Tawˆ kʼai ve li‸ 22
22
Kʼaw‸ shaiˍ da‸ tuˬ awˬ liˇ awˬ hkʼaˇ
1Chaw teˇ gʼaˇ lehˬ shu ve nuˇ, yawˬ hta‸ hkʼawˇ leh tiˇ caˇ ve maˇ kʼoˆ, hawˇ caˇ ve maˇ kʼoˆ, yawˇ lehˬ nuˇ teˇ hkeh awˬ tan ngaˇ hkeh, yawˬ teˇ hkeh awˬ tan awˇ hkeh gʼa kʼaw‸ shaiˍ ve yoˬ. 2-4Yawˇ hkʼawˇ taˍ ve hkʼe gʼa kʼaw‸ shaiˍ ve yoˬ. Yawˇ geh kʼaw‸ shaiˍ tuˬ te‸ chiˉ maˇ cawˬ ve kʼo, yawˇ hkʼawˇ taˍ ve awˬ tan yawˇ ve awˬ to hawˇ leh gʼa shaiˍ piˇ ve yoˬ. Ya‸ hkʼaˇ, yawˇ hkʼawˇ taˍ ve nuˇ, piˉ laˬ, yawˬ ehˉ hkʼaˬ hkʼe ve teˇ ceuˬ htawˇ, yawˇ geh lo awˬ te‸ te‸ gʼa kʼaw‸ mawˬ ve kʼo, teˇ hkeh hkʼawˇ taˍ ve awˬ tan nyiˇ hkeh gʼa kʼaw‸ shaiˍ ve yoˬ. Chaw hkʼawˇ teˇ gʼaˇ shu ve mawˇ hkʼawˇ chehˇ ve hta‸ mawˬ leh tiˇ pehˍ piˇ ve kʼo, tiˇ pehˍ shehˍ hpaˇ lehˬ venˇbaˆ maˇ cawˬ. Ya‸ hkʼaˇ, mvuhˇ nyi tawˆ la peuˬve kʼo, tiˇ pehˍ shehˍ hpaˇ venˇbaˆ cawˬ ve yoˬ.
5Chaw teˇ gʼaˇ yawˇ ve heh, maˇ heˆ kʼo a pehˉ meuˇ hko hkʼaw ceˇ hpehˇ caˍ leh, shu ve hko hkʼaw htawˇ ca lo‸ caˇ ve kʼo, yawˇ ve heh hkʼaw tawˆ ve da‸ jaˇ ve awˬ shiˍ awˬ nu teˇ hpaˍ yuˬ leh gʼa shaiˍ piˇ ve yoˬ.
6Chaw teˇ gʼaˇ aˬ miˍ tuˉ keu ve pa taw, teˇ caˉ peuˬ teˇ caˉ to‸ kʼai leh shu ve caˬ shiˍ hkʼa peu-eˬ hta‸ to‸ baˬ piˇ lawˬ ve kʼo, chaw oˇ ve lehˬ shu ve mawˇ shonˇ taˍ ve hkʼa peu-eˬ hta‸ gʼa kʼaw‸ shaiˍ ve yoˬ.
7Chaw teˇ gʼaˇ lehˬ, awˬ nu ve chaw teˇ gʼaˇ hta‸ hpu maˇ kʼoˆ, mawˇ teˇ ceuˬ ceuˬ maˇ kʼoˆ ha‸ shaˉ taˍ tuˬ chiˇ a‸ piˇ taˍ ve yoˬ. Yawˇ ve yehˬ hkʼaw chaw hkʼawˇ laˬ leh mawˇ oˇ ve hta‸ hkʼawˇ kʼai ve kʼo, chaw hkʼawˇ oˇ ve hta‸ yuˬ gʼa htaˇ, chaw hkʼawˇ oˇ ve lehˬ nyiˇ pun gʼa kʼaw‸ shaiˍ ve yoˬ. 8Ya‸ hkʼaˇ, chaw hkʼawˇ hta‸ yuˬ maˇ gʼa ve kʼo, yehˬ shehˍ hpaˇ oˇ ve bon yehˬ lo kʼai leh, yawˇ shu ve mawˇ maˇ hkʼawˇ ve awˬ lawn shaˉ hkiˆ gʼa hkanˍ ve yoˬ.
