Tcuh yaˇ li‸ 23

1Oˇ htaˇ, Pawˇlu‸ lehˬ jehˬ da‸ shehˍ hpaˇ awˬ moˍ hta‸ hkʼa deh‸ nyi leh kʼoˆ ve, Awˬ viˉ awˬ nyi teˇ hpaˍ-oˬ, ya‸ nyi hkʼa gaˬ Gʼuiˬsha mehˆ gʼuˇ suhˍ ngaˬ hkʼa te ve teˇ hpaˍ hta‸ pa taw ngaˬ ve shiˍ puiˉ ve nyi ma lehˬ, ngaˬ awˬ hkʼoˆ venˇbaˆ maˇ taˍ. 2Oˇ htaˇ paw hkuˇ lonˉ Aˍnaˍniˆ lehˬ, Yawˇ ve maw‸ kʼaw hta‸ dawˆ hpehˇ-oˆ teh‸, Pawˇlu‸ awˬ paˇ lo huˉ chehˇ ve chaw hui hta‸ kʼoˆ piˇ ve yoˬ. 3Oˇ htaˇ Pawˇlu‸ yawˇ hta‸ kʼoˆ piˇ ve, Htunˉ shehˍ taˍ ve gʼo‸ pa-oˬ, Gʼuiˬsha nawˬ hta‸ dawˆ tuˬ yoˬ. Awˬliˇtawˇhkawˇ awˬ hkʼaˇ suh ngaˬ hta‸ suhˉ jehˬ tuˬ nawˬ choˬ kaˬ mui chehˇ ve ka‸, awˬliˇtawˇhkawˇ hta‸ maˇ hawˍ ve awˬ hkʼaw lo nawˬ ngaˬ hta‸ dawˆ tcuh ve laˇ teh‸ kʼoˆ piˇ ve yoˬ.

4Awˬ paˇ lo huˉ chehˇ ve chaw teˇ hpaˍ lehˬ, Gʼuiˬsha ve paw hkuˇ lonˉ hta‸ nawˬ maˇ shawˍ maˇ caˆ kʼoˆ ve laˇ teh‸ na nyi ve yoˬ.

5Pawˇlu‸ kʼaw‸ kʼoˆ ve, Awˬ viˉ awˬ nyi teˇ hpaˍ-oˬ, yawˇ lehˬ paw hkuˇ lonˉ hpeh‸ ve hta‸ ngaˬ maˇ shiˍ. Nawˬ ve chaw ceuˬ hta‸ uˉ peunˍ shehˍ hpaˇ awˬ lawn nawˬ haiˬ ve hkawˇ maˇ gʼa yaw teh‸ bvuh‸ taˍ ve yoˬ teh‸, Pawˇlu‸ kʼoˆ ve yoˬ. #Taw 22:28

6Hpawnˬ da‸ ve chaw teˇ hpaˍ hpaˍ Saˍduˆkehˇ hpeh‸ leh, teˇ hpaˍ hpaˍ Hpaˍriˍsehˇ hpeh‸ ve hta‸ Pawˇlu‸ gʼa mawˬ gʼa shiˍ htaˇ, jehˬ da‸ shehˍ hpaˇ awˬ moˍ hta‸ yawˇ kʼoˆ piˇ ve, Awˬ viˉ awˬ nyi teˇ hpaˍ-oˬ, ngaˬ lehˬ Hpaˍriˍsehˇ hpeh‸ leh, Hpaˍriˍsehˇ ve awˬ yaˇ htawˇ hpeh‸ ve yoˬ. Suh ve chaw hui kʼaw‸ te‸ tu la ve hta‸ dawˇ law ve teˇ ceuˬ hta‸ pa taw ngaˬ suhˉ jehˬ ve hta‸ gʼa hkanˍ ve yoˬ teh‸, bvuhˬ chaweh kʼoˆ ve yoˬ.

