Tcuh yaˇ li‸ 27

Roˉma‸ venˇ lo kʼai tuˬ Pawˇlu‸ haw lo‸ kʼoˍ hta‸ ciˇ kʼai ve

1Iˉtaˍliˍ mvuhˇmiˬ lo ngaˬ hui haw lo‸ kʼoˍ gʼa ciˇ kʼai tuˬ jawˇmawˇ dawˇ cheˆ peuˬ ve teˇ yanˇ, Pawˇlu‸ leh awˬ kaˍ awˬ nu hpeh taˍ ve chaw teˇ hpaˍ hta‸, Awˇguˇtuˆ ma‸ teˇ ta‸ hta‸ caˉ da‸ ve Yuˇluˆ meh ve ma‸ poˍ teˇ gʼaˇ ve la‸ sheh awˬ hkʼaw lo chiˇ a‸ piˇ ve yoˬ. 2Aˍsiˆ mvuhˇmiˬ awˬ hkʼaw laˇ tsuhˇ gʼuiˬ pfuhˍ lo cawˬ ve venˇ teˇ hpaˍ lo kʼai tuˬ ve, Aˍdaˍmuˇtiˆ venˇ yaˇ ve haw lo‸ kʼoˍ hta‸ ngaˬ hui ciˇ kʼai ve yoˬ. Maˍkeˍdawˇniˆ mvuhˇmiˬ awˬ hkʼaw lo ve Hteˇsaˍlawˇniˆ venˇ yaˇ Aˍriˍtaˍhkuˆ htawˇ, ngaˬ hui geh kʼai ve yoˬ. 3Awˬ hkʼaw‸ nawˉ teˇ nyi ngaˬ hui Siˉdonˍ venˇ lo deh ve yoˬ. Pawˇlu‸ yawˇ ve awˬ chawˇ teˇ hpaˍ geh kʼai tuˬ leh awˬ chawˇ teˇ hpaˍ yawˇ hta‸ ha‸ shaˉ tuˬ, Yuˇluˆ lehˬ yawˇ hta‸ ha kʼaˉ leh a hkaw-anˬ piˇ ve yoˬ. 4Ngaˬ hui oˇ kaˬ lo tawˆ kʼai ve teˇ yanˇ, mvuhˇ haw hpawˇ maˇ cawˇ ve pa taw, mvuhˇ haw maˇ htinˍ ve teˇ hpawˇ lo Kuˇpaˍruˆ conˇ hta‸ ngaˬ hui peun leh kʼai ve yoˬ. 5Kiˇliˇkiˆ mvuhˇmiˬ leh Paˍpuˇliˆ mvuhˇmiˬ awˬ paˇ lo cawˬ ve laˇ tsuhˇ gʼuiˬ teˇ tawn hta‸ ngaˬ hui hpanˍ kʼai peuˬ hkʼaw‸ nawˉ, Luˇkiˆ mvuhˇmiˬ awˬ hkʼaw lo cawˬ ve Muˍraˆ venˇ lo gaˬ ve yoˬ. 6Ma‸ poˍ lehˬ oˇ kaˬ Iˉtaˍliˍ mvuhˇmiˬ lo kʼai ve haw lo‸ kʼoˍ hta‸ mawˬ leh, ngaˬ hui hta‸ lo‸-e tcuh ve yoˬ. Haw lo‸ kʼoˍ oˇ ve lehˬ, Aˍleˍsaˍduˆ venˇ yaˇ ve haw lo‸ kʼoˍ hpeh‸ ve yoˬ.

7Awˬ nyi awˬ haˉ maw chaweh ngaˬ hui a yehˉ yehˉ kʼai leh, haˍ jaˇ ve awˬ hkʼaw lo Kaˍniˆ venˇ hta‸ hkʼa tawˍ hui lo gaˬ ve yoˬ. Mvuhˇ haw hpawˇ maˇ cawˇ ve pa taw, ngaˬ hui awˬ gʼuˇ suhˍ kʼaw‸ kʼai maˇ hpeh‸ leh, mvuhˇ haw maˇ htinˍ ve teˇ hpawˇ lo Kaˍreˍteˍ conˇ hta‸ peun leh Saˍmoˍneˍ venˇ hpawˇ lo kʼai ve yoˬ. 8Haˍ jaˇ ve awˬ hkʼaw lo conˇ oˇ ve awˬ paˇ lo ngaˬ hui kʼai leh, Laˍsehˇ venˇ hta‸ neˇ ve Nyi sha ve deh kuiˬ meh ve teˇ kaˬ lo gaˬ ve yoˬ.

