Tcuh yaˇ li‸ 21

Pawˇlu‸ Yeˍruˆsaˍlehnˍ venˇ lo kʼai ve

1Yawˇ hui hta‸ hpaˆ da‸ peuˬ hkʼaw‸ nawˉ, ngaˬ hui haw lo‸ kʼoˍ kʼaw‸ ciˇ leh, Kawˇsaˆ conˇ lo hteˇ lehˍ kʼai ve yoˬ. Awˬ hkʼaw‸ nawˉ teˇ nyi Rawˇduˆ conˇ lo kʼai leh, oˇ kaˬ lo kʼaw‸ tu leh Paˍtaˍraˆ venˇ lo gaˬ ve yoˬ. 2Oˇ kaˬ lo Hpiˇniˆ mvuhˇmiˬ lo kʼai ve haw lo‸ kʼoˍ hta‸ ngaˬ hui gʼa mawˬ leh, haw lo‸ kʼoˍ oˇ ve hta‸ kʼaw‸ ciˇ kʼai ve yoˬ 3Kuˇpaˍruˆ conˇ hta‸ gʼa mawˬ htaˇ, la‸ sha paˉ hpawˇ lo ngaˬ hui kʼai peuˬ hkʼaw‸ nawˉ, Suˇriˆ mvuhˇmiˬ lo ciˇ kʼai leh, Tuˇruˆ venˇ lo deh ve yoˬ. Awˬ lawn kʼo, haw lo‸ kʼoˍ hkʼaw taˆ taˍ ve mawˇ teˇ hpaˍ hta‸ oˇ kaˬ lo yuˬ ya‸-e ve yoˬ. 4Oˇ kaˬ lo awˬ la‸ gʼawˇ teˇ hpaˍ hta‸ ngaˬ hui ca mawˬ leh, suhˍ nyi hkʼa gaˬ chehˇ ve yoˬ. Awˬ la‸ gʼawˇ oˇ ve teˇ hpaˍ lehˬ, Pawˇlu‸ Yeˍruˆsaˍlehnˍ venˇ lo maˇ gʼa kʼai tuˬ, Awˬ ha hpu hta‸ cuˇ leh yawˇ hta‸ kʼoˆ piˇ ve yoˬ. 5Suhˍ nyi biˇ peuˬ hkʼaw‸ nawˉ, ngaˬ hui tawˆ kʼai ve yoˬ. Yawˇ hui hkʼa peu-eˬ leh, awˬ miˇ awˬ yaˇ hui ka‸ teˇ geh venˇ awˬ baˬ lo hkʼa gaˬ ngaˬ hui hta‸ shiˍ kʼoˬ laˇ leh, gʼuiˬ pfuhˍ paˇ lo ngaˬ hui hkʼa peu-eˬ hkui tcuhˉ teh leh bon lawˬ ve yoˬ. 6Teˇ gʼaˇ leh teˇ gʼaˇ hpaˆ da‸ hkawˇ yaw da‸ peuˬ hkʼaw‸ nawˉ, ngaˬ hui haw lo‸ kʼoˍ hkʼaw lo taˆ lo‸-e leh, yawˇ hui htawˇ a shu yawˇ ve aˉ hkʼaw lo kʼo‸-e ve yoˬ.

