Tcuh yaˇ li‸ 19

Pawˇlu‸ Eˇfeˇsu‸ venˇ hkʼaw chehˇ htaˇ awˬ lawn

1Aˍpawˇlu‸ lehˬ, Kawˇrenˍhtuˆ venˇ awˬ hkʼaw lo chehˇ htaˇ, Pawˇlu‸ awˬ na hpawˇ ve mvuhˇmiˬ teˇ hpaˍ hta‸ hpanˍ kʼai leh, Eˇfeˇsu‸ venˇ lo gaˬ ve yoˬ. Oˇ kaˬ lo awˬ la‸ gʼawˇ teˇ hpaˍ hta‸ yawˇ gʼa mawˬ leh yawˇ hui hta‸ kʼoˆ piˇ ve, 2Nawˬ hui yonˍ ve teˇ yanˇ, da‸ ve kehˬ ve Awˬ ha hpu hta‸ gʼa peuˬ laˇ teh‸ na nyi htaˇ,

yawˇ hui kʼaw‸ kʼoˆ ve, Da‸ ve kehˬ ve Awˬ ha hpu cawˬ ve hta‸ ngaˬ hui maˇ kaˇ jaw teh‸ kʼaw‸ kʼoˆ piˇ ve yoˬ.

3Pawˇlu‸ kʼoˆ ve, Hkʼe te leh, nawˬ hui hkʼaˬ hkʼe ve baˆtiˆsaˬ hkanˍ ve le teh‸ na nyi htaˇ,

Yoˇhanˬ ve baˆtiˆsaˬ teˇ ceuˬ hta‸ hkanˍ ve yoˬ teh‸ yawˇ hui kʼaw‸ kʼoˆ piˇ ve yoˬ.

4Oˇ htaˇ Pawˇlu‸ kʼaw‸ kʼoˆ piˇ ve, Yoˇhanˬ lehˬ, venˇbaˆ hta‸ dawˇ hpfuhˆ ve hta‸ caˉ da‸ ve baˆtiˆsaˬ teˇ ceuˬ piˇ leh, yawˇ awˬ hkʼaw‸ nawˉ laˬ tuˬ ve teˇ gʼaˇ hta‸ gʼa yonˍ tuˬ chaw chi ma ve hta‸ maˍ piˇ ve yoˬ. Chaw oˇ ve teˇ gʼaˇ lehˬ Yeˍsuˆ yoˬ teh‸ kʼoˆ piˇ ve yoˬ.

5Tawˇ hkawˇ chi hta‸ yawˇ hui gʼa kaˇ htaˇ, Jawˇmawˇ Yeˍsuˆ ve awˬ meh awˬ hawˉ lo baˆtiˆsaˬ hkanˍ yuˬ ve yoˬ. 6Pawˇlu‸ yawˇ hui awˬ hkʼoˆ la‸ sheh taˍ htaˇ, da‸ ve kehˬ ve Awˬ ha hpu yawˇ hui awˬ hkʼoˆ lo ya‸ la ve yoˬ. Yawˇ hui tawˇ laiˉ ceuˬ yaw chiˇ mvuh leh bon maˍ ve yoˬ. 7Yawˇ hui hkʼa peu-eˬ teˇ chi nyiˇ gʼaˇ hkʼe cawˬ ve yoˬ.

