Tcuh yaˇ li‸ 10

Peˍtruˆ leh Kawˍneˍliˆ awˬ lawn

1Kehˉsaˍriˆ venˇ awˬ hkʼaw lo, Kawˍneˍliˆ meh ve ma‸ poˍ teˇ gʼaˇ cawˬ ve yoˬ. Yawˇ lehˬ, Iˉtaˍliˍ ma‸ moˍ teˇ ta‸ hta‸ caˉ da‸ ve yoˬ. 2Yawˇ leh yawˇ ve yehˬ yaˇ kʼa yaˇ hkʼa peu-eˬ Gʼuiˬsha hta‸ kawˆ puiˉ leh yawˆ yan puiˉ ve chaw hpeh‸ ve yoˬ. Yawˇ shu hta‸ ha kʼaˉ ve awˬ hkʼaw lo maˇ maˇ tanˇ piˇ leh, Gʼuiˬsha geh hkʼaˬ htaˆ ka‸ bon lawˬ tcuhˉ taˍ ve yoˬ. 3Teˇ nyi htaˇ, mvuhˇ hpeu‸ hpawˇ aˬ laˬ hkʼe shehˆ naˍ riˍ teˇ yanˇ, awˬ ha awˬ hkʼaw lo Gʼuiˬsha ve mvuhˇ naw ma tcuh yaˇ teˇ gʼaˇ yawˇ geh laˬ ve hta‸ hkʼa tawˍ lehˆ gʼa mawˬ ve yoˬ. Mvuhˇ naw ma tcuh yaˇ oˇ ve lehˬ, Kawˍneˍliˆ-oˬ teh‸ yawˇ hta‸ kuˬ ve yoˬ.

4Kawˍneˍliˆ yawˇ hta‸ hkʼa deh‸ nyi leh kawˆ jaˇ ve awˬ hkʼaw lo, Jawˇmawˇ-oˬ, aˬ hto‸ ma le teh‸ na nyi ve yoˬ.

Mvuhˇ naw ma tcuh yaˇ yawˇ hta‸ kʼoˆ piˇ ve, Nawˬ bon lawˬ ve hkawˇ leh tanˇ piˇ ve teˇ hpaˍ Gʼuiˬsha mehˆ gʼuˇ suhˍ gaˬ leh, yawˇ dawˇ nawˇ chehˇ ve yoˬ. 5Chi beu‸ Yuˇpeˍ venˇ lo chaw hta‸ kʼai tcuh leh, Peˍtruˆ teh‸ kʼoˆ ve Siˉmonˍ meh ve teˇ gʼaˇ hta‸ ca kuˬ tcuh-o. 6Yawˇ lehˬ shaˍ guiˬ te paˍ Siˉmonˍ ve aˉ hkʼaw lo chehˇ taˍ ve yoˬ. Yehˬ oˇ ve lehˬ, laˇ tsuhˇ gʼuiˬ pfuhˍ paˇ lo cawˬ ve yoˬ teh‸ kʼoˆ piˇ ve yoˬ. 7Yawˇ hta‸ tawˇ yaw ve mvuhˇ naw ma tcuh yaˇ kʼo‸-e peuˬ hkʼaw‸ nawˉ, yawˇ ve awˬ ceˬ nyiˇ gʼaˇ leh, yawˇ geh hkʼaˬ htaˆ ka‸ chehˇ ve ma‸ yaˇ hui awˬ hkʼaw lo Gʼuiˬsha hta‸ yawˆ yan ve teˇ gʼaˇ hta‸ kuˬ ve yoˬ. 8Awˬ lawn hkʼa peu-eˬ yawˇ hui hta‸ kʼaoˍ maˍ piˇ peuˬ hkʼaw‸ nawˉ, Yuˇpeˍ venˇ lo kʼai tcuh ve yoˬ.

