Tcuh yaˇ li‸ 13

Baˍnaˍbaˆ leh Sawˉlu‸ awˉ lawˉ teˇ pawˆ bon ca maˍ ve

1Anˍtiˆawˍ Hkri‸ yaˇ awˬ moˍ awˬ hkʼaw lo, bon maˍ paˍ hui leh maˍ piˇ shehˍ hpaˇ hui cawˬ ve yoˬ. Chaw chi teˇ hpaˍ lehˬ, Baˍnaˍbaˆ, Niˇgaˍ teh‸ kʼoˆ ve Suˉmonˍ, Kuˇreˍneˍ mvuhˇmiˬ yaˇ Luˇkiˆ, hkunˉ hawˉ hkanˇ Heˍroˆ geh teˇ geh uiˍ la ve Maˍneˍ leh Sawˉlu‸ hui yoˬ. 2Yawˇ hui Jawˇmawˇ Gʼuiˬsha hta‸ oˉ kʼoˍ pui leh caˇ tuˬ ce chehˇ htaˇ, da‸ ve kehˬ ve Awˬ ha hpu kʼoˆ ve, Ngaˬ te tcuh tuˬ ve kanˉ hta‸ Baˍnaˍbaˆ leh Sawˉlu‸ te tuˬ, yawˇ huiˉ maˬ hta‸ fuiˍ teh taˍ-o‸ teh‸ kʼoˆ piˇ ve yoˬ.

3Oˇ htaˇ yawˇ hui caˇ tuˬ ce leh bon lawˬ peuˬ hkʼaw‸ nawˉ, yawˇ huiˉ maˬ awˬ hkʼoˆ lo la‸ sheh taˍ leh hpehˇ kʼai ve yoˬ.

Kuˇpaˍruˆ conˇ lo tcuh yaˇ hui bon maˍ ve

4Hkʼe te leh, da‸ ve kehˬ ve Awˬ ha hpu yawˇ huiˉ maˬ hta‸ kʼai tcuh ve hkʼe, Seˍluˍkiˆ venˇ lo ya‸-e leh, Kuˇpaˍruˆ conˇ lo haw lo‸ kʼoˍ ciˇ kʼai ve yoˬ. 5Saˍlaˍmiˆ venˇ lo yawˇ huiˉ maˬ gaˬ htaˇ, Yuˇda‸ chaw hui ve bon yehˬ teˇ hpaˍ awˬ hkʼaw lo Gʼuiˬsha ve bon hkawˇ maˍ piˇ ve yoˬ. Yoˇhanˬ htawˇ yawˇ huiˉ maˬ hta‸ ga piˇ ve yoˬ.

6Yawˇ hui conˇ oˇ ve awˬ hkʼaw lo teˇ kaˬ peuˬ teˇ kaˬ kʼai leh, Paˍhpuˆ venˇ lo gaˬ htaˇ, Baˍyeˍsuˆ meh ve Yuˇda‸ chaw teˇ gʼaˇ hta‸ gʼa hpuˇ da‸ ve yoˬ. Yawˇ lehˬ, faˍ te puiˉ ve maˇ heˆ heˆ ve tcuh kaˍ paˍ teˇ gʼaˇ hpeh‸ ve yoˬ. 7Chaw oˇ ve lehˬ, Seˍraˍgiˆ Pawˇlu‸ teh‸ kʼoˆ ve dawˇ shiˍ puiˉ ve mvuhˇ miˬ jawˇmawˇ teˇ gʼaˇ geh chehˇ ve yoˬ. Mvuhˇmiˬ jawˇmawˇ oˇ ve lehˬ, Gʼuiˬsha ve tawˇ hkawˇ hta‸ kaˇ gaˇ ve pa taw, Baˍnaˍbaˆ leh Sawˉlu‸ hta‸ kuˬ ve yoˬ. 8Eˇluˇmaˆ lehˬ, mvuhˇmiˬ jawˇmawˇ oˇ ve maˇ gʼa yonˍ tuˬ yawˇ huiˉ maˬ hta‸ tawˍ taˍ ve yoˬ. (Eˇluˇmaˆ kʼoˆ ve tcuhˉ kuiˬ lehˬ, faˍ te puiˉ paˍ teh‸ kʼoˆ ve yoˬ.) 9Oˇ htaˇ Pawˇlu‸ teh‸ kʼoˆ ve Sawˉlu‸ teˇ gʼaˇ lehˬ, da‸ ve kehˬ ve Awˬ ha hpu hkʼa biˇ cawˬ leh, faˍ te puiˉ paˍ hta‸ hkʼa deh‸ nyi leh kʼoˆ piˇ ve, 10Neˇhaiˬ ve yaˇ-oˬ, nawˬ lehˬ heˍ ve leh haiˬ ve awˬ ceuˬ hkʼa biˇ cawˬ ve yoˬ. Hteˇ ve cawˇ ve hkʼa peu-eˬ ve canˇ paˍ teˇ gʼaˇ htawˇ nawˬ hpeh‸ ve yoˬ. Jawˇmawˇ Gʼuiˬsha ve hteˇ ve ya‸ kʼaw teˇ hpaˍ hta‸ kʼaw‸ lehˍ hpeh‸ kʼai tuˬ, nawˬ maˇ jehˇ jehˇ leh te tuˬ laˇ. 11Chi beu‸ Jawˇmawˇ Gʼuiˬsha ve kanˇ paˆ nawˬ awˬ hkʼoˆ gaˬ la leh, nawˬ mehˆ cuˉ leh teˇ tcuhˉ teˇ jaw mvuhˇ nyi hta‸ maˇ gʼa mawˬ teh‸ kʼoˆ piˇ ve yoˬ.

