Tawˆ kʼai ve li‸ 24

Gʼuiˬsha ve ka ti‸ shaˉ caˆ

1Oˇ ve hkʼaw‸ nawˉ, Gʼuiˬsha Moˉseˍ hta‸ kʼoˆ piˇ ve, Aˍronˍ, Naˬdaˆ, Aˍbiˇhuˆ leh Iˉsaˍreˍlaˆ chaw awˬ hoˉ awˬ naˬ 70 gʼaˇ hta‸ shiˍ veu laˇ leh, hkʼaw hkʼoˆ lo ngaˬ geh taˆ la-o. Nawˬ hui ngaˬ hta‸ maˇ vuiˇ maˇ neˇ kuiˬ lo gaˬ htaˇ, hkui tcuhˉ teh leh ngaˬ hta‸ oˉ kʼoˍ gʼa pui ve yoˬ. 2Moˉseˍ nawˬ teˇ gʼaˇ ceh tiˉ ngaˬ paˇ lo gʼa jiˆ laˬ ve yoˬ. Iˉsaˍreˍlaˆ chaw moˍ lonˉ lehˬ hkʼaw paˇ lo ceh ka‸ maˇ gʼa laˬ, teh‸ Moˉseˍ hta‸ kʼoˆ piˇ ve yoˬ.

3Moˉseˍ chaw moˍ lonˉ geh kʼai lehˬ, Gʼuiˬsha ve tawˇ hkʼa peu-eˬ leh, yawˇ ve awˬliˇtawˇhkawˇ hkʼa peu-eˬ yawˇ hui hta‸ kʼoˆ maˍ piˇ ve yoˬ. Oˇ htaˇ, chaw hkʼa peu-eˬ tawˇ teˇ hkawˇ tiˉ te leh, Gʼuiˬsha ngaˬ hui hta‸ kʼoˆ laˇ ve tawˇ hkʼa peu-eˬ hta‸ ngaˬ hui na yuˬ leh te tuˬ yoˬ, teh‸ kʼoˆ ve yoˬ. 4Moˉseˍ lehˬ, Gʼuiˬsha ve awˬliˇtawˇhkawˇ hkʼa peu-eˬ hta‸ bvuh‸ keu taˍ ve yoˬ. Yawˇ mvuhˇ shawˉ teˇ na‸ tu leh hkʼaw hkuiˉ puiˍ lo Gʼuiˬsha hta‸ tuˉ tanˇ kuiˬ teˇ maˬ te ve yoˬ. Peuˬ hkʼaw‸ nawˉ, Iˉsaˍreˍlaˆ chaw teˇ chi nyiˇ ceuˬ cawˬ ve hkʼe, haˉ pui shiˍ teˇ chi nyiˇ shiˍ duˇ ti ve yoˬ. 5Yawˇ lehˬ, Iˉsaˍreˍlaˆ chaw haˉ paˍ teˇ hpaˍ hta‸ nuˇ paˍ lonˉ tiˇ leh Gʼuiˬsha hta‸tuˉ tanˇ tcuh ve yoˬ. 6Moˉseˍ lehˬ, nuˇ suhˍ hta‸ yuˬ leh hkehˇ hkʼaw keu peuˬ hkʼaw‸ nawˉ, awˬ nu ve teˇ hkoˇ hta‸ yuˬ leh tanˇ kuiˬ hta‸ hpeh‸ pfuhˍ ve yoˬ. 7Oˇ ve hkʼaw‸ nawˉ, ka ti‸ shaˉ caˆ li‸ daw hta‸ yuˬ leh chaw hkʼa peu-eˬ hta‸ awˬ hkawˇ bvuhˬ chaweh te gʼaw maˍ piˇ ve yoˬ. Yawˇ hui lehˬ, Gʼuiˬsha kʼoˆ laˇ ve hkʼa peu-eˬ hta‸ ngaˬ hui na yuˬ leh te tuˬ yoˬ, teh‸ kʼoˆ ve yoˬ.