9Awˬ nyi awˬ haˉ maˇ maˇ peuˬ kʼai leh, caˇ tuˬ ce ve awˬ nyi ponˬ kʼai peuˬ ve pa taw, haw lo‸ kʼoˍ ciˇ ve kawˆ tuˬ uiˍ jaˇ ve awˬ yanˇ gaˬ la peuˬ. Pawˇlu‸ yawˇ hui hta‸ shaˍ ti‸ piˇ leh kʼoˆ ve, 10Awˬ chawˇ teˇ hpaˍ-oˬ, chi beu‸ haw lo‸ kʼoˍ ciˇ kʼai ve kʼo, haw lo‸ kʼoˍ leh mawˇ teˇ hpaˍ gʼa luˬ ve ceh tiˉ maˇ heˆ. Ngaˬ hui ve a sha‸ htawˇ gʼa shonˇ tuˬ ve hta‸ ngaˬ dawˇ shiˍ dawˇ mawˬ ve yoˬ teh‸ kʼoˆ piˇ ve yoˬ. 11Ya‸ hkʼaˇ ma‸ poˍ lehˬ, Pawˇlu‸ ve tawˇ hkawˇ a‸ kehˉ haw lo‸ kʼoˍ awˬ hoˉ leh haw lo‸ kʼoˍ awˬ shehˍ hpaˇ ve tawˇ hkawˇ hta‸ na ve yoˬ. 12Deh kuiˬ oˇ ve lehˬ, mvuhˇ kaˆ ve awˬ yanˇ awˬ hkʼaw chehˇ tuˬ awˬ pon maˇ da‸ ve pa taw, oˇ kaˬ tawˆ kʼai leh, hpeh‸ ve kʼo Hpiˇniˆ venˇ haw lo‸ kʼoˍ deh kuiˬ lo gaˬ leh, mvuhˇ kaˆ ve awˬ yanˇ peuˬ htaˇ hkʼa gaˬ oˇ kaˬ lo chehˇ tuˬ chaw maˇ-awˍ ve nyi ma cawˇ ve yoˬ. Hpiˇniˆ venˇ ve haw lo‸ kʼoˍ deh kuiˬ gʼuiˬ kʼaweh‸ lehˬ, Kaˍreˍteˍ conˇ lo cawˬ leh, mvuhˇ nyi tawˆ awˬ na teˇ ceˍ leh, mvuhˇ nyi tawˆ awˬ hawˉ teˇ ceˍ lo mawˍ taˍ ve yoˬ.

Laˇ tsuhˇ gʼuiˬ hta‸ mvuhˇ haw lonˉ meuˆ ve

13Awˬ hawˉ hpawˇ ve mvuhˇ haw a yehˉ yehˉ meuˆ la ve teˇ yanˇ, yawˇ hui dawˇ law taˍ ve hkʼe hpeh‸ la peuˬ teh‸ dawˇ leh, sho kʼuˉ kʼaweh‸ gʼawˬ tawˆ peuˬ hkaw‸ nawˉ, Kaˍreˍteˍ conˇ awˬ paˇ lo hpanˍ kʼai ve yoˬ. 14Ya‸ hkʼaˇ, maˇ maw maw gaˬ leh mvuhˇ nyi tawˆ awˬ na teˇ ceˍ lo laˬ ve mvuhˇ haw lonˉ lehˬ, miˬguiˬ hpawˇ lo te leh gʼaˇ hte‸ meuˆ la ve yoˬ. 15Mvuhˇ haw oˇ ve haw lo‸ kʼoˍ hta‸ htinˍ ve teˇ yanˇ, haw lo‸ kʼoˍ hkanˍ maˇ gʼaˇ ve pa taw, ngaˬ hui haw lo‸ kʼoˍ hta‸ hkʼe leˇ hpehˇ peu leh, haw lo‸ kʼoˍ hta‸ mvuhˇ haw meuˆ kʼai ve yoˬ. 16Kaˍlawˉdeˍ teh‸ kʼoˆ ve conˇ ehˉ, mvuhˇ haw maˇ hehnˇ jaˇ ve teˇ hpawˇ lo ngaˬ hui kʼai chehˇ htaˇ, haw lo‸ kʼoˍ ehˉ maˇ gʼa luˬ kʼai tuˬ, gʼaˇ hte‸ coˇ caˇ ve awˬ hkʼaw lo haw lo‸ kʼoˍ ehˉ hta‸ gʼawˬ yuˬ leh, haw lo‸ kʼoˍ lonˉ awˬ hkʼoˆ lo gʼawˬ teh taˍ ve yoˬ. 17Haw lo‸ kʼoˍ lonˉ maˇ gʼa paˆ-e tuˬ, yawˇ hui aˉ caˆ hkeh yuˬ leh hkʼa deh‸ hpeh tsuh‸ taˍ ve yoˬ. Oˇ htaˇ, shehˇ shiˍ hpoˆ lonˉ cawˬ kuiˬ lo yawˇ hui ca hkanˉ taˍ puiˉ-aˆ teh‸ dawˇ haˍ ve pa taw, hpa peˆ lonˉ teˇ hpaˍ hta‸ yuˬ ya‸-e leh, hkʼe leˇ mvuhˇ haw meuˆ kʼai tcuh ve yoˬ. 18Mvuhˇ haw lonˉ meuˆ hehnˇ jaˇ leh, haw lo‸ kʼoˍ taˆ taˆ ya‸ ya‸ te ve pa taw, awˬ hkʼaw‸ nawˉ teˇ nyi yawˇ hui taˆ taˍ ve mawˇ teˇ hpaˍ hta‸ yuˬ baˬ ve yoˬ. 19Shehˆ nyi gaˬ la htaˇ, haw lo‸ kʼoˍ ve awˬ hkʼeun teˇ hpaˍ hta‸ htawˇ yawˇ hui hkʼaˇ yawˇ hui yuˬ baˬ ve yoˬ. 20Awˬ nyi awˬ haˉ maw chaweh awˬ hkʼaw lo mvuhˇ nyi ka‸ meu‸ keu teˇ hpaˍ ka‸ maˇ tawˆ la ve awˬ hkʼoˆ, mvuhˇ haw lonˉ meuˆ tcuhˉ taˍ ve pa taw, ngaˬ hui gʼa pon tuˬ ve teh‸ dawˇ law kuiˬ a ciˉ ka‸ maˇ cawˬ.