7Ngaˬ hui Tuˇruˆ venˇ lo tu leh, haw lo‸ kʼoˍ ciˇ ve ya‸ kʼaw leh peuˬ htaˇ, Paˍtawˇleˍ venˇ lo gaˬ ve yoˬ. Oˇ kaˬ lo chehˇ ve awˬ viˉ awˬ nyi hui geh ca guiˇ leh, yawˇ hui geh teˇ nyi chehˇ ve yoˬ. 8Awˬ hkʼaw‸ nawˉ teˇ nyi ngaˬ hui kʼaw‸ tawˆ kʼai leh, Kehˉsaˍriˆ venˇ lo gaˬ ve yoˬ. Suhˍ gʼaˇ awˬ hkʼaw lo, Hpiˇliˇpuˆ meh ve ha lehˬ ve bon hkawˇ maˍ piˇ shehˍ hpaˇ teˇ gʼaˇ ve aˉ hkʼaw lo ngaˬ hui lo‸-e leh, yawˇ geh chehˇ ve yoˬ. 9Gʼuiˬsha ve tcuh kaˍ ma te ve yawˇ ve yaˇ miˇ awˇ gʼaˇ cawˬ ve yoˬ. Yaˇ miˇ oˇ ve awˇ gʼaˇ lehˬ, yaˇ miˇ haˉ hpeh‸ ve yoˬ. 10Yawˇ aˉ hkʼaw lo ngaˬ hui a ciˉ maw chaweh chehˇ ve teˇ yanˇ, Aˍgaˍbuˆ meh ve Gʼuiˬsha ve tcuh kaˍ paˍ teˇ gʼaˇ Yuˇda‸ mvuhˇmiˬ lo tu leh oˇ kaˬ lo gaˬ la ve yoˬ. 11Yawˇ ngaˬ hui geh lo‸ la peuˬ hkʼaw‸ nawˉ, Pawˇlu‸ ve haˍ pi caˆ hta‸ yuˬ leh, yawˇ hkʼaˇ yawˇ, yawˇ ve hkui sheh la‸ sheh hta‸ hpeh taˍ ve yoˬ. Oˇ htaˇ yawˇ kʼoˆ ve, Da‸ ve kehˬ ve Awˬ ha hpu chi hkʼe kʼoˆ ve yoˬ. Haˍ pi caˆ chi ve awˬ shehˍ hpaˇ hta‸ Yeˍruˆsaˍlehnˍ venˇ hkʼaw lo Yuˇda‸ chaw teˇ hpaˍ chi hkʼe te hpeh yuˬ leh buiˇshaˆaˉnaˆ chaw hui ve la‸ sheh hkʼaw lo chiˇ a‸ piˇ tuˬ yoˬ teh‸, Aˍgaˍbuˆ kʼoˆ piˇ ve yoˬ.

12Ngaˬ hui tawˇ hkawˇ chi hta‸ gʼa kaˇ htaˇ, ngaˬ hui leh oˇ kaˬ lo chehˇ ve chaw hui lehˬ, Yeˍruˆsaˍlehnˍ venˇ lo maˇ gʼa kʼai tuˬ Pawˇlu‸ hta‸ lawˬ hkawˉ ve yoˬ. 13Pawˇlu‸ kʼaw‸ kʼoˆ ve, Aˬ hto‸ ma te nawˬ hui hawˬ leh ngaˬ ve nyi ma hkoˇ kʼai tuˬ te laˇ ve le. Jawˇmawˇ Yeˍsuˆ ve awˬ meh hta‸ pa taw, Yeˍruˆsaˍlehnˍ venˇ awˬ hkʼaw lo shu hpeh laˇ ve ceh tiˉ maˇ heˆ, suh ve hta‸ hkanˍ tuˬ ve ka‸ ngaˬ gu taˍ peuˬ teh‸ kʼoˆ laˇ ve yoˬ.

14Ngaˬ hui yawˇ hta‸ beˬ maˇ gʼa ve teˇ yanˇ, Jawˇ mawˇ Gʼuiˬsha ve a loˍ cawˇ ve hkʼe hpeh‸ la piˇ-oˆ teh‸, ngaˬ hui kʼoˆ leh ta‸ iˉ chehˇ taˍ ve yoˬ.

15Oˇ ve awˬ hkʼaw‸ nawˉ, ngaˬ hui mawˇ gu taˍ leh Yeˍruˆsaˍlehnˍ venˇ lo taˆ-e ve yoˬ. 16Kehˉsaˍriˆ venˇ hkʼaw chehˇ ve awˬ la‸ gʼawˇ teˇ hpaˍ hpaˍ ngaˬ hui geh teˇ geh kʼai leh, Maˍnaˍsonˍ meh ve Kuˇpaˍruˆ chaw teˇ gʼaˇ geh haˉ tuˬ, ngaˬ hui hta‸ yawˇ geh shiˍ kʼoˬ laˇ ve yoˬ. Yawˇ lehˬ, awˬ la‸ gʼawˇ hpeh‸ maw peuˬ ve chaw teˇ gʼaˇ hpeh‸ ve yoˬ.

