Tcuh yaˇ li‸ 15

Yeˍruˆsaˍlehnˍ venˇ hkʼaw jehˬ da‸ ve

1Oˇ htaˇ, Yuˇda‸ mvuhˇmiˬ lo chehˇ ve chaw teˇ hpaˍ hpaˍ gaˬ la leh, Nawˬ hui lehˬ Moˉseˍ ve awˬ liˇ cawˬ ve hkʼe awˬ guiˬ meuˇ maˇ shoˍ ve kʼo, htaiˍ hkʼaw‸ ve hta‸ gʼa maˇ hpeh‸ teh‸, awˬ viˉ awˬ nyi teˇ hpaˍ hta‸ maˍ piˇ ve yoˬ. 2Pawˇlu‸ leh Baˍnaˍbaˆ chaw oˇ ve teˇ hpaˍ hta‸ maˇ hawˍ da‸ leh tawˇ gʼaˇ hte‸ gʼawˬ da‸ peuˬ hkʼaw‸ nawˉ, awˬ lawn chi hta‸ ca na nyi tuˬ, awˬ viˉ awˬ nyi teˇ hpaˍ lehˬ, Pawˇlu‸, Baˍnaˍbaˆ leh awˬ kaˍ awˬ nu chaw teˇ hpaˍ hpaˍ hta‸ leuˆ yuˬ leh, Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ geh kʼai tcuh ve yoˬ.

3Hkʼe te leh, Hkri‸ yaˇ awˬ moˍ yawˇ hui hta‸ kʼai tcuh ve teˇ yanˇ, yawˇ hui lehˬ Hpiˇniˆ mvuhˇmiˬ leh Saˍmaˍriˆ mvuhˇmiˬ hta‸ hpanˍ kʼai leh, buiˇshaˆaˉnaˆ chaw teˇ hpaˍ nyi ma kʼaw‸ pa ve awˬ lawn kʼaoˍ maˍ piˇ ve pa taw, awˬ viˉ awˬ nyi hkʼa peu-eˬ ha lehˬ jaˇ ve yoˬ. 4Yawˇ hui Yeˍruˆsaˍlehnˍ venˇ lo gaˬ la htaˇ, Hkri‸ yaˇ awˬ moˍ, tcuh yaˇ hui leh, awˬ hoˉ chaw mawˇ teˇ hpaˍ yawˇ hui hta‸ ha‸ yuˬ ve yoˬ. Oˇ htaˇ, Gʼuiˬsha yawˇ huiˉ maˬ hta‸ cuˇ ve awˬ hkʼaw lo, hkʼa te ve awˬ lawn hkʼa peu-eˬ yawˇ huiˉ maˬ yawˇ hui hta‸ kʼaoˍ maˍ piˇ ve yoˬ. 5Ya‸ hkʼaˇ, Hpaˍriˍsehˇ awˬ moˍ awˬ hkʼaw lo Yeˍsuˆ hta‸ yonˍ ve chaw teˇ hpaˍ hpaˍ tu la leh kʼoˆ ve, Yawˇ hui hta‸ awˬ guiˬ meuˇ gʼa shoˍ piˇ leh, Moˉseˍ ve awˬliˇtawˇhkawˇ awˬ hkʼaˇ suh te tuˬ yawˇ hui hta‸ tawˇ gʼa piˇ ve yoˬ teh‸ kʼoˆ piˇ ve yoˬ.