9Awˬ hkʼaw‸ nawˉ teˇ nyi yawˇ hui kʼai leh, Yuˇpeˍ venˇ awˬ paˇ lo gaˬ la ve teˇ yanˇ, Peˍtruˆ lehˬ bon lawˬ tuˬ, aˬ laˬ hkʼe mvuhˇ law‸ kʼaw tcuhˆ htaˇ yehˬ awˬ hta‸ teˇ htai‸ lo taˆ-e ve yoˬ. 10Oˇ htaˇ, yawˇ awˍ meu‸ la leh, awˍ caˇ gaˇ ve yoˬ. Shu caˇ tuˬ gu chehˇ ve teˇ yanˇ, zuh‸ maˆ mawˬ ve hkʼe awˬ ha awˬ hkʼaw lo mvuhˇ naw ma hpaw taˍ ve hta‸ yawˇ gʼa mawˬ ve yoˬ. 11Aˉ boˆ lonˉ hkʼa shuˍ shuˍ ve teˇ maˬ lehˬ, awˬ ceˍ awˇ ceˍ hta‸ hpeh taˍ leh, miˬguiˬ hkʼoˆ lo hpehˇ ya‸ la ve hta‸ yawˇ gʼa mawˬ ve yoˬ. 12Oˇ ve awˬ hkʼaw lo, hkui sheh la‸ sheh awˍ lehˇ cawˬ ve to nuˇ to shaˆ awˬ ceuˬ hkʼa peu-eˬ, loˇ kʼai gaˆ kʼai puiˉ ve awˬ ceuˬ hkʼa peu-eˬ leh, mvuhˇ hpe lo poˬ ve ngaˆ awˬ ceuˬ hkʼa peu-eˬ cawˬ ve yoˬ. 13Oˇ htaˇ, awˬ hkawˇ bvuhˬ la ve, Peˍtruˆ-oˬ, tu leh tiˇ caˇ-oˆ teh‸ kʼoˆ ve hta‸ yawˇ gʼa kaˇ ve yoˬ.

14Ya‸ hkʼaˇ Peˍtruˆ lehˬ, Jawˇmawˇ-oˬ, maˇ hpeh‸ taˬ. Cha‸ chiˆ leh maˇ da‸ maˇ kehˬ ve awˬ ceuˬ hta‸ ngaˬ teˇ pawˆ ka‸ maˇ caˇ jaw teh‸ kʼaw‸ kʼoˆ piˇ ve yoˬ.

15Teˇ pawˆ awˬ hkawˇ kʼaw‸ bvuhˬ la leh kʼoˆ ve, Gʼuiˬsha da‸ piˇ kehˬ piˇ peuˬ ve awˬ ceuˬ hta‸ cha‸ chiˆ ve taˇ kʼoˆ teh‸, yawˇ gʼa kʼaw‸ kaˇ ve yoˬ. 16Chi hkʼe shehˆ pawˆ hpeh‸ peuˬ leh, aˉ boˆ lonˉ hkʼa shuˍ shuˍ ve oˇ ve hta‸ teˇ cawˬ haˉ mvuhˇ naw ma lo kʼaw‸ yuˬ taˆ-e ve yoˬ.

17Peˍtruˆ lehˬ, awˬ ha awˬ hkʼaw gʼa mawˬ ve aˬ hto‸ ma tcuhˉ kuiˬ leh naˍ, yawˇ ve nyi ma hkʼaw lo dawˇ maˇ tawˆ te chehˇ htaˇ, Kawˍneˍliˆ tcuh peu laˇ ve chaw hui lehˬ, Siˉmonˍ ve yehˬ hta‸ ca na laˬ leh, yehˬmiˉhpe‸ lo gaˬ la peuˬ. 18Yawˇ hui kuˬ leh, Peˍtruˆ teh‸ kʼoˆ ve Siˉmonˍ meh ve teˇ gʼaˇ choˬ kaˬ chehˇ-aw laˇ teh‸ na nyi ve yoˬ.

19Peˍtruˆ lehˬ, awˬ ha awˬ hkʼaw lo yawˇ gʼa mawˬ ve hta‸ dawˇ nyi chehˇ htaˇ, Awˬ ha hpu yawˇ hta‸ kʼoˆ piˇ ve, Chaw shehˆ gʼaˇ nawˬ hta‸ ca chehˇ ve yoˬ. Tu leh ya‸ kʼai loˬ. 20Nyi ma htawˇdawˇnawˬdawˇ taˇ te. Yawˇ hui geh kʼai loˬ. Awˬ lawn kʼo, ngaˬ yawˇ hui hta‸ peu laˇ ve yoˬ teh‸ kʼoˆ piˇ ve yoˬ. 21Oˇ htaˇ Peˍtruˆ chaw oˇ ve teˇ hpaˍ geh ya‸-e leh, Ngaˬ lehˬ nawˬ hui ca ve chaw teˇ gʼaˇ yoˬ. Aˬ hto‸ ma awˬ lawn cawˬ leh laˬ ve le teh‸, yawˇ hui hta‸ na nyi ve yoˬ.

