Tcuh yaˇ li‸ 9

Sawˉlu‸ Hkri‸ yaˇ hpeh‸ la ve

1Sawˉlu‸ lehˬ, Jawˇmawˇ Yeˍsuˆ ve awˬ la‸ gʼawˇ hui hta‸ tiˇ pehˍ-a teh‸ tiˉ kʼoˆ leh, gʼaˇ hte‸ caˬ chehˇ ve yoˬ. 2Ya‸ kʼaw awˬ liˇ chi hta‸ lo‸-e ve chaw, hawˉ hkʼaˆ maˇ kʼoˆ, yaˇ miˇ maˇ kʼoˆ, hkʼa mawˬ ve chaw teˇ hpaˍ hta‸ yawˇ hpeh yuˬ leh Yeˍruˆsaˍlehnˍ venˇ lo sheh veu laˇ tuˬ, Daˍmaˍsehˆ venˇ lo cawˬ ve bon yehˬ teˇ hpaˍ hta‸ piˇ tuˬ awˬ pon, yawˇ paw hkuˇ lonˉ geh kʼai leh li‸ lawˬ ve yoˬ.

3Yawˇ Daˍmaˍsehˆ venˇ lo kʼai chehˇ htaˇ, venˇ awˬ paˇ lo gaˬ la leh, mvuhˇ naw ma lo awˬ gʼeuˆ teˇ cawˬ haˉ yawˇ hta‸ hkʼa caw zuhˇ hti la ve yoˬ. 4Yawˇ miˬ chaˇ hkʼoˆ lo paiˍ leh, Sawˉlu‸-oˬ, Sawˉlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le teh‸, yawˇ hta‸ kʼoˆ laˇ ve awˬ hkawˇ gʼa kaˇ ve yoˬ.

5Jawˇmawˇ-oˬ, nawˬ a shu le teh‸ yawˇ na nyi htaˇ,

Yeˍsuˆ kʼaw‸ kʼoˆ ve, Ngaˬ lehˬ nawˬ fawˉ mehˍ laˇ chehˇ ve Yeˍsuˆ yoˬ. 6Tu leh venˇ hkʼaw lo lo‸-e loˬ. Nawˬ hkʼaˬ hkʼe gʼa te tuˬ ve hta‸ hto laˇ tuˬ yoˬ teh‸ kʼoˆ piˇ ve yoˬ.

7Yawˇ geh kʼai chehˇ ve chaw teˇ hpaˍ lehˬ, awˬ hkawˇ oˇ ve hta‸ gʼa kaˇ htawˇ, teˇ gʼaˇ hta‸ ka‸ maˇ mawˬ ve pa taw, yawˇ hui ka keh leh huˉ chehˇ taˍ ve yoˬ. 8Sawˉlu‸ tu la leh, mehˆ ngaˉ nyi htawˇ yawˇ mehˆ maˇ mawˬ. Hkʼe te leh, yawˇ hui yawˇ ve la‸ sheh hta‸ yuˬ leh, Daˍmaˍsehˆ venˇ lo yawˇ hta‸ sheh kʼai ve yoˬ. 9Shehˆ nyi hkʼa gaˬ yawˇ mehˆ maˇ mawˬ leh, maˇ caˇ maˇ dawˬ te chehˇ ve yoˬ.

Sawˉlu‸ Daˍmaˍsehˆ venˇ hkʼaw chehˇ htaˇ awˬ lawn

10Oˇ htaˇ, Daˍmaˍsehˆ venˇ awˬ hkʼaw lo Aˍnaˍniˆ meh ve awˬ la‸ gʼawˇ teˇ gʼaˇ cawˬ ve yoˬ. Jawˇmawˇ Yeˍsuˆ lehˬ, awˬ ha awˬ hkʼaw lo, Aˍnaˍniˆ-oˬ teh‸ yawˇ hta‸ kuˬ htaˇ,

Jawˇmawˇ-oˬ, ngaˬ choˬ kaˬ chehˇ taˍ ve yoˬ teh‸, yawˇ kʼaw‸ kʼoˆ piˇ ve yoˬ.