8Oˇ ve awˬ hkʼaw‸ nawˉ, Pawˇlu‸ lehˬ bon yehˬ awˬ hkʼaw lo‸-e leh, nyi ma ha‸ hanˉ te leh ha pa sheh lehˇ hkʼa gaˬ maˍ piˇ ve yoˬ. Yawˇ hui geh yawˇ jehˬ da‸ cehˇ da‸ leh, Gʼuiˬsha ve mvuhˇmiˬ awˬ lawn yawˇ hui yonˍ la tuˬ yawˇ gʼaˇ hte‸ maˍ piˇ ve yoˬ. 9Ya‸ hkʼaˇ, yawˇ hui teˇ hpaˍ hpaˍ nyi ma heh leh maˇ yonˍ ve pa taw, yawˇ hui chaw chi ma ve mehˆ gʼuˇ suhˍ Ya‸ kʼaw awˬ liˇ awˬ lawn hta‸ maˇ shawˍ maˇ caˆ kʼoˆ ve yoˬ. Oˇ htaˇ, yawˇ yawˇ hui geh tawˆ kʼai leh, awˬ la‸ gʼawˇ teˇ hpaˍ hta‸ shiˍ kʼai leh, Tuˇraˍnuˆ ve cawnˇ yehˬ awˬ hkʼaw lo teˇ nyi le le jehˬ da‸ cehˇ da‸ ve yoˬ. 10Yawˇ nyiˇ hkʼaw‸ hkʼa gaˬ chi hkʼe te ve pa taw, Aˍsiˆ mvuhˇmiˬ awˬ hkʼaw lo hkʼa chehˇ ve chaw hkʼa peu-eˬ, Yuˇda‸ chaw maˇ kʼoˆ, Heˍlaˍsaˆ chaw maˇ kʼoˆ, Jawˇmawˇ Yeˍsuˆ ve tawˇ hkawˇ hta‸ gʼa kaˇ ve yoˬ.

11Gʼuiˬsha lehˬ Pawˇlu‸ hta‸ cuˇ leh uiˍ jaˇ ve anˇ tuˬ teˇ hpaˍ hta‸ te ve yoˬ. 12Pawˇlu‸ yehˇ ve hpaˉ ce‸ teˇ hpaˍ maˇ kʼoˆ, tsuh‸ tuˬ ve hpa teˇ hpaˍ maˇ kʼoˆ, chaw naˬ teˇ hpaˍ geh shu yuˬ kʼai ve teˇ yanˇ, yawˇ hui na-e la leh, haiˬ ve neˇ teˇ hpaˍ htawˇ tawˆ kʼai ve yoˬ. 13Oˇ htaˇ, neˇ hta‸ gʼa‸ kʼoˬ toˇ ve Yuˇda‸ chaw teˇ hpaˍ hpaˍ lehˬ, haiˬ ve neˇ geh ve chaw teˇ hpaˍ awˬ hkʼoˆ hta‸ kʼoˆ piˇ ve, Pawˇlu‸ maˍ ve Yeˍsuˆ teˇ gʼaˇ ve awˬ meh awˬ hawˉ lo ngaˬ nawˬ hui hta‸ tawˇ piˇ ve yoˬ teh‸ kʼoˆ leh, Jawˇmawˇ Yeˍsuˆ ve awˬ meh hta‸ kuˬ ve yoˬ. 14Keˍvaˆ meh ve Yuˇda‸ paw hkuˇ lonˉ teˇ gʼaˇ ve awˬ yaˇ paˍ suhˍ gʼaˇ htawˇ chi hkʼe te chehˇ ve yoˬ.

15Ya‸ hkʼaˇ, haiˬ ve neˇ yawˇ hui hta‸ kʼaw‸ kʼoˆ ve, Yeˍsuˆ hta‸ ngaˬ shiˍ ve yoˬ. Pawˇlu‸ awˬ lawn htawˇ ngaˬ shiˍ ve yoˬ. Nawˬ hui teˇ hpaˍ a shu le teh‸ kʼoˆ piˇ ve yoˬ.

16Oˇ htaˇ, haiˬ ve neˇ geh ve chaw lehˬ, yawˇ hui hta‸ pawˆ kʼuˉ leh, yawˇ hui hkʼa peu-eˬ hta‸ gʼaˇ ve awˬ hkʼaw lo hehnˇ chaweh te ve pa taw, yawˇ hui gʼa naˬ leh, yehˬ oˇ ve awˬ hkʼaw lo awˬ kʼu nyi te hpaw tawˆ-e ve yoˬ. 17Eˇfeˇsu‸ venˇ awˬ hkʼaw lo hkʼa chehˇ ve chaw hkʼa peu-eˬ, Yuˇda‸ chaw maˇ kʼoˆ, Heˍlaˍsaˆ chaw maˇ kʼoˆ, awˬ lawn chi hta‸ gʼa shiˍ gʼa kaˇ ve yoˬ. Yawˇ hui hkʼa peu-eˬ kawˆ jaˇ leh, Jawˇmawˇ Yeˍsuˆ ve awˬ meh hta‸ chiˇ uiˍ chiˇ mvuh ve yoˬ. 18Yonˍ peuˬ ve chaw htawˇ maˇ maˇ laˬ leh yawˇ hui te ya‸ ve teˇ hpaˍ hta‸ kʼaoˍ maˍ hto maˍ piˇ ve yoˬ. 19Faˍ te paˍ laiˉ gʼaˇ htawˇ, yawˇ hui ve li‸ teˇ hpaˍ hta‸ yuˬ laˬ leh, chaw hkʼa peu-eˬ mehˆ gʼuˇ suhˍ tuˉ baˬ ve yoˬ. Li‸ oˇ ve teˇ hpaˍ awˬ hpfuhˇ yawˇ hui shawˍ nyi htaˇ, ngaˇ meunˍ hteh‸ hpfuhˇ cawˬ ve yoˬ. 20Hkʼe te leh, awˬ gʼaˇ uiˍ ve awˬ hkʼaw lo Jawˇ mawˇ Gʼuiˬsha ve tawˇ hkawˇ uiˍ la maˇ la leh, kanˇ paˆ uiˍ jaˇ ve yoˬ.

