Tcuh yaˇ li‸ 17

Hteˇsaˍlawˇniˆ venˇ yaˇ hui duiˆ-ehˍ shaˇ-ehˍ te ve

1Oˇ ve hkʼaw‸ nawˉ, yawˇ hui Aˍhpiˇpawˇliˆ venˇ leh Aˍpawˇ lawˇniˆ venˇ hta‸ hpanˍ kʼai leh, Hteˇsaˍ lawˇniˆ venˇ lo gaˬ ve yoˬ. Oˇ kaˬ lo Yuˇda‸ chaw hui ve bon yehˬ cawˬ ve yoˬ. 2Pawˇlu‸ yawˇ te jaw ve hkʼe, yawˇ hui geh lo‸-e leh, shehˆ shinˉ hkʼa gaˬ Li‸ hpu hta‸ cuˇ leh yawˇ hui geh jehˬ da‸ cehˇ da‸ ve yoˬ. 3Hkri‸ lehˬ, tu‸ ve hkanˍ ve hta‸ gʼa hkanˍ leh, suh kuiˬ lo gʼa kʼaw‸ te‸ tu la ve yoˬ teh‸, yawˇ hkʼa tawˍ lehˆ hpeu‸ maˍ piˇ ve yoˬ. Ngaˬ nawˬ hui hta‸ kʼaoˍ maˍ laˇ ve Yeˍsuˆ chi teˇ gʼaˇ lehˬ, Hkri‸ hpeh‸ ve yoˬ teh‸ kʼoˆ ve yoˬ. 4Yawˇ hui teˇ hpaˍ hpaˍ yonˍ la leh, Pawˇlu‸ leh Siˍlaˆ hta‸ pawnˇ da‸ ve yoˬ. Gʼuiˬsha hta‸ oˉ kʼoˍ pui ve Heˍlaˍsaˆ chaw maˇ maˇ yonˍ leh, awˬ me‸ awˬ hponˇ cawˬ ve yaˇ miˇ teˇ hpaˍ htawˇ hkʼa cawˇ cawˇ yonˍ maˇ ve yoˬ.

5Ya‸ hkʼaˇ, Yuˇda‸ chaw teˇ hpaˍ lehˬ, hkawehˉ ve nyi ma cawˬ leh, kanˉ maˇ cawˬ ve chaw haiˬ teˇ hpaˍ hta‸ kuˬ yuˬ peuˬ hkʼaw‸ nawˉ, chaw awˬ moˍ lonˉ hta‸ hpawnˬ da‸ piˇ leh, venˇ awˬ hkʼaw lo duiˆ-ehˍ shaˇ-ehˍ te ve yoˬ. Yawˇ hui Yaˍsonˍ ve yehˬ hta‸ hoˆ yuˬ leh, Pawˇlu‸ leh Siˍlaˆ hta‸ chaw chi ma ve mehˆ gʼuˇ suhˍ gʼawˬ tawˆ la tuˬ ca ve yoˬ. 6Yawˇ huiˉ maˬ hta‸ ca maˇ mawˬ htaˇ, Yaˍsonˍ leh awˬ viˉ awˬ nyi teˇ hpaˍ hpaˍ hta‸ jawˇ mawˇ lonˉ hui geh gʼawˬ kʼai leh kʼoˆ ve, Miˬ guiˬ hkʼa peu-eˬ hta‸ sho‸ sha‸ tuˬ te piˇ lawˬ shehˍ hpaˇ teˇ hpaˍ lehˬ, choˬ kaˬ lo htawˇ gaˬ la peuˬ. 7Yaˍsonˍ lehˬ yawˇ hui hta‸ ha‸ yuˬ peuˬ. Yeˍsuˆ teh‸ kʼoˆ ve awˬ kaˍ awˬ nu hkunˉ hawˉ hkanˇ teˇ gʼaˇ cawˬ ve yoˬ teh‸, yawˇ hui kʼoˆ leh, jawˇmawˇ Kehˉsaˍ ve awˬ liˇ tawˇ hkawˇ hta‸ maˇ hawˍ da‸ ve teˇ hpaˍ yawˇ hui hkʼa peu-eˬ te chehˇ ve yoˬ teh‸ kuˬ ve yoˬ. 8Venˇ yaˇ teˇ hpaˍ leh jawˇmawˇ lonˉ hui lehˬ, awˬ lawn chi hta‸ gʼa kaˇ htaˇ, yawˇ hui nyi ma sho‸ sha‸ jaˇ ve yoˬ. 9Yawˇ hui lehˬ, Yaˍsonˍ leh awˬ kaˍ awˬ nu awˬ viˉ awˬ nyi teˇ hpaˍ hta‸ hpu tanˇ keu tcuh leh hkanˍ piˇ lawˬ peuˬ hkʼaw‸ nawˉ, yawˇ hui hta‸ hpehˇ piˇ ve yoˬ.

