Heˍbrehˇ li‸ 8

Ka ti‸ shaˉ caˆ awˬ suhˉ awˬ pon awˬ kaˍ te shehˍ hpaˇ

1Ngaˬ kʼoˆ gaˇ ve awˬ lawn uiˍ ve lehˬ chi hkʼe yoˬ. Chi hkʼe ve paw hkuˇ lonˉ teˇ gʼaˇ ngaˬ hui cawˬ ve yoˬ. Yawˇ lehˬ, mvuhˇ naw ma lo chehˇ ve Kanˇ paˆ uiˍ shehˍ hpaˇ ve kʼaw jaw la‸ sha paˇ lo mui taˍ leh, 2awˬ tehˬ awˬ na ve aˉ po kʼo bon yehˬ awˬ hkʼaw, da‸ kehˬ ve chehˇ kuiˬ lo, kanˉ te shehˍ hpaˇ hpeh‸ ve yoˬ. Awˬ tehˬ awˬ na ve aˉ po kʼo bon yehˬ oˇ ve lehˬ, chaw yaˇ te ve maˇ heˆ, Jawˇmawˇ Gʼuiˬsha te taˍ ve yoˬ.

3Awˬ lawn kʼo, paw hkuˇ lonˉ teˇ gʼaˇ le le lehˬ, la‸ shawnˍ leh tanˇ tuˬ teˇ hpaˍ tanˇ piˇ tuˬ awˬ pon, yawˇ hui hta‸ leuˆ teh taˍ ve yoˬ. Hkʼe te leh, paw hkuˇ lonˉ chi teˇ gʼaˇ htawˇ, tanˇ tuˬ teˇ ceuˬ ceuˬ yawˇ gʼa cawˬ taˍ ve yoˬ. 4Yawˇ lehˬ miˬguiˬ hkʼoˆ lo chehˇ taˍ ve hkʼe kʼo, yawˇ paw hkuˇ hpeh‸ tuˬ ve maˇ heˆ Awˬ lawn kʼo, awˬliˇtawˇhkawˇ awˬ hkʼaˇ suh te leh, la‸ shawnˍ teˇ hpaˍ tanˇ piˇ shehˍ hpaˇ hui cawˬ taˍ ve yoˬ. 5Yawˇ hui lehˬ, mvuhˇ naw ma hkʼoˆ bon yehˬ ve awˬ ho‸ awˬ han leh aˉ gʼuiˬ ha ceh hpeh‸ ve bon yehˬ teˇ maˬ awˬ hkʼaw lo kanˉ te chehˇ ve yoˬ. Awˬ lawn kʼo, Moˉseˍ lehˬ aˉ po kʼo bon yehˬ hta‸ te-a teh‸ te ve teˇ yanˇ, Gʼuiˬsha yawˇ hta‸ chi hkʼe maˍ piˇ ve, Hkʼaw pui hkʼoˆ lo nawˬ hta‸ maw laˇ peuˬ ve awˬ hkʼaˇ hkʼa shuˍ shuˍ hkʼa peu-eˬ ve hta‸ nawˬ te tuˬ shaˍ ti‸ taˍ-o‸ teh‸, yawˇ hta‸ kʼoˆ piˇ ve yoˬ.#Taw 25:40 6Chi beu‸ Yeˍsuˆ lehˬ, da‸ leuˉ ve ka ti‸ shaˉ caˆ awˬ pon awˬ kaˍ te shehˍ hpaˇ hpeh‸ ve hkʼe, yawˇ gʼa taˍ ve kanˉ htawˇ da‸ leuˉ ve yoˬ. Aˬ hto‸ ma pa taw ka ti‸ shaˉ caˆ oˇ ve da‸ leuˉ ve le teh‸ kʼoˆ kʼo, da‸ leuˉ ve ka ti‸ teˇ hpaˍ awˬ hkʼoˆ teh taˍ ve hta‸ pa taw yoˬ.

