Yeˍsaˍkeˍlaˆ li‸ 34
34
Iˉsaˍreˍlaˆ ve yawˬ hawˉ paˍ
1Gʼuiˬsha ngaˬ hta‸ chi hkʼe kʼoˆ laˇ ve yoˬ. 2Chaw yaˇ-oˬ, Iˉsaˍreˍlaˆ chaw hui ve awˬ hoˉ awˬ naˬ teˇ hpaˍ hta‸ hkeu piˇ-oˆ. Ngaˬ Gʼuiˬsha kʼoˆ laˇ chehˇ ve tawˇ chi teˇ hpaˍ yawˇ hui hta‸ kʼoˆ maˍ piˇ-oˆ. Iˉsaˍreˍlaˆ ve yawˬ hawˉ shehˍ hpaˇ teˇ hpaˍ-oˬ, nawˬ hui gʼa dawˇ haˍ jaˇ tuˬ yoˬ. Nawˬ hui lehˬ a shu yawˇ awˬ to hta‸ ha‸ shaˉ piˇ chehˇ ve htawˇ, yawˬ teˇ hpaˍ hta‸ maˇ ha‸ shaˉ piˇ. 3Nawˬ hui lehˬ cuˉ gʼuiˬ hta‸ dawˬ, yawˬ mvuh te taˍ ve veu‸ kʼaˇ hta‸ veu‸ deh leh, chu jaˇ ve yawˬ teˇ hpaˍ hta‸ tiˇ caˇ chehˇ ve yoˬ. Ya‸ hkʼaˇ, nawˬ hui yawˬ teˇ hpaˍ hta‸ maˇ ha‸ shaˉ piˇ. 4Gʼaˇ nuˇ ve yawˬ teˇ hpaˍ hta‸ nawˬ hui maˇ ha‸ shaˉ piˇ. Naˬ chehˇ ve yawˬ teˇ hpaˍ hta‸ naˆ tsuhˇ maˇ gu piˇ. Hkʼaw kuiˬ naˬ kuiˬ cawˬ ve teˇ hpaˍ hta‸ nawˬ hui maˇ peh piˇ. Mehˉ kʼai chehˇ ve teˇ hpaˍ hta‸ nawˬ hui maˇ gʼa‸ ca. Nawˬ hui yawˬ oˇ ve teˇ hpaˍ hta‸ hehnˇ chaweh te piˇ chehˇ ve yoˬ. 5Yawˬ teˇ hpaˍ lehˬ, yawˬ hawˉ shehˍ hpaˇ maˇ cawˬ ve pa taw, hpaˆ da‸ guiˇ da‸ kʼai leh, haiˬ ve to nuˇ to shaˆ che‸ caˇ ve hta‸ gʼa hkanˍ chehˇ ve yoˬ. 6Chi hta‸ pa taw, ngaˬ ve yawˬ teˇ hpaˍ hkʼaw hkʼoˆ lo caw toˇ chehˇ ve yoˬ. Yawˇ hui lehˬ miˬguiˬ hkʼa ti chi ti lo hpaˆ da‸ kʼai leh, chaw teˇ gʼaˇ ka‸ yawˇ hui hta‸ maˇ gʼa‸ ca piˇ.
