Tcuh yaˇ li‸ 8

1Yawˇ hta‸ tiˇ pehˍ ve lehˬ, Sawˉlu‸ htawˇ nyi ma cawˇ ve yoˬ.

Sawˉlu‸ Hkriˬ yaˇ awˬ moˍ hta‸ fawˉ mehˍ ve

Oˇ ve teˇ nyi hta‸ tanˬ leh Yeˍruˆsaˍlehnˍ venˇ hkʼaw chehˇ ve Hkri‸ yaˇ awˬ moˍ lehˬ, fawˉ mehˍ jaˇ ve hta‸ gʼa hkanˍ ve pa taw, tcuh yaˇ teˇ hpaˍ maˇ heˆ kʼo, yawˇ hui hkʼa peu-eˬ hpaˆ da‸ leh Yuˇda‸ mvuhˇmiˬ leh Saˍmaˍriˆ mvuhˇ miˬ teˇ kaˬ le le lo hpaw-e ve yoˬ. 2Gʼuiˬsha hta‸ yawˆ yan ve chaw teˇ hpaˍ lehˬ, Saˍteˍhpanˍ hta‸ ca tuˍ piˇ leh, yawˇ hta‸ pa taw gʼaˇ hte‸ paˆ hawˬ kehˇ hawˬ ve yoˬ.

3Ya‸ hkʼaˇ Sawˉlu‸ lehˬ, Hkri‸ yaˇ awˬ moˍ hta‸ te luˬ chehˇ ve yoˬ. Yawˇ teˇ yehˬ peuˬ teˇ yehˬ hkʼaw lo‸-e leh, hawˉ hkʼaˆ yaˇ miˇ teˇ hpaˍ hta‸ gʼawˬ kʼai leh, htawnˍ hkʼaw lo ca keu taˍ ve yoˬ.

Saˍmaˍriˆ mvuhˇmiˬ lo ha lehˬ ve bon hkawˇ bvuhˬ kʼai ve

4Hkʼe te leh hpaˆ da‸ kʼai ve chaw teˇ hpaˍ lehˬ, teˇ kaˬ peuˬ teˇ kaˬ lo kʼai leh ha lehˬ ve bon hkawˇ ca maˍ piˇ ve yoˬ. 5Hpiˇliˇpuˆ htawˇ, Saˍmaˍriˆ venˇ lo kʼai leh yawˇ hui hta‸ Hkri‸ awˬ lawn maˍ piˇ ve yoˬ. 6Yawˇ maˍ ve hta‸ gʼa kaˇ leh, yawˇ te ve awˬ heˆ hta‸ gʼa mawˬ htaˇ, chaw awˬ moˍ lonˉ lehˬ, nyi ma teˇ shiˍ tiˉ taˍ leh yawˇ ve tawˇ hkawˇ hta‸ na ve yoˬ. 7Awˬ lawn kʼo, neˇ cha‸ chiˆ geh ve chaw maˇ maˇ awˬ hkʼaw lo, neˇ teˇ hpaˍ bvuhˬ chaweh kuˬ leh tawˆ kʼai ve yoˬ. Hkui sheh la‸ sheh suh ve chaw leh, hkui luˬ ve chaw maˇ maˇ hta‸ htawˇ gu na-e piˇ ve yoˬ. 8Hkʼe te leh, venˇ yaˇ oˇ ve teˇ hpaˍ maˇ maˇ ha lehˬ jaˇ ve yoˬ.

9Siˉmonˍ meh ve chaw teˇ gʼaˇ lehˬ, ponˬ laˬ htaˇ venˇ oˇ ve awˬ hkʼaw lo faˍ te leh, Saˍmaˍriˆ chaw hui hta‸ maˇ maˇ anˇ piˇ lawˬ ve yoˬ. Ngaˬ lehˬ chaw uiˍ teˇ gʼaˇ hpeh‸ ve yoˬ teh‸ yawˇ kʼoˆ ve yoˬ. 10Uiˍ ve i ve chaw hkʼa peu-eˬ htawˇ, Chaw chi hpaˇ lehˬ, uiˍ jaˇ ve kanˇ paˆ teh‸ kʼoˆ ve Gʼuiˬsha ve kanˇ paˆ hpeh‸ ve yoˬ teh‸ yawˇ hui kʼoˆ leh, yawˇ ve tawˇ hkawˇ hta‸ na ve yoˬ. 11Chaw oˇ ve lehˬ, maw chaweh faˍ te maˍ leh, yawˇ hui hta‸ anˇ piˇ lawˬ ve pa taw, yawˇ hui yawˇ ve tawˇ hkawˇ hta‸ na ve yoˬ. 12Ya‸ hkʼaˇ, Gʼuiˬsha ve mvuhˇmiˬ leh Yeˍsuˆ Hkri‸ ve awˬ meh hta‸ caˉ da‸ ve ha lehˬ ve bon hkawˇ awˬ lawn Hpiˇliˇpuˆ maˍ ve hta‸ yawˇ hui yonˍ la leh, hawˉ hkʼaˆ yaˇ miˇ teˇ hpaˍ baˆtiˆsaˬ hkanˍ yuˬ ve yoˬ. 13Siˉmonˍ yawˇ awˬ to htawˇ yonˍ la leh, baˆtiˆsaˬ hkanˍ yuˬ peuˬ hkʼaw‸ nawˉ, Hpiˇliˇpuˆ awˬ hkʼaˇ suh kʼai ve yoˬ. Awˬ heˆ leh uiˍ ve anˇ tuˬ teˇ hpaˍ hta‸ gʼa mawˬ htaˇ, yawˇ anˇ jaˇ ve yoˬ.

