Tcuh yaˇ li‸ 25

Jawˇmawˇ Kehˉsaˍ geh kʼai tuˬ Pawˇlu‸ lawˬ ve

1Jawˇmawˇ Hpeˍtuˆ lehˬ mvuhˇmiˬ oˇ ve awˬ hkʼaw lo gaˬ la leh, shehˆ nyi gaˬ peuˬ hkʼaw‸ nawˉ, yawˇ Kehˉsaˍriˆ venˇ lo tu leh Yeˍruˆsaˍlehnˍ venˇ lo kʼai ve yoˬ. 2Oˇ htaˇ, paw hkuˇ lonˉ hui leh Yuˇda‸ chaw hui ve awˬ hoˉ awˬ naˬ teˇ hpaˍ Pawˇlu‸ awˬ lawn maˇ da‸ ve teˇ hpaˍ jawˇmawˇ Hpeˍtuˆ hta‸ hto piˇ ve yoˬ. 3Yawˇ hui kʼoˆ ve, Awˬ bon te leh Pawˇlu‸ hta‸ Yeˍruˆsaˍlehnˍ venˇ lo a ciˉ peu laˇ-oˆ teh‸, jawˇmawˇ Hpeˍtuˆ hta‸ lawˬ hkawˉ ve yoˬ. Awˬ lawn kʼo, ya‸ kʼaw kʼaˉ lo yawˇ hui naˆ taˍ leh Pawˇlu‸ hta‸ tiˇ pehˍ tuˬ dawˇ taˍ ve yoˬ. 4Jawˇmawˇ Hpeˍtuˆ kʼaw‸ kʼoˆ ve, Pawˇlu‸ lehˬ, Kehˉsaˍriˆ venˇ awˬ hkʼaw lo haw taˍ ve yoˬ. Maˇ maw maw ngaˬ awˬ to oˇ kaˬ lo kʼaw‸ kʼo‸-e tuˬ yoˬ. 5Hkʼe te leh, nawˬ hui awˬ hkʼaw lo kanˇ paˆ cawˬ ve chaw teˇ hpaˍ ngaˬ geh teˇ geh kʼai leh, chaw oˇ ve awˬ hkʼoˆ venˇbaˆ taˍ tuˬ cawˬ ve kʼo ca taˍ-o‸ teh‸, yawˇ kʼaw‸ kʼoˆ piˇ ve yoˬ.

6Yawˇ yawˇ hui geh aˬ laˬ hkʼe teˇ chi nyi chehˇ peuˬ hkʼaw‸ nawˉ, yawˇ Kehˉsaˍriˆ venˇ lo kʼaw‸ kʼo‸-e ve yoˬ. Awˬ hkʼaw‸ nawˉ teˇ nyi yawˇ suhˉ jehˬ kuiˬ kʼaw jaw hkʼoˆ mui leh, Pawˇlu‸ hta‸ ca shiˍ veu laˇ tuˬ tawˇ piˇ ve yoˬ. 7Pawˇlu‸ gaˬ la htaˇ, Yeˍruˆsaˍlehnˍ venˇ lo laˬ ve Yuˇda‸ chaw teˇ hpaˍ lehˬ, yawˇ hta‸ hkʼa caw zuhˇ huˉ taˍ leh, yawˇ hui shaˉ hkiˆ yuˬ maˍ piˇ maˇ gʼa ve htawˇ, uiˍ jaˇ ve venˇbaˆ teˇ hpaˍ yawˇ awˬ hkʼoˆ taˍ ve yoˬ. 8Pawˇlu‸ yawˇ ve awˬ lawn kʼaw‸ yaw hkʼaw‸ leh kʼoˆ ve, Yuˇda‸ chaw hui ve awˬ liˇ tawˇ hkawˇ hta‸ maˇ kʼoˆ, bon yehˬ lonˉ hta‸ maˇ kʼoˆ, jawˇmawˇ Kehˉsaˍ hta‸ maˇ kʼoˆ, ngaˬ te‸ chiˉ ka‸ maˇ te ya‸ teh‸ kʼoˆ piˇ ve yoˬ.