7Naw hui yawˬ hawˉ shehˍ hpaˇ teˇ hpaˍ-oˬ, chi beu‸ ngaˬ Gʼuiˬsha nawˬ hui hta‸ kʼoˆ laˇ chehˇ ve tawˇ hta‸ na sheˍ. 8Ngaˬ lehˬ awˬ tehˬ awˬ na te‸ chehˇ ve Gʼuiˬsha hpeh‸ ve hkʼe, nawˬ hui lehˬ ngaˬ ve tawˇ hta‸ na yuˬ cawˇ ve yoˬ. Yawˬ hawˉ paˍ maˇ cawˬ ve pa taw, haiˬ ve to nuˇ to shaˆ teˇ hpaˍ lehˬ ngaˬ ve yawˬ teˇ hpaˍ hta‸ che‸ caˇ chehˇ ve yoˬ. Ngaˬ ve yawˬ hawˉ shehˍ hpaˇ teˇ hpaˍ lehˬ, yawˬ hta‸ maˇ gʼa‸ ca. Yawˇ hui lehˬ a shu yawˇ awˬ to hta‸ ceh tiˉ ha‸ shaˉ chehˇ leh, yawˬ teˇ hpaˍ hta‸ maˇ ha‸ shaˉ piˇ. 9Chi hta‸ pa taw, nawˬ hui yawˬ hawˉ shehˍ hpaˇ teˇ hpaˍ-oˬ, ngaˬ ve tawˇ hta‸ na sheˍ. 10Ngaˬ Gʼuiˬsha chi hkʼe kʼoˆ ve yoˬ. Ngaˬlehˬ nawˬ hui ve canˇ paˍ hpeh‸ ve yoˬ. Ngaˬ ve yawˬ teˇ hpaˍ hta‸ ngaˬ nawˬ hui ve la‸ sheh hkʼaw lo yuˬ tawˆ leh, nawˬ hui hta‸ yawˇ hui ve yawˬ hawˉ shehˍ hpaˇ kʼaw‸ te tcuh laˇ tuˬ ve maˇ heˆ. Nawˬ hui a shu yawˇ awˬ to hta‸ ka‸ ngaˬ kʼaw‸ ha‸ shaˉ tcuh laˇ tuˬ ve maˇ heˆ. Ngaˬ ve yawˬ teˇ hpaˍ hta‸ nawˬ hui geh kʼaw‸ yuˬ tawˆ leh, yawˇ hui hta‸ tiˇ caˇ tcuh laˇ tuˬ ve maˇ heˆ.
Da‸ ve yawˬ hawˉ shehˍ hpaˇ
11Ngaˬ Gʼuiˬsha nawˬ hui hta‸ chi hkʼe kʼoˆ laˇ ve yoˬ. Ngaˬ awˬ to ngaˬ ve yawˬ teˇ hpaˍ hta‸ kʼaw‸ nyi kʼaw‸ ha‸ shaˉ piˇ tuˬ yoˬ. 12Yawˬ hawˉ paˍ teˇ gʼaˇ lehˬ hpaˆ da‸ kʼai taˍ ve yawˬ teˇ hpaˍ hta‸ teˇ geh gʼa‸ hpoˆ piˇ ve hkʼe, ngaˬ lehˬ yawˬ teˇ hpa hta‸ oˇ hkʼe te piˇ tuˬ yoˬ. Naˆ ho‸ leh kawˆ tuˬ uiˍ ve awˬ nyi teˇ nyi htaˇ, hpaˆ da‸ kʼai taˍ ve yawˬ teˇ hpaˍ hta‸ ngaˬ kʼaw‸ shiˍ hkʼaw‸ veu laˇ piˇ tuˬ yoˬ. 13Shu mvuhˇmiˬ hkʼaw chehˇ taˍ ve teˇ hpaˍ hta‸ htawˇ, ngaˬ shaw hpoˆ leh yawˇ hui ve mvuhˇmiˬ lo kʼaw‸ shiˍ hkʼaw‸ veu laˇ piˇ tuˬ yoˬ. Iˉsaˍreˍlaˆ ve hkʼaw leh iˉ kaˆ lawˬ kʼaˉ teˇ hpaˍ awˬ paˇ lo ngaˬ yawˇ hui hta‸ kʼaw‸ shiˍ hkʼaw‸ veu laˇ piˇ leh, da‸ ve kʼaˆ caˇ kuiˬ lo kʼaˆ caˇ piˇ lawˬ tuˬ yoˬ. 14Iˉsaˍreˍlaˆ mvuhˇmiˬ hkʼaw cawˬ ve da‸ ve kʼaˆ caˇ kuiˬ teˇ hpaˍ hkʼaw ngaˬ yawˇ hui hta‸ gawˬ lehˍ chehˇ piˇ lawˬtuˬ yoˬ. 15Ngaˬ lehˬ ngaˬ ve yawˬ teˇ hpaˍ ve yawˬ hawˉ paˍ hpeh‸ leh, yawˇ hui awˬ pon gʼaˇ jehˇ kuiˬ ca piˇ tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ ve yoˬ.