22Yawˇ hui kʼaw‸ kʼoˆ piˇ ve, Chaw da‸ chaw hteˇ, Gʼuiˬsha hta‸ kawˆ leh, Yuˇda‸ chaw hkʼa peu-eˬ yawˇ awˬ lawn shaˉ hkiˆ hkanˍ ve Kawˍneˍliˆ meh ve ma‸ poˍ teˇ gʼaˇ cawˬ ve yoˬ. Nawˬ hta‸ yawˇ ve yehˬ hkʼaw lo kuˬ yuˬ leh, nawˬ ve tawˇ hkawˇ hta‸ na tuˬ, da‸ kehˬ ve mvuhˇ naw ma tcuh yaˇ teˇ gʼaˇ yawˇ hta‸ hpeu‸ maˍ piˇ peuˬ teh‸ yawˇ hui kʼoˆ piˇ ve yoˬ. 23Hkʼe te leh, Peˍtruˆ yawˇ hui hta‸ aˉ hkʼaw lo kuˬ yuˬ leh hkʼa deh‸ ha‸ yuˬ ve yoˬ.

Shawˉ pawˍ teˇ nyi hkʼe yawˇ tu leh yawˇ hui geh teˇ geh kʼai ve yoˬ. Yuˇpeˍ venˇ hkʼaw lo chehˇ ve awˬ viˉ awˬ nyi teˇ hpaˍ hpaˍ htawˇ yawˇ geh kʼai ve yoˬ. 24Awˬ hkʼaw‸ nawˉ teˇ nyi yawˇ hui Kehˉsaˍriˆ venˇ hkʼaw gaˬ ve yoˬ. Kawˍneˍliˆ lehˬ, yawˇ ve awˬ viˇ awˬ nyi leh awˬ chawˇ awˬ paˆ hui hta‸ kuˬ hpawnˬ peuˬ leh, yawˇ hui hta‸ law chehˇ ve yoˬ. 25Peˍtruˆ lo‸ la htaˇ, Kawˍneˍliˆ yawˇ hta‸ ha‸ yuˬ leh, Peˍtruˆ ve hkui paˇ lo boˆ sheˬ leh oˉ kʼoˍ pui ve yoˬ. 26Ya‸ hkʼaˇ, Peˍtruˆ yawˇ hta‸ gʼawˬ tu leh, Tu-o, ngaˬ htawˇ chaw hpeh‸ ve yoˬ teh‸ kʼoˆ piˇ ve yoˬ. 27Oˇ htaˇ, Peˍtruˆ Kawˍneˍliˆ geh na‸ uˉ te da‸ leh lo‸-e ve teˇ yanˇ, chaw maˇ maˇ hpawnˬ chehˇ taˍ ve hta‸ gʼa mawˬ ve yoˬ. 28Peˍtruˆ yawˇ hui hta‸ kʼoˆ piˇ ve, Yuˇda‸ chaw teˇ gʼaˇ lehˬ, buiˇshaˆaˉnaˆ chaw hta‸ awˬ chawˇ te ve maˇ kʼoˆ, yawˇ geh ca guiˇ ve maˇ kʼoˆ, te maˇ keunˍ te maˇ cawˇ ve hta‸ nawˬ hui shiˍ taˍ ve yoˬ. Ya‸ hkʼaˇ, hkʼaˬ ve chaw teˇ gʼaˇ hta‸ maˇ kʼoˆ, cha‸ chiˆ ve ka‸, maˇ da‸ maˇ kehˬ ve ka‸ maˇ gʼa kʼoˆ tuˬ Gʼuiˬsha ngaˬ hta‸ maˍ laˇ peuˬ. 29Chi hta‸ pa taw ngaˬ hta‸ kuˬ htaˇ, ngaˬ te‸ chiˉ maˇ kʼaw‸ kʼoˆ leh laˬ ve yoˬ. Hkʼe te leh, aˬ hto‸ ma awˬ lawn cawˬ leh ngaˬ hta‸ ca kuˬ la ve le, ngaˬ na nyi gaˇ ve yoˬ teh‸, yawˇ hui hta‸ kʼoˆ piˇ ve yoˬ.

