Tcuh yaˇ li‸ 20

Maˍkeˍdawˇniˆ mvuhˇmiˬ leh Heˍlaˍsaˆ mvuhˇmiˬ lo Pawˇlu‸ kʼai ve

1Duiˆ-ehˍ shaˇ-ehˍ te ve chi gawˬ kʼai peuˬ hkʼaw‸ nawˉ, Pawˇlu‸ lehˬ, awˬ la‸ gʼawˇ hui hta‸ kuˬ leh awˬ gʼaˇ piˇ peuˬ htaˇ, yawˇ hui hta‸ hpaˆ da‸ leh Maˍkeˍdawˇniˆ mvuhˇmiˬ lo kʼai ve yoˬ. 2Yawˇ Maˍkeˍdawˇniˆ mvuhˇmiˬ hta‸ hpanˍ kʼai leh, yawˇ hui hta‸ awˬ gʼaˇ maˇ maˇ piˇ peuˬ hkʼaw‸ nawˉ, Heˍlaˍsaˆ mvuhˇ miˬ lo gaˬ la ve yoˬ. 3Pawˇlu‸ oˇ kaˬ lo ha pa sheh lehˇ chehˇ peuˬ hkʼaw‸ nawˉ, haw lo‸ kʼoˍ ciˇ leh Suˇriˆ mvuhˇmiˬ lo kʼo‸-e a teh‸ te htaˇ, Yuˇda‸ chaw teˇ hpaˍ yawˇ hta‸ tiˇ pehˍ tuˬ jehˬ da‸ taˍ ve pa taw, Maˍkeˍdawˇniˆ mvuhˇ miˬ hpawˇ lo kʼaw‸ kʼo‸-e tuˬ yawˇ dawˇ taˍ ve yoˬ. 4Pawˇlu‸ geh kʼai ve chaw teˇ hpaˍ lehˬ, Beˍriˆ venˇ yaˇ Puˇluˆ ve yaˇ paˍ Sawˇpaˍtaˍruˆ, Hteˇsaˍlawˇniˆ venˇ yaˇ Aˍriˍtaˍhkuˆ leh Seˍkuˍduˆ, Deˍbeˍ venˇ yaˇ Gaˍyuˆ leh Tiˆmoˉseˍ, Aˍsiˆ mvuhˇmiˬ chaw Tuˇhkiˆ leh Taˍroˆhpeˍ hui yoˬ. 5Yawˇ hui awˉ lawˉ kʼai leh, Taˍroˇaˆ venˇ lo ngaˬ hui hta‸ law chehˇ ve yoˬ. 6Hkaoˍmonˇ awˬ hkʼaw lo diˇ maˇ keu ve pawehˇ peuˬ hkʼaw‸ nawˉ, ngaˬ hui Hpiˇliˇpiˆ venˇ lo haw lo‸ kʼoˍ ciˇ tawˆ-e leh, ngaˇ nyi gaˬ heh‸, Taˍroˇaˆ venˇ lo yawˇ hui geh gaˬ leh, oˇ kaˬ lo suhˍ nyi chehˇ ve yoˬ.

Taˍroˇaˆ venˇ lo Pawˇlu‸ awˬ leh teˇ pawˆ kʼai ve

7Suhˍ nyi awˬ hkʼaw awˉ lawˉ teˇ haˉ htaˇ, hkaoˍmonˇ hkʼeh‸ tuˬ awˬ pon ngaˬ hui hpawnˬ da‸ ve yoˬ. Pawˇlu‸ lehˬ, shawˉ pawˍ tawˆ kʼai tuˬ dawˇ ve pa taw, yawˇ hui hta‸ maˍ piˇ jehˬ piˇ leh, shehˍ kʼaw hkui hkʼa gaˬ yawˇ hui hta‸ maˍ piˇ ve yoˬ. 8Ngaˬ hui hpawnˬ da‸ ve awˬ hta‸ teˇ htai‸ ve awˬ bawehˇ awˬ hkʼaw lo kawˆ faiˇ maˇ maˇ cawˬ ve yoˬ. 9Uˇtuˇhkuˆ meh ve chaw haˉ paˍ teˇ gʼaˇ yehˬ miˉ ehˉ awˬ hpe‸ lo mui taˍ ve yoˬ. Pawˇlu‸ maw chaweh maˍ piˇ ve pa taw yawˇ zuh‸ muiˉ jo leh, zuh‸ muiˉ kʼa ve teˇ yanˇ, yehˬ shehˆ htai‸ ve hta‸ yawˇ ce leh, suh peuˬ ve hta‸ shu ca chiˇ yuˬ ve yoˬ. 10Oˇ htaˇ, Pawˇlu‸ ya‸-e leh, chaw oˇ ve awˬ hkʼoˆ hta‸ boˆ taˍ peuˬ hkʼaw‸ nawˉ, yawˇ hta‸ kʼuˉ taˍ leh kʼoˆ ve, Duiˆ-ehˍ shaˇ-ehˍ taˇ te. Yawˇ awˬ hkʼaw lo a sha‸ cawˬ sheˍ ve yoˬ teh‸, yawˇ hui hta‸ kʼoˆ piˇ ve yoˬ. 11Pawˇlu‸ kʼaw‸ taˆ-e leh, hkaoˍmonˇ hkʼeh‸ leh caˇ ve yoˬ. Mvuhˇ htiˇ htaˇ hkʼa gaˬ yawˇ hui geh maw chaweh na‸ uˉ te da‸ peuˬ hkʼaw‸ nawˉ, yawˇ tawˆ kʼai ve yoˬ. 12Yawˇ hui lehˬ, yaˇ paˍ oˇ ve hta‸ awˬ te‸ gʼa shiˍ kʼo‸-e leh, ha lehˬ jaˇ ve yoˬ.

