Tcuh yaˇ li‸ 26

Jawˇmawˇ Aˍgiˇpaˆ mehˆ gʼuˇ suhˍ Pawˇlu‸ tawˇ yaw ve

1Oˇ htaˇ, jawˇmawˇ Aˍgiˇpaˆ lehˬ Pawˇlu‸ hta‸ kʼoˆ piˇ ve, Nawˬ ve awˬ lawn kʼoˆ tuˬ a hkaw-anˬ cawˬ ve yoˬ teh‸ kʼoˆ piˇ ve yoˬ. Hkʼe te leh, Pawˇlu‸ yawˇ ve la‸ sheh che leh yawˇ ve awˬ lawn kʼaw‸ yaw hkʼaw‸ piˇ ve,

2Hkunˉ hawˉ hkanˇ Aˍgiˇpaˆ-oˬ, Yuˇda‸ chaw teˇ hpaˍ ngaˬ awˬ hkʼoˆ venˇbaˆ taˍ laˇ ve hkʼa peu-eˬ awˬ lawn, ya‸ nyi nawˬ mehˆ gʼuˇ suhˍ ngaˬ kʼaw‸ yaw hkʼaw‸ hpeh‸ ve pa taw, ngaˬ ha lehˬ jaˇ ve yoˬ. 3Awˬ lawn kʼo, Yuˇda‸ chaw hui ve awˬ liˇ awˬ hkʼaˇ teˇ hpaˍ leh, yawˇ hui tawˇ gʼawˬ da‸ ve teˇ hpaˍ awˬ lawn nawˬ hkʼa deh‸ shiˍ ve yoˬ. Hkʼe te leh, a ciˉ yeunˇ hkanˍ leh ngaˬ ve tawˇ hkawˇ hta‸ na tuˬ ngaˬ nawˬ hta‸ lawˬ hkawˉ ve yoˬ

Pawˇlu‸ Hpaˍriˍsehˇ hpeh‸ jaw ve awˬ lawn

4Awˉ lawˉ htaˇ, ngaˬ yaˇ nehˬ hpeh‸ ve teˇ yanˇ hta‸ tanˬ leh, ngaˬ ve chaw ceuˬ awˬ hkʼaw lo maˇ kʼoˆ, Yeˍruˆsaˍlehnˍ venˇ awˬ hkʼaw lo maˇ kʼoˆ, ngaˬ te ve awˬ liˇ awˬ hkʼaˇ teˇ hpaˍ hta‸ Yuˇda‸ chaw hkʼa peu-eˬ shiˍ taˍ ve yoˬ. 5Awˬ hkuiˉ puiˍ htaˇ ka‸ yawˇ hui ngaˬ ve awˬ lawn shiˍ taˍ ve pa taw, ngaˬ hui ve oˉ kʼoˍ pui ve awˬ liˇ awˬ hkʼaw lo, Hpaˍriˍsehˇ teh‸ kʼoˆ ve hehnˇ jaˇ ve awˬ liˇ te ve teˇ moˍ hta‸ ngaˬ caˉ da‸ ve teh‸ yawˇ hui shaˉ hkiˆ hkanˍ gaˇ ve kʼo hkanˍ hpeh‸ ve yoˬ. 6Gʼuiˬsha lehˬ, ngaˬ hui ve awˬ puˍ awˬ pi hui hta‸ piˇ taˍ ve ka ti‸ hta‸ ngaˬ dawˇ law ve pa taw, chi beu‸ suhˉ jehˬ ve hta‸ gʼa hkanˍ tuˬ, ngaˬ choˬ kaˬ lo huˉ taˍ ve yoˬ. 7Ngaˬ hui ve chaw ceuˬ teˇ chi nyiˇ ceuˬ lehˬ, tanˇ hkuinˇ tanˇ vanˇ coˇ caˇ leh Gʼuiˬ sha hta‸ oˉ kʼoˍ pui ve awˬ hkʼaw lo, ka ti‸ oˇ ve hta‸ gʼa tuˬ yawˇ hui dawˇ law chehˇ ve yoˬ. Hkunˉ hawˉ hkanˇ-oˬ, dawˇ law taˍ ve oˇ ve hta‸ pa taw Yuˇda‸ chaw teˇ hpaˍ ngaˬ hta‸ venˇbaˆ taˍ laˇ ve yoˬ. 8Suh peuˬ ve chaw hui hta‸ Gʼuiˬsha kʼaw‸ te‸ tu la piˇ ve teˇ ceuˬ hta‸ yonˍ maˇ hpeh‸ ve teh‸ aˬ hto‸ ma pa taw nawˬ hui dawˇ ve le.