6Oˇ htaˇ, tcuh yaˇ hui leh, awˬ hoˉ chaw mawˇ teˇ hpaˍ awˬ lawn chi ve hta‸ jehˬ da‸ tuˬ hpawnˬ da‸ ve yoˬ. 7Awˬ lawn chi hta‸ maˇ maˇ jehˬ da‸ peuˬ hkʼaw‸ nawˉ, Peˍtruˆ tu la leh yawˇ hui hta‸ kʼoˆ piˇ ve, Awˬ viˉ awˬ nyi teˇ hpaˍ-oˬ, ngaˬ hta‸ pa taw buiˇ shaˆ aˉ naˆ chaw teˇ hpaˍ ha lehˬ ve bon hkawˇ hta‸ gʼa kaˇ leh gʼa yonˍ tuˬ, awˉ lawˉ htaˇ ka‸ nawˬ hui awˬ hkʼaw lo Gʼuiˬsha ngaˬ hta‸ leuˆ yuˬ taˍ ve hta‸ nawˬ hui shiˍ ve yoˬ. 8Nyi ma hta‸ shiˍ ve Gʼuiˬsha lehˬ, ngaˬ hui hta‸ da‸ ve kehˬ ve Awˬ ha hpu pe‸ laˇ ve hkʼa shuˍ shuˍ, yawˇ hui hta‸ htawˇ piˇ ve awˬ hkʼaw lo, yawˇ hui awˬ pon yawˇ shaˉ hkiˆ hkanˍ ve yoˬ. 9Gʼuiˬsha lehˬ, ngaˬ hui leh yawˇ hui hta‸ maˇ peun da‸ piˇ lawˬ. Yonˍ ve hta‸ pa taw, yawˇ hui ve nyi ma hta‸ htawˇ yawˇ da‸ piˇ kehˬ piˇ peuˬ. 10Hkʼe te leh, ngaˬ hui ve awˬ puˍ awˬ pi teˇ hpaˍ ka‸ ngaˬ hui ka‸ taˆ maˇ gʼaˇ ve taˆ tuˬ hta‸ yuˬ leh, Gʼuiˬsha hta‸ lawˇ nyi tuˬ, aˬ hto‸ ma te awˬ la‸ gʼawˇ hui ve la‸ kʼaˉ hkʼoˆ ca taˍ piˇ ve le. 11Ngaˬ hui htawˇ yawˇ hui hkʼa shuˍ shuˍ, Jawˇmawˇ Yeˍsuˆ ve awˬ bon hta‸ pa taw ceh tiˉ htaiˍ hkʼaw‸ gʼa tuˬ ve hta‸ ngaˬ hui yonˍ ve yoˬ teh‸ Peˍtruˆ kʼoˆ piˇ ve yoˬ.

12Oˇ htaˇ, hkʼa hpawnˬ la ve chaw hkʼa peu-eˬ ta‸ iˉ gawˬ lehˍ chehˇ ve yoˬ. Baˍnaˍbaˆ leh Pawˇlu‸ lehˬ, Gʼuiˬsha yawˇ huiˉ maˬ hta‸ cuˇ leh, buiˇshaˆaˉnaˆ chaw hui awˬ hkʼaw lo anˇ tuˬ leh awˬ heˆ hkʼa te ve teˇ hpaˍ awˬ lawn yawˇ huiˉ maˬ kʼaoˍ maˍ piˇ ve hta‸ yawˇ hui na chehˇ ve yoˬ. 13Yawˇ huiˉ maˬ tawˇ yaw peuˬ htaˇ, Yaˍkoˆ kʼoˆ ve, Awˬ viˉ awˬ nyi teˇ hpaˍ-oˬ, ngaˬ ve hkawˇ hta‸ na sheˍ. 14Gʼuiˬsha lehˬ, yawˇ ve awˬ meh hta‸ pfuhˇ tuˬ ve awˬ pon buiˇshaˆaˉnaˆ chaw hui awˬ hkʼaw lo chaw teˇ moˍ hta‸ yuˬ tawˆ tuˬ, awˉ lawˉ htaˇ Gʼuiˬsha yawˇ hui hta‸ dawˇ nyi leh ha kʼaˉ ve awˬ lawn Suˉmonˍ ngaˬ hui hta‸ kʼaoˍ maˍ laˇ peuˬ. 15Yawˇ kʼoˆ ve tawˇ hkawˇ lehˬ, Gʼuiˬsha ve tcuh kaˍ paˍ hui ve tawˇ hkawˇ hta‸ hawˍ da‸ ve yoˬ. Tcuh kaˍ paˍ ve li‸ awˬ hkʼaw lo chi hkʼe bvuh‸ taˍ ve,

16Chi teˇ hpaˍ hpeh‸ la peuˬ hkʼaw‸ nawˉ ngaˬ kʼaw‸ la leh,

paiˍ peuˬ ve Daˍviˆ ve yehˬ hta‸ ngaˬ kʼaw‸ te tuˬ yoˬ.