30Kawˍneˍliˆ kʼaw‸ kʼoˆ ve, Ponˬ laˬ ve awˇ nyi htaˇ, mvuhˇ hpeu‸ hpawˇ shehˆ naˍ riˍ chi teˇ yanˇ, ngaˬ aˉ hkʼaw lo bon lawˬ chehˇ ve yoˬ. Oˇ htaˇ, awˬ gʼeuˆ ba ve veu‸ kʼaˇ veu‸ deh ve chaw teˇ gʼaˇ ngaˬ mehˆ gʼuˇ suhˍ huˉ taˍ leh kʼoˆ ve, 31Kawˍneˍliˆ-oˬ, nawˬ bon lawˬ ve hta‸ Gʼuiˬsha gʼa kaˇ leh, nawˬ ha kʼaˉ leh tanˇ piˇ ve teˇ hpaˍ hta‸ Gʼuiˬsha dawˇ nawˇ chehˇ ve yoˬ. 32Hkʼe te leh, Yuˇpeˍ venˇ lo chaw hta‸ kʼai tcuh leh, Peˍtruˆ teh‸ kʼoˆ ve Siˉmonˍ meh ve chaw teˇ gʼaˇ hta‸ ca kuˬ tcuh-o. Yawˇ lehˬ, laˇ tsuhˇ gʼuiˬ pfuhˍ paˇ lo chehˇ ve shaˍ guiˬ te paˍ Siˉmonˍ ve aˉ hkʼaw lo chehˇ taˍ ve yoˬ teh‸, mvuhˇ naw ma tcuh yaˇ kʼoˆ laˇ ve yoˬ. 33Chi hta‸ pa taw, teˇ cawˬ haˉ ngaˬ nawˬ geh chaw hta‸ kʼai tcuh ve yoˬ. Nawˬ laˬ ve lehˬ, da‸ jaˇ ve yoˬ. Hkʼe te leh, Jawˇ mawˇ Gʼuiˬsha nawˬ hta‸ hkʼa kʼoˆ tcuh laˇ ve hkʼa peu-eˬ hta‸ na tuˬ, chi beu‸ ngaˬ hui hkʼa peu-eˬ Gʼuiˬsha mehˆ gʼuˇ suhˍ chehˇ taˍ ve yoˬ teh‸, Kawˍneˍliˆ kʼaw‸ kʼoˆ piˇ ve yoˬ.

34Oˇ htaˇ, Peˍtruˆ maw‸ kʼaw ngaˉ leh kʼoˆ ve, Gʼuiˬsha lehˬ chaw mehˆ hpfuhˇ hta‸ maˇ nyi ve ngaˬ awˬ tehˬ awˬ na gʼa shiˍ ve yoˬ. 35Chaw teˇ ceuˬ le le awˬ hkʼaw lo Gʼuiˬsha hta‸ kawˆ leh, hteˇ ve cawˇ ve hta‸ te ve chaw teˇ gʼaˇ hta‸ yawˇ nyi ma cawˇ ve yoˬ. 36Gʼuiˬsha lehˬ, Iˉsaˍreˍlaˆ chaw hui hta‸ piˇ ve tawˇ hkawˇ hta‸ nawˬ hui shiˍ ve yoˬ. Tawˇ hkawˇ oˇ ve lehˬ, hkʼa peu-eˬ awˬ hkʼoˆ Jawˇmawˇ hpeh‸ ve Yeˍsuˆ Hkri‸ hta‸ pa taw dawˇ sha gaˇ sha ve hta‸ caˉ da‸ ve ha lehˬ ve bon hkawˇ hpehˬ ve yoˬ. 37Yoˇhanˬ maˍ ve baˆtiˆsaˬ piˇ ve teˇ ceuˬ awˬ hkʼaw‸ nawˉ, Gaˍliˍlehˇ mvuhˇmiˬ hta‸ tanˬ leh Yuˇda‸ mvuhˇmiˬ teˇ kaˬ le le lo ha lehˬ ve bon hkawˇ oˇ ve bvuhˬ kʼai ve yoˬ. 38Bon hkawˇ oˇ ve lehˬ, Naˍzaˍrehˆ chaw Yeˍsuˆ awˬ lawn yoˬ. Gʼuiˬsha lehˬ, da‸ ve kehˬ ve Awˬ ha hpu maˇ kʼoˆ, kanˇ paˆ maˇ kʼoˆ, yawˇ hta‸ ngeuˍ pfuhˍ piˇ ve awˬ lawn leh, Gʼuiˬsha yawˇ geh chehˇ ve pa taw, yawˇ teˇ kaˬ peuˬ teˇ kaˬ lo kʼai chehˇ htaˇ, da‸ ve hta‸ te leh, neˇhaiˬ fawˉ mehˍ ve chaw hkʼa peu-eˬ hta‸ gu na-e piˇ ve awˬ lawn yoˬ. 39Yuˇda‸ chaw hui ve mvuhˇmiˬ awˬ hkʼaw lo maˇ kʼoˆ, Yeˍruˆsaˍlehnˍ venˇ awˬ hkʼaw lo maˇ kʼoˆ, yawˇ hkʼa te ve hkʼa peu-eˬ hta‸ ngaˬ hui htawˇ shaˉ hkiˆ hkanˍ shehˍ hpaˇ hpeh‸ ve yoˬ. Shu yawˇ hta‸ suhˆ hkuiˉ daw hkʼoˆ lo hta‸ pehˍ ve yoˬ. 40Ya‸ hkʼaˇ, shehˆ nyi teˇ nyi gaˬ htaˇ, Gʼuiˬ sha yawˇ hta‸ kʼaw‸ te‸ tuˬ la piˇ leh, chaw teˇ hpaˍ hpaˍ hta‸ yawˇ awˬ to maw piˇ ve yoˬ. 41Chaw hkʼa peu-eˬ hta‸ maw piˇ ve maˇ heˆ. Shaˉ hkiˆ hkanˍ tuˬ awˬ pon awˉ lawˉ htaˇ Gʼuiˬsha leuˆ yuˬ taˍ ve ngaˬ hui hta‸ yawˇ maw laˇ ve yoˬ. Suh kuiˬ lo yawˇ kʼaw‸ te‸ tu la peuˬ hkʼaw‸ nawˉ, ngaˬ hui yawˇ geh hkʼa geh caˇ ve dawˬ ve yoˬ. 42Ngaˬ hui lehˬ, chaw chi ma ve hta‸ bon maˍ piˇ tuˬ yawˇ ngaˬ hui hta‸ tawˇ piˇ taˉ laˇ ve yoˬ. Chi hkʼoˆ ka‸, te‸ chehˇ ve chaw hta‸ maˇ kʼoˆ, suh peuˬ ve chaw hta‸ maˇ kʼoˆ, Yeˍsuˆ lehˬ suhˉ jehˬ shehˍ hpaˇ hpeh‸ tuˬ Gʼuiˬsha yawˇ hta‸ fuiˍ teh taˍ ve awˬ lawn shaˉ hkiˆ hkanˍ tuˬ htawˇ, yawˇ ngaˬ hui hta‸ tawˇ piˇ taˉ laˇ ve yoˬ. 43Yawˇ hta‸ hkʼa yonˍ ve chaw hkʼa peu-eˬ, yawˇ ve awˬ meh hta‸ pa taw venˇbaˆ hpehˇ hkʼa ve hta‸ gʼa ve yoˬ teh‸, Gʼuiˬsha ve tcuh kaˍ paˍ hkʼa peu-eˬ yawˇ awˬ lawn shaˉ hkiˆ hkanˍ taˍ ve yoˬ teh‸, Peˍtruˆ kʼoˆ piˇ ve yoˬ.