9Chaw nyiˇ gʼaˇ lehˬ, nuˇ, piˉ laˬ, yawˬ ehˉ, aˉ po‸ leh awˬ nu ve mawˇ teˇ ceuˬ ceuˬ hta‸ veh da‸ leh tawˇ gʼawˬ da‸ ve kʼo, chaw oˇ ve nyiˇ gʼaˇ gʼaˇ bon yehˬ lo gʼa kʼai ve yoˬ. Maˇ cawˇ ve chaw lehˬ, cawˇ ve chaw hta‸ nyiˇ pun gʼa kʼaw‸ shaiˍ piˇ ve yoˬ.
10Chaw teˇ gʼaˇ lehˬ, awˬ nu ve chaw teˇ gʼaˇ hta‸ yawˇ ve nuˇ, piˉ laˬ, yawˬ ehˉ leh awˬ nu ve ceˇ teˇ ceuˬ ceuˬ ha‸ shaˉ tuˬ chiˇ a‸ piˇ taˍ ve hkʼaw, suh kʼai ve, naˬ ve, maˇ heˆ kʼo shu hiˉ yuˬ kʼai leh shaˉ hkiˆ maˇ cawˬ ve kʼo, 11chaw oˇ ve bon yehˬ lo kʼai leh yawˇ shu ve mawˇ maˇ hkʼawˇ ve awˬ lawn shaˉ hkiˆ gʼa hkanˍve yoˬ. Awˬ shehˍ hpaˇ htawˇ, chaw hkʼawˇ hta‸ yuˬ maˇ gʼa ve kʼo, chaw oˇ ve hpaˇ kʼoˆ ve hta‸ nyi hkʼaˇ gʼa suh leh, kʼaw‸ shaiˍ da‸ tuˬ maˇ loˍ. 12Ya‸ hkʼaˇ, ceˇ oˇ ve hta‸ shu hkʼawˇ kʼai ve kʼo, yawˇ lehˬ awˬ shehˍ hpaˇ hta‸ gʼa kʼaw‸ shaiˍ piˇ ve yoˬ. 13Ceˇ oˇ ve hta‸ haiˬve to nuˇ to shaˆ che‸ caˇ ve kʼo, chaw oˇ ve lehˬ shaˉ hkiˆ hkʼa deh‸ gʼa maˍ piˇ ve yoˬ. Oˇ hkʼe te ve kʼo, haiˬ ve to nuˇ to shaˆ che‸ caˇ taˍ ve ceˇ awˬ pon kʼaw‸ shaiˍ da‸ tuˬ maˇ loˍ.
14Chaw teˇ gʼaˇ lehˬ, awˬ nu ve chaw teˇ gʼaˇ geh ceˇ teˇ hkeh ngaˍ taˍ leh, awˬ shehˍ hpaˇ maˇ chehˇ hkʼaw‸ nawˉ naˬ ve, maˇ heˆ kʼo suh-e ve kʼo, ngaˍ shehˍ hpaˇ gʼa kʼaw‸ shaiˍ ve yoˬ. 15Ya‸ hkʼaˇ, awˬ shehˍ hpaˇ chehˇ taˍ ve kʼo, ngaˍ shehˍ hpaˇ kʼaw‸ shaiˍ piˇ tuˬ maˇ loˍ. Awˬ hpfuhˇ piˇ leh ngaˍ taˍ ve kʼo, ngaˍ ve awˬ hpfuhˇ ceh tiˉ gʼa kʼaw‸ piˇ ve yoˬ.
Bon yehˬ hta‸ caˉ da‸ ve awˬ liˇ awˬ hkʼaˇ
16Chaw teˇ gʼaˇ yaˇ miˇ haˉ teˇ gʼaˇ hta‸ ca te ya‸ ve kʼo, awˬ hpfuhˇ piˇ leh yawˇ hta‸ gʼa heuˆ ve yoˬ. 17Ya‸ hkʼaˇ, awˬ pa lehˬ chaw oˇ ve hta‸ yawˇ ve yaˇ miˇ maˇ piˇ gaˇ ve kʼo, te muiˬ te jaw ve hkʼe chaw oˇ ve lehˬ, yaˇ miˇ hta‸ mehˆ hpfuhˇ gʼa tsuhˇ piˇ ve yoˬ.
18Neˇ hta‸ cuˇ leh shu hta‸ naˬ tuˬ te ve chaw hta‸ gʼa tiˇ pehˍ ve yoˬ.
19To nuˇ to shaˆ hta‸ haˉ chawˇ te ve chaw hta‸ gʼa tiˇ pehˍ ve yoˬ.
