Tcuh yaˇ li‸ 22

1Awˬ viˉ awˬ nyi hui leh awˬ pa teˇ hpaˍ-oˬ, nawˬ hui mehˆ gʼuˇ suhˍ ngaˬ ve awˬ lawn ngaˬ yaw hkʼaw‸ ve tawˇ hkawˇ hta‸ a ciˉ na sheˍ teh‸ kʼoˆ piˇ ve yoˬ. 2Yawˇ Heˍbrehˇ hkawˇ yaw ve hta‸ yawˇ hui gʼa kaˇ htaˇ, ya‸ sheh htaˇ a‸ kehˉ ka‸ ta‸ iˉ gawˬ lehˍ chehˇ ve yoˬ. Oˇ htaˇ yawˇ kʼoˆ ve,

3Ngaˬ lehˬ Kiˇliˇkiˆ mvuhˇmiˬ Taˍsuˆ venˇ awˬ hkʼaw lo paw la ve Yuˇda‸ chaw teˇ gʼaˇ hpeh‸ ve yoˬ. Ya‸ hkʼaˇ, Yeˍruˆsaˍlehnˍ venˇ chi awˬ hkʼaw lo Gaˍmaˍleˍlaˆ ve hkui paˇ lo ngaˬ uiˍ la leh, awˬ puˍ awˬ pi hui ve awˬliˇtawˇhkawˇ hta‸ ngaˬ hkʼa deh‸ gʼa henˇ ve yoˬ. Ya‸ nyi nawˬ hui hkʼa peu-eˬ Gʼuiˬsha awˬ pon nyi ma pfuhˇ jaˇ ve hkʼa shuˍ shuˍ ngaˬ htawˇ nyi ma pfuhˇ jaˇ ve yoˬ. 4Ponˬ laˬ htaˇ, hawˉ hkʼaˆ yaˇ miˇ teˇ hpaˍ hta‸ hpeh yuˬ leh htawnˍ hkʼaw lo keu leh, tiˇ pehˍ htaˇ hkʼa gaˬ Ya‸ kʼaw awˬ liˇ chi hta‸ ngaˬ fawˉ mehˍ jaw peuˬ. 5Paw hkuˇ lonˉ leh awˬ hoˉ chaw mawˇ hkʼa peu-eˬ htawˇ ngaˬ awˬ pon shaˉ hkiˆ hkanˍ hpeh‸ ve yoˬ. Yawˇ hui geh awˬ viˉ awˬ nyi teˇ hpaˍ awˬ pon ngaˬ li‸ gʼa leh, Daˍmaˍsehˆ venˇ hkʼaw lo chehˇ ve chaw teˇ hpaˍ hta‸ htawˇ hpeh yuˬ veu laˇ leh Yeˍruˆsaˍlehnˍ venˇ awˬ hkʼaw lo ciˍ yanˍ piˇ tuˬ, ngaˬ Daˍmaˍsehˆ venˇ lo kʼai ve yoˬ.