9Ya‸ hkʼaˇ, jawˇmawˇ Hpeˍtuˆ lehˬ, Yuˇda‸ chaw hui yawˇ hta‸ nyi ma cawˇ tuˬ heuˆ gaˇ ve pa taw, Pawˇlu‸ hta‸ kʼoˆ piˇ ve, Awˬ lawn chi teˇ hpaˍ ngaˬ mehˆ gʼuˇ suhˍ suhˉ jehˬ tuˬ, nawˬ Yeˍruˆsaˍlehnˍ venˇ lo kʼai gaˇ laˇ teh‸ na nyi ve yoˬ.

10Pawˇlu‸ kʼaw‸ kʼoˆ ve, Jawˇmawˇ Kehˉsaˍ ve suhˉ jehˬ kuiˬ kʼaw jaw awˬ gʼuˇ suhˍ lo ngaˬ huˉ chehˇ ve yoˬ. Choˬ kaˬ lo ngaˬ hta‸ suhˉ jehˬ laˇ cawˇ ve yoˬ. Nawˬ awˬ to hkʼa deh‸ shiˍ taˍ ve hkʼe, ngaˬ Yuˇda‸ chaw teˇ hpaˍ hta‸ te‸ chiˉ ka‸ maˇ te ya‸. 11Ngaˬ te ya‸ leh suh keunˍ ve teˇ ceuˬ ceuˬ te taˍ ve kʼo, suh ve hta‸ ngaˬ maˇ jaw kʼai. Ya‸ hkʼaˇ, yawˇ hui ngaˬ awˬ hkʼoˆ venˇbaˆ taˍ ve teˇ hpaˍ, teˇ ceuˬ ka‸ maˇ cawˇ ve kʼo, yawˇ hui ve la‸ shehˍ hkʼaw ngaˬ hta‸ teˇ gʼaˇ ka‸ chiˇ a‸ piˇ maˇ hpeh‸. Jawˇmawˇ Kehˉsaˍ geh kʼai tuˬ ngaˬ lawˬ ve yoˬ teh kʼoˆ piˇ ve yoˬ.

12Oˇ htaˇ jawˇmawˇ Hpeˍtuˆ lehˬ, yawˇ ve jehˬ da‸ shehˍ hpaˇ awˬ moˍ geh jehˬ da‸ peuˬ hkʼaw‸ nawˉ, Nawˬ jawˇmawˇ Kehˉsaˍ geh kʼai tuˬ lawˬ ve pa taw, jawˇmawˇ Kehˉsaˍ geh nawˬ gʼa kʼai tuˬ yoˬ teh‸ kʼaw‸ kʼoˆ piˇ ve yoˬ.