7Yawˇ chi hkʼe kʼoˆ ve teˇ yanˇ, Hpaˍriˍsehˇ hui leh Saˍduˆkehˇ hui tawˇ gʼawˬ da‸ leh, hpawnˬ da‸ ve chaw hui nyiˇ moˍ hpeh‸ sheˬ ve yoˬ. 8Awˬ lawn kʼo, Saˍduˆkehˇ hui lehˬ, kʼaw‸ te‸ tu la ve maˇ cawˬ, mvuhˇ naw ma tcuh yaˇ ka‸ awˬ ha ka‸ maˇ cawˬ teh‸ kʼoˆ ve yoˬ. Ya‸ hkʼaˇ Hpaˍriˍsehˇ hui lehˬ, chi hkʼa peu-eˬ cawˬ ve yoˬ teh‸ yonˍ ve yoˬ. 9Hkʼe te leh duiˆ-ehˍ shaˇ-ehˍ hpeh‸ la ve yoˬ. Oˇ htaˇ, Hpaˍriˍsehˇ ve awˬ moˍ awˬ hkʼaw lo ve li‸ bvuh‸ paˍ teˇ hpaˍ hpaˍ tu leh kʼoˆ ve, Chi hpaˇ awˬ hkʼaw lo venˇbaˆ teˇ ceuˬ hta‸ ka‸ ngaˬ hui maˇ mawˬ. Awˬ ha, maˇ heˆ kʼo mvuhˇ naw ma tcuh yaˇ yawˇ hta‸ tawˇ yaw piˇ leh naˍ teh‸ kʼoˆ leh tawˇ gʼawˬ da‸ ve yoˬ.

10Chi hkʼe tawˇ gʼawˬ da‸ jaˇ ve teˇ yanˇ, chaw oˇ ve teˇ hpaˍ lehˬ Pawˇlu‸ hta‸ gʼawˬ tzuh‸ sheˬ puiˉ-aˆ teh‸, ma‸ teˇ hinˉ poˍ dawˇ haˍ ve pa taw, yawˇ ma‸ yaˇ teˇ hpaˍ hta‸ ya‸-e tcuh leh, Pawˇlu‸ hta‸ yawˇ hui ve la‸ sheh awˬ hkʼaw lo lu yuˬ peuˬ hkʼaw‸ nawˉ, ma‸ yaˇ yehˬ awˬ hkʼaw lo kʼaw‸ yuˬ kʼai tuˬ, yawˇ tawˇ piˇ ve yoˬ.

11Oˇ ve teˇ haˉ, Jawˇmawˇ Gʼuiˬsha Pawˇlu‸ awˬ paˇ lo huˉ taˍ leh kʼoˆ ve, Nyi ma taˇ luˬ. Yeˍruˆsaˍlehnˍ venˇ awˬ hkʼaw lo ngaˬ ve awˬ lawn nawˬ shaˉ hkiˆ hkanˍ peuˬ ve hkʼa shuˍ shuˍ Roˉma‸ venˇ awˬ hkʼaw lo htawˇ nawˬ shaˉ hkiˆ gʼa hkanˍ tuˬ yoˬ teh‸ yawˇ hta‸ kʼoˆ piˇ ve yoˬ.

