Tcuh yaˇ li‸ 16

Pawˇlu‸ leh Siˍlaˆ geh Tiˆmoˉseˍ kʼai ve

1Oˇ htaˇ Pawˇlu‸ lehˬ, Deˍbeˍ venˇ leh Luˇtaˍraˆ venˇ lo gaˬ ve yoˬ. Luˇtaˍraˆ venˇ awˬ hkʼaw lo Tiˆmoˉseˍ meh ve awˬ la‸ gʼawˇ teˇ gʼaˇ cawˬ ve yoˬ. Yawˇ ve awˬ e lehˬ, yonˍ ve Yuˇda‸ ma hpeh‸ leh, yawˇ ve awˬ pa lehˬ, Heˍlaˍsaˆ chaw hpeh‸ ve yoˬ. 2Awˬ la‸ gʼawˇ oˇ ve lehˬ, Luˇtaˍraˆ venˇ leh Iˇkawˇniˆ venˇ lo chehˇ ve awˬ viˉ awˬ nyi hui awˬ hkʼaw lo awˬ meh da‸ ve chaw teˇ gʼaˇ hpeh‸ ve yoˬ. 3Pawˇlu‸ lehˬ, Tiˆmoˉseˍ hta‸ yawˇ geh shiˍ kʼai gaˇ ve yoˬ. Yawˇ ve awˬ pa Heˍlaˍsaˆ chaw hpeh‸ ve hta‸ oˇ kaˬ lo chehˇ ve Yuˇda‸ chaw teˇ hpaˍ shiˍ ve pa taw, Pawˇlu‸ Tiˆmoˉseˍ hta‸ yuˬ leh awˬ guiˬ meuˇ shoˍ piˇ ve yoˬ. 4Yawˇ hui venˇ teˇ hpaˍ lo hpanˍ kʼai chehˇ htaˇ, Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ jehˬ cheˆ taˍ ve teˇ hpaˍ hta‸ te kʼai tuˬ, teˇ caˉ yawˇ hui hta‸ hto piˇ ve yoˬ. 5Hkʼe te leh, Hkri‸ yaˇ awˬ moˍ teˇ hpaˍ yonˍ ve awˬ hkʼaw lo awˬ gʼaˇ uiˍ la leh, teˇ nyi le le chaw maˇ la ve yoˬ.

Awˬ ha awˬ hkʼaw Maˍkeˍdawˇniˆ chaw hta‸ gʼa mawˬ ve

6Aˍsiˆ mvuhˇmiˬ awˬ hkʼaw lo bon hkawˇ maˇ gʼa maˍ tuˬ, da‸ ve kehˬ ve Awˬ ha hpu yawˇ hui hta‸ tawˍ taˍ ve pa taw, yawˇ hui Hpuˍgiˆ mvuhˇmiˬ leh Gaˍlaˍtiˆ mvuhˇmiˬ lo hpanˍ kʼai ve yoˬ. 7Muˇsiˆ mvuhˇmiˬ lo gaˬ la htaˇ, Beˍtuˇniˆ mvuhˇmiˬ awˬ hkʼaw lo‸-e tuˬ dawˇ taˍ ve htawˇ, Yeˍsuˆ ve Awˬ ha hpu yawˇ hui hta‸ a hkaw-anˬ maˇ piˇ. 8Hkʼe te leh, yawˇ hui Muˇsiˆ mvuhˇmiˬ awˬ jaˇ lo hpanˍ kʼai leh, Taˍroˇaˆ venˇ lo gaˬ ve yoˬ. 9Tanˇ hkuinˇ htaˇ Pawˇlu‸ lehˬ, awˬ ha awˬ hkʼaw lo Maˍkeˍdawˇniˆ chaw teˇ gʼaˇ huˉ taˍ ve hta‸ gʼa mawˬ ve yoˬ. Yawˇ Pawˇlu‸ hta‸ lawˬ hkawˉ leh kʼoˆ ve, Maˍkeˍdawˇniˆ mvuhˇ miˬ lo laˬ leh ngaˬ hui hta‸ ga laˇ-oˆ teh‸ kʼoˆ ve yoˬ. 10Awˬ ha awˬ hkʼaw lo yawˇ chi hkʼe gʼa mawˬ peuˬ hkʼaw‸ nawˉ, Maˍkeˍdawˇniˆ chaw hui hta‸ ha lehˬ ve bon hkawˇ maˍ piˇ tuˬ, Gʼuiˬ sha ngaˬ hui hta‸ kuˬ yuˬ ve teh‸ gʼa shiˍ leh, teˇ cawˬ haˉ Maˍkeˍdawˇniˆ mvuhˇmiˬ lo gʼa kʼai tuˬ ngaˬ hui te ve yoˬ.

