Tcuh yaˇ li‸ 12

Jawˇmawˇ Heˍroˆ Yaˍkoˆ hta‸ tiˇ pehˍ leh, Peˍtruˆ hta‸ htawnˍ hkʼaw keu ve

1Awˬ yanˇ oˇ ve awˬ hkʼaw lo hkunˉ hawˉ hkanˇ Heˍroˆ lehˬ, Hkri‸ yaˇ awˬ moˍ awˬ hkʼaw lo chehˇ ve chaw teˇ hpaˍ hpaˍ hta‸ gʼaˇ hte‸ fawˉ mehˍ ve yoˬ. 2Yawˇ lehˬ Yoˇhanˬ ve awˬ viˉ paˍ Yaˍkoˆ hta‸ aˉ htaw chaw pehˍ ve yoˬ. 3Chi ve hta‸ Yuˇda‸ chaw hui nyi ma cawˇ ve hta‸ yawˇ gʼa mawˬ htaˇ, Peˍtruˆ hta‸ htawˇ hpeh yuˬ ve yoˬ. Awˬ yanˇ oˇ ve lehˬ, Hkaoˍmonˇ awˬ hkʼaw lo diˇ maˇ keu ve pawehˇ awˬ yanˇ hpeh‸ ve yoˬ. 4Peˍtruˆ hta‸ hpeh yuˬ peuˬ hkʼaw‸ nawˉ, htawnˍ hkʼaw keu leh, yawˇ hta‸ shaw tuˬ ve ma‸ yaˇ teˇ chi hkaw‸ gʼaˇ ve la‸ sheh hkʼaw lo chiˇ a‸ piˇ ve yoˬ. Paˍsaˍhkaˍ pawehˇ peuˬ hkʼaw‸ nawˉ heh‸, chaw chi ma ve mehˆ gʼuˇ suhˍ Peˍtruˆ hta‸ yuˬ tawˆ la tuˬ yawˇ dawˇ taˍ ve yoˬ. 5Hkʼe te leh, Peˍtruˆ htawnˍ hkʼaw lo gʼa chehˇ ve yoˬ. Ya‸ hkʼaˇ, Hkri‸ yaˇ awˬ moˍ lehˬ, yawˇ awˬ pon Gʼuiˬsha geh gʼaˇ hte‸ bon lawˬ chehˇ ve yoˬ.

Peˍtruˆ hta‸ htawnˍ hkʼaw lo ponˬ piˇ ve

6Jawˇmawˇ Heˍroˆ lehˬ, shawˉ pawˍ hkʼe yawˇ hta‸ yuˬ tawˆ-a teh‸ te ve teˇ haˉ htaˇ, Peˍtruˆ hta‸ sho caˆ nyiˇ caˆ hpeh taˍ ve yoˬ. Yawˇ lehˬ, ma‸ yaˇ nyiˇ gʼaˇ awˬ kaˍ lo zuh‸ muiˉ kʼa chehˇ leh, shaw shehˍ hpaˇ teˇ hpaˍ htawˇ htawnˍ yehˬ miˇ awˬ baˬ lo shaw chehˇ ve yoˬ. 7Oˇ htaˇ, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ tawˆ la leh, bawehˇ oˇ ve awˬ hkʼaw lo awˬ gʼeuˆ ba ve yoˬ. Yawˇ lehˬ, Peˍtruˆ ve nyi kuˇ hpawˇ hta‸ hta leh, Haˆ haˆ tu loˬ teh‸ kʼoˆ leh, yawˇ hta‸ nawˍ piˇ ve yoˬ. Oˇ htaˇ sho caˆ teˇ hpaˍ lehˬ, yawˇ ve la‸ sheh lo kʼehˆ ce ve yoˬ. 8Mvuhˇ naw ma tcuh yaˇ yawˇ hta‸ kʼoˆ piˇ ve, Haˍ pi tsuh‸ leh hkuiˉ nuˆ tcuhˉ-oˆ teh‸ kʼoˆ htaˇ, yawˇ htawˇ oˇ hkʼe te ve yoˬ. Peuˬ leh, Nawˬ ve aˉ po‸ lonˉ deh leh ngaˬ hkʼaˇ suh laˬ-o‸ teh‸, yawˇ hta‸ kʼaw‸ kʼoˆ piˇ ve yoˬ. 9Oˇ htaˇ yawˇ tawˆ-e leh mvuhˇ naw ma tcuh yaˇ hkʼaˇ suh kʼai ve yoˬ. Ya‸ hkʼaˇ, mvuhˇ naw ma tcuh yaˇ te ve kanˉ lehˬ, awˬ tehˬ awˬ na hpeh‸ ve hta‸ yawˇ maˇ shiˍ leh, zuh‸ maˆ mawˬ ve hkʼe awˬ ha awˬ hkʼaw lo mawˬ ve teh‸ yawˇ dawˇ ve yoˬ. 10Yawˇ huiˉ maˬ lehˬ, shaw shehˍ hpaˇ awˉ lawˉ teˇ moˍ leh nyiˇ moˍ teˇ moˍ hta‸ ka‸ ponˬ kʼai peuˬ hkʼaw‸ nawˉ, venˇ hkʼaw lo‸-e ve sho yehˬ miˉ lo gaˬ la ve yoˬ. Yawˇ huiˉ maˬ awˬ pon yehˬ miˉ oˇ ve yawˇ hkʼaˇ yawˇ hpaw baˬ leh, yawˇ huiˉ maˬ tawˆ kʼai ve yoˬ. Ya‸ kʼaw ceh teˇ maˬ lo gaˬ htaˇ, teˇ cawˬ haˉ mvuhˇ naw ma tcuh yaˇ yawˇ hta‸ hpaˆ da‸ ve yoˬ.