Luˬ kʼai sheˆ kʼai peuˬ ve hta‸ htawˇ ngaˬ kʼaw‸ gu leh,

yehˬ oˇ ve hta‸ ngaˬ kʼaw‸ cawˍ ti tuˬ yoˬ.

17Oˇ htaˇ, cawˬ taˍ sheˍ ve chaw teˇ hpaˍ leh,

ngaˬ ve awˬ meh hkʼa pfuhˇ ve buiˇ shaˆ aˉ naˆ

chaw hui hkʼa peu-eˬ, Jawˇmawˇ Gʼuiˬsha hta‸ ca tuˬ yoˬ.

18Aˬ sho-eˬ htaˇ ka‸ awˬ lawn chi ngaˬ hui hta‸ shiˍ tcuh laˇ ve Jawˇmawˇ Gʼuiˬsha chi hkʼe kʼoˆ ve yoˬ teh‸ bvuh‸ taˍ ve yoˬ. #Amo 9:11-12

19Hkʼe te leh, Gʼuiˬsha geh kʼaw‸ hpfuhˆ kʼaw‸ la ve buiˇshaˆaˉnaˆ chaw teˇ hpaˍ hta‸ sho‸ sha‸ tuˬ te maˇ cawˇ. 20Ya‸ hkʼaˇ, shaˉ ho‸ hta‸ caˉ da‸ ve cha‸ chiˆ ve teˇ hpaˍ maˇ kʼoˆ, haˉ chawˇ haˉ paˆ te ve maˇ kʼoˆ, kʼawˍ peˍ nyiˉ pehˍ ve awˬ shaˍ hta‸ caˇ ve maˇ kʼoˆ, awˬ suhˍ hta‸ caˇ ve maˇ kʼoˆ, chi teˇ hpaˍ hta‸ jaw kʼai tuˬ, yawˇ hui hta‸ li‸ bvuh‸ piˇ cawˇ ve yoˬ teh‸ ngaˬ dawˇ ve yoˬ. 21Awˬ lawn kʼo, teˇ shinˉ nyi le le bon yehˬ awˬ hkʼaw lo Moˉseˍ ve awˬliˇtawˇhkawˇ hta‸ gʼaw maˍ piˇ ve pa taw, aˬ sho-eˬ htaˇ ka‸ te leh teˇ venˇ le le awˬ hkʼaw lo maˍ piˇ shehˍ hpaˇ teˇ hpaˍ cawˬ ve yoˬ teh‸ Yaˍkoˆ kʼoˆ piˇ ve yoˬ.

22Oˇ htaˇ, yawˇ hui awˬ hkʼaw lo chaw hta‸ leuˆ yuˬ leh, Pawˇlu‸ leh Baˍnaˍbaˆ geh Anˍtiˆawˍ venˇ lo kʼai tcuh tuˬ, tcuh yaˇ teˇ hpaˍ leh awˬ hoˉ chaw mawˇ teˇ hpaˍ, Hkri‸ yaˇ awˬ moˍ hkʼa peu-eˬ geh teˇ geh nyi ma cawˇ ve yoˬ. Awˬ viˉ awˬ nyi teˇ hpaˍ awˬ hkʼaw lo awˬ hoˉ te ve Baˍsaˍbaˆ teh‸ kʼoˆ ve Yuˇda‸ leh Siˍlaˆ hta‸ kʼai tcuh ve yoˬ. 23Yawˇ huiˉ maˬ yuˬ kʼai ve li‸ lehˬ chi hkʼe bvuh‸ taˍ ve yoˬ.