Pawˇlu‸ leh Siˍlaˆ Hpiˇliˇpiˆ htawnˍ hkʼaw geh ve

11Hkʼe te leh, ngaˬ hui Taˍroˇaˆ venˇ te leh Saˍmoˍtaˍrehˆ conˇ lo hteˇ lehˍ haw lo‸ kʼoˍ ciˇ kʼai leh, awˬ hkʼaw‸ nawˉ teˇ nyi Naˍpawˇliˆ venˇ lo gaˬ ve yoˬ. 12Venˇ oˇ ve awˬ hkʼaw lo kʼaw‸ tawˆ kʼai leh Hpiˇliˇpiˆ venˇ lo gaˬ ve yoˬ. Venˇ oˇ ve lehˬ, Maˍkeˍdawˇniˆ mvuhˇmiˬ awˬ hkʼaw lo Roˉma‸ chaw hui teh taˍ ve venˇ lonˉ hpeh‸ ve yoˬ. Ngaˬ hui oˇ kaˬ lo a ciˉ maw chaweh chehˇ taˍ ve yoˬ. 13Shinˉ nyi gaˬ ve teˇ yanˇ, shu bon lawˬ kuiˬ cawˬ hehˉ teh‸ ngaˬ hui dawˇ leh, venˇ awˬ baˬ hpawˇ iˉ kaˆ gʼuiˬ pfuhˍ paˇ lo kʼai ve yoˬ. Ngaˬ hui oˇ kaˬ lo mui taˍ leh, hkʼa hpawnˬ la ve yaˇ miˇ teˇ hpaˍ hta‸ maˍ piˇ ve yoˬ. 14Oˇ htaˇ, Gʼuiˬsha hta‸ oˉ kʼoˍ pui ve Luˍdiˇ meh ve yaˇ miˇ teˇ gʼaˇ ngaˬ hui ve hkawˇ hta‸ na chehˇ ve yoˬ. Yawˇ lehˬ, hpa nyi naˆ meuˉ lehˍ ve hta‸ hawˇ ve Saˍtiˍrehˇ venˇ yaˇ hpeh‸ ve yoˬ. Pawˇ lu‸ ve tawˇ hkawˇ hta‸ na yuˬ tuˬ Jawˇmawˇ Gʼuiˬsha yawˇ ve nyi ma hta‸ hpaw piˇ ve yoˬ. 15Yaˇ miˇ oˇ ve leh yawˇ ve yehˬ yaˇ kʼa yaˇ hkʼa peu-eˬ baˆtiˆsaˬ hkanˍ yuˬ peuˬ hkʼaw‸ nawˉ, yawˇ ngaˬ hui hta‸ kʼoˆ laˇ ve, Ngaˬ lehˬ Jawˇmawˇ Gʼuiˬsha awˬ hkʼaw lo ka ti‸ yeˬ ve chaw hpeh‸ ve teh‸ nawˬ hui dawˇ ve kʼo, ngaˬ ve yehˬ lo ca chehˇ la-o teh‸ kʼoˆ leh, ngaˬ hui hta‸ gʼaˇ hte‸ lawˬ hkawˉ ve yoˬ.