Beˍriˆ venˇ hkʼaw tcuh yaˇ hui chehˇ htaˇ awˬ lawn

10Awˬ viˉ awˬ nyi teˇ hpaˍ lehˬ, teˇ cawˬ haˉ Pawˇlu‸ leh Siˍlaˆ hta‸ Beˍriˆ venˇ lo tanˇ hkuinˇ htaˇ kʼai tcuh ve yoˬ. Yawˇ huiˉ maˬ oˇ kaˬ lo gaˬ la htaˇ, Yuˇda‸ chaw hui ve bon yehˬ hkʼaw lo‸-e ve yoˬ. 11Chaw chi teˇ hpaˍ lehˬ, Hteˇsaˍlawˇniˆ chaw hui a‸ kehˉ dawˇ nyi puiˉ leh, Gʼuiˬsha ve tawˇ hkawˇ hta‸ yawˇ hui ha lehˬ ha kʼa ha‸ yuˬ ve yoˬ. Awˬ lawn chi teˇ hpaˍ cawˇ maˇ cawˇ ve hta‸ gʼa shiˍ tuˬ, yawˇ hui teˇ nyi le le Li‸ hpu hta‸ hkʼa deh‸ gʼaw nyi chehˇ ve yoˬ. 12Hkʼe te leh, yawˇ hui awˬ hkʼaw lo chaw maˇ maˇ yonˍ la ve yoˬ. Awˬ me‸ awˬ hponˇ cawˬ ve Heˍlaˍsaˆ yaˇ miˇ teˇ hpaˍ leh hawˉ hkʼaˆ teˇ hpaˍ htawˇ, yonˍ la ve chaw hkʼa cawˇ cawˇ maˇ ve yoˬ. 13Pawˇlu‸ lehˬ, Beˍriˆ venˇ awˬ hkʼaw lo Gʼuiˬ sha ve tawˇ hkawˇ maˍ piˇ chehˇ ve hta‸ Hteˇsaˍlawˇniˆ venˇ lo chehˇ ve Yuˇda‸ chaw teˇ hpaˍ gʼa shiˍ htaˇ, oˇ kaˬ lo htawˇ yawˇ hui kʼai leh, chaw awˬ moˍ lonˉ teˇ hpaˍ hta‸ juˆ piˇ leh duiˆ-ehˍ shaˇ-ehˍ te piˇ lawˬ ve yoˬ. 14Oˇ htaˇ, awˬ viˉ awˬ nyi teˇ hpaˍ lehˬ, Pawˇlu‸ hta‸ laˇ tsuhˇ gʼuiˬ hkʼa gaˬ teˇ cawˬ haˉ kʼai tcuh ve yoˬ. Ya‸ hkʼaˇ, Siˍlaˆ leh Tiˆmoˉseˍ oˇ kaˬ lo chehˇ taˉ sheˍ ve yoˬ. 15Pawˇlu‸ hta‸ shiˍ kʼoˬ ve chaw hui lehˬ, Aˍhtenˍ venˇ hkʼa gaˬ shiˍ kʼoˬ piˇ ve yoˬ. Siˍlaˆ leh Tiˆmoˉseˍ yawˇ geh haˆ haˆ laˬ tuˬ, Pawˇlu‸ yawˇ hui hta‸ tawˇ shanˍ feu piˇ leh yawˇ hui kʼaw‸ kʼo‸-e ve yoˬ.