Pawˇlu‸ yawˇ Hkri‸ yaˇ hpeh‸ la ve awˬ lawn hto piˇ ve

6Ngaˬ kʼai leh Daˍmaˍsehˆ venˇ awˬ paˇ lo gaˬ la htaˇ, mvuhˇ law‸ kʼaw tcuhˆ teˇ yanˇ, mvuhˇ naw ma lo hehnˇ jaˇ ve awˬ gʼeuˆ teˇ cawˬ haˉ ngaˬ hta‸ hkʼa caw zuhˇ hti la ve yoˬ. 7Ngaˬ miˬ chaˇ hkʼoˆ paiˍ leh, Sawˇlu‸-oˬ, Sawˇlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le teh‸, ngaˬ hta‸ kʼoˆ laˇ ve awˬ hkawˇ hta‸ gʼa kaˇ ve yoˬ. 8Jawˇmawˇ-oˬ, nawˬ a shu le teh‸, ngaˬ na nyi htaˇ, yawˇ kʼaw‸ kʼoˆ laˇ ve, Ngaˬ lehˬ nawˬ fawˉ mehˍ laˇ chehˇ ve Naˍzaˍrehˆ chaw Yeˍsuˆ yoˬ teh‸ kʼaw‸ kʼoˆ laˇ ve yoˬ. 9Ngaˬ geh kʼai chehˇ ve chaw teˇ hpaˍ lehˬ, awˬ gʼeuˆ oˇ ve hta‸ gʼa mawˬ htawˇ, ngaˬ hta‸ tawˇ yaw laˇ ve awˬ hkawˇ hta‸ yawˇ hui maˇ gʼa kaˇ. 10Oˇ htaˇ ngaˬ kʼaw‸ kʼoˆ piˇ ve, Jawˇmawˇ-oˬ, ngaˬ aˬ hto‸ ma gʼa te tuˬ le teh‸ na nyi htaˇ, Jawˇmawˇ kʼaw‸ kʼoˆ laˇ ve, Tu leh Daˍmaˍsehˆ venˇ hkʼaw lo kʼai-o. Nawˬ awˬ pon hkʼa fuiˍ teh taˍ ve kanˉ hkʼa peu-eˬ oˇ kaˬ lo nawˬ hta‸ hto laˇ tuˬ yoˬ teh‸, ngaˬ hta‸ kʼaw‸ kʼoˆ laˇ ve yoˬ. 11Hehnˇ jaˇ ve awˬ gʼeuˆ oˇ ve hta‸ pa taw ngaˬ mehˆ maˇ mawˬ ve teˇ yanˇ, ngaˬ geh kʼai ve chaw teˇ hpaˍ ngaˬ ve la‸ sheh hta‸ sheh veu leh, Daˍmaˍsehˆ venˇ hkʼaw lo‸-e ve yoˬ.

12Oˇ kaˬ lo chehˇ ve Yuˇda‸ chaw hkʼa peu-eˬ awˬ hkʼaw lo awˬ meh da‸ leh awˬliˇtawˇhkawˇ awˬ hkʼaˇ suh Gʼuiˬsha hta‸ yawˆ yan puiˉ ve Aˍnaˍniˆ meh ve chaw teˇ gʼaˇ cawˬ ve yoˬ. 13Yawˇ ngaˬ geh laˬ leh, Awˬ nyi paˍ Sawˉlu‸-oˬ, nawˬ mehˆ kʼaw‸ mawˬ la-o teh‸ ngaˬ awˬ paˇ lo huˉ taˍ leh kʼoˆ laˇ ve yoˬ. Oˇ teˇ hkui awˬ hkʼaw lo ngaˬ mehˆ kʼaw‸ mawˬ la leh yawˇ hta‸ gʼa mawˬ ve yoˬ. 14Oˇ htaˇ yawˇ kʼoˆ ve, Nawˬ lehˬ Gʼuiˬsha ve a loˍ hta‸ gʼa shiˍ tuˬ ve maˇ kʼoˆ, hteˇ ve cawˇ ve teˇ gʼaˇ hta‸ gʼa mawˬ tuˬ ve maˇ kʼoˆ, yawˇ ve maw‸ kʼaw hkʼaw tawˆ la ve tawˇ hkawˇ hta‸ gʼa kaˇ tuˬ ve maˇ kʼoˆ, ngaˬ hui ve awˬ puˍ awˬ pi hui ve Gʼuiˬsha lehˬ, nawˬ hta‸ leuˆ yuˬ peuˬ. 15Awˬ lawn kʼo, nawˬ gʼa mawˬ gʼa kaˇ ve teˇ hpaˍ hta‸ chaw hkʼa peu-eˬ mehˆ gʼuˇ suhˍ yawˇ awˬ pon nawˬ shaˉ hkiˆ hkanˍ shehˍ hpaˇ gʼa hpeh‸ tuˬ yoˬ. 16Chi beu‸ nawˬ aˬ hto‸ ma pa taw law chehˇ ve le. Tu la-o. Yawˇ ve awˬ meh hta‸ peun ve awˬ hkʼaw lo baˆtiˆsaˬ hkanˍ yuˬ leh, nawˬ ve venˇbaˆ teˇ hpaˍ htaˬ tsuhˇ hkʼa-o teh‸ yawˇ ngaˬ hta‸ kʼoˆ laˇ ve yoˬ.