21Chi teˇ hpaˍ hpeh‸ la peuˬ hkʼaw‸ nawˉ, Pawˇlu‸ yawˇ ve nyi ma hkʼaw dawˇ taˍ ve, Maˍkeˍdawˇniˆ mvuhˇmiˬ leh Aˍhkaˍyaˆ mvuhˇmiˬ hta‸ hpanˍ kʼai peuˬ hkʼaw‸ nawˉ, Yeˍruˆsaˍlehnˍ venˇ lo kʼai tuˬ yoˬ. Yawˇ kʼoˆ ve, Ngaˬ oˇ kaˬ lo gaˬ peuˬ hkʼaw‸ nawˉ Roˉma‸ venˇ lo htawˇ ngaˬ gʼa gaˬ tuˬ yoˬ teh‸ kʼoˆ ve yoˬ. 22Yawˇ hta‸ ga piˇ shehˍ hpaˇ teˇ hpaˍ awˬ hkʼaw lo, Tiˆmoˉseˍ leh Eˇraˍtuˆ nyiˇ gʼaˇ hta‸ Maˍkeˍdawˇniˆ mvuhˇmiˬ lo yawˇ kʼai tcuh peuˬ hkʼaw‸ nawˉ, yawˇ awˬ to Aˍsiˆ mvuhˇmiˬ awˬ hkʼaw lo teˇ tcuhˉ teˇ jaw chehˇ sheˍ ve yoˬ.

Eˇfeˇsu‸ venˇ hkʼaw lo sho‸ sha‸ jaˇ ve awˬ lawn

23Awˬ yanˇ oˇ ve awˬ hkʼaw lo, Ya‸ kʼaw awˬ liˇ hta‸ pa taw sho‸ sha‸ tuˬ maˇ maˇ tawˆ la ve yoˬ. 24Awˬ lawn kʼo, Deˍmeˍtriˆ meh ve hpu dawˆ paˍ teˇ gʼaˇ cawˬ ve yoˬ. Yawˇ hpu yuˬ leh Aˍteˍmiˆ gʼuiˬsha ma ve fuˍ yehˬ ehˉ teˇ hpaˍ hta‸ te leh, yawˇ hta‸ pa taw hpu dawˆ paˍ teˇ hpaˍ maˇ maˇ paw sha la ve yoˬ. 25Yawˇ lehˬ hpu dawˆ paˍ hui hta‸ leh oˇ hkʼe ve kanˉ te ve chaw teˇ hpaˍ hta‸ kuˬ hpawnˬ peuˬ leh kʼoˆ ve, Awˬ chawˇ teˇ hpaˍ-oˬ, kanˉ chi hta‸ pa taw ngaˬ hui paw sha la ve hta‸ nawˬ hui shiˍ ve yoˬ. 26Pawˇlu‸ chi teˇ gʼaˇ lehˬ, chaw yaˇ hui ve la‸ sheh hkʼa te ve gʼuiˬsha teˇ hpaˍ lehˬ, gʼuiˬ sha maˇ heˆ teh‸ kʼoˆ ve yoˬ. Hkʼe te leh, Eˇfeˇsu‸ venˇ awˬ hkʼaw lo ceh tiˉ maˇ heˆ, aˬ laˬ hkʼe Aˍsiˆ mvuhˇmiˬ hkʼa peu-eˬ awˬ hkʼaw lo chaw maˇ maˇ hta‸ yawˇ beˬ leh, nyi ma hpfuhˆ kʼai tuˬ te ve hta‸ nawˬ hui gʼa kaˇ gʼa mawˬ ve yoˬ. 27Hkʼe te leh, ngaˬ hui ve kanˉ luˬ kʼai ve hta‸ dawˇ haˍ tuˬ cawˬ ve awˬ hkʼoˆ ka‸, uiˍ jaˇ mvuh jaˇ ve Aˍteˍmiˆ gʼuiˬsha ma ve fuˍ yehˬ lehˬ, te‸ chiˉ awˬ bon maˇ cawˬ ve hkʼe hpeh‸ leh, Aˍsiˆ mvuhˇmiˬ hkʼa peu-eˬ leh miˬguiˬ hkʼa peu-eˬ oˉ kʼoˍ pui ve Aˍteˍmiˆ gʼuiˬsha ma ve awˬ me‸ awˬ hponˇ luˬ kʼai tuˬ ve hta‸ htawˇ dawˇ haˍ tuˬ cawˬ ve yoˬ teh‸ yawˇ kʼoˆ piˇ ve yoˬ.