Pawˇlu‸ hta‸ tiˇ pehˍ tuˬ shu hkʼawˇ jehˬ ve

12Mvuhˇ htiˇ la ve teˇ yanˇ, Yuˇda‸ chaw teˇ hpaˍ hpawnˬ da‸ leh, Pawˇlu‸ hta‸ maˇ gʼa tiˇ pehˍ ve ceh ceh, te‸ chiˉ ka‸ maˇ caˇ maˇ dawˬ teh‸ kʼoˆ leh, a shu yawˇ awˬ to hta‸ hkanˍ taˍ ve yoˬ. 13Chi hkʼe hkanˍ taˍ ve chaw awˇ chi hpaˆ cawˬ ve yoˬ. 14Yawˇ hui lehˬ, paw hkuˇ lonˉ teˇ hpaˍ leh awˬ hoˉ chaw mawˇ teˇ hpaˍ geh kʼai leh kʼoˆ ve, Ngaˬ hui Pawˇlu‸ hta‸ maˇ gʼa tiˇ pehˍ ve ceh ceh, caˇ tuˬ a ciˉ ka‸ maˇ leh‸ nyi teh‸ kʼoˆ leh, a shu yawˇ awˬ to hta‸ hkanˍ taˍ ve yoˬ. 15Hkʼe te leh, nawˬ hui leh jehˬ da‸ shehˍ hpaˇ awˬ moˍ teˇ geh Pawˇlu‸ ve awˬ lawn hta‸ leuˉ leh hkʼa deh‸ na nyi tuˬ ve hkʼe te leh, yawˇ hta‸ nawˬ hui geh yuˬ laˬ tuˬ ma‸ teˇ hinˉ poˍ hta‸ lawˬ hkʼawˉ-oˆ. Awˬ paˇ lo yawˇ maˇ gaˬ la sheˍ htaˇ yawˇ hta‸ tiˇ pehˍ tuˬ ngaˬ hui gu taˍ peuˬ teh‸ kʼoˆ piˇ ve yoˬ.

16Yawˇ hui chi hkʼe naˆ taˍ ve awˬ lawn hta‸ Pawˇlu‸ ve awˬ nuˍ ma ve yaˇ paˍ gʼa shiˍ leh, yawˇ ma‸ yaˇ yehˬ hkʼaw lo‸-e leh Pawˇlu‸ hta‸ ca hto piˇ ve yoˬ. 17Pawˇlu‸ lehˬ, ma‸ poˍ teˇ gʼaˇ hta‸ kuˬ leh yawˇ hta‸ kʼoˆ piˇ ve, Chaw haˉ paˍ chi hta‸ ma‸ teˇ hinˉ poˍ geh shiˍ kʼai-o. Yawˇ hta‸ kʼoˆ piˇ tuˬ awˬ lawn cawˬ ve yoˬ teh‸ kʼoˆ piˇ ve yoˬ. 18Hkʼe te leh, ma‸ poˍ yawˇ hta‸ shiˍ kʼai leh, ma‸ teˇ hinˉ poˍ geh gaˬ htaˇ yawˇ hta‸ kʼoˆ piˇ ve, Chaw haˉ paˍ chi nawˬ hta‸ kʼoˆ laˇ tuˬ awˬ lawn cawˬ ve pa taw, yawˇ hta‸ nawˬ geh shiˍ veu laˇ tuˬ, htawnˍ hkʼaw chehˇ ve Pawˇlu‸ ngaˬ hta‸ kuˬ leh lawˬ hkawˉ laˇ ve yoˬ teh‸ kʼoˆ piˇ ve yoˬ.

19Ma‸ teˇ hinˉ poˍ lehˬ, chaw haˉ paˍ ve la‸ sheh hta‸ yuˬ leh, baˬ kuiˬ lo shiˍ kʼai leh kʼoˆ ve, Nawˬ ngaˬ hta‸ aˬ hto‸ ma kʼoˆ laˇ tuˬ cawˬ le teh‸ na nyi ve yoˬ.