11Jawˇmawˇ Yeˍsuˆ yawˇ hta‸ kʼaw‸ kʼoˆ piˇ ve, Tu leh, Hteˇ ve ya‸ kʼaw teh‸ kʼoˆ ve teˇ caˆ lo kʼai-o. Yuˇda‸ ve aˉ hkʼaw lo Taˍsuˆ venˇ yaˇ Sawˉlu‸ hta‸ ca nyi-o. Awˬ lawn kʼo, yawˇ bon lawˬ chehˇ ve yoˬ. 12Yawˇ mehˆ kʼaw‸ mawˬ la tuˬ, Aˍnaˍniˆ meh ve chaw teˇ gʼaˇ lo‸ la leh, yawˇ awˬ hkʼoˆ la‸ sheh taˍ ve hta‸ gʼa mawˬ peuˬ teh‸, Yeˍsuˆ Aˍnaˍniˆ hta‸ kʼoˆ piˇ ve yoˬ.

13Ya‸ hkʼaˇ Aˍnaˍniˆ kʼaw‸ kʼoˆ ve, Jawˇ mawˇ-oˬ, chaw oˇ ve lehˬ Yeˍruˆsaˍlehnˍ venˇ hkʼaw lo nawˬ ve da‸ kehˬ ve chaw hui hta‸ haiˬ ve hkʼaˬ ma te ve awˬ lawn chaw laiˉ gʼaˇ hto laˇ ve hta‸ ngaˬ gʼa kaˇ peuˬ. 14Choˬ kaˬ lo htawˇ, nawˬ ve awˬ meh hta‸ hkʼa kuˬ ve chaw hkʼa peu-eˬ hta‸ hpeh yuˬ tuˬ, paw hkuˇ lonˉ hui geh yawˇ a hkaw-anˬ gʼa peuˬ teh‸, Aˍnaˍniˆ kʼaw‸ kʼoˆ piˇ ve yoˬ.

15Ya‸ hkʼaˇ, Jawˇmawˇ Yeˍsuˆ yawˇ hta‸ kʼaw‸ kʼoˆ piˇ ve, Kʼai loˬ. Awˬ lawn kʼo, chaw oˇ ve lehˬ, buiˇshaˆaˉnaˆ chaw leh hkunˉ hawˉ hkanˇ hui mehˆ gʼuˇ suhˍ maˇ kʼoˆ, Iˉsaˍreˍlaˆ chaw hui mehˆ gʼuˇ suhˍ maˇ kʼoˆ, ngaˬ ve awˬ meh hta‸ pfuhˇ kʼai tuˬ, yawˇ lehˬ ngaˬ leuˆ yuˬ taˍ ve awˬ hkʼeun hpeh‸ ve yoˬ. 16Awˬ lawn kʼo, ngaˬ ve awˬ meh hta‸ pa taw yawˇ hkʼaˬ ma gʼa tu‸ gʼa hkanˍ tuˬ ve ngaˬ yawˇ hta‸ maw piˇ tuˬ yoˬ teh‸ kʼoˆ piˇ ve yoˬ.

17Hkʼe te leh, Aˍnaˍniˆ kʼai leh yehˬ oˇ ve awˬ hkʼaw lo lo‸-e ve yoˬ. Oˇ htaˇ, yawˇ Sawˉlu‸ awˬ hkʼoˆ la‸ sheh taˍ leh kʼoˆ ve, Awˬ nyi paˍ Sawˉlu‸-oˬ, nawˬ mehˆ kʼaw‸ mawˬ la leh da‸ ve kehˬ ve Awˬ ha hpu biˇ la tuˬ, ya‸ kʼaw kʼaˉ lo nawˬ laˬ ve teˇ yanˇ, nawˬ hta‸ yawˇ awˬ to maw laˇ ve Jawˇmawˇ Yeˍsuˆ lehˬ, ngaˬ hta‸ peu laˇ ve yoˬ teh‸ kʼoˆ piˇ ve yoˬ. 18Teˇ cawˬ haˉ Sawˉlu‸ ve mehˆ shiˍ awˬ hkʼaw lo awˬ shehˆ hta‸ shuˍ ve awˬ ceuˬ ce la leh, yawˇ mehˆ kʼaw‸ mawˬ la ve yoˬ. Oˇ htaˇ, yawˇ tu leh baˆtiˆsaˬ hkanˍ yuˬ peuˬ hkʼaw‸ nawˉ, caˇ tuˬ caˇ leh awˬ gʼaˇ kʼaw‸ cawˬ la ve yoˬ.