16Mehˉ kʼai taˍ ve yawˬ teˇ hpaˍ hta‸ ngaˬ gʼa‸ ca leh, hpaw toˇ chehˇ ve yawˬ teˇ hpaˍ hta‸ htawˇ ngaˬ shiˍ hkʼaw‸ veu laˇ piˇ tuˬ yoˬ. Hkʼaw kuiˬ naˬ kuiˬ cawˬ ve teˇ hpaˍ hta‸ ngaˬ peh piˇ leh, naˬchehˇ ve teˇ hpaˍ hta‸ngaˬ gu na-e piˇ tuˬ yoˬ. Ya‸ hkʼaˇ, chu leh awˬ gʼaˇ uiˍ ve teˇ hpaˍ hta‸ ngaˬ te luˬ piˇ tuˬ yoˬ. Awˬ lawn kʼo, ngaˬ lehˬ da‸ ve kanˉ hta‸ tiˉ te ve yawˬ hawˉ paˍ hpeh‸ ve pa taw yoˬ.
17Chi hta‸ pa taw, ngaˬ ve yawˬ teˇ hpaˍ-oˬ, ngaˬ Gʼuiˬsha nawˬ hui hta‸ chi hkʼe kʼoˆ laˇ ve yoˬ. Ngaˬ nawˬ hui hta‸ suhˉ jehˬ leh, da‸ ve leh maˇ da‸ ve leh yawˬ leh aˉ che‸ hta‸ pehˬ da‸ tuˬ yoˬ. 18Nawˬ hui teˇ hpaˍ hpaˍ lehˬ da‸ jaˇ ve mvuh‸ hta‸ gʼa caˇ ve ceh tiˉnyi hkʼaˇ maˇ suh puiˉ. Nawˬ hui maˇ caˇ ve awˬ ceuˬ hta‸ nawˬ hui naˆ nehˆ piˇ ve yoˬ. Nawˬ hui lehˬ kehˬ da‸ jaˇ ve iˉ kaˆ hta‸ dawˬ leh, nawˬ hui maˇ dawˬ gaˇ ve iˉ kaˆ hta‸ te tiˬ taˉ ve yoˬ. 19Awˬ nu ve ngaˬ ve yawˬ teˇ hpaˍ lehˬ, nawˬ hui naˆ nehˆ taˉ ve mvuh‸ hta‸ gʼa caˇ leh, nawˬ hui te tiˬ taˉ ve iˉ kaˆ hta‸ gʼa dawˬ ve yoˬ.
20Chi hta‸ pa taw, ngaˬ Gʼuiˬsha nawˬ hui hta‸ chi hkʼe kʼoˆ laˇ ve yoˬ. Chi beu‸ ngaˬ lehˬ awˬ gʼaˇ uiˍ ve yawˬ leh awˬ gʼaˇ nuˇ ve yawˬ hta‸ pehˬ da‸ tuˬ yoˬ. 21Nawˬ hui lehˬ naˬ chehˇ ve yawˬ hta‸ guˆ baˬ ca‸ baˬ piˇ chehˇ ve yoˬ. 22Ya‸ hkʼaˇ, ngaˬ lehˬ ngaˬ ve yawˬ teˇ hpaˍ hta‸ htaiˍ hkʼaw‸ piˇ leh, yawˇ hui hta‸ hkʼa mvuhˇ hkʼa na te tcuh piˇ lawˬ tuˬ ve maˇ heˆ. Ngaˬ lehˬ yawˬ teˇ hkeh le le ve hta‸ suhˉ jehˬ piˇ leh, da‸ ve leh maˇ da‸ ve hta‸ pehˬ da‸ piˇ tuˬ yoˬ. 23Ngaˬ lehˬ yawˇ hui hta‸ ngaˬ ve awˬ ceˬ paˍ Daˍviˆ hkʼe ve jawˇmawˇ teˇ gʼaˇ ca piˇ leh, yawˇ hui ve yawˬ hawˉ shehˍ hpaˇ te tcuh tuˬ yoˬ. Yawˇ lehˬ yawˇ hui hta‸ ha‸ shaˉ piˇ tuˬ yoˬ. 24Ngaˬ lehˬ yawˇ hui ve Gʼuiˬsha hpeh‸ leh, ngaˬ ve awˬ ceˬ paˍ Daˍviˆ hkʼe ve jawˇmawˇ teˇ gʼaˇ lehˬ yawˇ hui hta‸ uˉ peunˍ shehˍ hpaˇ hpeh‸ la tuˬ yoˬ. Ngaˬ chi hkʼe kʼoˆ taˍ peuˬ ve yoˬ. 25Ngaˬ yawˇ hui hta‸ ka ti‸ te piˇ leh, yawˇ hui gawˬ lehˍ gʼa chehˇ tuˬ yoˬ. Ngaˬ ve yawˬ teˇ hpaˍ ti mi hkʼaw gawˬ lehˍ gʼa chehˇ leh, heh puiˉ hkʼaw lo zuh‸ chehˇ hpeh‸ tuˬ, ngaˬ lehˬ mvuhˇmiˬ hkʼaw chehˇ taˍ ve kawˆ tuˬ uiˍ ve to nuˇ to shaˆ teˇ hpaˍ hta‸ gʼa‸ kʼoˬ piˇ tuˬ yoˬ.