Awˬ viˉ awˬ nyi awˬ hkʼaw lo tcuh yaˇ hui leh awˬ hoˉ chaw mawˇ teˇ hpaˍ lehˬ, Anˍtiˆawˍ venˇ, Suˇriˆ mvuhˇmiˬ leh Kiˇliˇkiˆ mvuhˇmiˬ lo chehˇ ve buiˇ shaˆ aˉ naˆ chaw hui awˬ hkʼaw lo awˬ viˉ awˬ nyi teˇ hpaˍ hta‸ ha‸ pehnˇ ve tawˇ shanˍ feu laˇ ve yoˬ. 24Ngaˬ hui awˬ hkʼaw lo ve chaw teˇ hpaˍ hpaˍ lehˬ, ngaˬ hui maˇ kʼai tcuh ve ka‸ nawˬ hui geh kʼai leh, nawˬ hui hta‸ sho‸ sha‸ piˇ leh nyi ma htawˇ hpfuhˆ nawˬ hpfuhˆ kʼai tuˬ maˍ piˇ ve awˬ lawn hta‸ ngaˬ hui gʼa kaˇ ve yoˬ. 25Chi hta‸ pa taw, ngaˬ hui jehˬ da‸ ve awˬ hkʼaw lo nyi ma teˇ shiˍ tiˉ taˍ leh, nawˬ hui geh kʼai tuˬ chaw nyiˇ gʼaˇ hta‸ leuˆ yuˬ ve yoˬ. 26Ngaˬ hui ve Jawˇmawˇ Yeˍsuˆ Hkri‸ awˬ pon a shu yawˇ ve a sha‸ hta‸ tanˇ taˬ ve, ngaˬ hui ha‸ ve Baˍnaˍbaˆ leh Pawˇlu‸ geh yawˇ huiˉ maˬ hta‸ kʼai tcuh ve yoˬ. 27Hkʼe te leh, li‸ hkʼaw bvuh‸ taˍ ve awˬ lawn chi teˇ hpaˍ nawˬ hui hta‸ kʼaoˍ maˍ laˇ tuˬ, Yuˇda‸ leh Siˍlaˆ hta‸ nawˬ hui geh peu laˇ ve yoˬ. 28Jaw kʼai tuˬ loˍ jaˇ ve awˬ ceuˬ chi teˇ hpaˍ awˬ hkʼoˆ, awˬ kaˍ awˬ nu ve awˬ vuiˬ nawˬ hui hta‸ maˇ taˍ tuˬ, da‸ ve kehˬ ve Awˬ ha hpu ka‸ ngaˬ hui ka‸ nyi ma cawˇ ve yoˬ. 29Nawˬ hui jaw kʼai cawˇ ve teˇ hpaˍ lehˬ, shaˉ ho‸ hta‸ tanˇ taˍ ve awˬ ceuˬ hta‸ caˇ ve maˇ kʼoˆ, awˬ suhˍ hta‸ caˇ ve maˇ kʼoˆ, kʼawˍ peˍ nyiˉ pehˍ ve awˬ shaˍ hta‸ caˇ ve maˇ kʼoˆ, haˉ chawˇ haˉ paˆ te ve hta‸ maˇ kʼoˆ, chi teˇ hpaˍ yoˬ. Chi teˇ hpaˍ hta‸ nawˬ hui jaw kʼai ve kʼo da‸ jaˇ ve yoˬ. Dawˇ sha gaˇ sha ve cawˬ piˇ-oˆ teh‸ bvuh‸ taˍ ve yoˬ.

30Yawˇ hui tawˆ kʼai leh Anˍtiˆawˍ venˇ lo gaˬ ve teˇ yanˇ, chaw chi ma ve hta‸ kuˬ hpawnˬ leh, yawˇ hui hta‸ li‸ oˇ ve piˇ ve yoˬ. 31Li‸ oˇ ve hta‸ gʼaw htaˇ, yawˇ hui hta‸ awˬ gʼaˇ pe‸ laˇ ve pa taw ha lehˬ jaˇ ve yoˬ. 32Yuˇda‸ leh Siˍlaˆ lehˬ, yawˇ huiˉ maˬ htawˇ bon maˍ paˍ hpeh‸ ve pa taw, awˍ viˉ awˬ nyi hui hta‸ maˇ maˇ maˍ piˇ ve awˬ hkʼaw lo, awˬ gʼaˇ piˇ leh yawˇ hui hta‸ yeˬ la piˇ lawˬ ve yoˬ. 33Yawˇ huiˉ maˬ oˇ kaˬ lo a ciˉ maw chaweh chehˇ peuˬ hkʼaw‸ nawˉ, tcuh peu laˇ ve chaw hui geh kʼaw‸ kʼo‸-e tuˬ, awˬ viˉ awˬ nyi teˇ hpaˍ lehˬ, dawˇ sha gaˇ sha ve awˬ hkʼaw lo yawˇ huiˉ maˬ hta‸ kʼo‸-e tcuh ve yoˬ. #15:33 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -34 Ya‸ hkʼaˇ Siˍlaˆ lehˬ, oˇ kaˬ lo chehˇ taˉ cawˇ teh‸ yawˇ dawˇ ve yoˬ.