14Saˍmaˍriˆ chaw hui Gʼuiˬsha ve tawˇ hkawˇ hta‸ ha‸ yuˬ ve awˬ lawn Yeˍruˆsaˍlehnˍ venˇ hkʼaw chehˇ ve tcuh yaˇ teˇ hpaˍ gʼa kaˇ htaˇ, yawˇ hui Peˍtruˆ leh Yoˇhanˬ hta‸ oˇ kaˬ lo kʼai tcuh ve yoˬ. 15Yawˇ huiˉ maˬ oˇ kaˬ lo gaˬ htaˇ, chaw oˇ ve teˇ hpaˍ da‸ ve kehˬ ve Awˬ ha hpu gʼa tuˬ, yawˇ hui awˬ pon bon lawˬ piˇ ve yoˬ. 16Awˬ lawn kʼo, yawˇ hui awˬ hkʼaw lo chaw teˇ gʼaˇ awˬ hkʼoˆ hta‸ ka‸, da‸ ve kehˬ ve Awˬ ha hpu maˇ ya‸ la sheˍ. Yawˇ hui lehˬ, Jawˇmawˇ Yeˍsuˆ ve awˬ meh awˬ hkʼaw lo baˆtiˆsaˬ hkanˍ ve ceh tiˉ sheˍ. 17Oˇ htaˇ, tcuh yaˇ oˇ ve nyiˇ gʼaˇ yawˇ hui awˬ hkʼoˆ hta‸ la‸ sheh taˍ leh, yawˇ hui da‸ ve kehˬ ve awˬ ha hpu gʼa ve yoˬ.

18Tcuh yaˇ oˇ ve nyiˇ gʼaˇ shu awˬ hkʼoˆ hta‸ la‸ sheh taˍ ve pa taw da‸ ve kehˬ ve Awˬ ha hpu gʼa ve hta‸ Siˉmonˍ gʼa mawˬ htaˇ, yawˇ hpu yuˬ veu laˇ leh kʼoˆ ve, 19Hkʼaˬ ve teˇ gʼaˇ awˬ hkʼoˆ hta‸ maˇ kʼoˆ, ngaˬ la‸ sheh taˍ ve teˇ yanˇ yawˇ da‸ ve kehˬ ve Awˬ ha hpu gʼa tuˬ, kanˇ paˆ chi ngaˬ hta‸ htawˇ pe‸ laˇ-oˆ teh‸ lawˬ ve yoˬ.

20Peˍtruˆ yawˇ hta‸ kʼaw‸ kʼoˆ piˇ ve, Gʼuiˬsha ve la‸ shawnˍ hta‸ hpu piˇ leh gʼa tuˬ teh‸ nawˬ dawˇ ve pa taw, nawˬ ve hpu lehˬ nawˬ geh hkʼa geh luˬ kʼai piˇ-oˆ. 21Gʼuiˬsha mehˆ gʼuˇ suhˍ nawˬ ve nyi ma maˇ hteˇ ve pa taw, kanˉ chi hta‸ nawˬ a ciˉ ka‸ maˇ caˉ da‸. 22Hkʼe te leh, nawˬ awˬ hkʼaw lo haiˬ ve chi hta‸ dawˇ hpfuhˆ loˬ. Hpeh‸ ve kʼo, nawˬ ve nyi ma dawˇ hkʼaˇ hta‸ Jawˇmawˇ Gʼuiˬsha hpehˇ laˇ tuˬ yawˇ hta‸ lawˬ hkawˉ-oˆ. 23Awˬ lawn kʼo, nawˬ awˬ hkʼaw lo hkʼaˇ ve awˬ taw‸ ma cawˬ leh, venˇbaˆ nawˬ hta‸ hpeh tiˍ taˍ ve hta‸ ngaˬ gʼa mawˬ ve yoˬ teh‸, yawˇ hta‸ kʼoˆ piˇ ve yoˬ.