26Ngaˬ yawˇ hui hta‸ awˬ bon na‸ piˇ leh, yawˇ hui hta‸ ngaˬ ve da‸ kehˬ ve hkʼaw pui paˇ lo chehˇ tcuh piˇ tuˬ yoˬ. Oˇ kaˬ lo yawˇ hui loˍ la ve teˇ yanˇ ngaˬ bon na‸ piˇ leh mvuhˇ yeˬ ya‸ la piˇ tuˬ yoˬ. 27Iˉ shiˍ cehˬ teˇ hpaˍ iˉ shiˍ naw‸ la leh, ti mi hkʼaw awˬ shiˍ awˬ nu cawˬ la tuˬ yoˬ. Chaw teˇ gʼaˇ le le a shu yawˇ mvuhˇmiˬ hkʼaw gawˬ lehˍ gʼa chehˇ tuˬ yoˬ. Ngaˬ ve chaw teˇ hpaˍ hta‸ hpeh taˍ ve sho caˆ hta‸ ngaˬ hpui hkʼa piˇ leh, yawˇ hui hta‸ shu ceˬ te chehˇ kuiˬ lo ponˬ piˇ ve teˇ yanˇ, ngaˬ Gʼuiˬsha hpeh‸ ve hta‸ yawˇ hui shiˍ la tuˬ yoˬ. 28Buiˇshaˆaˉnaˆ chaw teˇ hpaˍ yawˇ hui ve mawˇ jeˬ hta‸ kʼaw‸ hiˉ yuˬ tuˬ ve maˇ heˆ. Haiˬ ve to nuˇ to shaˆ teˇ hpaˍ htawˇ yawˇ hui hta‸ kʼaw‸ che‸ caˇ tuˬ ve maˇ heˆ. Yawˇ hui gawˬ lehˍ gʼa chehˇ leh, chaw teˇ gʼaˇ ka‸ yawˇ hui hta‸ ca ho piˇ tuˬ ve maˇ heˆ. 29Ngaˬ yawˇ hui hta‸ hkuiˇ jaˇ da‸ jaˇ ve ti mi teˇ hpaˍ piˇ leh, mvuhˇmiˬ hkʼaw meu‸ ve kaˆ ve teˇ ceuˬ hta‸ awˬ leh meuˇ gaˬ la piˇ tuˬ yoˬ. Awˬ nu ve chaw ceuˬ teˇ hpaˍ yawˇ hui hta‸ hkʼa mvuhˇ hkʼa na kʼaw‸ kʼoˆ guiˇ tuˬ ve maˇ heˆ. 30Ngaˬ Iˉsaˍreˍlaˆ chaw hta‸ ha‸ shaˉ piˇ chehˇ leh, yawˇ hui lehˬ ngaˬ ve chaw hpeh‸ ve hta‸ chaw teˇ gʼaˇ le le shiˍ la tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ ve yoˬ.
31Ngaˬ caˍ piˇ taw piˇ taˍ ve ngaˬ ve yawˬ teˇ hpaˍ-oˬ, nawˬ hui lehˬ ngaˬ ve chaw hpeh‸ leh, ngaˬ lehˬ nawˬ hui ve Gʼuiˬsha hpeh‸ ve yoˬ, teh‸ Gʼuiˬsha kʼoˆ ve yoˬ.
Currently Selected:
Yeˍsaˍkeˍlaˆ li‸ 34: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