Bon yehˬ lonˉ hkʼaw lo shu Pawˇlu‸ hta‸ hpeh yuˬ ve

17Ngaˬ hui Yeˍruˆsaˍlehnˍ venˇ lo gaˬ htaˇ, awˬ viˉ awˬ nyi teˇ hpaˍ ngaˬ hui hta‸ ha lehˬ ha kʼa ha‸ yuˬ laˇ ve yoˬ. 18Awˬ hkʼaw‸ nawˉ teˇ nyi, Pawˇlu‸ lehˬ ngaˬ hui geh teˇ geh Yaˍkoˆ geh kʼai leh, awˬ hoˉ chaw mawˇ hkʼa peu-eˬ htawˇ hpawnˬ chehˇ taˍ ve yoˬ. 19Pawˇlu‸ lehˬ, yawˇ hui hta‸ hpuˇ da‸ hkawˇ yaw da‸ peuˬ hkʼaw‸ nawˉ, yawˇ kanˉ te ve awˬ hkʼaw lo buiˇshaˆaˉnaˆ chaw hui awˬ pon Gʼuiˬsha hkʼa te ve kanˉ teˇ hpaˍ awˬ lawn, teˇ ceuˬ peuˬ teˇ ceuˬ yawˇ hui hta‸ kʼaoˍ maˍ piˇ ve yoˬ. 20Tawˇ hkawˇ chi hta‸ gʼa kaˇ htaˇ, yawˇ hui Gʼuiˬsha hta‸ chiˇ uiˍ chiˇ mvuh ve yoˬ. Oˇ htaˇ, yawˇ hui Pawˇlu‸ hta‸ kʼoˆ piˇ ve, Awˬ viˉ paˍ-oˬ, Yuˇda‸ chaw hui awˬ hkʼaw lo yonˍ ve chaw hkʼaˬ nyiˇ meunˍ cawˬ ve hta‸ nawˬ shiˍ taˍ ve yoˬ. Yawˇ hui hkʼa peu-eˬ awˬ liˇ tawˇ hkawˇ hta‸ nyi ma pfuhˇ jaˇ ve yoˬ. 21Nawˬ lehˬ, a shu yawˇ ve awˬ yaˇ teˇ hpaˍ hta‸ awˬ guiˬ meuˇ maˇ gʼa shoˍ leh, awˬ liˇ awˬ hkʼaˇ cawˬ ve hkʼe maˇ gʼa te teh‸ nawˬ kʼoˆ leh, Moˉseˍ ve awˬ liˇ hta‸ baˬ taˉ tuˬ, buiˇshaˆaˉnaˆ chaw hui geh chehˇ ve Yuˇda‸ chaw teˇ hpaˍ hta‸ nawˬ maˍ piˇ ve yoˬ teh‸, yawˇ hui laiˉ pawˆ gʼa kaˇ ve yoˬ. 22Hkʼe te leh, hkʼaˬ hkʼe te tuˬ le. Nawˬ gaˬ la ve awˬ lawn hta‸ yawˇ hui awˬ tehˬ awˬ na gʼa kaˇ tuˬ yoˬ. 23Chi hta‸ pa taw, nawˬ hta‸ ngaˬ hui kʼoˆ laˇ ve hkʼe te-o. Ka ti‸ shaˉ caˆ te taˍ ve chaw awˇ gʼaˇ ngaˬ hui geh chehˇ ve yoˬ. 24Yawˇ hui hta‸ kuˬ yuˬ leh, yawˇ hui geh teˇ geh da‸ la kehˬ la tuˬ ve awˬ liˇ hta‸ ca te-o. Yawˇ hui oˉ kʼoˍ chiˇ baˬ hpeh‸ tuˬ, yawˇ hui awˬ pon awˬ hpfuhˇ ca keu piˇ-oˆ. Oˇ hkʼe te ve kʼo, nawˬ ve awˬ lawn chaw chi ma ve gʼa kaˇ ve hkʼe maˇ cawˇ ve law teh‸ gʼa shiˍ leh, nawˬ awˬ to awˬ liˇ tawˇ hkawˇ awˬ hkʼaˇ suh hkʼa deh‸ kʼai chehˇ ve hta‸ gʼa shiˍ tuˬ yoˬ. 25Yonˍ ve buiˇshaˆaˉnaˆ chaw hui awˬ pon lehˬ, shaˉ ho‸ hta‸ tanˇ taˍ ve awˬ ceuˬ hta‸ caˇ ve maˇ kʼoˆ, awˬ suhˍ hta‸ caˇ ve maˇ kʼoˆ, kʼawˍ peˍ nyiˉ pehˍ ve awˬ shaˍ hta‸ caˇ ve maˇ kʼoˆ, haˉ chawˇ haˉ paˆ te ve hta‸ maˇ kʼoˆ, chi teˇ hpaˍ hta‸ jaw kʼai tuˬ ngaˬ hui jehˬ cheˆ taˍ ve hkʼe yawˇ hui hta‸ li‸ bvuh‸ piˇ peuˬ teh‸, yawˇ hui Pawˇlu‸ hta‸ kʼoˆ piˇ ve yoˬ.