Buiˇ shaˆ aˉ naˆ chaw hui geh kʼai tuˬ Yeˍsuˆ Pawˇlu‸ hta‸ kuˬ ve

17Oˇ ve awˬ hkʼaw‸ nawˉ, ngaˬ Yeˍruˆsaˍlehnˍ venˇ lo kʼaw‸ gaˬ la leh, bon yehˬ lonˉ awˬ hkʼaw lo bon lawˬ chehˇ htaˇ, awˬ ha awˬ hkʼaw lo ngaˬ Jawˇmawˇ Yeˍsuˆ hta‸ gʼa mawˬ ve yoˬ. 18Yawˇ ngaˬ hta‸ kʼoˆ laˇ ve, Yeˍruˆsaˍlehnˍ venˇ awˬ hkʼaw lo haˆ haˆ tawˆ kʼai loˬ. Awˬ lawn kʼo, ngaˬ awˬ lawn nawˬ shaˉ hkiˆ hkanˍ ve hta‸ chaw chi teˇ hpaˍ maˇ ha‸ yuˬ teh‸ yawˇ kʼoˆ laˇ ve yoˬ. 19Oˇ htaˇ ngaˬ kʼaw‸ kʼoˆ piˇ ve, Jawˇmawˇ-oˬ, nawˬ hta‸ yonˍ ve chaw teˇ hpaˍ hta‸ ngaˬ htawnˍ hkʼaw yuˬ keu leh, bon yehˬ teˇ yehˬ le le awˬ hkʼaw lo ngaˬ yawˇ hui hta‸ dawˆ ve awˬ lawn yawˇ hui shiˍ taˍ ve yoˬ. 20Nawˬ ve shaˉ hkiˆ hkanˍ shehˍ hpaˇ Saˍteˍhpanˍ ve awˬ suhˍ hta‸ yuˬ sheˆ ve teˇ yanˇ, ngaˬ lehˬ awˬ paˇ lo huˉ taˍ leh yawˇ hui te chehˇ ve hta‸ ngaˬ nyi ma cawˇ ve yoˬ. Yawˇ hta‸ tiˇ pehˍ shehˍ hpaˇ hui ve veu‸ kʼaˇ hta‸ htawˇ ngaˬ shaw taˍ ve yoˬ teh‸, ngaˬ kʼaw‸ kʼoˆ piˇ ve yoˬ. 21Yawˇ kʼaw‸ kʼoˆ laˇ ve, Tawˆ kʼai loˬ. Ngaˬ nawˬ hta‸ vuiˇ kuiˬ lo chehˇ ve buiˇ shaˆ aˉ naˆ chaw hui geh kʼai tcuh tuˬ yoˬ teh‸, Pawˇlu‸ yawˇ hui hta‸ kʼoˆ piˇ ve yoˬ.