Teˇ cawˬ haˉ moˬ hkʼa shuˍ shuˍ naˆ ho‸ ve yawˇ awˬ hkʼoˆ lo gaˬ la leh, yawˇ ve la‸ sheh hta‸ sheh kʼai tuˬ, yawˇ shu hta‸ ca chehˇ ve yoˬ. 12Chi hkʼe hpeh‸ la ve hta‸ mvuhˇmiˬ jawˇmawˇ gʼa mawˬ htaˇ, yawˇ yonˍ ve yoˬ. Awˬ lawn kʼo, Jawˇmawˇ Gʼuiˬ sha ve maˍ piˇ ve tawˇ hkawˇ hta‸ yawˇ anˇ jaˇ ve yoˬ.

Piˇsiˇdiˆ mvuhˇmiˬ Anˍtiˆawˍ venˇ hkʼaw chehˇ htaˇ awˬ lawn

13Pawˇlu‸ leh yawˇ ve awˬ chawˇ teˇ hpaˍ lehˬ, Paˍhpuˆ venˇ lo tu leh, Paˍpuˇliˆ mvuhˇmiˬ Peˍraˍgeˍ venˇ lo haw lo‸ kʼoˍ ciˇ kʼai ve yoˬ. Oˇ kaˬ lo Yoˇhanˬ yawˇ huiˉ maˬ hta‸ hpaˆ da‸ leh, Yeˍruˆsaˍlehnˍ venˇ lo kʼaw‸ kʼo‸-e ve yoˬ. 14Oˇ htaˇ, yawˇ huiˉ maˬ Peˍraˍgeˍ venˇ lo kʼaw‸ tu leh, Piˇsiˇdiˆ mvuhˇmiˬ Anˍtiˆawˍ venˇ lo gaˬ ve yoˬ. Shinˉ nyi htaˇ yawˇ huiˉ maˬ bon yehˬ taˆ-e leh mui ve yoˬ. 15Awˬliˇtawˇhkawˇ li‸ leh tcuh kaˍ paˍ hui ve li‸ hta‸ shu gʼaw peuˬ hkʼaw‸ nawˉ, bon yehˬ awˬ hoˉ teˇ hpaˍ lehˬ, yawˇ huiˉ maˬ geh chaw kʼai tcuh leh, Awˬ viˉ awˬ nyi teˇ hpaˍ-oˬ, chaw chi ma ve hta‸ awˬ gʼaˇ piˇ tuˬ ve tawˇ hkawˇ cawˬ ve kʼo, kʼoˆ piˇ-oˆ teh‸ kʼoˆ piˇ ve yoˬ. 16Oˇ htaˇ Pawˇlu‸ tu leh, la‸ sheh te maˍ leh kʼoˆ ve,