8Oˇ htaˇ, Moˉseˍ lehˬ hkehˇ hkʼaw keu taˍ ve awˬ suhˍ hta‸ yuˬ leh, chaw yaˇ teˇ hpaˍ hta‸ hpeh‸ pfuhˍ piˇ leh kʼoˆ ve, Awˬ suhˍ chi ve lehˬ, Gʼuiˬsha nawˬ hui hta‸ piˇ laˇ taˍ ve awˬliˇtawˇhkawˇ hta‸ caˉ da‸ ve ka ti‸ shaˉ caˆ awˬ suhˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

9Moˉseˍ, Aˍronˍ Naˍdaˆ, Aˍbiˇhuˆ leh Iˉsaˍreˍlaˆ chaw awˬ hoˉ awˬ naˬ 70 gʼaˇ hkʼaw hkʼoˆ lo taˆ-e leh, 10Iˉsaˍreˍlaˆ ve Gʼuiˬsha hta‸ gʼa mawˬ ve yoˬ. Yawˇ ve hkui sheh awˬ hawˉ lo mvuhˇ naw hkʼa shuˍ kehˬ da‸ jaˇ leh, nawˉ-ehˍ ve shehnˉ shiˍ hkʼawˇ taˍ ve hta‸ shuˍ ve awˬ ceuˬ hta‸ yawˇ hui gʼa mawˬ ve yoˬ. 11Gʼuiˬsha lehˬ, Iˉsaˍreˍlaˆ chaw awˬ hoˉ awˬ naˬ chi teˇ hpaˍ hta‸ maˇ ciˍ yanˍ piˇ. Yawˇ hui Gʼuiˬsha hta‸ gʼa mawˬ peuˬ hkʼaw‸ nawˉ, teˇ geh hti caˇ hti dawˬ ve yoˬ.

Moˉseˍ Siˉnaˆ hkʼaw hkʼoˆ chehˇ ve

12Oˇ htaˇ, Gʼuiˬsha Moˉseˍ hta‸ kʼoˆ piˇ ve, Ngaˬ geh hkʼaw hkʼoˆ lo taˆ la-o. Nawˬ yawˇ hui hta‸ maˍ piˇ tuˬ, haˉ pui baˉ hkʼoˆ lo bvuh‸ taˍ ve ngaˬ ve awˬliˇtawˇhkawˇ teˇ hpaˍ ngaˬ nawˬ hta‸ piˇ laˇ tuˬ yoˬ, teh‸ kʼoˆ piˇ ve yoˬ. 13Moˉseˍ lehˬ, yawˇ ve awˬ ceˬ paˍ Yawˇsuˆ hta‸ shiˍ veu leh, Gʼuiˬsha geh kʼai tuˬ gu taˍ ve yoˬ. 14Oˇ htaˇ Moˉseˍ kʼoˆ ve, Ngaˬ huiˉ maˬ nawˬ hui geh kʼaw‸ gaˬ la htaˇ hkʼa gaˬ, choˬ kaˬ lo law taˍ-o‸. Aˍronˍ leh Huˇraˆ ka‸ choˬ kaˬ nawˬ hui geh chehˇ taˍ ve yoˬ. Chaw teˇ gʼaˇ gʼaˇ tawˇ te da‸ tuˬ cawˬ ve kʼo, yawˇ huiˉ maˬ geh kʼai hpeh‸ ve yoˬ, teh‸ Iˉsaˍreˍlaˆ awˬ hoˉ awˬ naˬ teˇ hpaˍ hta‸ kʼoˆ piˇ ve yoˬ.

15Hkʼe te leh, Moˉseˍ hkʼaw hkʼoˆ taˆ-e leh, moˬ lehˬ hkʼaw oˇ ve hta‸ hoˆ beh taˍ ve yoˬ. 16Gʼuiˬsha ve awˬ me‸ awˬ hponˇ hkʼaw oˇ ve awˬ hkʼoˆ ya‸ la leh, hkaw‸ nyi hkʼa gaˬ moˬ hoˆ beh taˍ ve yoˬ. Suhˍ nyi teˇ nyi gaˬ htaˇ, Gʼuiˬsha lehˬ moˬ hkʼaw chehˇ taˍ leh Moˉseˍ hta‸ kuˬ ve yoˬ. 17Gʼuiˬsha ve awˬ me‸ awˬ hponˇ lehˬ, hkʼaw hkʼoˆ lo aˬ miˍ to‸ chehˇ ve hkʼa shuˍ hpeh‸ ve hta‸ Iˉsaˍreˍlaˆ chaw teˇ hpaˍ gʼa mawˬ ve yoˬ. 18Moˉseˍ moˬ hkʼaw lo‸-e leh hkʼaw hkʼoˆ lo taˆ-e ve yoˬ. Oˇ kaˬ lo yawˇ 40 nyi 40 haˉ chehˇ taˍ ve yoˬ.

Currently Selected:

Tawˆ kʼai ve li‸ 24: LHBE

Highlight

Copy

Compare