Tcuh yaˇ li‸ 14

Pawˇlu‸ leh Baˍnaˍbaˆ Iˇkawˇniˆ venˇ hkʼaw chehˇ htaˇ awˬ lawn

1Yawˇ huiˉ maˬ Iˇkawˇniˆ venˇ lo gaˬ leh, Yuˇda‸ ve bon yehˬ awˬ hkʼaw lo teˇ geh lo‸-e ve yoˬ. Oˇ kaˬ lo yawˇ huiˉ maˬ hkʼa deh‸ maˍ piˇ ve pa taw, Yuˇda‸ chaw leh Heˍlaˍsaˆ chaw hui maˇ maˇ yonˍ la ve yoˬ. 2Ya‸ hkʼaˇ, maˇ yonˍ ve Yuˇda‸ chaw teˇ hpaˍ lehˬ, buiˇshaˆaˉnaˆ chaw hui hta‸ ca juˆ piˇ leh, awˬ viˉ awˬ nyi oˇ ve teˇ hpaˍ hta‸ canˇ ve nyi ma cawˬ la tuˬ te ve yoˬ. 3Hkʼe te leh, oˇ kaˬ lo yawˇ huiˉ maˬ maw chaweh chehˇ leh, Jawˇmawˇ Yeˍsuˆ awˬ hkʼaw lo nyi ma ha‸ hanˉ te leh maˍ piˇ ve yoˬ. Jawˇmawˇ Yeˍsuˆ htawˇ, yawˇ huiˉ maˬ hta‸ cuˇ leh anˇ tuˬ leh awˬ heˆ teˇ hpaˍ te ve awˬ hkʼaw lo, yawˇ ve awˬ bon awˬ shinˉ awˬ lawn maˍ ve tawˇ hkawˇ awˬ pon shaˉ hkiˆ hkanˍ ve yoˬ. 4Ya‸ hkʼaˇ, venˇ yaˇ teˇ hpaˍ lehˬ, nyiˇ moˍ hpeh‸ sheˬ leh, teˇ hpaˍ hpaˍ Yuˇda‸ chaw hui hpawˇ chehˇ leh, teˇ hpaˍ hpaˍ tcuh yaˇ hui hpawˇ chehˇ ve yoˬ.

5Buiˇ shaˆ aˉ naˆ chaw hui leh Yuˇda‸ chaw teˇ hpaˍ lehˬ, yawˇ hui ve awˬ hoˉ awˬ naˬ teˇ hpaˍ geh teˇ geh Pawˇlu‸ leh Baˍnaˍbaˆ hta‸ hkʼa mvuhˇ hkʼa na te leh haˉ pui baˬ-a teh‸ te ve hta‸ yawˇ huiˉ maˬ gʼa shiˍ htaˇ, 6Luˇkawˇniˆ mvuhˇmiˬ awˬ hkʼaw lo cawˬ ve Luˇtaˍraˆ venˇ, Deˍbeˍ venˇ leh, awˬ paˇ awˬ kui ve mvuhˇmiˬ lo hpaw-e ve yoˬ. 7Mvuhˇmiˬ oˇ ve awˬ hkʼaw lo htawˇ, yawˇ huiˉ maˬ ha lehˬ ve bon hkawˇ maˍ piˇ ve yoˬ.

Luˇtaˍraˆ venˇ lo shu Pawˇlu‸ hta‸ haˉ pui baˬ ve

8Luˇtaˍraˆ venˇ awˬ hkʼaw lo hkui luˬ paˍ teˇ gʼaˇ mui chehˇ ve yoˬ. Yawˇ paw la htaˇ ka‸ hkui luˬ paˍ hpeh‸ leh, ya‸ kaw teˇ pawˆ ka‸ maˇ toˇ jaw. 9Yawˇ lehˬ Pawˇlu‸ maˍ piˇ ve hta‸ na chehˇ ve yoˬ. Pawˇlu‸ yawˇ hta‸ hkʼa deh‸ nyi leh, na-e la tuˬ yawˇ yonˍ ve nyi ma cawˬ ve hta‸ gʼa shiˍ htaˇ, 10awˬ hkawˇ bvuhˬ chaweh kuˬ leh, Hteˇ lehˍ tu huˉ-oˆ teh‸, yawˇ hta‸ kʼoˆ piˇ ve yoˬ. Yawˇ pawˆ tu leh, ya‸ kʼaw juˇ kʼai ve yoˬ. 11Pawˇlu‸ chi hkʼe te ve hta‸ chaw awˬ moˍ lonˉ gʼa mawˬ htaˇ, yawˇ hui lehˬ Luˇkawˇniˆ hkawˇ yaw leh, Gʼuiˬsha teˇ hpaˍ lehˬ chaw yaˇ hkʼe te leh ngaˬ hui geh ya‸ la peuˬ teh‸, awˬ hkawˇ bvuhˬ chaweh kuˬ ve yoˬ. 12Yawˇ hui lehˬ, Baˍnaˍbaˆ hta‸ Cuˇsaˆ teh‸ meh piˇ ve yoˬ. Pawˇlu‸ lehˬ leuˉ leh tawˇ yaw ve pa taw, yawˇ hta‸ Heˍmeˍ teh‸ meh piˇ ve yoˬ. 13Venˇ awˬ baˬ hpawˇ lo Cuˇsaˆ ve bon yehˬ teˇ yehˬ cawˬ ve yoˬ. Bon yehˬ oˇ ve hta‸ caˉ da‸ ve paw hkuˇ teˇ gʼaˇ lehˬ, nuˇ teˇ hpaˍ leh suhˉ veˆ hkʼaw teˇ hpaˍ hta‸ venˇ taˍ meu‸ hpe‸ lo yuˬ laˬ leh, chaw awˬ moˍ lonˉ geh teˇ geh yawˇ huiˉ maˬ hta‸ tanˇ piˇ tuˬ dawˇ taˍ ve yoˬ.