Jawˇmawˇ Aˍgiˇpaˆ leh Beˍraˍniˆ mehˆ gʼuˇ suhˍ Pawˇlu‸ hta‸ shiˍ kʼai ve

13Awˬ hkʼaw‸ nawˉ maˇ maw maw gaˬ leh, hkunˉ hawˉ hkanˇ Aˍgiˇpaˆ leh awˬ miˇ ma Beˍraˍniˆ lehˬ, jawˇmawˇ Hpeˍtuˆ hta‸ ha‸ yuˬ tuˬ Kehˉsaˍriˆ venˇ lo gaˬ la ve yoˬ. 14Yawˇ huiˉ maˬ oˇ kaˬ lo a ciˉ maw chaweh chehˇ ve awˬ yanˇ awˬ hkʼaw lo, jawˇmawˇ Hpeˍtuˆ lehˬ Pawˇlu‸ awˬ lawn hkunˉ hawˉ hkanˇ hta‸ hto piˇ leh kʼoˆ ve, Jawˇmawˇ Hpeˍliˆ htawnˍ hkʼaw keu taˉ ve chaw teˇ gʼaˇ cawˬ ve yoˬ. 15Ngaˬ Yeˍruˆsaˍlehnˍ venˇ awˬ hkʼaw lo chehˇ htaˇ, paw hkuˇ lonˉ hui leh Yuˇda‸ awˬ hoˉ chaw mawˇ teˇ hpaˍ lehˬ, yawˇ ve awˬ lawn hto laˇ leh, yawˇ hta‸ suhˉ taˆ tuˬ yawˇ hui ngaˬ hta‸ lawˬ ve yoˬ. 16Ngaˬ yawˇ hui hta‸ kʼaw‸ kʼoˆ piˇ ve, Venˇ baˆ taˍ ve hta‸ gʼa hkanˍ ve chaw teˇ gʼaˇ lehˬ, venˇbaˆ taˍ shehˍ hpaˇ teˇ hpaˍ hta‸ mehˆ hpfuhˇ tawˍ da‸ leh, venˇbaˆ taˍ ve awˬ lawn hta‸ yawˇ maˇ gʼa yaw hkʼaw‸ sheˍ ve ceh ceh, hkʼaˬ ve teˇ gʼaˇ hta‸ htawˇ maˇ kʼoˆ, shu la‸ hkʼaw chiˇ a‸ piˇ tuˬ Roˉma‸ chaw hui awˬ liˇ maˇ cawˬ teh‸, ngaˬ yawˇ hui hta‸ kʼaw‸ kʼoˆ piˇ ve yoˬ. 17Hkʼe te leh, yawˇ hui choˬ kaˬ lo hpawnˬ la ve teˇ yanˇ htaˇ, ngaˬ awˬ yanˇ maˇ jiˆ leh, awˬ hkʼaw‸ nawˉ teˇ nyi suhˉ jehˬ kuiˬ kʼaw jaw hkʼoˆ mui leh, chaw oˇ ve hta‸ shiˍ veu laˇ tuˬ tawˇ piˇ ve yoˬ. 18Oˇ htaˇ, yawˇ hui tu leh chaw oˇ ve teˇ gʼaˇ awˬ hkʼoˆ venˇbaˆ taˍ ve teˇ yanˇ, ngaˬ dawˇ taˍ ve venˇbaˆ teˇ ceuˬ ka‸ yawˇ hui maˇ taˍ. 19Ya‸ hkʼaˇ, yawˇ hui oˉ kʼoˍ pui ve awˬ liˇ awˬ hkʼaˇ teˇ hpaˍ awˬ lawn leh, Yeˍsuˆ teh‸ meh ve suh peuˬ ve chaw teˇ gʼaˇ awˬ lawn ceh tiˉ yawˇ geh tawˇ gʼawˬ da‸ chehˇ ve yoˬ. Yeˍsuˆ oˇ ve lehˬ, te‸ chehˇ ve yoˬ teh‸ Pawˇlu‸ kʼoˆ tcuhˉ taˍ ve yoˬ. 20Awˬ lawn chi hta‸ hkʼaˬ hkʼe na nyi tuˬ ngaˬ dawˇ maˇ tawˆ ve pa taw, Awˬ lawn chi teˇ hpaˍ Yeˍruˆsaˍlehnˍ venˇ awˬ hkʼaw lo suhˉ jehˬ tuˬ, nawˬ oˇ kaˬ lo kʼai gaˇ laˇ teh‸, ngaˬ yawˇ hta‸ na nyi ve yoˬ. 21Ya‸ hkʼaˇ Pawˇlu‸ lehˬ, hkunˉ hawˉ hkanˇ lonˉ suhˉ taˆ laˇ tuˬ awˬ pon teh taˍ laˇ sheˍ teh‸ yawˇ lawˬ hkawˉ ve pa taw, yawˇ hta‸ jawˇ mawˇ Kehˉsaˍ geh kʼai tcuh htaˇ hkʼa gaˬ shaw taˍ tuˬ ngaˬ tawˇ piˇ taˍ ve yoˬ teh‸, jawˇmawˇ Hpeˍtuˆ kʼoˆ piˇ ve yoˬ.