Pawˇlu‸ Aˍhtenˍ venˇ hkʼaw chehˇ htaˇ awˬ lawn

16Pawˇlu‸ Aˍhtenˍ venˇ awˬ hkʼaw lo yawˇ huiˉ maˬ hta‸ law chehˇ htaˇ, venˇ oˇ ve awˬ hkʼaw lo shaˉ ho‸ hkʼa biˇ cawˬ ve hta‸ yawˇ gʼa mawˬ leh, yawˇ ve nyi ma awˬ hkʼaw lo hpeh‸ bawˬ jaˇ ve yoˬ. 17Hkʼe te leh, yawˇ lehˬ bon yehˬ awˬ hkʼaw lo Yuˇda‸ chaw hui leh Gʼuiˬsha hta‸ oˉ kʼoˍ pui ve chaw hui hta‸ maˇ kʼoˆ, teˇ nyi le le tcuh hkʼaw lo hkʼa mawˬ hkʼa hpuˇ ve chaw teˇ hpaˍ hta‸ htawˇ maˇ kʼoˆ, jehˬ da‸ cehˇ da‸ ve yoˬ. 18Oˇ htaˇ, Eˇpiˇkuˇruˆ awˬ liˇ leh Saˍtawˉeˆ awˬ liˇ yuˬ ve cuˇ yiˍ cawˬ ve chaw teˇ hpaˍ lehˬ, Pawˇ lu‸ geh jehˬ da‸ ve yoˬ. Yawˇ hui teˇ hpaˍ hpaˍ kʼoˆ ve, Shu hkawˇ ca gʼawˆ kʼaoˍ toˇ ve chaw chi teˇ gʼaˇ aˬ hto‸ ma hta‸ kʼoˆ gaˇ ve leh naˍ teh‸ kʼoˆ ve yoˬ.

Pawˇlu‸ lehˬ, Yeˍsuˆ awˬ lawn leh kʼaw‸ te‸ tu la ve awˬ lawn maˍ piˇ ve pa taw, teˇ hpaˍ hpaˍ kʼoˆ ve, Yawˇ lehˬ awˬ kaˍ awˬ nu mvuhˇ miˬ ve gʼuiˬsha teˇ hpaˍ awˬ lawn ca maˍ toˇ ve chaw yoˬ teh‸ kʼoˆ ve yoˬ. 19Oˇ htaˇ, yawˇ hui Pawˇlu‸ hta‸ yuˬ leh, jehˬ da‸ kuiˬ Aˍreˍ hkʼaw teˇ shiˍ lo shiˍ kʼai leh kʼoˆ ve, Nawˬ maˍ piˇ ve awˬ lawn awˬ suhˉ chi ngaˬ hui hta‸ htawˇ a ciˉ maˍ laˇ-oˆ. 20Awˬ lawn kʼo, ngaˬ hui maˇ shiˍ maˇ kaˇ jaw ve awˬ ceuˬ teˇ hpaˍ nawˬ kʼoˆ laˇ ve yoˬ. Awˬ ceuˬ oˇ ve teˇ hpaˍ aˬ hto‸ ma tcuhˉ kuiˬ cawˬ ve hta‸ ngaˬ hui shiˍ gaˇ ve yoˬ teh‸, yawˇ hui kʼoˆ ve yoˬ. 21Aˍhtenˍ venˇ chaw hkʼa peu-eˬ leh hkehˉ chaw teˇ hpaˍ lehˬ, awˬ lawn awˬ suhˉ teˇ ceuˬ ceuˬ hta‸ gʼa kaˇ gʼa hto tuˬ awˬ pon ceh tiˉ yawˇ hui awˬ yanˇ te peuˬ piˇ chehˇ ve yoˬ.