Taˍroˇaˆ venˇ lo tu leh Meˍleˍtuˆ venˇ lo kʼai ve

13Ngaˬ hui lehˬ, haw lo‸ kʼoˍ ciˇ leh Aˍsoˆ venˇ lo awˉ lawˉ kʼai taˍ ve yoˬ. Pawˇlu‸ lehˬ, ya‸ kʼaw juˇ kʼai leh, oˇ kaˬ lo gaˬ htaˇ ngaˬ hui geh haw lo‸ kʼoˍ gʼa kʼaw‸ ciˇ tuˬ yawˇ gu taˍ ve yoˬ. 14Aˍsoˆ venˇ lo yawˇ ngaˬ hui hta‸ hpuˇ da‸ htaˇ, yawˇ hta‸ ngaˬ hui haw lo‸ kʼoˍ hkʼaw ha‸ yuˬ leh, Miˍtuˆleˍ venˇ lo ciˇ kʼai ve yoˬ. 15Oˇ kaˬ lo tawˆ kʼai leh, shawˉ pawˍ teˇ nyi hkʼe ngaˬ hui Hkiˇoˆ conˇ awˬ paˇ lo gaˬ leh, hpa‸ nyi hkʼe teˇ nyi Saˍmoˆ conˇ lo gaˬ ve yoˬ. Hpiˇ nyi hkʼe teˇ nyi oˇ kaˬ lo kʼaw‸ tawˆ kʼai leh, Meˍleˍtuˆ venˇ lo gaˬ ve yoˬ. 16Pawˇlu‸ lehˬ, Aˍsiˆ mvuhˇmiˬ awˬ hkʼaw lo maw maw maˇ gʼa chehˇ tuˬ, Eˇfeˇsu‸ venˇ lo maˇ deh leh teˇ pawˆ tiˉ awˬ gʼuˇ suhˍ kʼai tuˬ yawˇ dawˇ cheˆ taˍ ve yoˬ. Hpeh‸ ve kʼo, Peˍteˍkoˆteˍ awˬ nyi htaˇ Yeˍruˆsaˍlehnˍ venˇ awˬ hkʼaw lo gʼa chehˇ taˍ tuˬ, yawˇ haˆ haˆ kʼai gaˇ ve yoˬ.