22Oˇ htaˇ jawˇmawˇ Aˍgiˇpaˆ kʼoˆ ve, Ngaˬ htawˇ yawˇ ve tawˇ hkawˇ hta‸ kaˇ gaˇ ve yoˬ teh‸ jawˇmawˇ Hpeˍtuˆ hta‸ kʼoˆ piˇ htaˇ,

Shawˉ pawˍ nawˬ gʼa kaˇ tuˬ yoˬ teh‸, jawˇmawˇ Hpeˍtuˆ kʼaw‸ kʼoˆ piˇ ve yoˬ.

23Hkʼe te leh, awˬ hkʼaw‸ nawˉ teˇ nyi jawˇ mawˇ Aˍgiˇpaˆ leh Beˍraˍniˆ yawˇ huiˉ maˬ lehˬ, awˬ me‸ awˬ hponˇ jiˇ leh, ma‸ teˇ hinˉ poˍ hui leh, venˇ awˬ hkʼaw lo ve chaw uiˍ teˇ hpaˍ geh teˇ geh hpawnˬ da‸ kuiˬ bawehˇ awˬ hkʼaw lo lo‸-e ve yoˬ. Jawˇ mawˇ Hpeˍtuˆ tawˇ piˇ ve teˇ yanˇ, Pawˇlu‸ hta‸ shu shiˍ veu laˇ ve yoˬ. 24Oˇ htaˇ jawˇmawˇ Hpeˍtuˆ kʼoˆ ve, Hkunˉ hawˉ hkanˇ Aˍgiˇpaˆ leh choˬ kaˬ lo hpawnˬ chehˇ ve chaw teˇ hpaˍ-oˬ, chi beu‸ nawˬ hui mawˬ ve chaw chi teˇ gʼaˇ lehˬ, Yeˍruˆsaˍlehnˍ venˇ awˬ hkʼaw lo maˇ kʼoˆ, choˬ kaˬ lo maˇ kʼoˆ, yawˇ awˬ lawn Yuˇda‸ chaw hkʼa peu-eˬ ngaˬ geh laˬ leh, Chi hpaˇ te‸ chehˇ maˇ keunˍ teh‸ yawˇ hui gʼaˇ hte‸ kuˬ ve yoˬ. 25Ya‸ hkʼaˇ, chaw chi hpaˇ awˬ hkʼaw lo suh keunˍ ve venˇbaˆ hta‸ ngaˬ maˇ mawˬ. Yawˇ awˬ to hkunˉ hawˉ hkanˇ lonˉ geh kʼai tuˬ lawˬ ve pa taw, yawˇ hta‸ kʼai tcuh tuˬ ngaˬ dawˇ cheˆ taˍ peuˬ. 26Yawˇ ve awˬ lawn ngaˬ ve jawˇmawˇ lonˉ hta‸ li‸ bvuh‸ piˇ tuˬ awˬ ti teˇ ceuˬ ka‸ maˇ cawˬ sheˍ. Hkʼe te leh, ngaˬ hui yawˇ hta‸ hkʼa deh‸ na nyi peuˬ kʼo, yawˇ ve awˬ lawn ngaˬ teˇ ceuˬ ceuˬ bvuh‸ hpeh‸ tuˬ, nawˬ hui chi ma ve mehˆ gʼuˇ suhˍ maˇ kʼoˆ, hkunˉ hawˉ hkanˇ Aˍgiˇpaˆ-oˬ, leuˉ leh nawˬ mehˆ gʼuˇ suhˍ maˇ kʼoˆ, ngaˬ yawˇ hta‸ shiˍ veu laˇ peuˬ. 27Awˬ lawn kʼo, htawnˍ hkʼaw keu taˍ ve chaw teˇ gʼaˇ hta‸ peu kʼai ve teˇ yanˇ, yawˇ hta‸ venˇbaˆ taˍ ve awˬ lawn teˇ hpaˍ li‸ hkʼa deh‸ maˇ bvuh‸ piˇ kʼo, a ciˉ ka‸ maˇ cawˇ teh‸ ngaˬ dawˇ ve yoˬ teh‸ jawˇmawˇ Hpeˍtuˆ kʼoˆ piˇ ve yoˬ.

Currently Selected:

Tcuh yaˇ li‸ 25: LHBE

Highlight

Copy

Compare