20Oˇ htaˇ yawˇ kʼaw‸ kʼoˆ ve, Pawˇlu‸ awˬ lawn hkʼa deh‸ na nyi gaˇ ve hkʼe te leh, shawˉ pawˍ kʼo jehˬ da‸ shehˍ hpaˇ awˬ moˍ geh shiˍ veu laˇ tuˬ Yuˇda‸ chaw teˇ hpaˍ nawˬ hta‸ lawˬ hkawˉ tuˬ nyi ma hawˍ da‸ peuˬ. 21Ya‸ hkʼaˇ, yawˇ hui nyi ma cawˇ ve hkʼe nawˬ taˇ te. Awˬ lawn kʼo, Pawˇlu‸ hta‸ maˇ gʼa tiˇ pehˍ ve ceh ceh, te‸ chiˉ ka‸ maˇ caˇ maˇ dawˬ teh‸, chaw awˇ chi hpaˆ shaˉ hkiˆ hkanˍ taˍ leh, yawˇ hta‸ naˆ chehˇ taˍ ve yoˬ. Chi beu‸ yawˇ hui gu taˍ leh, nawˬ ve tawˇ hkawˇ hta‸ law na chehˇ ve yoˬ teh‸ kʼoˆ piˇ ve yoˬ.

22Ma‸ teˇ hinˉ poˍ chaw haˉ paˍ hta‸ kʼoˆ piˇ ve, Nawˬ ngaˬ hta‸ hto laˇ ve awˬ lawn chi, chaw teˇ gʼaˇ hta‸ ka‸ taˇ hto piˇ teh‸ tawˇ piˇ peuˬ leh, yawˇ hta‸ kʼo‸-e tcuh ve yoˬ.

Jawˇmawˇ lonˉ Hpeˍliˆ geh Pawˇlu‸ hta‸ kʼai tcuh ve

23Oˇ htaˇ, ma‸ teˇ hinˉ poˍ lehˬ, ma‸ poˍ nyiˇ gʼaˇ hta‸ kuˬ yuˬ leh kʼoˆ piˇ ve, Ya‸ puiˉ kʼawˇ naˍ riˍ htaˇ Kehˉsaˍriˆ venˇ lo kʼai tuˬ, la‸ caˉ pfuhˇ ve ma‸ yaˇ nyiˇ ha, iˉ mvuhˇ ciˇ ve ma‸ yaˇ suhˍ chi leh, gehˇ taˆ ve ma‸ yaˇ nyiˇ ha hta‸ hkʼa deh‸ gu taˍ-o‸. 24Chi hkʼoˆ ka‸, Pawˇlu‸ ciˇ tuˬ ve iˉ mvuhˇ teˇ hpaˍ hta‸ hkʼa deh‸ gu taˍ leh, mvuhˇmiˬ jawˇ mawˇ lonˉ Hpeˍliˆ geh yawˇ hta‸ hkʼa deh‸ shiˍ kʼoˬ piˇ-oˆ teh‸, yawˇ huiˉ maˬ hta‸ tawˇ piˇ ve yoˬ. 25Ma‸ teˇ hinˉ poˍ lehˬ li‸ chi hkʼe bvuh‸ feu piˇ ve,

26Kaˍlawˇdiˆ Luˇsiˆ lehˬ, awˬ me‸ awˬ hponˇ uiˍ ve mvuhˇmiˬ jawˇmawˇ lonˉ Hpeˍliˆ hta‸ ha‸ pehnˇ ve tawˇ hkawˇ shanˍ feu laˇ ve yoˬ. 27Chaw chi teˇ gʼa hta‸ Yuˇda‸ chaw hui hpeh yuˬ leh, yawˇ hta‸ tiˇ pehˍ-a teh‸ te ve teˇ yanˇ, ma‸ yaˇ teˇ hpaˍ geh teˇ geh ngaˬ kʼai leh, yawˇ Roˉma‸ chaw hpeh‸ ve hta‸ gʼa shiˍ ve pa taw yawˇ hta‸ ponˬ piˇ ve yoˬ. 28Yuˇda‸ chaw teˇ hpaˍ yawˇ awˬ hkʼoˆ venˇbaˆ hkʼaˬ hkʼe taˍ ve hta‸ ngaˬ shiˍ gaˇ ve pa taw, yawˇ hui ve jehˬ da‸ shehˍ hpaˇ awˬ moˍ geh ngaˬ yawˇ hta‸ shiˍ kʼai ve yoˬ. 29Suh keunˍ ve venˇbaˆ maˇ kʼoˆ, htawnˍ hkʼaw geh keunˍ ve venˇbaˆ maˇ kʼoˆ, yawˇ hui yawˇ awˬ hkʼoˆ maˇ taˍ. Ya‸ hkʼaˇ, yawˇ hui ve awˬ liˇ tawˇ hkawˇ hta‸ caˉ da‸ ve awˬ lawn hta‸ ceh venˇbaˆ taˍ ve hta‸ ngaˬ gʼa mawˬ ve yoˬ. 30Chaw chi teˇ gʼaˇ hta‸ tiˇ pehˍ tuˬ shu gu taˍ ve hta‸ ngaˬ gʼa kaˇ htaˇ, teˇ cawˬ haˉ yawˇ hta‸ nawˬ geh peu laˇ leh, yawˇ hta‸ venˇ baˆ taˍ ve chaw teˇ hpaˍ nawˬ mehˆ gʼuˇ suhˍ yawˇ awˬ lawn kʼoˆ tuˬ ngaˬ yawˇ hui hta‸ tawˇ piˇ taˍ ve yoˬ teh‸ bvuh‸ piˇ ve yoˬ.