Eˇfeˇsu‸ Hkri‸ yaˇ ve awˬ hoˉ chaw mawˇ hui hta‸ Pawˇlu‸ maˍ piˇ ve

17Pawˇlu‸ lehˬ, Meˍleˍtuˆ venˇ lo chehˇ taˍ leh, Eˇfeˇsu‸ venˇ lo chaw hta‸ kʼai tcuh leh Hkri‸ yaˇ awˬ moˍ awˬ hoˉ chaw mawˇ teˇ hpaˍ hta‸ ca kuˬ tcuh ve yoˬ. 18Yawˇ hui yawˇ geh gaˬ la htaˇ, yawˇ yawˇ hui hta‸ kʼoˆ piˇ ve, Ngaˬ lehˬ Aˍsiˆ mvuhˇmiˬ awˬ hkʼaw lo awˉ lawˉ gaˬ la ve teˇ nyi te leh, ngaˬ nawˬ hui geh hkʼaˬ htaˆ ka‸ hkʼaˬ hkʼe te chehˇ ve awˬ lawn hta‸ nawˬ hui shiˍ ve yoˬ. 19Ngaˬ Jawˇmawˇ Yeˍsuˆ ve kanˉ hta‸ te htaˇ, nyi ma nuˇ nuˇ nehˬ nehˬ taˍ ve, mehˆ gʼuiˬ maˇ maˇ ya‸ la ve leh, Yuˆda‸ chaw hui ngaˬ hta‸ tiˇ pehˍ tuˬ jehˬ da‸ ve pa taw, beˬ ve lawˇ ve laiˉ ceuˬ ngaˬ gʼa hkanˍ ve awˬ lawn hta‸ htawˇ nawˬ hui shiˍ taˍ ve yoˬ. 20Ngaˬ nawˬ hui hta‸ maˍ laˇ hto laˇ htaˇ, nawˬ hui awˬ pon awˬ bon cawˬ ve teˇ hpaˍ, teˇ ceuˬ hta‸ ka‸ ngaˬ maˇ faˉ taˍ leh, chaw hkʼa peu-eˬ mehˆ gʼuˇ suhˍ maˇ kʼoˆ, teˇ yehˬ peuˬ teˇ yehˬ awˬ hkʼaw lo maˇ kʼoˆ, ngaˬ nawˬ hui hta‸ maˍ laˇ ve yoˬ. 21Gʼuiˬsha mehˆ gʼuˇ suhˍ venˇbaˆ dawˇ hpfuhˆ tuˬ maˇ kʼoˆ, ngaˬ hui ve Jawˇmawˇ Yeˍsuˆ Hkri‸ hta‸ yonˍ tuˬ maˇ kʼoˆ, Yuˇda‸ chaw leh Heˍlaˍsaˆ chaw hui hta‸ ngaˬ shaˉ hkiˆ hkanˍ peuˬ ve awˬ lawn hta‸ htawˇ nawˬ hui shiˍ ve yoˬ. 22Chi beu‸ ngaˬ lehˬ, Awˬ ha hpu awˬ hkʼaw lo hpeh taˍ ve hta‸ gʼa hkanˍ leh, Yeˍruˆsaˍlehnˍ venˇ lo kʼai chehˇ ve yoˬ. Oˇ kaˬ lo ngaˬ hkʼaˬ hkʼe hpeh‸ la tuˬ leh naˍ maˇ shiˍ. 23Ya‸ hkʼaˇ, shu hpeh yuˬ leh fawˉ mehˍ laˇ tuˬ ve teˇ hpaˍ ngaˬ hta‸ law taˍ ve yoˬ teh‸, teˇ venˇ le le awˬ hkʼaw lo da‸ ve kehˬ ve Awˬ ha hpu ngaˬ hta‸ hkʼa tawˍ lehˆ hto laˇ ve yoˬ. 24Ya‸ hkʼaˇ, ngaˬ gʼa toˇ tuˬ ve ya‸ kʼaw hta‸ awˬ leh hkʼa gaˬ ngaˬ toˇ peuˬ leh, Jawˇmawˇ Yeˍsuˆ ngaˬ hta‸ kanˉ pe‸ laˇ ve hkʼe Gʼuiˬ sha ve awˬ bon hta‸ caˉ da‸ ve ha lehˬ ve bon hkawˇ awˬ lawn shaˉ hkiˆ gʼa hkanˍ peuˬ ve kʼo, ngaˬ ve a sha‸ awˬ hpfuhˇ hkʼaˆ ve teh‸ ngaˬ maˇ shawˍ.

25Gʼuiˬsha ve mvuhˇmiˬ awˬ lawn ngaˬ nawˬ hui hta‸ ca toˇ maˍ piˇ peuˬ. Nawˬ hui hkʼa gʼa kaˇ ve chaw hkʼa peu-eˬ lehˬ, awˬ hkʼaw‸ nawˉ teˇ pawˆ ka‸ ngaˬ ve mehˆ hpfuhˇ hta‸ maˇ gʼa kʼaw‸ mawˬ tuˬ ve ngaˬ shiˍ ve yoˬ. 26Hkʼe te leh, nawˬ hui hkʼa peu-eˬ ve awˬ suhˍ hta‸ ngaˬ ponˬ ve yoˬ teh‸, ya‸ nyi ngaˬ nawˬ hui hta‸ shaˉ hkiˆ hkanˍ ve yoˬ. 27Awˬ lawn kʼo, Gʼuiˬsha ve a loˍ hkʼa peu-eˬ nawˬ hui hta‸ maˍ laˇ tuˬ ngaˬ maˇ jaw kʼai. 28Nawˬ hui lehˬ, a shu yawˇ awˬ to hta‸ maˇ kʼoˆ, yawˬ awˬ moˍ hkʼa peu-eˬ hta‸ maˇ kʼoˆ, hkʼa deh‸ nyi ha‸ shaˉ-oˆ. Jawˇmawˇ Gʼuiˬ sha lehˬ, yawˇ ve awˬ suhˍ vuiˬ yuˬ taˍ ve awˬ moˍ hta‸ caˍ piˇ taw piˇ tuˬ, da‸ ve kehˬ ve Awˬ ha hpu nawˬ hui hta‸ nyi ha‸ shaˉ shehˍ hpaˇ hpeh‸ piˇ lawˬ peuˬ. 29Ngaˬ tawˆ kʼai peuˬ hkʼaw‸ nawˉ, yawˬ awˬ moˍ hta‸ te luˬ te sheˆ tuˬ ve haiˬ jaˇ ve veˬ teˇ hpaˍ nawˬ hui awˬ hkʼaw lo‸ la tuˬ ve hta‸ ngaˬ shiˍ ve yoˬ. 30Chi hkʼoˆ ka‸, nawˬ hui awˬ hkʼaw lo chaw teˇ hpaˍ hpaˍ tu la leh, awˬ la‸ gʼawˇ teˇ hpaˍ hta‸ yawˇ hui awˬ hkʼaˇ suh kʼai tuˬ ve awˬ pon beˬ yuˬ tuˬ hteˇ ve tawˇ hkawˇ hta‸ yawˇ hpfuhˆ piˇ tuˬ yoˬ. 31Chi hta‸ pa taw shaw taˍ-o‸. Ngaˬ lehˬ nawˬ hui teˇ gʼaˇ le le hta‸ shehˆ hkʼaw‸ hkʼa gaˬ, tanˇ hkuinˇ tanˇ vanˇ maˇ jehˇ jehˇ leh mehˆ gʼuiˬ ya‸ la ve awˬ hkʼaw lo shaˍ ti‸ pe‸ laˇ ve hta‸ dawˇ nawˇ-oˆ.

