Tawˆ kʼai ve li‸ 23
23
Hteˇ ve cawˇ ve awˬ lawn
1Maˇ hteˇ maˇ cawˇ ve tawˇ hta‸ nawˬ maˇ gʼa ca kʼoˆ toˇ. Venˇbaˆ cawˬ ve chaw hui hpawˇ chehˇ leh, maˇ heˆ heˆ ve shaˉ hkiˆ nawˬ maˇ gʼa hkanˍ. 2Chaw maˇ ve hpawˇ chehˇ leh haiˬ ve kanˉ hta‸ nawˬ maˇ gʼa te. Maˇ hteˇ maˇ cawˇ ve shaˉ hkiˆ maˇ gʼa hkanˍ. 3Nawˬ suhˉ jehˬ piˇ ve teˇ yanˇ, haˍ gʼawˇ ve chaw hui ve mehˆ hpfuhˇ hta‸ htawˇ maˇ gʼa nyi.
4Nawˬ ve canˇ paˍ ve nuˇ maˇ kʼoˆ, piˉ laˬ maˇ kʼoˆ, mehˉ kʼai taˍ ve hta‸ nawˬ gʼa mawˬ ve kʼo, yawˇ geh gʼa sheh hkʼaw‸ veu laˇ piˇ ve yoˬ. 5Yawˇ ve piˉ laˬ teˇ hkeh mawˇ taˆ maˇ gʼaˇ leh paiˍ taˍ ve hta‸ nawˬ gʼa mawˬ ve kʼo, piˉ laˬ oˇ ve hta‸ nawˬ gʼa chiˇ tu piˇ ve yoˬ. Nawˬ maˇ gʼa jaw kʼai.
6Haˍ ve gʼawˇ ve chaw hta‸ suhˉ jehˬ piˇ ve teˇ yanˇ, maˇ hteˇ maˇ cawˇ ve hta‸ nawˬ maˇ gʼa te. 7Maˇ hteˇ maˇ cawˇ ve hkʼaw shu hta‸ nawˬ venˇbaˆ maˇ gʼa taˍ. Te‸ chiˉ venˇbaˆ maˇ cawˬ ve chaw hta‸ maˇ gʼa tiˇ pehˍ. Awˬ lawn kʼo, oˇ hkʼe te ve chaw hta‸ ngaˬ ciˍ yanˍ piˇ tuˬ yoˬ. 8Shu hkʼawˇ piˇ laˇ ve la‸ shawnˍ hta‸ nawˬ maˇ gʼa ha‸ yuˬ. Awˬ lawn kʼo, la‸ shawnˍ oˇ hkʼe ve lehˬ chaw yaˇ hta‸ mehˆ cuˉ piˇ lawˬ leh, hteˇ ve cawˇ ve awˬ ceuˬ hta‸ ya‸ kʼai tuˬ te ve yoˬ.
9Shu mvuhˇmiˬ lo laˬ ve hkehˉ chaw hta‸ nawˬ hkʼa mvuhˇ hkʼa na maˇ gʼa te. Awˬ lawn kʼo, nawˬ htawˇ Eˇjiˇtu‸ mvuhˇmiˬ hkʼaw hkehˉ chaw hpeh‸ jaw leh, hkehˉ chaw gʼa hpeh‸ ve teˇ ceuˬ hkʼaˬ ma hkanˍ haˍ ve hta‸ nawˬ shiˍ taˍ ve yoˬ.