16Oˇ ve hkʼaw‸ nawˉ, ngaˬ hui bon lawˬ kuiˬ lo kʼaw‸ kʼai chehˇ ve teˇ yanˇ, mawˉ te puiˉ ve awˬ ceˬ ma ehˉ teˇ gʼaˇ ngaˬ hui hta‸ laˬ ha‸ la ve yoˬ. Yawˇ lehˬ kuˇ puiˉ kʼaoˍ puiˉ ve pa taw, yawˇ ve awˬ shehˍ hpaˇ teˇ hpaˍ maˇ maˇ paw sha la ve yoˬ. 17Yaˇ miˇ oˇ ve lehˬ, Pawˇlu‸ leh ngaˬ hui awˬ hkʼaˇ suh laˬ leh, Chaw chi teˇ hpaˍ lehˬ, nawˬ hui hta‸ htaiˍ hkʼaw‸ ve ya‸ kʼaw maˍ laˇ ve, mvuh jaˇ ve Gʼuiˬsha teˇ gʼaˇ ve awˬ ceˬ hui hpeh‸ ve yoˬ teh‸ yawˇ kuˬ ve yoˬ. 18Awˬ nyi awˬ haˉ maw chaweh yawˇ chi hkʼe te ve pa taw, Pawˇlu‸ hkanˍ maˇ gʼa ve yoˬ. Yawˇ kʼaw‸ hpfuhˆ leh neˇ hta‸ kʼoˆ piˇ ve, Yeˍsuˆ Hkri‸ ve awˬ meh awˬ hkʼaw lo ngaˬ nawˬ hta‸ tawˇ piˇ ve, yawˇ awˬ hkʼaw lo tawˆ kʼai-o teh‸ kʼoˆ piˇ htaˇ, oˇ teˇ hkui neˇ tawˆ kʼai ve yoˬ.

19Yawˇ ve awˬ shehˍ hpaˇ teˇ hpaˍ lehˬ, yawˇ hui paw sha la tuˬ dawˇ law kuiˬ maˇ kʼaw‸ cawˬ ve teh‸ gʼa shiˍ htaˇ, Pawˇlu‸ leh Siˍlaˆ hta‸ yawˇ hui hpeh yuˬ leh, shaˉ nanˉ lo chehˇ ve jawˇmawˇ teˇ hpaˍ geh gʼawˬ kʼai ve yoˬ. 20Yawˇ huiˉ maˬ hta‸ jawˇmawˇ lonˉ teˇ hpaˍ geh sheh kʼai leh kʼoˆ piˇ ve, Chaw chi teˇ hpaˍ lehˬ, Yuˇda‸ chaw hpeh‸ leh, ngaˬ hui ve venˇ hta‸ sho‸ sha‸ tuˬ maˇ maˇ te chehˇ ve yoˬ. 21Ngaˬ hui Roˉma‸ chaw teˇ hpaˍ ha‸ yuˬ maˇ hpeh‸, te maˇ hpeh‸ ve awˬ liˇ awˬ hkʼaˇ teˇ hpaˍ yawˇ hui maˍ piˇ chehˇ ve yoˬ teh‸ kʼoˆ ve yoˬ. 22Chaw awˬ moˍ lonˉ htawˇ, Pawˇlu‸ leh Siˍlaˆ awˬ hkʼoˆ hta‸ venˇbaˆ gʼaˇ hte‸ taˍ ve yoˬ.

Jawˇmawˇ lonˉ teˇ hpaˍ lehˬ, yawˇ huiˉ maˬ ve veu‸ kʼaˇ hta‸ kʼehˆ baˬ sheˬ leh, suhˆ taˬ yuˬ leh dawˆ tuˬ tawˇ piˇ ve yoˬ. 23Yawˇ huiˉ maˬ hta‸ maˇ maˇ dawˆ peuˬ hkʼaw‸ nawˉ, htawnˍ hkʼaw keu taˍ leh, yawˇ huiˉ maˬ hta‸ hkʼa deh‸ shaw tuˬ htawnˍ awˬ hoˉ teˇ gʼaˇ hta‸ tawˇ piˇ ve yoˬ. 24Htawnˍ awˬ hoˉ teˇ gʼaˇ htawˇ, shu tawˇ piˇ ve hkʼe yawˇ huiˉ maˬ hta‸ htawnˍ awˬ kʼaw ji ve teˇ bawehˇ lo keu leh, yawˇ huiˉ maˬ ve hkui sheh hta‸ ka‸ suhˆ htawˆ taˍ ve awˬ hkʼaw lo keu leh shawˇ hoˆ taˍ ve yoˬ.