21Yawˇ hui caˇ tuˬ maˇ caˇ ve maw peuˬ hkʼaw‸ nawˉ, Pawˇlu‸ yawˇ hui awˬ kʼaw ji lo tu huˉ leh kʼoˆ ve, Awˬ chawˇ teˇ hpaˍ-oˬ, nawˬ hui ngaˬ ve hkʼawˇ hta‸ na leh keˍreˍteˍ conˇ lo maˇ tawˆ la sheˍ ve hkʼe kʼo, luˬ ve sheˆ ve chi hta‸ maˇ gʼa hpuˇ. 22Ya‸ hkʼaˇ, chi beu‸ ha lehˬ chehˇ-oˆ teh‸, ngaˬ nawˬ hui hta‸ lawˬ hkawˉ ve yoˬ. Nawˬ hui awˬ hkʼaw lo teˇ gʼa ka‸ maˇ gʼa suh, haw lo‸ kʼoˍ ceh tiˉ luˬ kʼai tuˬ yoˬ. 23Awˬ lawn kʼo, ngaˬ hta‸ uˉ peunˍ leh ngaˬ oˉ kʼoˍ pui ve Gʼuiˬsha yawˇ ve mvuhˇ naw ma tcuh yaˇ teˇ gʼaˇ lehˬ, ya‸ puiˉ haˉ ngaˬ awˬ paˇ lo huˉ taˍ leh kʼoˆ ve, 24Pawˇlu‸-oˬ, taˇ kawˆ, Hkunˉ hawˉ hkanˇ lonˉ Kehˉsaˍ mehˆ gʼuˇ suhˍ nawˬ gʼa tu huˉ tuˬ yoˬ. Nawˬ geh teˇ geh haw lo‸ kʼoˍ ciˇ taˍ ve chaw hkʼa peu-eˬ htawˇ, Gʼuiˬ sha nawˬ hta‸ pe‸ laˇ tuˬ yoˬ teh‸ ngaˬ hta‸ kʼoˆ laˇ ve yoˬ. 25Hkʼe te leh, awˬ chawˇ teˇ hpaˍ-oˬ, ha lehˬ chehˇ-oˆ. Ngaˬ hta‸ kʼoˆ laˇ ve hkʼa shuˍ shuˍ hpeh‸ la tuˬ yoˬ teh‸, ngaˬ Gʼuiˬsha hta‸ yonˍ ve yoˬ. 26Ya‸ hkʼaˇ ngaˬ hui lehˬ, conˇ teˇ maˬ maˬ awˬ hkʼoˆ lo gʼa hkanˉ taˍ tuˬ yoˬ teh‸, Pawˇlu‸ yawˇ hui hta‸ kʼoˆ piˇ ve yoˬ.