Daˍmaˍsehˆ venˇ hkʼaw Pawˇlu‸ bon maˍ ve

19Daˍmaˍsehˆ venˇ awˬ hkʼaw lo awˬ la‸ gʼawˇ hui geh yawˇ teˇ tcuhˉ teˇ jaw chehˇ leh, 20Yeˍsuˆ lehˬ Gʼuiˬsha ve Yaˇ hpu yoˬ teh‸, teˇ cawˬ haˉ bon yehˬ teˇ hpaˍ awˬ hkʼaw lo yawˇ tanˬ maˍ piˇ ve yoˬ.

21Gʼa kaˇ ve chaw hkʼa peu-eˬ anˇ leh kʼoˆ ve, Chi hpaˇ lehˬ, Yeˍruˆsaˍlehnˍ venˇ awˬ hkʼaw lo awˬ meh oˇ ve hta‸ hkʼa kuˬ ve chaw hui hta‸ te luˬ shehˍ hpaˇ hpeh‸ ve maˇ heˆ laˇ. Choˬ kaˬ lo htawˇ, oˇ hkʼe ve chaw teˇ hpaˍ hta‸ hpeh yuˬ leh paw hkuˇ lonˉ hui geh sheh kʼai tuˬ yawˇ gaˬ la peuˬ teh‸ yawˇ hui kʼoˆ da‸ ve yoˬ.

22Sawˉlu‸ lehˬ, co ha hpawˇ shaˬ te shaˬ awˬ gʼaˇ uiˍ la leh, Yeˍsuˆ lehˬ Hkri‸ hpeh‸ tehˬ ve yoˬ teh‸ hkʼa deh‸ maˍ piˇ ve pa taw, Daˍmaˍsehˆ venˇ hkʼaw chehˇ ve Yuˇda‸ chaw teˇ hpaˍ hkʼaˬ hkʼe kʼaw‸ kʼoˆ tuˬ, yawˇ hui a ciˉ ka‸ dawˇ maˇ tawˆ ve yoˬ.

23Awˬ nyi awˬ haˉ hkʼa cawˇ cawˇ maw la peuˬ htaˇ, Sawˉlu‸ hta‸ tiˇ pehˍ tuˬ Yuˇda‸ chaw hui jehˬ da‸ ve yoˬ. 24Ya‸ hkʼaˇ, yawˇ hui jehˬ da‸ ve hta‸ Sawˉlu‸ gʼa shiˍ ve yoˬ. Yawˇ hta‸ tiˇ pehˍ tuˬ, venˇ yehˬ miˉ teˇ hpaˍ hta‸ tanˇ hkuinˇ tanˇ vanˇ yawˇ hui shaw chehˇ ve pa taw, 25yawˇ ve awˬ la‸ gʼawˇ teˇ hpaˍ tanˇ hkuinˇ htaˇ Sawˉlu‸ hta‸ shiˍ veu leh, hkʼaˉ puˍ lu hkʼaw keu leh lanˇ venˇ awˬ baˬ lo yawˇ hta‸ hpehˇ ya‸-e ve yoˬ.