22Oˇ htaˇ Pawˇlu‸ lehˬ, jehˬ da‸ kuiˬ Aˍreˍ hkʼaw awˬ kʼaw ji ve teˇ kaˬ lo huˉ taˍ leh kʼoˆ ve, Aˍhtenˍ chaw teˇ hpaˍ-oˬ, nawˬ hui lehˬ hkʼa peu-eˬ awˬ hkʼaw lo gʼuiˬsha teˇ hpaˍ hta‸ yawˆ yan puiˉ jaˇ ve hta‸ ngaˬ gʼa mawˬ ve yoˬ. 23Awˬ lawn kʼo, ngaˬ teˇ kaˬ peuˬ teˇ kaˬ kʼai leh nawˬ hui oˉ kʼoˍ pui ve awˬ ceuˬ teˇ hpaˍ hta‸ nyi ve teˇ yanˇ, Ngaˬ hui maˇ shiˍ ve Gʼuiˬsha awˬ pon teh‸ bvuh‸ taˍ ve tanˇ kuiˬ teˇ maˬ hta‸ ngaˬ gʼa mawˬ ve yoˬ. Nawˬ hui maˇ shiˍ leh oˉ kʼoˍ pui chehˇ ve Gʼuiˬsha teˇ gʼaˇ awˬ lawn ngaˬ nawˬ hui hta‸ kʼaoˍ maˍ laˇ ve yoˬ. 24Miˬguiˬ leh miˬguiˬ hkʼoˆ hkʼa cawˬ ve hkʼa peu-eˬ hta‸ te hpanˍ ve Gʼuiˬsha lehˬ, mvuhˇ naw ma leh miˬguiˬ ve Awˬ shehˍ hpaˇ hpeh‸ ve yoˬ. Yawˇ lehˬ chaw yaˇ la‸ sheh te taˍ ve yehˬ awˬ hkʼaw lo chehˇ tuˬ ve maˇ heˆ. 25Chaw yaˇ ve la‸ sheh yawˇ awˬ pon teˇ ceuˬ ceuˬ te tuˬ yawˇ loˍ ve ka‸ maˇ heˆ. Awˬ lawn kʼo, yawˇ lehˬ chaw hkʼa peu-eˬ hta‸ a sha‸ te‸ piˇ leh, teˇ ceuˬ le le piˇ ve yoˬ. 26Yawˇ lehˬ miˬguiˬ hkʼoˆ teˇ kaˬ le le lo chehˇ tuˬ, chaw teˇ ceuˬ le le hta‸ chaw teˇ gʼaˇ awˬ hkʼaw lo ceh tiˉ te hpanˍ taˍ ve yoˬ. Yawˇ hui awˬ pon fuiˍ da‸ pehˬ da‸ ve awˬ yanˇ maˇ kʼoˆ, yawˇ hui chehˇ tuˬ ve miˬ tcuhˉ teˇ hpaˍ maˇ kʼoˆ, yawˇ gu taˍ ve yoˬ. 27Hkʼaˬ hkʼe te leh chaw yaˇ yawˇ hta‸ ca ve awˬ hkʼaw lo ca shoˆ nyi leh gʼa mawˬ tuˬ awˬ pon, yawˇ chaw yaˇ hta‸ te hpanˍ taˍ ve yoˬ. Chi hkʼe kʼoˆ ve ka‸, yawˇ lehˬ ngaˬ hui hkʼaˬ ve teˇ gʼaˇ hta‸ htawˇ vuiˇ da‸ ve maˇ heˆ. 28Awˬ lawn kʼo,

yawˇ hta‸ pa taw ngaˬ hui te‸ chehˇ ve, hiˆ hiˆ naˇ naˇ te chehˇ ve leh hpeh‸ chehˇ taˍ ve yoˬ.