31Hkʼe teˇ leh, ma‸ teˇ hinˉ poˍ kʼoˆ taˍ ve hkʼe, ma‸ yaˇ teˇ hpaˍ Pawˇlu‸ hta‸ shiˍ veu leh, Anˍtiˇpaˍriˆ venˇ hkʼa gaˬ tanˇ hkuinˇ htaˇ yawˇ hta‸ shiˍ kʼoˬ piˇ ve yoˬ. 32Shawˉ pawˍ teˇ nyi hkʼe Pawˇlu‸ hta‸ awˬ gʼuˇ suhˍ shiˍ kʼai tuˬ, awˬ kaˍ awˬ nu ma‸ yaˇ teˇ hpaˍ lehˬ, iˉ mvuhˇ ciˇ ve ma‸ yaˇ teˇ hpaˍ hta‸ teh taˉ leh, yawˇ hui ve chehˇ kuiˬ lo kʼaw‸ kʼo‸-e ve yoˬ. 33Iˉ mvuhˇ ciˇ ve ma‸ yaˇ teˇ hpaˍ lehˬ, Kehˉsaˍriˆ venˇ lo gaˬ htaˇ, mvuhˇmiˬ jawˇmawˇ lonˉ hta‸ li‸ piˇ leh, Pawˇlu‸ hta‸ htawˇ yawˇ geh shiˍ teh taˍ ve yoˬ. 34Mvuhˇmiˬ jawˇmawˇ lonˉ lehˬ, li‸ hta‸ gʼaw peuˬ hkʼaw‸ nawˉ, Pawˇlu‸ hkʼaˬ ve teˇ mvuhˇ miˬ hta‸ caˉ da‸ ve le teh‸ na nyi ve yoˬ. Yawˇ lehˬ Kiˇliˇkiˆ mvuhˇmiˬ hta‸ caˉ da‸ ve teh‸ gʼa shiˍ htaˇ, 35mvuhˇmiˬ jawˇmawˇ lonˉ kʼoˆ ve, Nawˬ hta‸ venˇbaˆ taˍ shehˍ hpaˇ teˇ hpaˍ gaˬ la htaˇ, nawˬ kʼoˆ tuˬ cawˬ ve teˇ hpaˍ hta‸ ngaˬ na tuˬ yoˬ teh‸ kʼoˆ piˇ ve yoˬ. Peuˬ leh, Pawˇlu‸ hta‸ Heˍroˆ ve hawˉ yehˬ awˬ hkʼaw lo haw taˍ tuˬ yawˇ tawˇ piˇ ve yoˬ.

Currently Selected:

Tcuh yaˇ li‸ 23: LHBE

Highlight

Copy

Compare