Pawˇlu‸ Hkri‸ yaˇ hui hta‸ fawˉ mehˍ jaw ve aw lawn

9Naˍzaˍrehˆ chaw Yeˍsuˆ ve awˬ meh hta‸ tawˍ taˍ tuˬ laiˉ ceuˬ te cawˇ ve yoˬ teh‸ ngaˬ awˬ tehˬ awˬ na dawˇ nyi jaw ve yoˬ. 10Yeˍruˆsaˍlehnˍ venˇ awˬ hkʼaw lo ngaˬ oˇ hkʼe te jaw ve yoˬ. Paw hkuˇ lonˉ hui geh a hkaw-anˬ gʼa peuˬ leh, Hkri‸ yaˇ hui laiˉ gʼaˇ hta‸ htawnˍ hkʼaw haw taˍ ve yoˬ. Shu yawˇ hui hta‸ tiˇ pehˍ ve teˇ yanˇ, ngaˬ htawˇ nyi ma cawˇ leh la‸ sheh chiˇ jaw ve yoˬ. 11Bon yehˬ hkʼa peu-eˬ awˬ hkʼaw lo ngaˬ yawˇ hui hta‸ laiˉ pawˆ ciˍ yanˍ piˇ leh, yawˇ hui Gʼuiˬsha hta‸ maˇ shawˍ maˇ caˆ kʼoˆ tuˬ ngaˬ gʼaˇ hte‸ te ve yoˬ. Nyi ma zuhˆ jaˇ beu‸ jaˇ ve awˬ hkʼaw lo, shu mvuhˇ shu miˬ ve venˇ teˇ hpaˍ hkʼa gaˬ ngaˬ yawˇ hui hta‸ fawˉ mehˍ jaw ve yoˬ.

Pawˇlu‸ yawˇ Hkri‸ yaˇ hpeh‸ la ve awˬ lawn hto piˇ ve

12Hkunˉ hawˉ hkanˇ-oˬ, ngaˬ chi hkʼe te chehˇ ve awˬ hkʼaw lo, paw hkuˇ lonˉ hui ngaˬ hta‸ kanˉ chi chiˇ a‸ laˇ leh a hkaw-anˬ pe‸ laˇ ve pa taw, ngaˬ Daˍmaˍsehˆ venˇ lo kʼai ve yoˬ. 13Ya‸ kʼaw kʼaˉ lo mvuhˇ law‸ kʼaw tcuhˆ teˇ yanˇ, mvuhˇ naw ma lo mvuhˇ nyi a‸ kehˉ hehnˇ ve awˬ gʼeuˆ lehˬ, ngaˬ leh ngaˬ geh teˇ geh kʼai chehˇ ve chaw hui hta‸ hkʼa caw zuhˇ hti la ve hta‸ ngaˬ gʼa mawˬ ve yoˬ. 14Ngaˬ hui hkʼa peu-eˬ miˬ chaˇ hkʼoˆ lo paiˍ taˍ htaˇ, Heˍbrehˇ hkawˇ yaw leh chi hkʼe kʼoˆ laˇ ve awˬ hkawˇ hta‸ ngaˬ gʼa kaˇ ve, Sawˉlu‸-oˬ, Sawˉlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le. Nuˇ juˆ tuˬ ve aˉ taˬ hta‸ nawˬ hteˆ ve lehˬ, nawˬ gʼa naˬ ve ceh tiˉ yoˬ teh‸ kʼoˆ laˇ ve yoˬ. 15Jawˇmawˇ-oˬ, nawˬ a shu le teh‸ ngaˬ na nyi ve teˇ yanˇ, Jawˇmawˇ kʼaw‸ kʼoˆ laˇ ve, Ngaˬ lehˬ nawˬ fawˉ mehˍ chehˇ ve Yeˍsuˆ yoˬ. 16Tu leh hteˇ lehˍ huˉ-oˆ. Awˬ lawn kʼo, nawˬ ngaˬ hta‸ gʼa mawˬ ve lehˬ, chi awˬ pon yoˬ. Nawˬ ngaˬ hta‸ gʼa mawˬ peuˬ ve teˇ hpaˍ awˬ lawn maˇ kʼoˆ, awˬ hkʼaw‸ nawˉ ngaˬ hta‸ gʼa kʼaw‸ mawˬ tuˬ ve teˇ hpaˍ awˬ lawn maˇ kʼoˆ, nawˬ kanˉ te leh shaˉ hkiˆ hkanˍ tuˬ, ngaˬ nawˬ hta‸ leuˆ yuˬ taˍ ve yoˬ. 17Yuˇda‸ chaw leh buiˇshaˆaˉnaˆ chaw hui mehˆ gʼa mawˬ la tuˬ, yawˇ hui geh ngaˬ nawˬ hta‸ kʼai tcuh leh, yawˇ hui ve la‸ sheh awˬ hkʼaw lo nawˬ hta‸ ponˬ laˇ tuˬ yoˬ. 18Yawˇ hui mehˆ mawˬ la ve pa taw, naˆ ho‸ ve hta‸ hpfuhˆ baˬ taˉ leh, awˬ gʼeuˆ lo laˬ tuˬ yoˬ. Chi hkʼoˆ ka‸, saˍtanˍ ve kanˇ paˆ hta‸ hpfuhˆ baˬ taˉ leh Gʼuiˬsha geh laˬ tuˬ yoˬ. Hkʼe te leh, yawˇ hui venˇbaˆ hpehˇ hkʼa ve hta‸ ka‸ gʼa leh ngaˬ hta‸ yonˍ ve awˬ hkʼaw lo da‸ la kehˬ la peuˬ ve chaw teˇ hpaˍ geh teˇ geh ka‸ gʼa chehˇ tuˬ yoˬ.