Nawˬ hui ve kʼa muiˬ hkawˇ kʼa shehˍ hpaˇ teˇ hpaˍ hpaˍ kʼoˆ ve hkʼe,

Ngaˬ hui lehˬ yawˇ lo caˉ ya‸ la ve awˬ yaˇ awˬ duˬ hpeh‸ ve yoˬ.

29Hkʼe te leh, ngaˬ hui Gʼuiˬsha lo caˉ ya‸ la ve awˬ yaˇ awˬ duˬ hpeh‸ ve hta‸ pa taw, chaw yaˇ hui dawˇ puiˉ te puiˉ ve awˬ ho‸ awˬ han teˇ hpaˍ, shi maˇ kʼoˆ, hpu maˇ kʼoˆ, haˉ pui maˇ kʼoˆ, Gʼuiˬ sha lehˬ chi teˇ hpaˍ hta‸ shuˍ da‸ ve teh‸ ngaˬ hui maˇ dawˇ cawˇ. 30Ponˬ laˬ htaˇ nawˬ hui maˇ shiˍ leh te ve teˇ hpaˍ hta‸ Gʼuiˬsha maˇ tawnˇ taˍ ve htawˇ, chi beu‸ lehˬ teˇ kaˬ le le lo chehˇ ve chaw hkʼa peu-eˬ venˇbaˆ hta‸ dawˇ hpfuhˆ tuˬ Gʼuiˬsha tawˇ piˇ taˍ ve yoˬ. 31Awˬ lawn kʼo, yawˇ leuˆ yuˬ ve teˇ gʼaˇ hta‸ cuˇ leh miˬguiˬ yaˇ hui hta‸ hteˇ ve cawˇ ve awˬ hkʼaw lo suhˉ jehˬ tuˬ, yawˇ awˬ nyi tinˍ taˍ peuˬ. Chi teˇ gʼaˇ hta‸ Gʼuiˬsha leuˆ yuˬ ve teh‸ chaw hkʼa peu-eˬ gʼa shiˍ tuˬ, suh kuiˍ lo yawˇ hta‸ kʼaw‸ te‸ tu la piˇ peuˬ teh‸ Pawˇlu‸ maˍ piˇ ve yoˬ.

32Suh peuˬ ve chaw kʼaw‸ te‸ tu la ve awˬ lawn yawˇ hui gʼa kaˇ htaˇ, chaw teˇ hpaˍ hpaˍ yawˇ hta‸ hkʼa mvuhˇ hkʼa na kʼoˆ leh gʼuiˬ ve yoˬ. Ya‸ hkʼaˇ, teˇ hpaˍ hpaˍ kʼoˆ ve, Nawˬ kʼoˆ laˇ ve awˬ lawn chi awˬ hkʼaw‸ nawˉ teˇ pawˆ ngaˬ hui na tuˬ sheˍ teh‸ kʼoˆ ve yoˬ. 33Hkʼe te leh, Pawˇlu‸ yawˇ hui hpawnˬ da‸ kuiˬ awˬ hkʼaw lo tawˆ kʼai ve yoˬ. 34Chaw teˇ hpaˍ hpaˍ yonˍ la leh Pawˇlu‸ hta‸ pawnˇ da‸ ve yoˬ. Chaw oˇ ve teˇ hpaˍ awˬ hkʼaw lo, Daˍyawˉnaˍsiˆ meh ve Aˍreˍ hkʼaw jawˇmawˇ teˇ gʼaˇ, Daˍmaˍriˆ meh ve yaˇ miˇ teˇ gʼaˇ leh, awˬ kaˍ awˬ nu chaw teˇ hpaˍ htawˇ cawˬ ve yoˬ.

Currently Selected:

Tcuh yaˇ li‸ 17: LHBE

Highlight

Copy

Compare