26Oˇ htaˇ Pawˇlu‸ lehˬ, shawˉ pawˍ teˇ nyi hkʼe chaw oˇ ve awˇ gʼaˇ hta‸ kuˬ yuˬ leh, yawˇ hui geh teˇ geh da‸ la kehˬ la tuˬ ve awˬ liˇ hta‸ ca te peuˬ hkʼaw‸ nawˉ, bon yehˬ lonˉ hkʼaw lo‸-e ve yoˬ. Yawˇ hui awˬ pon da‸ la kehˬ la ve awˬ liˇ te ve awˬ nyi biˇ la tuˬ ve awˬ yanˇ, yawˇ hui teˇ gʼaˇ peuˬ teˇ gʼaˇ awˬ pon tanˇ tuˬ gʼa tanˇ piˇ tuˬ ve awˬ yanˇ ca hto piˇ ve yoˬ.

27Suhˍ nyi oˇ ve biˇ la paˇ neˇ htaˇ, Aˍsiˆ mvuhˇmiˬ lo laˬ ve Yuˇda‸ chaw teˇ hpaˍ lehˬ, Pawˇlu‸ hta‸ bon yehˬ lonˉ awˬ hkʼaw lo gʼa mawˬ leh, chaw awˬ moˍ lonˉ hta‸ ca juˆ piˇ ve yoˬ. Oˇ htaˇ, yawˇ hui Pawˇlu‸ hta‸ hpeh yuˬ peuˬ hkʼaw‸ nawˉ kuˬ leh kʼoˆ ve, 28Iˉsaˍreˍlaˆ chaw teˇ hpaˍ-oˬ, haˆ ga la-o. Chaw chi hpaˇ lehˬ, ngaˬ hui ve chaw ceuˬ hta‸ maˇ kʼoˆ, awˬliˇtawˇhkawˇ hta‸ maˇ kʼoˆ, chehˇ kuiˬ chi hta‸ maˇ kʼoˆ, chi teˇ hpaˍ hta‸ canˇ tuˬ teˇ kaˬ le le lo chehˇ ve chaw hkʼa peu-eˬ hta‸ maˍ piˇ ve chaw teˇ gʼaˇ hpeh‸ ve yoˬ. Chi hkʼoˆ ka‸, yawˇ Heˍlaˍsaˆ chaw teˇ hpaˍ hta‸ bon yehˬ lonˉ awˬ hkʼaw lo shiˍ veu laˇ leh, da‸ kehˬ ve chehˇ kuiˬ chi hta‸ cha‸ chiˆ tuˬ te ve yoˬ teh‸ kʼoˆ ve yoˬ. 29Awˬ lawn kʼo, Taˍroˇhpeˍ meh ve Eˇfeˇsu‸ chaw teˇ gʼaˇ hta‸ ponˬ laˬ htaˇ venˇ awˬ hkʼaw lo Pawˇlu‸ geh te toˇ chehˇ ve hta‸ yawˇ hui gʼa mawˬ leh, chaw oˇ ve hta‸ bon yehˬ lonˉ awˬ hkʼaw lo Pawˇlu‸ shiˍ veu laˇ ve yoˬ teh‸ yawˇ hui dawˇ ve yoˬ.