Mvuhˇ naw ma lo hpeu‸ maˍ laˇ ve awˬ ceuˬ hta‸ Pawˇlu‸ na yuˬ ve

19Hkʼe te leh hkunˉ hawˉ hkanˇ Aˍgiˇpaˆ-oˬ, mvuhˇ naw ma lo hpeu‸ maˍ laˇ ve awˬ ceuˬ hta‸ ngaˬ maˇ na yuˬ ve maˇ heˆ. 20Awˉ lawˉ htaˇ Daˍmaˍsehˆ venˇ chaw teˇ hpaˍ hta‸ maˇ kʼoˆ, awˬ hkʼaw‸ nawˉ Yeˍruˆsaˍlehnˍ venˇ leh Yuˇda‸ mvuhˇmiˬ hkʼa peu-eˬ awˬ hkʼaw lo maˇ kʼoˆ, buiˇshaˆaˉnaˆ chaw teˇ hpaˍ hta‸ htawˇ maˇ kʼoˆ, ngaˬ bon maˍ piˇ ve yoˬ. Yawˇ hui lehˬ, a shu yawˇ ve venˇbaˆ hta‸ dawˇ hpfuhˆ leh, Gʼuiˬsha geh kʼaw‸ hpfuhˆ kʼaw‸ la leh, venˇbaˆ dawˇ hpfuhˆ ve hta‸ keunˍ da‸ ve kanˉ teˇ hpaˍ te tuˬ ngaˬ yawˇ hui hta‸ maˍ piˇ ve yoˬ. 21Chi hta‸ pa taw, bon yehˬ lonˉ awˬ hkʼaw lo Yuˇda‸ chaw hui ngaˬ hta‸ hpeh yuˬ leh tiˇ pehˍ tuˬ te ve yoˬ. 22Ya‸ hkʼaˇ, ya‸ nyi hkʼa gaˬ Gʼuiˬsha ga laˇ ve pa taw, ngaˬ choˬ kaˬ lo gʼa huˉ taˍ leh, uiˍ ve i ve chaw hkʼa peu-eˬ hta‸ shaˉ hkiˆ hkanˍ chehˇ ve yoˬ. Hkʼaˬ hkʼe hpeh‸ la tuˬ ve awˬ lawn Gʼuiˬsha ve tcuh kaˍ paˍ hui leh Moˉseˍ kʼoˆ ve hkʼe ceh ngaˬ kʼoˆ ve yoˬ. 23Yawˇ hui kʼoˆ ve lehˬ, Hkri‸ gʼa tu‸ gʼa hkanˍ leh, suh kuiˬ lo yawˇ awˉ lawˉ kʼaw‸ te‸ tu la ve teˇ gʼaˇ hpeh‸ ve pa taw, Yuˇda‸ chaw leh buiˇshaˆaˉnaˆ chaw hui hta‸ awˬ gʼeuˆ awˬ lawn yawˇ hto piˇ maˍ piˇ tuˬ yoˬ teh‸ Pawˇlu‸ kʼoˆ ve yoˬ.