24Oˇ htaˇ Siˉmonˍ kʼaw‸ kʼoˆ piˇ ve, Nawˬ huiˉ maˬ hkʼa kʼoˆ ve teˇ hpaˍ, teˇ ceuˬ ka‸ ngaˬ awˬ hkʼoˆ lo maˇ gʼa gaˬ la tuˬ, ngaˬ awˬ pon Jawˇmawˇ Gʼuiˬsha geh lawˬ hkawˉ laˇ-oˆ teh‸ kʼoˆ ve yoˬ.

25Hkʼe te leh yawˇ huiˉ maˬ shaˉ hkiˆ hkanˍ leh, Jawˇmawˇ Gʼuiˬsha ve tawˇ hkawˇ maˍ piˇ peuˬ hkʼaw‸ nawˉ, Yeˍruˆsaˍlehnˍ venˇ lo kʼaw‸ kʼo‸-e ve yoˬ. Kʼo‸-e chehˇ htaˇ, Saˍmaˍriˆ hkʼaˆ laiˉ hkʼaˆ awˬ hkʼaw lo ha lehˬ ve bon hkawˇ maˍ piˇ ve yoˬ.

Hpiˇliˇpuˆ leh Ehˇtaˍyoˇpiˆ a maˬ lonˉ awˬ lawn

26Oˇ htaˇ, Jawˇmawˇ Gʼuiˬsha ve mvuhˇ naw ma tcuh yaˇ Hpiˇliˇpuˆ hta‸ kʼoˆ piˇ ve, Nawˬ tu leh, awˬ hawˉ hpawˇ lo kʼai-o. Yeˍruˆsaˍlehnˍ venˇ te leh Gaˍsaˍ lo kʼai ve ya‸ kʼaw hta‸ kʼai-o teh‸ kʼoˆ piˇ ve yoˬ. Ya‸ kʼaw oˇ ve lehˬ, shehˇ de hkʼaw kʼai ve ya‸ kʼaw yoˬ. 27Hkʼe te leh, yawˇ tu leh kʼai ve yoˬ. Oˇ htaˇ, Ehˇtaˍyoˇpiˆ mvuhˇmiˬ hta‸ uˉ peunˍ ve, Kanˍdaˍkeˍ meh ve nanˇ hawˉ hkanˇ ma awˬ hawˉ lo jawˇmawˇ te ve Ehˇtaˍyoˇpiˆ chaw teˇ gʼaˇ lehˬ, Yeˍruˆsaˍlehnˍ venˇ lo oˉ kʼoˍ ca pui kʼaw‸ la ve yoˬ. Yawˇ lehˬ, nanˇ hawˉ hkanˇ ma ve hpu shi mawˇ jeˬ hkʼa peu-eˬ hta‸ ha‸ shaˉ shehˍ hpaˇ lonˉ teˇ gʼaˇ hpeh‸ ve yoˬ. 28Yawˇ kʼo‸-e chehˇ htaˇ, yawˇ ve iˉ mvuhˇ lawˬ awˬ hkʼaw lo mui leh, tcuh kaˍ paˍ Iˉsaˍyaˆ ve li‸ hta‸ gʼaw chehˇ ve yoˬ. 29Oˇ htaˇ, Hpiˇliˇpuˆ hta‸ Awˬ ha hpu kʼoˆ piˇ ve, Iˉ mvuhˇ lawˬ oˇ ve geh teˇ geh kʼai-o teh‸ kʼoˆ piˇ ve yoˬ. 30Hkʼe te leh, Hpiˇliˇpuˆ gʼuiˇ kʼai leh, tcuh kaˍ paˍ Iˉsaˍyaˆ ve li‸ hkʼaw lo jawˇmawˇ oˇ ve gʼaw chehˇ ve hta‸ yawˇ gʼa kaˇ htaˇ, Nawˬ gʼaw chehˇ ve awˬ lawn chi hta‸ nawˬ shiˍ-aˬ laˇ teh‸ yawˇ hta‸ na nyi ve yoˬ.

31Yawˇ kʼaw‸ kʼoˆ ve, Shu ngaˬ hta‸ tcuhˉ kuiˬ maˇ kʼaoˍ maˍ laˇ ve kʼo, hkʼaˬ hkʼe te shiˍ hpeh‸ tuˬ le teh‸ kʼoˆ peuˬ leh, yawˇ geh teˇ geh taˆ mui la tuˬ yawˇ Hpiˇliˇpuˆ hta‸ kuˬ ve yoˬ. 32Yawˇ gʼaw chehˇ ve Li‸ hpu lehˬ chi teˇ tawn yoˬ.

Tiˇ pehˍ tuˬ awˬ pon yawˬ hkʼa shuˍ shuˍ yawˇ hta‸ sheh kʼai ve yoˬ.