Suhˍ hkʼaw‸ leh suhˍ nyi ve awˬ lawn
10Hkaw‸ hkʼaw‸ hkʼa gaˬ nawˬ ve ti mi hta‸ te caˇ hpeh‸ ve yoˬ. 11Ya‸ hkʼaˇ, suhˍ hkʼaw‸ teˇ hkʼaw‸ gaˬ ve kʼo, ti mi oˇ ve hta‸ nawˬ maˇ gʼa kʼaw‸ te caˇ. Hkʼe leˇ gʼa teh taˍ leh, haˍ gʼawˇ ve chaw hta‸ gʼa te caˇ piˇ lawˬ ve yoˬ. Ti mi hkʼaw sheˆ taˍ ve awˬ shiˍ awˬ nu teˇ hpaˍ hta‸ heh puiˉ hkʼaw lo chehˇ ve to nuˇ to shaˆ teˇ hpaˍ awˬ pon gʼa teh taˍ piˇ ve yoˬ. Nawˬ ve a pehˉ meuˇ hko, sha lonˍ hko hta‸ htawˇ, oˇ ve hkʼa shuˍ gʼa te ve yoˬ.
12Hkaw‸ nyi hkʼa gaˬ nawˬ kanˉ te hpeh‸ve yoˬ. Ya‸ hkʼaˇ, suhˍ nyi teˇ nyi gaˬ htaˇ, nawˬ kanˉ maˇ gʼa te leh gʼa jehˇ taˍ ve yoˬ. Nawˬ ve ceˇ teˇ hpaˍ, awˬ ceˬ paˍ awˬ ceˬ ma leh shu mvuhˇmiˬ lo laˬ taˍ ve hkehˉ chaw teˇ hpaˍ hta‸ gʼaˇ gʼa jehˇ piˇ ve yoˬ.
13Ngaˬ kʼoˆ piˇ taˍ ve tawˇ teˇ hkawˇ le le hta‸ nawˬ hui hkʼa deh‸ na yuˬ-o‸. Awˬ kaˍ awˬ nu gʼuiˬsha teˇ hpaˍ hta‸ oˉ kʼoˍ maˇ gʼa pui. Yawˇ hui ve awˬ meh hta‸ ka‸ maˇ gʼa kuˬ.
Uiˍ jaˇ ve pawehˇ shehˆ maˬ
14Teˇ hkʼaw‸ awˬ hkʼaw lo nawˬ hui ngaˬ hta‸ yawˆ yan leh pawehˇ shehˆ pawˆ gʼa te ve yoˬ. 15Ngaˬ kʼoˆ piˇ taˍ ve hkʼe, diˇ maˇ keu ve hkaoˍmonˇ caˇ ve pawehˇ hta‸ nawˬ hui suhˍ nyi hkʼa gaˬ gʼa te ve yoˬ. Awˬ yanˇ oˇ ve lehˬ, nawˬ hui Eˇjiˇtu‸ mvuhˇmiˬ hkʼaw‸ tawˆ la ve Aˍbiˆbaˍlaˆ ha pa hkʼaw ngaˬ tinˍ taˍ ve awˬ yanˇ gʼa hpeh‸ ve yoˬ. Chaw teˇ gʼaˇ ka‸ tanˇ tuˬ maˇ yuˬ veu laˇ leh ngaˬ mehˆ gʼuˇ suhˍ maˇ gʼa laˬ.
16Nawˬ hui lehˬ, caˬ gʼeu‸ caˬ jaw‸ ve awˬ yanˇ gaˬ htaˇ, pawehˇ teˇ maˬ gʼa kʼaw‸ te ve yoˬ. Oˇ ve hkʼaw‸ nawˉ, mvuhˇ kaˆ yanˇ nawˬ hui iˉ shiˍ shaˉ ve awˬ yanˇ gaˬ la htaˇ, aˉ po kʼo pawehˇ hta‸ gʼa kʼaw‸ te ve yoˬ. 17Chi hkʼe teˇ hkʼaw‸ shehˆ pawˆ pawehˇ te ve awˬ yanˇ gaˬ la htaˇ, hawˉ hkʼaˆ paˍ teˇ gʼaˇ le le ngaˬ hta‸ oˉ kʼoˍ gʼa ca pui la ve yoˬ.