Sawˉlu‸ Yeˍruˆsaˍlehnˍ venˇ hkʼaw chehˇ htaˇ awˬ lawn

26Yawˇ Yeˍruˆsaˍlehnˍ venˇ lo gaˬ la htaˇ, awˬ la‸ gʼawˇ hui hta‸ ca pawnˇ da‸ tuˬ yawˇ te ve htawˇ, yawˇ awˬ la‸ gʼawˇ hpeh‸ la peuˬ ve hta‸ yawˇ hui maˇ yonˍ ve pa taw, yawˇ hui hkʼa peu-eˬ yawˇ hta‸ kawˆ ve yoˬ. 27Ya‸ hkʼaˇ Baˍnaˍbaˆ yawˇ hta‸ shiˍ veu leh, tcuh yaˇ hui geh kʼai ve yoˬ. Sawˉlu‸ yawˇ ya‸ kʼaw kʼaˉ lo Jawˇmawˇ Yeˍsuˆ hta‸ gʼa mawˬ leh, Jawˇmawˇ Yeˍsuˆ yawˇ hta‸ tawˇ yaw laˇ ve awˬ lawn maˇ kʼoˆ, Daˍmaˍsehˆ venˇ hkʼaw lo Yeˍsuˆ ve awˬ meh hta‸ cuˇ leh nyi ma ha‸ hanˉ ve awˬ hkʼaw lo yawˇ bon maˍ piˇ ve awˬ lawn maˇ kʼoˆ, Baˍnaˍbaˆ yawˇ hui hta‸ kʼaoˍ maˍ piˇ ve yoˬ. 28Hkʼe te leh, Sawˉlu‸ lehˬ Yeˍruˆsaˍlehnˍ venˇ awˬ hkʼaw lo yawˇ hui geh chehˇ leh, tawˆ tawˆ lo‸ lo‸ te chehˇ ve yoˬ. Jawˇmawˇ Yeˍsuˆ ve awˬ meh hta‸ cuˇ leh, nyi ma ha‸ hanˉ ve awˬ hkʼaw lo yawˇ bon maˍ ve yoˬ. 29Heˍlaˍsaˆ hkawˇ yaw ve Yuˇda‸ chaw teˇ hpaˍ geh yawˇ na‸ uˉ te da‸ leh tawˇ gʼawˬ da‸ ve yoˬ. Oˇ htaˇ, yawˇ hui lehˬ yawˇ hta‸ tiˇ pehˍ tuˬ te chehˇ ve yoˬ. 30Awˬ lawn oˇ ve hta‸ awˬ viˉ awˬ nyi teˇ hpaˍ gʼa shiˍ htaˇ, yawˇ hta‸ Kehˉsaˍriˆ venˇ lo shiˍ kʼai leh, Taˍsuˆ venˇ hkʼa gaˬ yawˇ hta‸ kʼo‸-e tcuh ve yoˬ.

31Oˇ hta‸, Yuˇda‸ mvuhˇmiˬ, Gaˍliˍlehˇ mvuhˇ miˬ leh Saˍmaˍriˆ mvuhˇmiˬ teˇ kaˬ le le lo chehˇ ve Hkri‸ yaˇ awˬ moˍ lehˬ, dawˇ sha gaˇ sha cawˬ leh, uiˍ la mvuh la ve yoˬ. Jawˇ mawˇ Gʼuiˬsha hta‸ kawˆ ve awˬ hkʼaw lo maˇ kʼoˆ, da‸ ve kehˬ ve Awˬ ha hpu dawˇ sha piˇ ve awˬ hkʼaw lo maˇ kʼoˆ, yawˇ hui toˇ kʼai leh maˇ la chehˇ ve yoˬ.

Ehˉneˍ hta‸ gu na-e piˇ ve

32Oˇ htaˇ Peˍtruˆ lehˬ, yawˇ hui ve chehˇ kuiˬ teˇ kaˬ peuˬ teˇ kaˬ lo kʼai leh, Luˇdaˆ venˇ hkʼaw lo chehˇ ve Hkri‸ yaˇ hui geh gaˬ ve yoˬ. 33Oˇ kaˬ lo hkui sheh la‸ sheh suh leh, hiˉ hkʼaw‸ hkʼa gaˬ zuh‸ chehˇ ve Ehˉneˍ meh ve chaw teˇ gʼaˇ hta‸ yawˇ gʼa mawˬ ve yoˬ. 34Peˍtruˆ yawˇ hta‸ kʼoˆ piˇ ve, Ehˉneˍ-oˬ, Yeˍsuˆ Hkri‸ nawˬ hta‸ gu na-e laˇ ve yoˬ. Tu leh nawˬ ve zuh‸ hpui hta‸ gu teh-o teh‸, yawˇ hta‸ kʼoˆ piˇ htaˇ, teˇ cawˬ haˉ yawˇ tu la ve yoˬ. 35Luˇdaˆ venˇ leh Shaˍronˍ mvuhˇmiˬ awˬ hkʼaw chehˇ ve chaw hkʼa peu-eˬ na-e la peuˬ ve chaw oˇ ve hta‸ gʼa mawˬ leh, Jawˇ mawˇ Yeˍsuˆ geh hpfuhˆ kʼaw‸ la ve yoˬ.