20Ngaˬ hta‸ maˇ heˆ leh, awˬ nu ve gʼuiˬsha hta‸ tuˉ tanˇ piˇ ve chaw hta‸ gʼa tiˇ pehˍ ve yoˬ.
21Shu mvuhˇmiˬ lo laˬ ve hkehˉ chaw hta‸ maˇ gʼa fawˉ mehˍ. Awˬ lawn kʼo, nawˬ hui htawˇ Eˇjiˇtu‸ mvuhˇmiˬ lo laˬ taˍ ve hkehˉ chaw hpeh‸ ve yoˬ. 22Mehˇchawˇma leh yaˇcuˬshi hta‸ hkʼa mvuhˇ hkʼa na maˇ gʼa te. 23Nawˬ hui oˇ hkʼe te piˇ leh, yawˇ hui ngaˬ hta‸ kuˬ ve teˇ yanˇ, ngaˬ na yuˬ piˇ tuˬ yoˬ. 24Oˇ htaˇ, ngaˬ nyi ma zuhˆ la leh nawˬ hui hta‸ ma‸ bawˆ kuiˬ lo suh-e piˇ lawˬ tuˬ yoˬ. Nawˬ hui ve awˬ miˇ ma teˇ hpaˍ mehˇchawˇma kʼaw‸ hpeh‸ la leh, nawˬ hui ve yaˇ teˇ hpaˍ yaˇcuˬshi kʼaw‸ hpeh‸ la tuˬ yoˬ.
25Nawˬ geh chehˇ taˍ ve haˍ ve gʼawˇ ve chaw teˇ hpaˍ hta‸ hpu chiˇ piˇ ve teˇ yanˇ, yawˇ hui geh awˬ yawˬ maˇ gʼa lawˬ yuˬ.
26Chaw teˇ gʼaˇ gʼaˇ nawˬ geh aˉ po‸ ca tan laˇ ve kʼo, mvuhˇ maˇ hpeu‸ sheˬ htaˇ yawˇ ve aˉ po‸ hta‸ nawˬ gʼa kʼaw‸ hkʼaw‸ piˇ ve yoˬ. 27Awˬ lawn kʼo, yawˇ lehˬ aˉ po‸ oˇ ve teˇ hkʼoˆ tiˉ cawˬ ve yoˬ. Yawˇ aˬ hto‸ ma veu‸ zuh‸ tuˬ le. Yawˇ ngaˬ hta‸ kuˬ ve kʼo, yawˇ kuˬ hkawˇ hta‸ ngaˬ na yuˬ piˇ tuˬ yoˬ. Awˬ lawn kʼo, ngaˬ lehˬ ha kʼaˉ puiˉ ve Gʼuiˬsha hpeh‸ ve yoˬ.
28Gʼuiˬsha hta‸ nawˬ maˇ shawˍ maˇ caˆ maˇ gʼa kʼoˆ. Nawˬ ve awˬ hoˉ awˬ naˬ teˇ hpaˍ hta‸ maˇ gʼa hkeu.
29Nawˬ hui geh awˉ lawˉ peuˇ tawˆ la ve awˬ shiˍ awˬ nu, shaˍlonˍ chu, leh a pehˉ meuˇ gʼuiˬ ngaˬ hta‸ gʼa tanˇ laˇ ve yoˬ. Nawˬ hui geh awˉ lawˉ peuˇ paw la ve yaˇ paˍ uiˍ teˇ gʼaˇ le le ngaˬ hta‸ gʼa piˇ laˇ ve yoˬ. 30Oˇ ve hkʼa shuˍ, nawˬ hui geh awˉ lawˉ peuˇ paw la ve nuˇ, yawˬ, teˇ hpaˍ ngaˬ hta‸ gʼa piˇ laˇ ve yoˬ. Yawˇ hui lehˬ, awˬ ma peuˍ geh suhˍ nyi ceh tiˉ gʼa teh leh hiˉ nyi teˇ nyi gaˬ kʼo, ngaˬ hta‸ gʼa piˇ laˇ ve yoˬ.
31Nawˬ hui lehˬ, ngaˬ ve chaw hpeh‸ ve yoˬ. Chi hta‸ pa taw, haiˬ ve to nuˇ to shaˆ che‸ caˇ taˍ ve shaˍ hta‸ nawˬ hui maˇ gʼa caˇ. Hpuiˇ hta‸ gʼa caˍ piˇ ve yoˬ.
Currently Selected:
Tawˆ kʼai ve li‸ 22: LHBE
Highlight
Copy
Compare
Share
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