18Nawˬ hui ngaˬ hta‸ to nuˇ to shaˆ tanˇ la chehˇ ve teˇ yanˇ, diˇ keu taˍ ve hkaoˍmonˇ hta‸ maˇ gʼa yehˇ. Ngaˬ hta‸ tuˉ tanˇ ve shaˍ chu hta‸ mvuhˇ htiˇ la htaˇ hkʼa gaˬ maˇ gʼa teh taˍ.
19Teˇ hkʼaw‸ le le awˉ lawˉ peuˇ naw‸ la taˍ ve awˬ shiˍ awˬ nu teˇ hpaˍ, Gʼuiˬsha ve yehˬ lo gʼa yuˬ laˬ ve yoˬ.
Yawˬ ehˉ hta‸ yawˇ awˬ e ve cuˉ gʼuiˬ hkʼaw maˇ gʼa keu caˉ caˇ.
Awˬ lawn laiˉ ceuˬ maˍ piˇ ve
20Ngaˬ gu taˍ ve chehˇ kuiˬ lo nawˬ hui hta‸ ha‸ shaˉ leh shiˍ kʼai laˇ tuˬ, mvuhˇ naw tcuh yaˇ teˇ gʼaˇ hta‸, nawˬ hui gʼuˇ suhˍ lo ngaˬ kʼai peu tuˬ yoˬ. 21Yawˇ ve tawˇ hta‸ hkʼa deh‸ na yuˬ-o‸. Yawˇ hta‸ maˇ shawˍ maˇ caˆ taˇ te. Nawˬ hui oˇ hkʼe te kʼo, yawˇ nawˬ hui ve venˇbaˆ hta‸ hpehˇ laˇ tuˬ ve maˇ heˆ. Awˬ lawn kʼo, ngaˬ yawˇ hta‸ peu laˇ taˍ ve yoˬ. 22Ya‸ hkʼaˇ, nawˬ hui yawˇ ve tawˇ hta‸ na yuˬ leh, ngaˬ kʼoˆ ve hkʼe te ve kʼo, ngaˬ nawˬ hui ve canˇ paˍ teˇ hpaˍ hta‸ gʼa‸ kʼoˬ laˇ tuˬ yoˬ. 23Ngaˬ ve mvuhˇ naw tcuh yaˇ lehˬ, nawˬ hui gʼuˇ suhˍ lo kʼai leh nawˬ hui hta‸ Aˍmawˇriˆ chaw, Hiˇtiˆ chaw, Hpeˍraˍziˆ chaw, Hkaˍnaˍniˆ chaw, Hiˇviˆ chaw leh Yeˍbuˇsiˆ chaw hui ve mvuhˇmiˬ lo shiˍ kʼai laˇ tuˬ yoˬ. Ngaˬ lehˬ, chaw oˇ ve teˇ hpaˍ hta‸ te luˬ te sheˆ piˇ tuˬ yoˬ. 24Nawˬ hui lehˬ, chaw oˇ ve teˇ hpaˍ ve gʼuiˬsha hta‸ oˉ kʼoˍ maˇ gʼa pui. Yawˇ hui te ve hkʼe nawˬ hui maˇ gʼa te. Yawˇ hui ve gʼuiˬsha teˇ hpaˍ hta‸ nawˬ hui gʼa te luˬ leh, yawˇ hui ve da‸ kehˬ ve haˉ pui hkuiˉ daw teˇ hpaˍ hta‸ gʼa dawˆ paˆ ve yoˬ. 25Nawˬ hui ve Gʼuiˬsha hta‸ ceh tiˉ nawˬ hui oˉ kʼoˍ gʼa pui ve yoˬ. Oˇ hkʼe te ve kʼo, ngaˬ nawˬ hui hta‸ caˇ tuˬ dawˬ tuˬ piˇ laˇ leh, nawˬ hui geh cawˬ ve naˬ ve gawˬ ve awˬ ceuˬ hkʼa peu-eˬ hta‸ yuˬ baˬ laˇ tuˬ yoˬ. 26Nawˬ hui ve mvuhˇmiˬ hkʼaw yaˇ miˇ teˇ gʼaˇ ka‸ yaˇ shawˆ-e tuˬ ve maˇ heˆ. Chaw teˇ gʼaˇ ka‸ chaw meh ma hpeh‸ tuˬ ve maˇ heˆ. Ngaˬ nawˬ hui hta‸ co zuhˬ ha zuhˬ cawˬ la piˇ tuˬ yoˬ.