27Teˇ chi awˇ nyi teˇ haˉ gaˬ leh, ngaˬ hui Aˍdiˆ laˇ tsuhˇ gʼuiˬ hta‸ hpanˍ kʼai chehˇ ve teˇ yanˇ, shehˍ kʼaw hkui htaˇ hkʼe gaˬ leh, ngaˬ hui miˬguiˬ teˇ peˆ peˆ hta‸ neˇ la peuˬ hehˉ teh‸, haw lo‸ kʼoˍ hkʼaw kanˉ te paˍ teˇ hpaˍ dawˇ ve yoˬ. 28Yawˇ hui iˉ kaˆ hta‸ tehˆ nyi ve teˇ yanˇ, nyiˇ chi loˬ naˉ ve hta‸ gʼa shiˍ ve yoˬ. Awˬ hkʼaw‸ nawˉ maˇ maw maw yawˇ hui teˇ pawˆ kʼaw‸ tehˆ nyi htaˇ, teˇ chi ngaˇ loˬ naˉ ve hta‸ gʼa shiˍ ve yoˬ. 29Yawˇ hui lehˬ, haˉ pui hta‸ htinˍ heuˆ la puiˉ-aˆ teh‸ dawˇ haˍ ve pa taw, haw lo‸ kʼoˍ awˬ mehˍ hpawˇ lo sho kʼuˉ kʼaweh‸ awˍ lehˇ hpehˇ ya‸-e peuˬ leh, mvuhˇ haˆ haˆ htiˇ la tuˬ ve hta‸ dawˇ law chehˇ ve yoˬ. 30Haw lo‸ kʼoˍ hkʼaw kanˉ te ve chaw teˇ hpaˍ lehˬ, haw lo‸ kʼoˍ hta‸ baˬ taˉ leh hpaw-e tuˬ dawˇ taˍ ve yoˬ. Chi hta‸ pa taw, haw lo‸ kʼoˍ oˉ kʼoˍ hpawˇ lo sho kʼuˉ kʼaweh‸ hpehˇ ya‸-e ve hkʼe te leh, haw lo‸ kʼoˍ ehˉ hta‸ iˉ kaˆ awˬ hkʼaw lo yuˬ ya‸-e ve teˇ yanˇ, 31Pawˇlu‸ lehˬ ma‸ poˍ leh ma‸ yaˇ teˇ hpaˍ hta‸ kʼoˆ piˇ ve, Chaw chi teˇ hpaˍ haw lo‸ kʼoˍ awˬ hkʼaw lo maˇ chehˇ taˍ ve kʼo, nawˬ hui ponˬ maˇ hpeh‸ teh‸ kʼoˆ piˇ ve yoˬ. 32Oˇ htaˇ, ma‸ yaˇ teˇ hpaˍ lehˬ, haw lo‸ kʼoˍ ehˉ ve aˉ caˆ hkeh teˇ hpaˍ hta‸ tawˆ cheˆ leh, laˇ tsuhˇ gʼuiˬ hkʼaw shi peu ve yoˬ.

33Mvuhˇ htiˇ la paˇ neˇ htaˇ, yawˇ hui hkʼa peu-eˬ awˍ caˇ tuˬ Pawˇlu‸ yawˇ hui hta‸ awˬ gʼaˇ piˇ leh kʼoˆ ve, Nawˬ hui dawˇ haˍ dawˇ hkiˉ ve awˬ hkʼaw lo law chehˇ leh, caˇ tuˬ te‸ chiˉ ka‸ maˇ caˇ ve, ya‸ nyi teˇ chi awˇ nyi gaˬ peuˬ. 34Chi hta‸ pa taw, caˇ tuˬ caˇ-oˆ teh‸ ngaˬ nawˬ hui hta‸ lawˬ hkʼawˉ ve yoˬ. Chi lehˬ, nawˬ hui gʼa ponˬ tuˬ awˬ pon ngaˬ kʼoˆ ve yoˬ. Awˬ lawn kʼo, nawˬ hui teˇ gʼaˇ ka‸ uˉ hkeh mvuh teˇ mvuh ka‸ maˇ gʼa luˬ maˇ gʼa sheˆ teh‸, Pawˇlu‸ yawˇ hui hta‸ kʼoˆ piˇ ve yoˬ. 35Yawˇ chi hkʼe kʼoˆ peuˬ htaˇ, hkaoˍmonˇ hta‸ yuˬ leh, yawˇ hui hkʼa peu-eˬ mehˆ gʼuˇ suhˍ Gʼuiˬsha hta‸ chiˇ mvuh peuˬ hkʼaw‸ nawˉ, yawˇ hkaoˍ monˇ hkʼeh‸ leh caˇ ve yoˬ. 36Oˇ htaˇ, yawˇ hui hkʼa peu-eˬ htawˇ ha lehˬ la leh caˇ tuˬ caˇ ve yoˬ. 37Haw lo‸ kʼoˍ oˇ ve hta‸ ciˇ taˍ ve chaw hkʼa peu-eˬ lehˬ, 276 gʼaˇ cawˬ ve yoˬ. 38Yawˇ hui hkʼa bvuhˆ caˇ peuˬ hkʼaw‸ nawˉ, caˬ shiˍ caˬ hkʼa hta‸ laˇ tsuhˇ gʼuiˬ awˬ hkʼaw lo baˬ keu leh, haw lo‸ kʼoˍ hta‸ lawˬ la piˇ lawˬ ve yoˬ.