14Ya‸ hkʼaˇ, tcuh yaˇ Baˍnaˍbaˆ leh Pawˇlu‸ awˬ lawn oˇ ve hta‸ gʼa kaˇ htaˇ, yawˇ huiˉ maˬ ve veu‸ kʼaˇ hta‸ tzuh‸ suhˍ leh, chaw awˬ moˍ lonˉ awˬ hkʼaw lo gʼuiˇ lo‸-e leh kʼoˆ ve, 15Awˬ chawˇ teˇ hpaˍ-oˬ, aˬ hto‸ ma pa taw chi hkʼe te ve le. Ngaˬ huiˉ maˬ htawˇ nawˬ hui hkʼa shuˍ shuˍ chaw yaˇ hpeh‸ ve yoˬ. Awˬ bon maˇ cawˬ ve chi teˇ hpaˍ hta‸ baˬ taˉ leh, te‸ chehˇ ve Gʼuiˬsha geh kʼaw‸ hpfuhˆ kʼaw‸ la tuˬ, ngaˬ huiˉ maˬ nawˬ hui hta‸ ha lehˬ ve bon hkawˇ maˍ laˇ ve yoˬ. Te‸ chehˇ ve Gʼuiˬsha lehˬ mvuhˇ naw ma, miˬguiˬ, laˇ tsuhˇ gʼuiˬ leh oˇ ve teˇ hpaˍ awˬ hkʼaw hkʼa cawˬ ve teˇ hpaˍ hta‸ yawˇ hpanˍ taˍ ve yoˬ. 16Gʼuiˬsha lehˬ, ponˬ laˬ ve awˬ co-e teˇ hpaˍ awˬ hkʼaw lo chaw ceuˬ hkʼa peu-eˬ ve hta‸ a shu yawˇ ve a loˍ awˬ hkʼaˇ suh te kʼai tuˬ hpehˇ piˇ taˍ ve yoˬ. 17Ya‸ hkʼaˇ, yawˇ awˬ lawn shaˉ hkiˆ hkanˍ ve awˬ ceuˬ teˇ hpaˍ hta‸ yawˇ maˇ teh taˍ ve maˇ heˆ. Awˬ lawn kʼo, yawˇ da‸ ve hta‸ te leh, mvuhˇ naw ma lo mvuhˇ yeˬ laˬ piˇ ve, awˬ shiˍ awˬ nu naw‸ la tuˬ awˬ tcuhˉ awˬ yanˇ piˇ ve, caˇ tuˬ dawˬ tuˬ hkʼa bvuhˆ caˍ piˇ leh, ha lehˬ tuˬ nyi hkʼaˇ suh htaˇ hkʼa gaˬ yawˇ piˇ ve yoˬ teh‸, yawˇ huiˉ maˬ gʼaˇ hte‸ kuˬ ve yoˬ. 18Chi hkʼe kʼoˆ ve htawˇ, chaw awˬ moˍ lonˉ yawˇ huiˉ maˬ hta‸ maˇ gʼa tanˇ laˇ tuˬ, aˬ laˬ hkʼe tawˍ taˍ maˇ gʼa ve yoˬ.