Roˉma‸ ma‸ poˍ ve la‸ hkʼaw lo Pawˇlu‸ chehˇ ve

22Tawˇ chi teˇ hkawˇ hkʼa gaˬ yawˇ hui yawˇ ve hkawˇ hta‸ ta‸ iˉ na taˍ ve yoˬ. Oˇ htaˇ, yawˇ hui awˬ hkawˇ bvuhˬ chaweh kuˬ leh kʼoˆ ve, Chi hkʼe ve chaw hta‸ miˬguiˬ hkʼoˆ lo yuˬ baˬ loˬ. Yawˇ te‸ chehˇ maˇ keunˍ teh‸ yawˇ hui kʼoˆ ve yoˬ. 23Yawˇ hui kuˬ leh, a shu yawˇ ve veu‸ kʼaˇ hta‸ kʼehˆ leh baˬ taˆ ve, je‸ meu-e ka‸ mvuhˇ hpe lo hkaˆ baˬ ve yoˬ. 24Hkʼe te leh, ma‸ teˇ hinˉ poˍ lehˬ, Pawˇlu‸ hta‸ ma‸ yaˇ yehˬ awˬ hkʼaw lo yuˬ kʼai tcuh leh, aˬ hto‸ ma pa taw shu yawˇ awˬ lawn chi hkʼe kʼoˆ kuˬ chehˇ ve hta‸ gʼa shiˍ tuˬ, Yawˇ hta‸ jaw‸ leh na nyi-o teh‸ tawˇ piˇ ve yoˬ. 25Shaˍ guiˬ caˆ yuˬ leh yawˇ hta‸ hpeh ve teˇ yanˇ, Pawˇlu‸ lehˬ awˬ paˇ lo huˉ taˍ ve ma‸ poˍ hta‸ kʼoˆ piˇ ve, Roˉma‸ chaw hpeh‸ ve teˇ gʼaˇ hta‸ suhˉ maˇ jehˬ leh nawˬ hui jaw‸ ve awˬ liˇ cawˬ leh laˇ teh‸ na nyi ve yoˬ.

26Tawˇ oˇ ve hta‸ ma‸ poˍ gʼa kaˇ htaˇ, ma‸ teˇ hinˉ poˍ geh kʼai leh, Nawˬ hkʼaˬ hkʼe te tuˬ dawˇ ve le. Chaw chi teˇ gʼaˇ lehˬ, Roˉma‸ chaw hpeh‸ ve law teh‸, yawˇ hta‸ kʼoˆ piˇ ve yoˬ.

27Ma‸ teˇ hinˉ poˍ lehˬ Pawˇlu‸ geh laˬ leh, Nawˬ Roˉma‸ chaw yoˬ laˇ. Ngaˬ hta‸ hto laˇ-oˆ teh‸ na nyi htaˇ,

Yoˬ teh‸ Pawˇlu‸ kʼaw‸ kʼoˆ piˇ ve yoˬ.

28Ma‸ teˇ hinˉ poˍ kʼaw‸ kʼoˆ piˇ ve, Ngaˬ Roˉma‸ chaw hpeh‸ la tuˬ hpu maˇ maˇ gʼa piˇ ve yoˬ teh‸ kʼoˆ htaˇ,

Pawˇlu‸ kʼaw‸ kʼoˆ ve, Ngaˬ lehˬ, paw la htaˇ ka‸ Roˉma‸ chaw hpeh‸ ve yoˬ teh‸ kʼoˇ piˇ ve yoˬ.

29Oˇ htaˇ, yawˇ hta‸ jaw‸ leh na nyi-a teh‸ te ve chaw teˇ hpaˍ teˇ cawˬ haˉ tawˆ kʼai ve yoˬ. Ma‸ teˇ hinˉ poˍ htawˇ, Pawˇlu‸ Roˉma‸ chaw hpeh‸ ve hta‸ gʼa shiˍ htaˇ, yawˇ hta‸ gʼa hpeh peuˬ ve pa taw kawˆ jaˇ ve yoˬ.

Yuˇda‸ jawˇmawˇ hui mehˆ gʼuˇ suhˍ Pawˇlu‸ gaˬ ve

30Awˬ hkʼaw‸ nawˉ teˇ nyi, Yuˇda‸ chaw hui Pawˇlu‸ awˬ hkʼoˆ venˇbaˆ taˍ ve hta‸ hkʼa deh‸ gʼa shiˍ tuˬ, ma‸ teˇ hinˉ poˍ lehˬ, Pawˇlu‸ hta‸ hpeh taˍ ve hta‸ hpui hkʼa leh, paw hkuˇ lonˉ hui leh jehˬ da‸ shehˍ hpaˇ awˬ moˍ hta‸ kuˬ hpawnˬ peuˬ hkʼaw‸ nawˉ, Pawˇlu‸ hta‸ shiˍ ya‸-e leh, yawˇ hui awˬ kʼaw ji lo teh taˍ ve yoˬ.

Currently Selected:

Tcuh yaˇ li‸ 22: LHBE

Highlight

Copy

Compare