Yawˬ mvuh nuˆ shehˍ hpaˇ mehˆ gʼuˇ suhˍ yawˬ ehˉ ta‸ iˉ chehˇ ve hkʼe,

yawˇ ka‸ yawˇ ve maw‸ kʼaw maˇ ngaˉ leh ta‸ iˉ chehˇ taˍ ve yoˬ.

33Nyiˉ ya‸ ve hta‸ gʼa hkanˍ htaˇ, shu yawˇ hta‸ maˇ hteˇ maˇ cawˇ ve awˬ hkʼaw lo suhˉ jehˬ ve yoˬ.

Yawˇ ve awˬ ceuˬ awˬ hkʼaˇ hta‸ a shu kʼaoˍ hpeh‸ tuˬ le.

Awˬ lawn kʼo, miˬguiˬ hkʼoˆ lo yawˇ ve a sha‸ hta‸ yuˬ baˬ ve yoˬ, teh‸ bvuh‸ taˍ ve yoˬ. #Isy 53:7-8

34A ma‸ lonˉ lehˬ Hpiˇliˇpuˆ hta‸ na nyi ve, Gʼuiˬsha ve tcuh kaˍ paˍ chi teˇ gʼaˇ a shu awˬ lawn kʼoˆ ve le. Yawˇ awˬ to awˬ lawn kʼoˆ ve laˇ. Maˇ heˆ kʼo, awˬ kaˍ awˬ nu teˇ gʼaˇ awˬ lawn kʼoˆ ve laˇ, ngaˬ nawˬ hta‸ a ciˉ na nyi gaˇ ve yoˬ teh‸ kʼoˆ piˇ ve yoˬ. 35Oˇ htaˇ, Hpiˇliˇpuˆ maw‸ kʼaw ngaˉ leh, Li‸ hpu chi teˇ tawn hta‸ tanˬ leh, Yeˍsuˆ ve awˬ lawn ha lehˬ ve bon hkawˇ yawˇ hta‸ kʼaoˍ maˍ piˇ ve yoˬ. 36Yawˇ hui ya‸ kʼaw kʼaˉ lo kʼai chehˇ htaˇ, iˉ kaˆ cawˬ kuiˬ teˇ kaˬ lo gaˬ la leh, a ma‸ lonˉ kʼoˆ ve, Nyi loˬ, choˬ kaˬ iˉ kaˆ cawˬ ve yoˬ. Ngaˬ baˆtiˆsaˬ maˇ gʼa hkanˍ tuˬ, aˬ hto‸ ma tawˍ taˍ tuˬ cawˬ le teh‸ kʼoˇ piˇ ve yoˬ. #8:36 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -37 Hpiˇliˇpuˆ kʼoˆ ve, Nawˬ ve nyi ma awˬ tawˬ hkʼa gaˬ yonˍ ve kʼo, baˆtiˆsaˬ hkanˍ ve yoˬ teh‸ kʼoˆ ve yoˬ. Jawˇmawˇ kʼaw‸ kʼoˆ ve, Yeˍsuˆ Hkri‸ leh Gʼuiˬsha ve Yaˇ hpu hpeh‸ ve yoˬ teh‸ ngaˬ yonˍ ve yoˬ.

38Oˇ htaˇ, yawˇ iˉ mvuhˇ lawˬ hta‸ jehˇ tcuh leh, yawˇ huiˉ maˬ nyiˇ gʼaˇ gʼaˇ iˉ kaˆ hkʼaw lo ya‸-e leh, Hpiˇliˇpuˆ lehˬ a ma‸ lonˉ hta‸ baˆtiˆsaˬ piˇ ve yoˬ. 39Yawˇ huiˉ maˬ iˉ kaˆ hkʼaw lo tawˆ la htaˇ, Jawˇmawˇ Gʼuiˬsha ve Awˬ ha hpu Hpiˇliˇpuˆ hta‸ teˇ cawˬ haˉ yuˬ kʼai leh, a ma‸ lonˉ yawˇ hta‸ maˇ kʼaw‸ mawˬ. A ma‸ lonˉ lehˬ, ha lehˬ ha kʼa awˬ gʼuˇ suhˍ kʼaw‸ kʼai ve yoˬ. 40Oˇ htaˇ, Aˍcoˆ venˇ awˬ hkʼaw lo Hpiˇliˇpuˆ hta‸ shu gʼa mawˬ ve yoˬ. Yawˇ awˬ gʼuˇ suhˍ kʼai leh, Kehˉsaˍriˆ venˇ hkʼa gaˬ, venˇ hkʼaˆ hkʼa peu-eˬ awˬ hkʼaw lo ha lehˬ ve bon hkawˇ maˍ piˇ ve yoˬ.

Currently Selected:

Tcuh yaˇ li‸ 8: LHBE

Highlight

Copy

Compare