Iˉsaˍreˍlaˆ chaw hui leh Gʼuiˬsha hta‸ kawˆ ve chaw teˇ hpaˍ-oˬ, na sheˍ. 17Iˉsaˍreˍlaˆ chaw ceuˬ ve Gʼuiˬsha lehˬ, ngaˬ hui ve awˬ puˍ lonˉ teˇ hpaˍ hta‸ leuˆ yuˬ leh, yawˇ hui Eˇjiˇtu‸ mvuhˇ miˬ awˬ hkʼaw lo chehˇ htaˇ, yawˇ hui hta‸ taˍ uiˍ taˍ mvuh piˇ ve yoˬ. Awˬ hkʼaw‸ nawˉ yawˇ la‸ sheh chiˇ leh yawˇ hui hta‸ sheh tawˆ-e ve yoˬ. 18Heh puiˉ hkʼaw lo aˬ laˬ hkʼe awˇ chi hkʼaw‸ hkʼa gaˬ, yawˇ hui te ve awˬ liˇ awˬ hkʼaˇ teˇ hpaˍ hta‸ yawˇ yeunˇ hkanˍ ve yoˬ. 19Hkaˍnanˍ mvuhˇmiˬ awˬ hkʼaw lo chehˇ ve chaw suhˍ ceuˬ hta‸ Gʼuiˬsha te luˬ peuˬ hkʼaw‸ nawˉ, awˇ ha ngaˇ chi hkʼaw‸ hkʼe chaw oˇ ve teˇ hpaˍ ve mvuhˇmiˬ Iˉsaˍreˍlaˆ chaw hui hta‸ piˇ ve yoˬ.

20Oˇ ve hkʼaw‸ nawˉ, tcuh kaˍ paˍ Saˍmo-eˍlaˆ ve awˬ co-e hkʼa gaˬ, Gʼuiˬsha yawˇ hui hta‸ suhˉ jehˬ shehˍ hpaˇ hui piˇ ve yoˬ. 21Oˇ htaˇ, yawˇ hui hkunˉ hawˉ hkanˇ lawˬ leh, Beˍyaˍmenˍ ve awˬ ceuˬ awˬ hkʼaˇ Kiˇshaˆ ve yaˇ Sawˉlu‸ teˇ gʼaˇ awˇ chi hkʼaw‸ hkʼa gaˬ hkunˉ hawˉ hkanˇ te tuˬ Gʼuiˬsha yawˇ hui hta‸ piˇ ve yoˬ. 22Gʼuiˬsha yawˇ hta‸ yuˬ baˬ peuˬ hkʼaw‸ nawˉ, yawˇ hui ve hkunˉ hawˉ hkanˇ hpeh‸ la tuˬ Daˍviˆ hta‸ chiˇ taˆ-e ve yoˬ. Gʼuiˬsha Daˍviˆ awˬ lawn shaˉ hkiˆ hkanˍ leh kʼoˆ ve, Ngaˬ nyi ma cawˇ ve chaw, Yeˍsehˇ ve yaˇ Daˍviˆ hta‸ ngaˬ mawˬ peuˬ. Yawˇ lehˬ ngaˬ ve a loˍ hkʼa biˇ te tuˬ yoˬ teh‸ kʼoˆ ve yoˬ. #Chi 89:20 23Gʼuiˬsha ka ti‸ piˇ taˍ ve hkʼe, Daˍviˆ ve awˬ ceuˬ awˬ hkʼaˇ awˬ hkʼaw lo Iˉsaˍreˍlaˆ chaw hui awˬ pon Htaiˍ hkʼaw‸ shehˍ hpaˇ Yeˍsuˆ hta‸ yawˇ tawˆ la piˇ peuˬ. 24Yeˍsuˆ maˇ tawˆ la sheˍ awˬ gʼuˇ suhˍ, Yoˇhanˬ lehˬ venˇbaˆ dawˇ hpfuhˆ ve hta‸ caˉ da‸ ve baˆtiˆsaˬ awˬ lawn Iˉsaˍreˍlaˆ chaw hkʼa peu-eˬ hta‸ maˍ piˇ ve yoˬ. 25Yoˇhanˬ lehˬ, yawˇ ve kanˉ te peuˬ paˇ neˇ htaˇ yawˇ kʼoˆ ve, Ngaˬ a shu hpeh‸ ve teh‸ nawˬ hui dawˇ le. Ngaˬ lehˬ chaw oˇ ve teˇ gʼaˇ maˇ heˆ. Ya‸ hkʼaˇ, chaw oˇ ve teˇ gʼaˇ lehˬ, ngaˬ awˬ hkʼaw‸ nawˉ laˬ chehˇ ve yoˬ. Yawˇ ve hkuiˉ nuˇ caˆ hta‸ hpui tuˬ ve ceh ka‸ ngaˬ maˇ keunˍ teh‸ yawˇ kʼoˆ ve yoˬ.