19Oˇ ve hkʼaw‸ nawˉ, Anˍtiˆawˍ venˇ leh Iˇkawˇniˆ venˇ lo chehˇ ve Yuˇda‸ chaw teˇ hpaˍ laˬ leh, chaw awˬ moˍ lonˉ hta‸ beˬ gʼa peuˬ hkʼaw‸ nawˉ, yawˇ hui Pawˇlu‸ hta‸ haˉ pui baˬ ve yoˬ. Yawˇ suh peuˬ teh‸ dawˇ leh, yawˇ hui yawˇ hta‸ venˇ awˬ baˬ lo gʼawˬ baˬ ve yoˬ. 20Ya‸ hkʼaˇ, awˬ la‸ gʼawˇ teˇ hpaˍ yawˇ hta‸ hkʼa caw zuhˇ chehˇ htaˇ, yawˇ tu leh venˇ hkʼaw kʼaw‸ lo‸-e ve yoˬ. Awˬ hkʼaw‸ nawˉ teˇ nyi yawˇ Baˍnaˍbaˆ geh teˇ geh Deˍbeˍ venˇ lo kʼai ve yoˬ.

21Venˇ oˇ ve awˬ hkʼaw lo ha lehˬ ve bon hkawˇ maˍ piˇ leh, chaw maˇ maˇ hta‸ awˬ la‸ gʼawˇ hpeh‸ la piˇ peuˬ hkʼaw‸ nawˉ, yawˇ huiˉ maˬ lehˬ Luˇtaˍraˆ venˇ, Iˇkawˇniˆ venˇ leh Anˍtiˆawˍ venˇ lo kʼaw‸ kʼo‸-e ve yoˬ. 22Awˬ la‸ gʼawˇ teˇ hpaˍ nyi ma yeˬ la leh, yonˍ ve awˬ hkʼaw lo yeˬ chehˇ tuˬ, yawˇ hui hta‸ awˬ gʼaˇ piˇ ve yoˬ. Ngaˬ hui lehˬ tu‸ ve hkanˍ ve maˇ maˇ hta‸ hkanˍ ve hkʼaw lo Gʼuiˬsha ve mvuhˇmiˬ hkʼaw gʼa lo‸-e ve yoˬ teh‸ yawˇ hui hta‸ maˍ piˇ ve yoˬ. 23Yawˇ hui caˇ tuˬ ce leh bon lawˬ ve awˬ hkʼaw lo, Hkri‸ yaˇ awˬ moˍ teˇ moˍ le le awˬ pon awˬ hoˉ chaw mawˇ teˇ hpaˍ hta‸ leuˆ yuˬ leh, yawˇ hui yonˍ chehˇ ve Jawˇ mawˇ Gʼuiˬsha ve la‸ sheh awˬ hkʼaw lo chiˇ a‸ piˇ ve yoˬ.

Suˇriˆ mvuhˇmiˬ Anˍtiˆawˍ venˇ lo kʼaw‸ kʼo‸-e ve

24Peuˬ leh yawˇ huiˉ maˬ Piˇsiˇdiˆ mvuhˇmiˬ lo hpanˍ kʼai leh, Paˍpuˇliˆ mvuhˇmiˬ lo gaˬ ve yoˬ. 25Peˍraˍgeˍ venˇ awˬ hkʼaw lo bon hkawˇ maˍ piˇ peuˬ hkʼaw‸ nawˉ, yawˇ huiˉ maˬ Aˍtaˍliˆ venˇ lo kʼai ve yoˬ. 26Oˇ kaˬ lo haw lo‸ kʼoˍ ciˇ leh, Anˍtiˆawˍ venˇ lo kʼaw‸ kʼo‸-e ve yoˬ. Venˇ oˇ ve awˬ hkʼaw lo ponˬ laˬ htaˇ yawˇ huiˉ maˬ Gʼuiˬsha ve kanˉ te tuˬ awˬ pon awˬ bon piˇ shehˍ hpaˇ Gʼuiˬsha ve la‸ sheh awˬ hkʼaw lo shu yawˇ huiˉ maˬ hta‸ chiˇ a‸ piˇ taˍ ve yoˬ. Chi beu‸ kanˉ oˇ ve hta‸ yawˇ huiˉ maˬ te biˇ peuˬ.

27Yawˇ huiˉ maˬ gaˬ la htaˇ, Hkri‸ yaˇ awˬ moˍ hta‸ kuˬ hpawnˬ leh, Gʼuiˬsha yawˇ huiˉ maˬ hta‸ cuˇ leh hkʼa te ve awˬ lawn maˇ kʼoˆ, buiˇshaˆaˉnaˆ chaw hui yonˍ hpeh‸ tuˬ, Gʼuiˬsha yehˬ miˉ hpaw piˇ ve awˬ lawn maˇ kʼoˆ, yawˇ hui hta‸ kʼaoˍ maˍ piˇ ve yoˬ. 28Oˇ kaˬ lo yawˇ huiˉ maˬ awˬ la‸ gʼawˇ hui geh a ciˉ maw chaweh chehˇ ve yoˬ.

Currently Selected:

Tcuh yaˇ li‸ 14: LHBE

Highlight

Copy

Compare