25Shehˍ kʼaw hkui teˇ yanˇ htaˇ, Pawˇlu‸ leh Siˍlaˆ bon lawˬ leh Gʼuiˬsha hta‸ kʼa muiˬ chiˇ mvuh chehˇ ve yoˬ. Htawnˍ hkʼaw chehˇ ve chaw teˇ hpaˍ lehˬ, yawˇ huiˉ maˬ ve hkawˇ hta‸ na chehˇ ve yoˬ. 26Teˇ cawˬ haˉ miˬ hiˆ jaˇ ve pa taw, htawnˍ awˬ hkuiˉ puiˍ hiˆ hiˆ naˇ naˇ hpeh‸ ve yoˬ. Yehˬ miˉ hkʼa peu-eˬ teˇ cawˬ haˉ hpaw baˬ sheˬ leh, chaw hkʼa peu-eˬ hta‸ hpeh taˍ ve sho caˆ teˇ hpaˍ kʼehˆ tawˆ-e ve yoˬ. 27Htawnˍ awˬ hoˉ teˇ cawˬ haˉ nawˇ la leh, htawnˍ yehˬ miˉ hkʼa peu-eˬ hpaw baˬ taˍ ve hta‸ gʼa mawˬ ve yoˬ. Htawnˍ hkʼaw chehˇ ve chaw hkʼa peu-eˬ hpaw-e peuˬ hehˉ teh‸ dawˇ leh, yawˇ ve aˉ htaw gʼawˬ tawˆ leh yawˇ awˬ to hta‸ juˆ pehˍ-a teh‸ te ve yoˬ. 28Pawˇlu‸ bvuhˬ chaweh kuˬ leh kʼoˆ ve, Nawˬ awˬ to hta‸ te‸ chiˉ taˇ te, Ngaˬ hui hkʼa peu-eˬ chehˇ taˍ ve yoˬ teh‸ kʼoˆ piˇ ve yoˬ.

29Oˇ htaˇ, htawnˍ awˬ hoˉ lehˬ, Aˬ miˍ tuˉ veu laˇ-oˆ teh‸ kʼoˆ leh gʼuiˇ lo‸-e ve yoˬ. Yawˇ kawˆ cheˇ ve awˬ hkʼaw lo Pawˇlu‸ leh Siˍlaˆ mehˆ gʼuˇ suhˍ boˆ taˍ ve yoˬ. 30Yawˇ yawˇ huiˉ maˬ hta‸ shiˍ tawˆ-e peuˬ leh, Jawˇmawˇ teˇ hpaˍ-oˬ, htaiˍ hkʼaw‸ gʼa tuˬ ngaˬ hkʼaˬ hkʼe gʼa te tuˬ le teh‸ na nyi ve yoˬ.

31Yawˇ huiˉ maˬ kʼoˆ piˇ ve, Jawˇmawˇ Yeˍsuˆ hta‸ yonˍ loˬ. Nawˬ leh nawˬ ve yehˬ yaˇ kʼa yaˇ hui htaiˍ hkʼaw‸ ve hta‸ gʼa tuˬ yoˬ teh‸ kʼaw‸ kʼoˆ piˇ ve yoˬ. 32Oˇ htaˇ, yawˇ huiˉ maˬ lehˬ, htawnˍ awˬ hoˉ leh yawˇ ve yehˬ yaˇ kʼa yaˇ hui hta‸ Jawˇ mawˇ Gʼuiˬsha ve tawˇ hkawˇ maˍ piˇ ve yoˬ. 33Oˇ ve teˇ haˉ awˬ hkʼaw lo yawˇ yawˇ huiˉ maˬ hta‸ shiˍ kʼai leh, yawˇ huiˉ maˬ ve naˬ kuiˬ teˇ hpaˍ hta‸ tsuhˇ baˬ piˇ peuˬ hkʼaw‸ nawˉ, yawˇ awˬ to ka‸ yawˇ ve yehˬ yaˇ kʼa yaˇ hkʼa peu-eˬ ka‸ teˇ cawˬ haˉ baˆtiˆsaˬ hkanˍ yuˬ ve yoˬ. 34Oˇ ve awˬ hkʼaw‸ nawˉ, yawˇ huiˉ maˬ hta‸ yawˇ ve aˉ hkʼaw lo shiˍ kʼai leh, te caˍ te taw piˇ ve yoˬ. Gʼuiˬsha hta‸ yonˍ peuˬ ve pa taw, yawˇ leh yawˇ ve yehˬ yaˇ kʼa yaˇ hkʼa peu-eˬ ha lehˬ jaˇ ve yoˬ.

