suhˍ yuˬ leh hpeh‸ pfuhˍ piˇ ve yoˬ. 22Awˬliˇtawˇhkawˇ piˇ taˍ ve hkʼa shuˍ shuˍ, aˬ laˬ hkʼe awˬ ceuˬ hkʼa peu-eˬ hta‸ awˬ suhˍ yuˬ leh tsuhˇ baˬ ve yoˬ. Awˬ suhˍ sheˆ ve teˇ ceuˬ maˇ cawˬ kʼo, venˇbaˆ hpehˇ ve teˇ ceuˬ ka‸ maˇ cawˬ.

Yeˍsuˆ yawˇ awˬ to tanˇ piˇ ve awˬ hkʼaw lo venˇbaˆ hta‸ yuˬ baˬ ve

23Hkʼe te leh, mvuhˇ naw ma hkʼoˆ ve awˬ ceuˬ teˇ hpaˍ ve awˬ ho‸ awˬ han hta‸ tsuhˇ baˬ tuˬ, chi hkʼe ve teˇ hpaˍ hta‸ gʼa te ve yoˬ. Ya‸ hkʼaˇ, mvuhˇ naw ma hkʼoˆ awˬ tehˬ awˬ na ve awˬ ceuˬ teˇ hpaˍ hta‸ tsuhˇ baˬ tuˬ, leuˉ leh da‸ ve tanˇ tuˬ teˇ hpaˍ hta‸ gʼa yehˇ ve yoˬ. 24Awˬ lawn kʼo, Hkri‸ lehˬ chaw yaˇ la‸ sheh te taˍ ve da‸ kehˬ ve chehˇ kuiˬ awˬ hkʼaw lo lo‸-e ve maˇ heˆ. Oˇ ve lehˬ, awˬ tehˬ awˬ na ve chehˇ kuiˬ teˇ maˬ ve awˬ ho‸ awˬ han ceh hpeh‸ ve yoˬ. Ya‸ hkʼaˇ, ngaˬ hui awˬ pon Gʼuiˬsha mehˆ gʼuˇ suhˍ yawˇ chehˇ taˍ tuˬ, mvuhˇ naw ma hkʼoˆ lo yawˇ lo‸-e taˍ peuˬ ve yoˬ. 25Paw hkuˇ lonˉ lehˬ, a shu yawˇ ve awˬ suhˍ maˇ heˆ ve hta‸ yuˬ leh, da‸ kehˬ ve chehˇ kuiˬ awˬ hkʼaw lo teˇ hkʼaw‸ le le lo‸-e ve yoˬ. Ya‸ hkʼaˇ, Hkri‸ lehˬ oˇ ve hkʼa shuˍ shuˍ yawˇ awˬ to laiˉ pawˆ gʼa tanˇ piˇ ve maˇ heˆ. 26Oˇ hkʼe gʼa tanˇ piˇ ve kʼo, miˬguiˬ te hpanˍ htaˇ ka‸ tanˬ leh, yawˇ laiˉ pawˆ gʼa hkanˍ suh tuˬ yoˬ. Ya‸ hkʼaˇ, yawˇ awˬ to tanˇ piˇ ve awˬ hkʼaw lo venˇbaˆ hta‸ yuˬ baˬ tuˬ, awˬ leh meuˇ ve awˬ yanˇ chi awˬ hkʼaw lo yawˇ teˇ pawˆ ceh tiˉ tawˆ la ve yoˬ. 27Chaw yaˇ hui lehˬ, teˇ pawˆ ceh tiˉ suh leh, awˬ hkʼaw‸ nawˉ suhˉ jehˬ ve hta‸ gʼa hkanˍ ve yoˬ. 28Chi hkʼa shuˍ shuˍ Hkri‸ lehˬ, chaw maˇ maˇ ve venˇbaˆ hta‸ hkanˍ pfuhˇ tuˬ, teˇ pawˆ ceh tiˉ yawˇ awˬ to tanˇ piˇ ve hta‸ gʼa hkanˍ ve yoˬ. Yawˇ nyiˇ pawˆ teˇ pawˆ kʼaw‸ ya‸ la htaˇ, venˇbaˆ hta‸ maˇ caˉ da‸ ve awˬ hkʼaw lo ya‸ la leh, yawˇ hta‸ dawˇ law chehˇ ve chaw teˇ hpaˍ hta‸ yawˇ htaiˍ hkʼaw‸ piˇ tuˬ yoˬ.

Currently Selected:

Heˍbrehˇ li‸ 9: LHBE

Highlight

Copy

Compare