35Ya‸ hkʼaˇ, Pawˇlu‸ leh Baˍnaˍbaˆ Anˍtiˆawˍ venˇ hkʼaw lo chehˇ taˍ leh, awˬ kaˍ awˬ nu chaw laiˉ gʼaˇ geh teˇ geh Jawˇmawˇ Gʼuiˬsha ve tawˇ hkawˇ maˍ piˇ leh bon maˍ ve yoˬ.

Pawˇlu‸ nyiˇ pawˆ teˇ pawˆ bon ca maˍ ve

36Awˬ nyi awˬ haˉ hkʼa cawˇ cawˇ maw peuˬ hkʼaw‸ nawˉ, Pawˇlu‸ lehˬ Baˍnaˍbaˆ hta‸ kʼoˆ piˇ ve, Jawˇmawˇ Gʼuiˬsha ve tawˇ hkawˇ maˍ piˇ jaw peuˬ ve teˇ venˇ le le awˬ hkʼaw lo chehˇ ve awˬ viˉ awˬ nyi teˇ hpaˍ hkʼaˬ hkʼe hpeh‸ chehˇ ve hta‸ ca kʼaw‸ toˇ nyi-a veuˬ teh‸ kʼoˆ piˇ ve yoˬ. 37Baˍnaˍbaˆ lehˬ, Maˍkuˆ teh‸ kʼoˆ ve Yoˇhanˬ hta‸ shiˍ kʼai gaˇ ve yoˬ. 38Ya‸ hkʼaˇ Pawˇlu‸ lehˬ, yawˇ hta‸ maˇ shiˍ kʼai cawˇ teh‸ dawˇ ve yoˬ. Awˬ lawn kʼo, ponˬ laˬ ve teˇ pawˆ Paˍpuˇliˆ mvuhˇmiˬ lo gaˬ htaˇ, yawˇ huiˉ maˬ hta‸ hpaˆ da‸ taˉ leh kanˉ te kuiˬ lo yawˇ maˇ kʼai ve hta‸ pa taw yoˬ. 39Hkʼe te leh, awˬ lawn oˇ ve hta‸ pa taw yawˇ huiˉ maˬ maˇ cawˇ da‸ leh hpaˆ da‸ ve yoˬ. Baˍnaˍbaˆ lehˬ Maˍkuˆ hta‸ shiˍ veu leh, Kuˇpaˍruˆ conˇ lo haw lo‸ kʼoˍ ciˇ kʼai ve yoˬ. 40Awˬ viˉ awˬ nyi teˇ hpaˍ lehˬ, awˬ bon piˇ shehˍ hpaˇ Jawˇmawˇ Gʼuiˬsha ve la‸ sheh awˬ hkʼaw lo Pawˇlu‸ hta‸ chiˇ a‸ piˇ peuˬ hkʼaw‸ nawˉ, yawˇ Siˍlaˆ hta‸ leuˆ yuˬ leh tawˆ kʼai ve yoˬ. 41Pawˇlu‸ lehˬ Suˇriˆ mvuhˇmiˬ leh Kiˇliˇkiˆ mvuhˇmiˬ hta‸ hpanˍ kʼai leh, Hkri‸ yaˇ awˬ moˍ teˇ hpaˍ yeˬ la tuˬ awˬ gʼaˇ piˇ ve yoˬ.

Currently Selected:

Tcuh yaˇ li‸ 15: LHBE

Highlight

Copy

Compare