7Awˬ lawn kʼo, awˉ lawˉ peuˇ ve ka ti‸ shaˉ caˆ teˇ maˬ biˇ ve hkʼe kʼo, ka ti‸ shaˉ caˆ nyiˇ pawˆ teˇ pawˆ kʼaw‸ piˇ tuˬ maˇ loˍ. 8Ya‸ hkʼaˇ, Jawˇmawˇ Gʼuiˬsha yawˇ hta‸ venˇbaˆ taˍ leh kʼoˆ ve,

Nyi loˬ, Iˉsaˍreˍlaˆ teˇ yehˬ leh Yuˇda‸ teˇ yehˬ hta‸

ka ti‸ shaˉ caˆ awˬ suhˉ ngaˬ teh taˍ piˇ tuˬ ve awˬ nyi gaˬ la tuˬ yoˬ.

9Ka ti‸ shaˉ caˆ awˬ suhˉ oˇ ve lehˬ, yawˇ hui ve awˬ puˍ awˬ pi teˇ hpaˍ hta‸ ngaˬ la‸ sheh gʼawˬ leh

Eˇjiˇtu‸ mvuhˇmiˬ awˬ hkʼaw lo sheh tawˆ la ve teˇ nyi htaˇ, ngaˬ yawˇ hui hta‸ te piˇ taˍ ve ka ti‸ shaˉ caˆ hkʼe maˇ heˆ.

Awˬ lawn kʼo, ngaˬ ve ka ti‸ shaˉ caˆ awˬ hkʼaˇ suh yawˇ hui maˇ kʼaw‸ te.

Hkʼe te leh, ngaˬ htawˇ yawˇ hui hta‸ teh taˉ ve yoˬ teh‸, Jawˇmawˇ Gʼuiˬsha kʼoˆ ve yoˬ.

10Awˬ yanˇ oˇ ve awˬ hkʼaw lo, Iˉsaˍreˍlaˆ teˇ yehˬ hta‸

ngaˬ te piˇ tuˬ ve ka ti‸ shaˉ caˆ lehˬ chi hkʼe yoˬ.

Ngaˬ ve awˬliˇtawˇhkawˇ teˇ hpaˍ

yawˇ hui ve nyi ma dawˇ hkʼaˇ awˬ hkʼaw lo keu piˇ leh,

yawˇ hui ve nyi ma awˬ hkʼoˆ hta‸ bvuh‸ piˇ tuˬ yoˬ.

Ngaˬ yawˇ hui ve Gʼuiˬsha hpeh‸ leh,

yawˇ hui htawˇ ngaˬ ve chaw hpeh‸ tuˬ yoˬ.

11Yawˇ hui lehˬ, Jawˇmawˇ Gʼuiˬsha hta‸ shiˍ-o‸ teh‸,

mvuhˇmiˬ yaˇ chawˇ chawˇ maˇ kʼoˆ, awˬ viˉ awˬ nyi maˇ kʼoˆ,

teˇ gʼaˇ hta‸ teˇ gʼaˇ maˍ piˇ da‸ tuˬ maˇ loˍ.

Awˬ lawn kʼo, yawˇ hui awˬ hkʼaw lo i jaˇ ve teˇ gʼaˇ te leh

uiˍ jaˇ ve teˇ gʼaˇ hkʼa gaˬ, yawˇ hui hkʼa peu-eˬ ngaˬ hta‸ shiˍ tuˬ yoˬ.

12Ngaˬ yawˇ hui ve ya‸ kuiˬ jiˆ kuiˬ

teˇ hpaˍ hta‸ ha kʼaˉ piˇ tuˬ yoˬ.

Yawˇ hui ve venˇbaˆ teˇ hpaˍ hta‸

ngaˬ kʼaw‸ dawˇ nawˇ tuˬ ve maˇ heˆ, teh‸ Jawˇmawˇ Gʼuiˬsha kʼoˆ ve yoˬ.#Yrm 31:31-34

13Ka ti‸ shaˉ caˆ awˬ suhˉ teh‸ yawˇ kʼoˆ ve teˇ yanˇ, awˉ lawˉ piˇ taˍ ve ka ti‸ shaˉ caˆ hta‸ awˬ piˍ hpeh‸ la piˇ lawˬ ve yoˬ. Maw jaˇ leh piˍ kʼai peuˬ ve awˬ ceuˬ lehˬ, mehˉ kʼai paˇ neˇ ve yoˬ.

Currently Selected:

Heˍbrehˇ li‸ 8: LHBE

Highlight

Copy

Compare