32Ngaˬ lehˬ chi beu‸ nawˬ hui hta‸ Gʼuiˬsha ve la‸ sheh hkʼaw leh, yawˇ ve awˬ bon uiˍ ve tawˇ hkawˇ awˬ hkʼaw lo a‸ piˇ ve yoˬ. Awˬ bon uiˍ ve tawˇ hkawˇ oˇ ve lehˬ, nawˬ hui hta‸ uiˍ la mvuh la piˇ puiˉ leh, da‸ la kehˬ la peuˬ ve chaw hkʼa peu-eˬ geh teˇ geh nawˬ hui hta‸ chehˇ kuiˬ pe‸ laˇ puiˉ ve yoˬ. 33Ngaˬ lehˬ, a shu teˇ gʼaˇ ve hpu, shi, veu‸ tuˬ kʼaˇ tuˬ hta‸ ka‸ maˇ sheˉ lai. 34Ngaˬ ve la‸ sheh chi lehˬ, ngaˬ leh ngaˬ geh chehˇ ve chaw hui hkʼa loˍ ve teˇ hpaˍ hta‸ gʼa tuˬ kanˉ te ve hta‸ nawˬ hui shiˍ ve yoˬ. 35Nawˬ hui htawˇ chi hkʼe gʼaˇ hte‸ te leh awˬ gʼaˇ nuˇ ve chaw hui hta‸ gʼa ga piˇ tuˬ, ngaˬ nawˬ hui hta‸ te maˍ laˇ peuˬ. Piˇ ve lehˬ gʼa ve a‸ kehˉ awˬ bon uiˍ ve yoˬ teh‸, Jawˇmawˇ Yeˍsuˆ kʼoˆ taˍ ve tawˇ hkawˇ hta‸ dawˇ nawˇ tuˬ htawˇ, hkʼa peu-eˬ awˬ hkʼaw lo ngaˬ nawˬ hui hta‸ te maˍ laˇ peuˬ teh‸, Pawˇlu‸ yawˇ hui hta‸ kʼoˆ piˇ ve yoˬ.

36Yawˇ chi hkʼe kʼoˆ peuˬ hkʼaw‸ nawˉ, yawˇ hui hkʼa peu-eˬ geh teˇ geh hkui tcuhˉ teh leh bon lawˬ ve yoˬ. 37Yawˇ hui hkʼa peu-eˬ gʼaˇ hte‸ hawˬ leh, Pawˇlu‸ ve kʼawˍ peˍ hta‸ kʼuˉ taˍ leh yawˇ hta‸ boˆ nu ve yoˬ, 38Awˬ hkʼaw‸ nawˉ teˇ pawˆ ka‸ yawˇ ve mehˆ hpfuhˇ hta‸ maˇ gʼa kʼaw‸ mawˬ teh‸ yawˇ kʼoˆ ve tawˇ teˇ hkawˇ hta‸ pa taw yawˇ hui dawˇ haˍ jaˇ ve yoˬ. Oˇ htaˇ, yawˇ hui Pawˇlu‸ hta‸ haw lo‸ kʼoˍ lo hkʼa gaˬ shiˍ kʼoˬ piˇ ve yoˬ.

Currently Selected:

Tcuh yaˇ li‸ 20: LHBE

Highlight

Copy

Compare