Jawˇmawˇ Aˍgiˇpaˆ yonˍ la tuˬ Pawˇlu‸ maˍ piˇ ve

24Pawˇlu‸ chi hkʼe yaw hkʼaw‸ chehˇ ve teˇ yanˇ, jawˇmawˇ Hpeˍtuˆ kʼoˆ ve, Pawˇlu‸-oˬ, nawˬ gʼuˇ kʼai peuˬ. Nawˬ li‸ maˇ maˇ henˇ ve pa taw nawˬ gʼuˇ kʼai ve yoˬ teh‸, awˬ hkawˇ bvuhˬ chaweh kʼoˆ ve yoˬ.

25Pawˇlu‸ kʼaw‸ kʼoˆ ve, Awˬ me‸ awˬ hponˇ uiˍ ve jawˇmawˇ Hpeˍtuˆ-oˬ, ngaˬ gʼuˇ ve maˇ heˆ. Chaw hkawˇ hkʼa deh‸ nawˇ taˍ ve awˬ hkʼaw lo ngaˬ nawˬ hta‸ hteˇ ve cawˇ ve tawˇ hkawˇ yaw laˇ ve yoˬ. 26Awˬ lawn chi teˇ hpaˍ hta‸ hkunˉ hawˉ hkanˇ Aˍgiˇpaˆ shiˍ taˍ ve pa taw, ngaˬ yawˇ hta‸ hkʼa tawˍ lehˆ kʼoˆ piˇ hpeh‸ ve yoˬ. Chi lehˬ baˬ kuiˬ lo hpeh‸ la ve maˇ heˆ ve pa taw, awˬ lawn chi teˇ hpaˍ hkunˉ hawˉ hkanˇ maˇ shiˍ maˇ mawˬ ve te ceuˬ ka‸ maˇ cawˬ teh‸ ngaˬ yonˍ ve yoˬ. 27Hkunˉ hawˉ hkanˇ Aˍgiˇpaˆ-oˬ, Gʼuiˬsha ve tcuh kaˍ paˍ hui ve tawˇ hkawˇ hta‸ nawˬ yonˍ ve laˇ. Nawˬ yonˍ ve hta‸ ngaˬ shiˍ ve yoˬ teh‸ kʼoˆ piˇ ve yoˬ.

28Jawˇmawˇ Aˍgiˇpaˆ lehˬ Pawˇlu‸ hta‸ kʼoˆ piˇ ve, Teˇ hkui tiˉ awˬ hkʼaw lo ngaˬ Hkri‸ yaˇ hpeh‸ la tuˬ nawˬ te ve law leˇ teh‸ kʼoˆ piˇ ve yoˬ.

29Pawˇlu‸ kʼaw‸ kʼoˆ ve, Awˬ yanˇ ngeh ve maˇ kʼoˆ, awˬ yanˇ maw ve maˇ kʼoˆ, nawˬ awˬ to ka‸, ya‸ nyi ngaˬ ve tawˇ hkawˇ hta‸ gʼa kaˇ ve chaw hkʼa peu-eˬ ka‸, sho caˆ hpeh taˍ ve teˇ ceuˬ maˇ heˆ kʼo, ngaˬ hkʼa shuˍ shuˍ hpeh‸ la tuˬ ngaˬ Gʼuiˬsha hta‸ bon lawˬ ve yoˬ teh‸ kʼoˆ piˇ ve yoˬ.

30Oˇ htaˇ, hkunˉ hawˉ hkanˇ tu leh, mvuhˇ miˬ jawˇmawˇ lonˉ ka‸, Beˍraˍniˆ ka‸, yawˇ hui geh mui taˍ ve chaw teˇ hpaˍ ka‸ tu ve yoˬ. 31Yawˇ hui tawˆ kʼai peuˬ hkʼaw‸ nawˉ, yawˇ hui teˇ gʼaˇ leh teˇ gʼaˇ kʼoˆ da‸ ve, Chaw chi lehˬ, tiˇ pehˍ keunˍ ve maˇ kʼoˆ, hpeh taˍ keunˍ ve maˇ kʼoˆ, venˇbaˆ teˇ ceuˬ ka‸ maˇ cawˬ teh‸ kʼoˆ da‸ ve yoˬ. 32Jawˇmawˇ Aˍgiˇpaˆ lehˬ jawˇmawˇ Hpeˍtuˆ hta‸ kʼoˆ piˇ ve, Chaw chi lehˬ, jawˇmawˇ Kehˉsaˍ geh kʼai tuˬ maˇ lawˬ ve hkʼe kʼo, yawˇ hta‸ hpehˇ piˇ hpeh‸ ve yoˬ teh‸ kʼoˆ ve yoˬ.

Currently Selected:

Tcuh yaˇ li‸ 26: LHBE

Highlight

Copy

Compare