44Tawˇ hkawˇ chi teˇ hpaˍ hta‸ Peˍtruˆ kʼoˆ chehˇ htaˇ, tawˇ hkawˇ chi hta‸ gʼa kaˇ ve chaw hkʼa peu-eˬ awˬ hkʼoˆ hta‸ da‸ ve kehˬ ve Awˬ ha hpu ya‸ la ve yoˬ. 45Buiˇ shaˆ aˉ naˆ chaw hui awˬ hkʼoˆ hta‸ htawˇ, da‸ ve kehˬ ve Awˬ ha hpu ngeuˍ pfuhˍ piˇ ve hta‸ pa taw, Peˍtruˆ geh laˬ ve Yuˇda‸ Hkri‸ yaˇ teˇ hpaˍ lehˬ anˇ jaˇ ve yoˬ. 46Awˬ lawn kʼo, chaw oˇ ve teˇ hpaˍ lehˬ, tawˇ laiˉ ceuˬ yaw chiˇ mvuh leh Gʼuiˬ sha hta‸ taˍ uiˍ taˍ mvuh piˇ ve hta‸ yawˇ hui gʼa kaˇ ve yoˬ. 47Oˇ htaˇ Peˍtruˆ kʼoˆ ve, Ngaˬ hui da‸ ve kehˬ ve Awˬ ha hpu gʼa ve hkʼa shuˍ shuˍ, da‸ ve kehˬ ve Awˬ ha hpu gʼa ve chaw chi teˇ hpaˍ hta‸ iˉ kaˆ awˬ hkʼaw lo baˆtiˆsaˬ maˇ gʼa piˇ tuˬ, tawˍ taˍ tsuhˇ taˍ paˍ a shu cawˬ le teh‸ na nyi ve yoˬ. 48Yeˍsuˆ Hkri‸ ve awˬ meh awˬ hawˉ lo baˆtiˆsaˬ hkanˍ-o‸ teh‸, yawˇ yawˇ hui hta‸ kʼoˆ piˇ ve yoˬ. Oˇ htaˇ, yawˇ hui geh a ciˉ maw chaweh chehˇ taˉ tuˬ, yawˇ hui yawˇ hta‸ lawˬ hkawˉ ve yoˬ.

Currently Selected:

Tcuh yaˇ li‸ 10: LHBE

Highlight

Copy

Compare