Haw lo‸ kʼoˍ luˬ kʼai ve

39Mvuhˇ htiˇ la ve teˇ yanˇ, miˬguiˬ oˇ ve teˇ peˆ hta‸ yawˇ hui maˇ shiˍ. Ya‸ hkʼaˇ, shehˇ shiˍ cawˬ ve gʼuiˬ kʼaweh‸ hta‸ gʼa mawˬ leh, hpeh‸ ve kʼo haw lo‸ kʼoˍ hta‸ oˇ kaˬ lo gʼa‸ kʼai tuˬ dawˇ taˍ ve yoˬ. 40Hkʼe te leh, sho kʼuˉ kʼaweh‸ teˇ hpaˍ hta‸ laˇ tsuhˇ gʼuiˬ hkʼaw lo hpui baˬ taˉ ve yoˬ. Haw lo‸ kʼoˍ gʼa‸ tuˬ ve caˉ behˆ teˇ hpaˍ hpeh taˍ ve aˉ caˆ hkeh teˇ hpaˍ hta‸ htawˇ hpui sheˬ leh, haw lo‸ kʼoˍ oˉ kʼoˍ hpawˇ ve hpa peˆ lonˉ hta‸ mvuhˇ haw meuˆ tuˬ chiˇ taˆ-e peuˬ hkʼaw‸ nawˉ, shehˇ shiˍ cawˬ ve gʼuiˬ pfuhˍ lo gʼa‸ kʼai ve yoˬ. 41Ya‸ hkʼaˇ, iˉ kaˆ maˇ naˉ kuiˬ lo miˬ pui diˬ hta‸ htinˍ heuˆ leh, haw lo‸ kʼoˍ hkanˉ sheˍ ve yoˬ. Haw lo‸ kʼoˍ oˉ kʼoˍ hpawˇ hkanˉ yeˬ jaˇ leh, a ciˉ ka‸ maˇ jiˆ. Oˇ htaˇ, awˬ mehˍ hpawˇ teˇ tawn hta‸ gʼuiˬ baˇ gʼaˇ hte‸ dawˆ leh paˆ-e ve yoˬ.

42Hpeh taˍ ve chaw teˇ hpaˍ iˉ kaˆ lawehˇ leh hpaw tawˆ-e puiˉ-aˆ teh‸ ma‸ yaˇ teˇ hpaˍ dawˇ haˍ ve pa taw, yawˇ hui hta‸ tiˇ pehˍ tuˬ jehˬ daˬ ve yoˬ. 43Ya‸ hkʼaˇ, ma‸ poˍ lonˉ lehˬ Pawˇlu‸ hta‸ ponˬ piˇ gaˇ ve pa taw, yawˇ hui jehˬ da‸ ve hta‸ yawˇ tawˍ taˍ ve yoˬ. Oˇ htaˇ, iˉ kaˆ lawehˇ puiˉ ve chaw teˇ hpaˍ hta‸ iˉ kaˆ hkʼaw pawˆ lo‸-e leh, gʼuiˬ pfuhˍ lo lawehˇ tawˆ-e tuˬ, ma‸ poˍ lonˉ tawˇ piˇ ve yoˬ. 44Awˬ kaˍ awˬ nu chaw teˇ hpaˍ lehˬ, teˇ hpaˍ hpaˍ suhˆ baˉ hta‸ ciˇ tuˬ leh, teˇ hpaˍ hpaˍ haw lo‸ kʼoˍ ve awˬ hkʼeun teˇ hpaˍ hta‸ ciˇ tuˬ, yawˇ tawˇ piˇ ve yoˬ. Hkʼe te leh, chaw hkʼa peu-eˬ gʼa ponˬ leh, gʼuiˬ pfuhˍ lo gaˬ ve yoˬ.

Currently Selected:

Tcuh yaˇ li‸ 27: LHBE

Highlight

Copy

Compare