28Tawˇ oˇ ve hta‸ gʼa kaˇ htaˇ, yawˇ hui nyi ma zuhˆ jaˇ leh, Eˇfeˇsu‸ chaw hui ve Aˍteˍmiˆ gʼuiˬsha ma lehˬ, uiˍ jaˇ mvuh jaˇ ve yoˬ teh‸ kʼoˆ leh kuˬ ve yoˬ. 29Hkʼe te leh, venˇ oˇ ve hkʼa peu-eˬ awˬ hkʼaw lo duiˆ-ehˍ shaˇ-ehˍ hkʼa biˇ cawˬ leh, Pawˇlu‸ geh toˇ ve Maˍkeˍdawˇniˆ chaw Gaˍyuˆ leh Aˍriˍtaˍhkuˆ hta‸ yawˇ hui gʼawˬ yuˬ leh, pawehˇ te ve chehˇ kuiˬ lo teˇ geh gʼuiˇ lo‸-e ve yoˬ. 30Pawˇlu‸ lehˬ, chaw awˬ moˍ lonˉ awˬ hkʼaw lo lo‸-e gaˇ ve htawˇ, awˬ la‸ gʼawˇ teˇ hpaˍ yawˇ hta‸ tawˍ taˍ ve yoˬ. 31Pawˇlu‸ ve awˬ chawˇ hpeh‸ ve Aˍsiˆ mvuhˇ miˬ hta‸ caˉ da‸ ve jawˇmawˇ teˇ hpaˍ hpaˍ htawˇ, pawehˇ te ve chehˇ kuiˬ awˬ hkʼaw lo yawˇ maˇ gʼa lo‸-e tuˬ, chaw hta‸ kʼai tcuh leh yawˇ hta‸ lawˬ hkawˉ ve yoˬ. 32Hpawnˬ da‸ ve awˬ moˍ oˇ ve lehˬ, duiˆ-ehˍ shaˇ-ehˍ hpeh‸ leh, teˇ gʼaˇ teˇ ceuˬ kuˬ ve yoˬ. Yawˇ hui maˇ-awˍ ve aˬ hto‸ ma hta‸ pa taw hpawnˬ da‸ ve hta‸ maˇ shiˍ. 33Oˇ htaˇ, Yuˇda‸ chaw hui lehˬ, Aˍleˍsaˍduˆ meh ve teˇ gʼaˇ hta‸ chaw chi ma ve mehˆ gʼuˇ suhˍ lo ca‸ peu leh, yawˇ tawˇ yaw tuˬ, chaw awˬ moˍ lonˉ awˬ hkʼaw lo chaw teˇ hpaˍ hpaˍ yawˇ hta‸ awˬ gʼaˇ piˇ ve yoˬ. Hkʼe te leh, yawˇ chaw chi ma ve hta‸ tawˇ yaw hkʼaw‸ piˇ gaˇ leh, yawˇ la‸ sheh awˬ heˆ te maˍ ve yoˬ. 34Ya‸ hkʼaˇ, yawˇ Yuˇda‸ chaw hpeh‸ ve hta‸ yawˇ hui gʼa shiˍ htaˇ, Eˇfeˇsu‸ chaw hui ve Aˍteˍmiˆ gʼuiˬsha ma lehˬ, uiˍ jaˇ mvuh jaˇ ve yoˬ teh‸, aˬ laˬ hkʼe nyiˇ naˍ riˍ hkʼa gaˬ chaw hkʼa peu-eˬ teˇ hkawˇ tiˉ te leh kuˬ chehˇ ve yoˬ.