26Aˍbraˍhanˍ awˬ ceuˬ awˬ hkʼaˇ awˬ yaˇ awˬ duˬ hui leh, nawˬ hui awˬ hkʼaw lo Gʼuiˬsha hta‸ kawˆ ve awˬ viˉ awˬ nyi teˇ hpaˍ-oˬ, htaiˍ hkʼaw‸ ve awˬ lawn chi ngaˬ hui gʼa kaˇ peuˬ. 27Awˬ lawn kʼo, Yeˍruˆsaˍlehnˍ venˇ awˬ hkʼaw lo chehˇ ve chaw leh yawˇ hui ve jawˇmawˇ teˇ hpaˍ lehˬ, yawˇ hta‸ maˇ kʼoˆ, teˇ shinˉ nyi le le gʼaw chehˇ ve tcuh kaˍ paˍ hui ve li‸ hta‸ htawˇ maˇ kʼoˆ, maˇ shiˍ ve pa taw, yawˇ hta‸ suhˉ taˆ ve awˬ hkʼaw lo tawˇ hkawˇ oˇ ve teˇ hpaˍ hta‸ te biˇ la ve yoˬ. 28Yawˇ awˬ hkʼaw lo suh keunˍ ve venˇbaˆ hta‸ yawˇ hui maˇ mawˬ htawˇ, yawˇ hta‸ tiˇ pehˍ tuˬ jawˇmawˇ Piˉla‸ geh lawˬ ve yoˬ. 29Yawˇ awˬ lawn hkʼa bvuh‸ taˍ ve teˇ hpaˍ hta‸ yawˇ hui te biˇ peuˬ hkʼaw‸ nawˉ, yawˇ hta‸ suhˆ hkuiˉ daw hkʼoˆ yuˬ ya‸-e leh, tuˍ hpfuh hkʼaw keu taˍ ve yoˬ. 30Ya‸ hkʼaˇ, Gʼuiˬsha lehˬ yawˇ hta‸ suh kuiˬ lo kʼaw‸ te‸ tu la piˇ ve yoˬ. 31Gaˍliˍlehˇ mvuhˇmiˬ te leh Yeˍruˆsaˍlehnˍ venˇ hkʼa gaˬ yawˇ geh kʼai jaw ve chaw teˇ hpaˍ hta‸ awˬ nyi awˬ haˉ a ciˉ maw chaweh yawˇ awˬ to maw piˇ ve yoˬ. Chaw oˇ ve teˇ hpaˍ lehˬ, chi beu‸ shu mehˆ gʼuˇ suhˍ shaˉ hkiˆ hkanˍ shehˍ hpaˇ hpeh‸ ve yoˬ. 32Awˬ puˍ lonˉ teˇ hpaˍ hta‸ Gʼuiˬsha ka ti‸ piˇ taˍ ve hkʼe, ha lehˬ ve bon hkawˇ chi ngaˬ huiˉ maˬ nawˬ hui hta‸ maˍ laˇ ve yoˬ. 33Gʼuiˬsha Yeˍsuˆ hta‸ kʼaw‸ te‸ tu la piˇ ve teˇ yanˇ, yawˇ hui hta‸ ka ti‸ piˇ taˍ ve hkʼe, yawˇ hui ve yaˇ teˇ hpaˍ hpeh‸ ve ngaˬ hui hta‸ yawˇ te biˇ la piˇ ve yoˬ. Chiˇ mvuh ve li‸ nyiˇ maˬ teˇ maˬ awˬ hkʼaw lo bvuh‸ taˍ ve hkʼe,

Nawˬ lehˬ ngaˬ ve Yaˇ hpu hpeh‸ ve yoˬ.

Ya‸ nyi ngaˬ nawˬ ve Awˬ pa hpeh‸ la peuˬ, teh bvuh‸ taˍ ve yoˬ. #Chi 2:7

34Chi hkʼoˆ ka‸, yawˇ suh kuiˬ lo kʼaw‸ te‸ tu la leh, kuiˇ ve luˬ ve awˬ hkʼaw lo teˇ pawˆ ka‸ maˇ gʼa kʼaw‸ gaˬ tuˬ ve awˬ lawn Gʼuiˬsha chi hkʼe kʼoˆ ve,

Daˍviˆ gʼa taˍ ve, da‸ kehˬ leh yeˬ ve awˬ bon teˇ hpaˍ,

ngaˬ nawˬ hui hta‸ piˇ tuˬ yoˬ teh‸ kʼoˆ ve yoˬ. #Isy 55:3

35Chi hta‸ pa taw, Chiˇ mvuh ve li‸ awˬ hkʼaw lo awˬ kaˍ awˬ nu teˇ kaˬ bvuh‸ taˍ sheˍ ve,