Dawˍkaˍ hta‸ kʼaw‸ te‸ tu la piˇ ve

36Yuˇpeˍ venˇ awˬ hkʼaw lo Taˍbiˉtaˆ meh ve awˬ la‸ gʼawˇ ma teˇ gʼaˇ cawˬ ve yoˬ. Awˬ meh oˇ ve Heˍlaˍsaˆ hkawˇ kʼo, Dawˍkaˍ yoˬ. Yaˇ miˇ oˇ ve lehˬ, da‸ ve kanˉ teˇ hpaˍ leh, shu hta‸ ha kʼaˉ leh tanˇ piˇ ve teˇ hpaˍ hkʼa biˇ cawˬ ve yoˬ. 37Awˬ yanˇ oˇ ve awˬ hkʼaw lo yawˇ naˬ leh suh ve yoˬ. Yawˇ hui yawˇ hta‸ iˉ kaˆ tsuhˇ piˇ peuˬ leh, bawehˇ awˬ hta‸ teˇ htai‸ lo yawˇ hta‸ teh taˍ ve yoˬ. 38Luˇdaˆ venˇ lehˬ Yuˇpeˍ venˇ hta‸ neˇ leh, Peˍtruˆ Luˇdaˆ venˇ awˬ hkʼaw lo chehˇ taˍ ve awˬ lawn hta‸ awˬ la‸ gʼawˇ hui gʼa kaˇ htaˇ, yawˇ hui chaw nyiˇ gʼaˇ hta‸ kʼai tcuh leh, Awˬ yanˇ maˇ jiˆ leh ngaˬ hui geh haˆ haˆ laˬ-o‸ teh‸, yawˇ huiˉ maˬ yawˇ hta‸ lawˬ hkawˉ ve yoˬ. 39Hkʼe te leh, Peˍtruˆ tu leh yawˇ huiˉ maˬ geh kʼai ve yoˬ. Oˇ kaˬ lo gaˬ htaˇ, bawehˇ awˬ hta‸ teˇ htai‸ lo yawˇ hta‸ shiˍ kʼai ve yoˬ. Mehˇchawˇma hkʼa peu-eˬ Peˍtruˆ awˬ paˇ huˉ taˍ leh hawˬ leh, Dawˍkaˍ yawˇ hui geh chehˇ htaˇ, tawˉ taˍ ve aˉ po‸ veu‸ kʼaˇ teˇ hpaˍ yawˇ hta‸ maˍ piˇ ve yoˬ. 40Peˍtruˆ lehˬ, yawˇ hui hkʼa peu-eˬ hta‸ tawˆ kʼai tcuh peuˬ hkʼaw‸ nawˉ, yawˇ hkui tcuhˉ teh leh bon lawˬ ve yoˬ. Peuˬ leh, awˬ suh ku hpawˇ yawˇ hpfuhˆ leh, Taˍbiˉtaˆ-oˬ, tu-o teh‸ kʼoˆ ve yoˬ. Yaˇ miˇ oˇ ve mehˆ hpaw leh Peˍtruˆ hta‸ mawˬ htaˇ, tu mui ve yoˬ. 41Oˇ htaˇ, Peˍtruˆ la‸ sheh che leh, yawˇ hta‸ gʼawˬ tu piˇ peuˬ hkʼaw‸ nawˉ, Hkri‸ yaˇ hui leh mehˇchawˇma teˇ hpaˍ hta‸ kuˬ yuˬ leh, te‸ la peuˬ ve yaˇ miˇ oˇ ve yawˇ hui hta‸ kʼaw‸ a‸ piˇ ve yoˬ. 42Awˬ lawn chi, Yuˇpeˍ venˇ teˇ kaˬ le le awˬ hkʼaw lo bvuhˬ kʼai leh, chaw maˇ maˇ Jawˇ mawˇ Yeˍsuˆ hta‸ yonˍ la ve yoˬ. 43Peˍtruˆ lehˬ, Yuˇpeˍ venˇ awˬ hkʼaw lo Siˉmonˍ meh ve shaˍ guiˬ te paˍ geh awˬ nyi awˬ haˉ a ciˉ maw chaweh chehˇ ve yoˬ.

Currently Selected:

Tcuh yaˇ li‸ 9: LHBE

Highlight

Copy

Compare