30Venˇ yaˇ hkʼa peu-eˬ duiˆ-ehˍ shaˇ-ehˍ te leh, chaw awˬ hpoˆ awˬ diˬ gʼuiˇ laˬ ve yoˬ. Yawˇ hui Pawˇlu‸ hta‸ yuˬ leh, yawˇ hta‸ bon yehˬ lonˉ awˬ baˬ hpawˇ lo gʼawˬ tawˆ peuˬ hkʼaw‸ nawˉ, teˇ cawˬ haˉ yehˬ miˉ teˇ hpaˍ hta‸ hoˆ taˍ ve yoˬ. 31Pawˇlu‸ suh tuˬ yawˇ hui te chehˇ ve teˇ yanˇ, Yeˍruˆsaˍlehnˍ venˇ teˇ venˇ hkʼa peu-eˬ duiˆ-ehˍ shaˇ-ehˍ te chehˇ ve awˬ lawn ma‸ teˇ hinˉ poˍ hta‸ shu ca hto piˇ ve yoˬ. 32Teˇ cawˬ haˉ ma‸ yaˇ leh ma‸ poˍ teˇ hpaˍ hta‸ yawˇ kuˬ yuˬ leh, chaw awˬ moˍ lonˉ duiˆ-ehˍ shaˇ-ehˍ te chehˇ kuiˬ lo gʼuiˇ ya‸-e ve yoˬ. Chaw chi ma ve lehˬ, ma‸ teˇ hinˉ poˍ leh ma‸ yaˇ hui hta‸ gʼa mawˬ htaˇ, Pawˇlu‸ hta‸ maˇ kʼaw‸ dawˆ ve yoˬ. 33Oˇ htaˇ, ma‸ teˇ hinˉ poˍ Pawˇlu‸ geh kʼai leh yawˇ hta‸ yuˬ taˍ peuˬ hkʼaw‸ nawˉ, sho caˆ nyiˇ caˆ hpeh tuˬ tawˇ piˇ ve yoˬ. Peuˬ leh yawˇ kʼoˆ ve, Yawˇ hkʼaˬ hkʼe ve chaw hpeh‸ ve le, aˬ hto‸ ma te ve le teh‸ na nyi ve yoˬ. 34Chaw awˬ moˍ lonˉ awˬ hkʼaw lo, teˇ hpaˍ teˇ ceuˬ kuˬ chehˇ ve yoˬ. Chi hkʼe duiˆ-ehˍ shaˇ-ehˍ te ve hta‸ pa taw, awˬ lawn hkʼa deh‸ maˇ shiˍ hpeh‸ leh, Pawˇlu‸ hta‸ ma‸ yaˇ yehˬ awˬ hkʼaw lo yuˬ kʼai tuˬ ma‸ teˇ hinˉ poˍ tawˇ piˇ ve yoˬ. 35Pawˇlu‸ go tcuhˉ puiˍ lo gaˬ ve teˇ yanˇ, chaw awˬ moˍ lonˉ hehnˇ chaweh te ve pa taw, ma‸ yaˇ teˇ hpaˍ yawˇ hta‸ gʼa chiˇ taˆ-e ve yoˬ. 36Awˬ lawn kʼo, chaw awˬ moˍ lonˉ yawˇ awˬ hkʼaˇ suh gʼa‸ leh, Yawˇ hta‸ tiˇ pehˍ loˬ teh‸ kuˬ chehˇ ve yoˬ.

Chaw chi ma ve mehˆ gʼuˇ suhˍ Pawˇlu‸ tawˇ yaw ve

37Ma‸ yaˇ ve yehˬ awˬ hkʼaw lo Pawˇlu‸ hta‸ yuˬ lo‸-e a teh‸ te ve teˇ yanˇ, yawˇ ma‸ teˇ hinˉ poˍ hta‸ kʼoˆ piˇ ve, Nawˬ hta‸ ngaˬ tawˇ yaw hpeh‸-aw laˇ teh‸ na nyi ve teˇ yanˇ,

ma‸ teˇ hinˉ poˍ kʼoˆ ve, Nawˬ Heˍlaˍsaˆ hkawˇ shiˍ-aˍ laˇ. 38Nawˬ lehˬ, aˉ suhˆ htaˇ mvuhˇmiˬ hta‸ hpfuhˆ leh shu hta‸ tiˇ pehˍ ve chaw awˇ hinˉ gʼaˇ hta‸ shawˍ veu leh heh puiˉ hkʼaw lo shiˍ kʼai ve Eˇjiˇtu‸ chaw oˇ ve teˇ gʼaˇ maˇ heˆ laˇ teh‸ na nyi ve yoˬ.

39Pawˇlu‸ kʼaw‸ kʼoˆ piˇ ve, Ngaˬ lehˬ Kiˇliˇkiˆ mvuhˇmiˬ awˬ hkʼaw lo cawˬ ve Taˍsuˆ venˇ yaˇ, Yuˇda‸ chaw teˇ gʼaˇ hpeh‸ ve yoˬ. Venˇ oˇ ve lehˬ, awˬ meh maˇ uiˍ ve venˇ hpeh‸ ve maˇ heˆ. Chaw chi ma ve hta‸ tawˇ yaw tuˬ a hkaw-anˬ a ciˉ pe‸ laˇ-oˆ teh‸, yawˇ hta‸ lawˬ ve yoˬ.

40Ma‸ teˇ hinˉ poˍ yawˇ hta‸ a hkaw-anˬ piˇ ve teˇ yanˇ Pawˇlu‸ lehˬ, go awˬ hkʼoˆ huˉ taˍ leh, chaw chi ma ve hta‸ la‸ sheh awˬ heˆ te maˍ piˇ ve yoˬ. Yawˇ hui ta‸ iˉ gawˬ lehˍ chehˇ htaˇ, yawˇ yawˇ hui hta‸ Heˍbrehˇ hkawˇ yaw leh kʼoˆ ve,

Currently Selected:

Tcuh yaˇ li‸ 21: LHBE

Highlight

Copy

Compare