Nawˬ ve da‸ kehˬ ve Chaw lehˬ, kuiˇ ve luˬ ve hta‸ hpuˇ tuˬ nawˬ hkanˍ tuˬ ve maˇ heˆ teh‸ yawˇ kʼoˇ taˍ ve yoˬ. #Chi 16:10

36Daˍviˆ lehˬ, yawˇ ve teˇ co-e awˬ hkʼaw lo Gʼuiˬsha a loˍ cawˇ ve hkʼe te peuˬ hkʼaw‸ nawˉ suh ve yoˬ. Yawˇ ve awˬ puˍ teˇ hpaˍ geh shu yawˇ hta‸ taˍ leh, yawˇ kuiˇ kʼai luˬ kʼai ve yoˬ. 37Ya‸ hkʼaˇ, Gʼuiˬsha kʼaw‸ te‸ tu la piˇ ve teˇ gʼaˇ lehˬ, kuiˇ ve luˬ ve hta‸ maˇ gʼa hpuˇ. 38Chi hta‸ pa taw, awˬ viˉ awˬ nyi teˇ hpaˍ-oˬ, chi hta‸ shiˍ-o‸. Chaw chi teˇ gʼaˇ hta‸ pa taw venˇbaˆ hpehˇ hkʼa gʼa ve awˬ lawn nawˬ hui hta‸ kʼaoˍ maˍ laˇ ve yoˬ. 39Yawˇ hta‸ hkʼa yonˍ ve chaw teˇ gʼaˇ le le lehˬ, Moˉseˍ ve awˬliˇtawˇhkawˇ ponˬ piˇ maˇ gʼa ve awˬ ceuˬ hkʼa peu-eˬ hta‸ gʼa ponˬ ve yoˬ. 40Gʼuiˬsha ve tcuh kaˍ paˍ hui kʼoˆ ve,

Maˇ shawˍ maˇ caˆ kʼoˆ ve chaw hui-oˬ, nyi leh anˇ leh luˬ kʼai-o.

Awˬ lawn kʼo, nawˬ hui ve awˬ nyi awˬ haˉ teˇ hpaˍ awˬ hkʼaw lo ngaˬ kanˉ teˇ maˬ te ve yoˬ.

Awˬ lawn chi chaw teˇ gʼaˇ gʼaˇ nawˬ hui hta‸

kʼaoˍ maˍ laˇ ve htawˇ, nawˬ hui yonˍ tuˬ ve maˇ heˆ,

teh‸ kʼoˆ taˍ ve yoˬ. #Hbk 1:5 41Hkʼe te leh, yawˇ hui kʼoˆ ve hkʼe nawˬ hui awˬ hkʼoˆ maˇ gʼa gaˬ la tuˬ shaˍ ti‸ taˍ-o‸ teh‸, Pawˇlu‸ kʼoˆ piˇ ve yoˬ.

42Yawˇ huiˉ maˬ bon yehˬ hkʼaw tawˆ kʼai chehˇ htaˇ, awˬ lawn chi teˇ hpaˍ awˬ hkʼaw‸ nawˉ teˇ shinˉ htawˇ kʼaw‸ hto laˇ tuˬ, chaw chi ma ve yawˇ huiˉ maˬ hta‸ lawˬ ve yoˬ. 43Bon yehˬ ya‸ ve teˇ yanˇ, Yuˇda‸ chaw hui leh Gʼuiˬsha hta‸ oˉ kʼoˍ pui ve Yuˇda‸ awˬ liˇ yuˬ ve chaw maˇ maˇ Pawˇlu‸ leh Baˍnaˍbaˆ awˬ hkʼaˇ suh kʼai ve yoˬ. Gʼuiˬsha ve awˬ bon awˬ hkʼaw lo chehˇ yeˬ tuˬ, yawˇ huiˉ maˬ lehˬ yawˇ hui hta‸ maˍ piˇ leh awˬ gʼaˇ piˇ ve yoˬ.