35Mvuhˇ htiˇ la htaˇ, jawˇmawˇ lonˉ teˇ hpaˍ lehˬ, paˍ leˆ teˇ hpaˍ hta‸ kʼai tcuh leh, Chaw oˇ ve nyiˇ gʼaˇ hta‸ hpehˇ piˇ-oˆ teh‸, ca kʼoˆ piˇ tcuh ve yoˬ.

36Oˇ htaˇ, htawnˍ awˬ hoˉ teˇ gʼaˇ tawˇ hkawˇ oˇ ve Pawˇlu‸ hta‸ kʼoˆ piˇ ve, Nawˬ huiˉ maˬ hta‸ hpehˇ piˇ tuˬ, jawˇmawˇ lonˉ teˇ hpaˍ chaw hta‸ tcuh peu laˇ peuˬ. Hkʼe te leh, chi beu‸ tawˆ-e leh dawˇ sha gaˇ sha ve awˬ hkʼaw lo kʼai-o teh‸ kʼoˆ piˇ ve yoˬ.

37Ya‸ hkʼaˇ, Pawˇlu‸ yawˇ hui hta‸ kʼoˆ piˇ ve, Ngaˬ huiˉ maˬ Roˉma‸ chaw hpeh‸ ve ka‸, suhˉ maˇ jehˬ sheˍ htaˇ shu mehˆ gʼuˇ suhˍ ngaˬ huiˉ maˬ hta‸ dawˆ leh htawnˍ hkʼaw keu taˍ ve yoˬ. Chi beu‸ ta‸ iˉ gawˬ lehˍ ve awˬ hkʼaw lo ngaˬ huiˉ maˬ hta‸ hpehˇ laˇ tuˬ laˇ. Chi hkʼe maˇ heˆ. Yawˇ hui laˬ leh ngaˬ huiˉ maˬ hta‸ yuˬ tawˆ piˇ lawˬ-o‸ teh‸, yawˇ hui hta‸ kʼoˆ piˇ ve yoˬ.

38Paˍ leˆ teˇ hpaˍ lehˬ, jawˇmawˇ lonˉ hui hta‸ ca hto piˇ ve teˇ yanˇ, yawˇ huiˉ maˬ Roˉma‸ chaw hpeh‸ ve hta‸ yawˇ hui gʼa kaˇ leh kawˆ jaˇ ve yoˬ. 39Yawˇ hui yawˇ huiˉ maˬ geh laˬ leh, yawˇ hui ve ya‸ kuiˬ hpehˇ laˇ tuˬ lawˬ hkawˉ ve yoˬ. Hkʼe te leh, yawˇ huiˉ maˬ hta‸ yuˬ tawˆ peuˬ leh, venˇ oˇ ve awˬ hkʼaw lo tawˆ kʼai tuˬ lawˬ ve yoˬ. 40Oˇ htaˇ, yawˇ huiˉ maˬ htawnˍ hkʼaw tawˆ kʼai leh, Luˍdiˇ ve aˉ hkʼaw lo kʼai ve yoˬ. Awˬ viˉ awˬ nyi teˇ hpaˍ hta‸ gʼa mawˬ htaˇ, yawˇ hui hta‸ awˬ gʼaˇ piˇ peuˬ leh, yawˇ huiˉ maˬ venˇ oˇ ve awˬ hkʼaw lo tawˆ kʼai ve yoˬ.

Currently Selected:

Tcuh yaˇ li‸ 16: LHBE

Highlight

Copy

Compare