27Nawˬ hui hta‸ tawˍ taˍ ve chaw teˇ hpaˍ ngaˬ hta‸ kawˆ tuˬ ngaˬ te piˇ tuˬ yoˬ. Nawˬ hui hta‸ ca bawˆ la ve chaw teˇ hpaˍ hta‸ ngaˬ nyi ma luˬ kʼai piˇ leh gʼuiˇ hpaw-e piˇ lawˬ tuˬ yoˬ. 28Hiˇviˆ chaw, Hkaˍnaˍniˆ chaw, leh Hiˇtiˆ chaw teˇ hpaˍ kawˆ jaˇ leh gʼuiˇ hpaw-e tuˬ ngaˬ te piˇ tuˬ yoˬ. 29Ya‸ hkʼaˇ, yawˇ hui hkʼa peu-eˬ hta‸ teˇ hkʼaw‸ awˬ hkʼaw lo tiˉ ngaˬ gʼa‸ kʼoˬ piˇ tuˬ ve maˇ heˆ. Oˇ hkʼe te ve kʼo, mvuhˇmiˬ oˇ ve teˇ hpaˍ gawˬ cu gawˬ pehˆ hpeh‸ kʼai leh, haiˬ ve to nuˇ to shaˆ hkʼa biˇ cawˬ la tuˬ yoˬ. 30Nawˬ hui chaw maˇ la leh mvuhˇmiˬ oˇ ve hkʼa peu-eˬ hta‸ bawˆ yuˬ gʼa htaˇ hkʼa gaˬ, yawˇ hui hta‸ ngaˬ awˬ meu-eˇ awˬ meu-eˇ gʼa‸ kʼoˬ piˇ tuˬ yoˬ. 31Nawˬ hui ve miˬ tcuhˉ lehˬ, Laˇ tsuhˇ gʼuiˬ nyi hta‸ te leh Awˬ kʼaw ji ve laˇ tsuhˇ gʼuiˬ lo hkʼa gaˬ, hteunˍ lonˉ hta‸ te leh Uˉhpaˍraˆ iˉ kaˆ lawˬ lo hkʼa gaˬ hpeh‸ tuˬ yoˬ. Mvuhˇmiˬ oˇ ve teˇ hpaˍ hkʼaw chehˇ ve chaw hui hta‸ nawˬ hui gʼa uˉ peunˍ leh, nawˬ hui lehˬ chaw oˇ ve teˇ hpaˍ hta‸ gʼa‸ kʼoˬ piˇ tuˬ yoˬ. 32Ya‸ hkʼaˇ, nawˬ hui lehˬ yawˇ hui hta‸ maˇ kʼoˆ, yawˇ hui ve gʼuiˬsha teˇ hpaˍ hta‸ maˇ kʼoˆ, ka ti‸ shaˉ caˆ maˇ gʼa te. 33Yawˇ hui hta‸ nawˬ hui ve mvuhˇmiˬ hkʼaw taˇ chehˇ tcuh. Nawˬ hui chehˇ tcuh ve kʼo, yawˇ hui ve tawˇ hta‸ nawˬ hui na leh, ngaˬ hta‸ te ya‸ tuˬ yoˬ. Nawˬ hui lehˬ, yawˇ hui ve shaˉ ho‸ hta‸ oˉ kʼoˍ pui ve kʼo, va htaw taˍ ve hta‸ yaw tuˬ yoˬ, teh‸ Gʼuiˬsha kʼoˆ ve yoˬ.
Currently Selected:
Tawˆ kʼai ve li‸ 23: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