44Awˬ hkʼaw‸ nawˉ teˇ shinˉ, shinˉ nyi htaˇ, Gʼuiˬsha ve tawˇ hkawˇ hta‸ na tuˬ aˬ laˬ hkʼe venˇ yaˇ hkʼa peu-eˬ hpawnˬ la ve yoˬ. 45Ya‸ hkʼaˇ, Yuˇda‸ chaw hui lehˬ chaw awˬ moˍ lonˉ teˇ hpaˍ hta‸ gʼa mawˬ htaˇ, hkawehˉ ve nyi ma hkʼa biˇ cawˬ ve yoˬ. Pawˇlu‸ kʼoˆ ve hta‸ yawˇ hui gʼawˬ hkʼaˆ leh, yawˇ hta‸ maˇ shawˍ maˇ caˆ kʼoˆ piˇ ve yoˬ. 46Pawˇlu‸ leh Baˍnaˍbaˆ nyi ma ha‸ hanˉ te leh kʼoˆ ve, Gʼuiˬsha ve tawˇ hkawˇ nawˬ hui hta‸ awˉ lawˉ gʼa hto piˇ ve yoˬ. Ya‸ hkʼaˇ, nawˬ hui lehˬ Gʼuiˬsha ve tawˇ hkawˇ hta‸ chiˇ baˬ taˉ leh co ti‸ ha ti‸ hta‸ gʼa maˇ keunˍ teh‸ nawˬ hui hkʼaˇ nawˬ hui shawˍ taˍ ve pa taw, ngaˬ huiˉ maˬ buiˇ shaˆ aˉ naˆ chaw hui geh kʼai tuˬ yoˬ. 47Awˬ lawn kʼo,

Miˬguiˬ awˬ leh hkʼa gaˬ nawˬ hta‸ pa taw htaiˍ hkʼaw‸ ve hta‸ gʼa tuˬ,

buiˇshaˆaˉnaˆ chaw hui awˬ pon awˬ gʼeuˆ hpeh‸ tuˬ, ngaˬ nawˬ hta‸ teh taˍ ve yoˬ teh‸ Jawˇmawˇ Gʼuiˬsha ngaˬ huiˉ maˬ hta‸ chi hkʼe tawˇ piˇ taˍ ve yoˬ teh‸, Pawˇlu‸ kʼoˆ piˇ ve yoˬ. #Isy 49:6

48Buiˇ shaˆ aˉ naˆ chaw hui tawˇ hkawˇ chi hta‸ gʼa kaˇ htaˇ, ha lehˬ leh Gʼuiˬsha ve tawˇ hkawˇ hta‸ chiˇ uiˍ chiˇ mvuh ve yoˬ. Co ti‸ ha ti‸ hta‸ gʼa tuˬ awˬ pon hkʼa fuiˍ taˍ ve chaw hui lehˬ yonˍ la ve yoˬ.

49Hkʼe te leh Jawˇmawˇ Gʼuiˬsha ve tawˇ hkawˇ lehˬ, mvuhˇmiˬ oˇ ve awˬ hkʼaw teˇ kaˬ le le lo bvuhˬ kʼai ve yoˬ. 50Ya‸ hkʼaˇ, Yuˇda‸ chaw hui lehˬ, Gʼuiˬ sha hta‸ yawˆ yan ve awˬ me‸ awˬ hponˇ cawˬ ve yaˇ miˇ teˇ hpaˍ leh, venˇ oˇ ve awˬ hkʼaw lo chehˇ ve awˬ hoˉ awˬ naˬ teˇ hpaˍ hta‸ ca juˆ piˇ ve yoˬ. Pawˇlu‸ leh Baˍnaˍbaˆ hta‸ fawˉ mehˍ tuˬ yawˇ hui gʼaˇ hte‸ te leh, yawˇ huiˉ maˬ hta‸ mvuhˇmiˬ oˇ ve awˬ hkʼaw lo gʼa‸ kʼoˬ ve yoˬ. 51Yawˇ huiˉ maˬ lehˬ, chaw oˇ ve teˇ hpaˍ awˬ hkʼoˆ shaˉ hkiˆ hpeh‸ tuˬ, hkui taw kʼaw hawˉ ve je‸ meu-e hpi baˬ taˉ leh, Iˇkawˇniˆ venˇ lo kʼai ve yoˬ. 52Awˬ la‸ gʼawˇ teˇ hpaˍ lehˬ, ha lehˬ ve teˇ ceuˬ maˇ kʼoˆ, da‸ ve kehˬ ve Awˬ ha hpu maˇ kʼoˆ, hkʼa biˇ cawˬ ve yoˬ.

Currently Selected:

Tcuh yaˇ li‸ 13: LHBE

Highlight

Copy

Compare