35Venˇ ceˇ leˇ lonˉ lehˬ, chaw awˬ moˍ lonˉ hta‸ ta‸ iˉ chehˇ tcuh peuˬ hkʼaw‸ nawˉ, yawˇ yawˇ hui hta‸ kʼoˆ piˇ ve, Eˇfeˇsu‸ chaw teˇ hpaˍ-oˬ, Eˇfeˇsu‸ venˇ lehˬ, uiˍ jaˇ mvuh jaˇ ve Aˍteˍmiˆ gʼuiˬsha ma ve fuˍ yehˬ hta‸ maˇ kʼoˆ, mvuhˇ naw ma lo ce la ve shaˉ ho‸ hta‸ maˇ kʼoˆ, ha‸ shaˉ ve venˇ hpeh‸ ve hta‸ maˇ shiˍ ve chaw a shu cawˬ le. 36Awˬ lawn chi teˇ hpaˍ hta‸ tawˇ gʼawˬ da‸ tuˬ maˇ cawˬ ve pa taw, nawˬ hui ta‸ iˉ chehˇ cawˇ ve awˬ hkʼoˆ ka‸, maˇ dawˇ nyi leh te ve teˇ ceuˬ maˇ te cawˇ ve yoˬ. 37Chaw chi teˇ hpaˍ lehˬ, bon yehˬ hta‸ te luˬ ve ka‸ maˇ heˆ, ngaˬ hui ve gʼuiˬsha ma hta‸ maˇ shawˍ maˇ caˆ kʼoˆ ve ka‸ maˇ heˆ. Ya‸ hkʼaˇ, yawˇ hui hta‸ nawˬ hui choˬ kaˬ lo gʼawˬ veu laˇ peuˬ. 38Hkʼe te leh, Deˍmeˍtriˆ leh yawˇ ve awˬ chawˇ hpu dawˆ paˍ hui lehˬ, teˇ gʼaˇ gʼaˇ hta‸ tawˇ te da‸ tuˬ cawˬ ve kʼo, shaˉ nanˉ cawˬ leh, mvuhˇmiˬ jawˇmawˇ htawˇ cawˬ ve yoˬ. Yawˇ hui hkʼaˇ yawˇ hui tawˇ te da‸ piˇ lawˬ-o‸. 39Chi awˬ hkʼoˆ nawˬ hui te gaˇ ve kʼo, tawˇ jehˬ shehˍ hpaˇ awˬ moˍ lonˉ gʼa jehˬ cheˆ ve yoˬ. 40Awˬ lawn kʼo, ya‸ nyi duiˆ-ehˍ shaˇ-ehˍ te ve lehˬ, awˬ lawn te‸ chiˉ maˇ cawˬ ve pa taw, shu ngaˬ hui awˬ hkʼoˆ venˇbaˆ taˍ laˇ ve hta‸ dawˇ haˬ tuˬ cawˬ ve yoˬ. Aˬ hto‸ ma pa taw chi hkʼe hpawnˬ da‸ le teh‸ shu na nyi laˇ htaˇ, ngaˬ hui te‸ chiˉ kʼaw‸ kʼoˆ piˇ tuˬ maˇ cawˬ teh‸, chaw chi ma ve hta‸ yawˇ kʼoˆ piˇ ve yoˬ. 41Yawˇ chi hkʼe kʼoˆ peuˬ hkʼaw‸ nawˉ, hpawnˬ da‸ ve chaw hui hta‸ yawˇ hpehˇ piˇ ve yoˬ.

Currently Selected:

Tcuh yaˇ li‸ 19: LHBE

Highlight

Copy

Compare