11Oˇ htaˇ, Peˍtruˆ nyi ma hkʼaw kʼaw‸ nawˇ la leh kʼoˆ ve, Jawˇ mawˬ Gʼuiˬsha lehˬ, yawˇ ve mvuhˇ naw ma tcuh yaˇ hta‸ peu laˇ leh, jawˇmawˇ Heˍroˆ ve la‸ sheh awˬ hkʼaw lo maˇ kʼoˇ Yuˇda‸ chaw hui hkʼa dawˇ law taˍ ve awˬ hkʼaw lo maˇ kʼoˆ, ngaˬ hta‸ ponˬ laˇ ve awˬ tehˬ awˬ na ngaˬ gʼa shiˍ ve yoˬ teh‸ kʼoˆ ve yoˬ.

12Awˬ lawn chi hta‸ yawˇ gʼa shiˍ peuˬ htaˇ, Yoˇhanˬ ve awˬ e Maˍriˆ ve aˉ hkʼaw lo yawˇ kʼai ve yoˬ. (Yoˇhanˬ ve awˬ meh awˬ suhˉ lehˬ Maˍkuˆ yoˬ.) Oˇ kaˬ lo chaw maˇ maˇ hpawnˬ da‸ leh bon lawˬ chehˇ ve yoˬ. 13Yehˬ gʼuˇ suhˍ ve yehˬ miˉ hta‸ Peˍtruˆ htawˆ htaˇ, Roˇdeˍ meh ve awˬ ceˬ ma ehˉ teˇ gʼaˇ laˬ na la ve yoˬ. 14Peˍtruˆ ve awˬ hkawˇ yoˬ teh‸ yawˇ gʼa shiˍ htaˇ, yawˇ ha lehˬ jaˇ ve pa taw yehˬ miˉ hta‸ maˇ hpaw piˇ sheˍ. Ya‸ hkʼaˇ, aˉ hkʼaw gʼuiˇ lo‸-e leh, Peˍtruˆ lehˬ yehˬ gʼuˇ suhˍ ve yehˬ miˉ awˬ paˇ lo huˉ chehˇ ve yoˬ teh‸ yawˇ hui hta‸ kʼoˆ piˇ ve yoˬ. 15Yawˇ hui lehˬ, Nawˬ chaw gʼuˇ yoˬ teh‸ yawˇ hta‸ kʼoˆ piˇ ve htawˇ yawˇ lehˬ, Awˬ tehˬ awˬ na yoˬ teh‸ gʼaˇ hte‸ kʼoˇ tcuhˉ taˍ ve yoˬ. Yawˇ hui kʼaw‸ kʼoˆ ve, Peˍtruˆ ve mvuhˇ naw ma tcuh yaˇ yoˬ teh‸ kʼoˆ piˇ ve yoˬ.

16Peˍtruˆ lehˬ, htawˆ chehˇ sheˍ ve yoˬ. Yawˇ hui yehˬ miˉ hta‸ ca hpaw htaˇ, yawˇ hta‸ gʼa mawˬ leh anˇ jaˇ ve yoˬ. 17Yawˇ lehˬ, yawˇ hui ta‸ iˉ chehˇ tuˬ la‸ sheh te maˍ piˇ peuˬ leh, Jawˇmawˇ Gʼuiˬsha yawˇ hta‸ htawnˍ awˬ hkʼaw lo hkʼaˬ hkʼe te yuˬ tawˆ laˇ ve awˬ lawn yawˇ hui hta‸ kʼaoˍ maˍ piˇ ve yoˬ. Yaˍkoˆ leh awˬ viˉ awˬ nyi teˇ hpaˍ hta‸ awˬ lawn chi ve kaˇ piˇ-oˆ teh‸ kʼoˆ peuˬ hkʼaw‸ nawˉ, yawˇ tawˆ kʼai leh awˬ kaˍ awˬ nu teˇ kaˬ lo kʼai ve yoˬ.

18Mvuhˇ htiˇ la ve teˇ yanˇ, Peˍtruˆ hkʼaˬ hkʼe kʼai ve awˬ lawn ma‸ yaˇ teˇ hpaˍ maˇ shiˍ ve pa taw, yawˇ hui duiˆ-ehˍ shaˇ-ehˍ gʼaˇ hte‸ te chehˇ ve yoˬ. 19Jawˇmawˇ Heˍroˆ lehˬ, Peˍtruˆ hta‸ ca nyi leh maˇ mawˬ htaˇ, shaw shehˍ hpaˇ teˇ hpaˍ hta‸ yawˇ hkʼa deh‸ na nyi peuˬ hkʼaw‸ nawˉ, yawˇ hui hta‸ tiˇ pehˍ tuˬ tawˇ piˇ ve yoˬ.

Oˇ htaˇ, jawˇmawˇ Heˍroˆ lehˬ Yuˇda‸ mvuhˇmiˬ lo tu leh Kehˉsaˍriˆ venˇ lo kʼai leh oˇ kaˬ lo chehˇ taˍ ve yoˬ.

Jawˇmawˇ Heˍroˆ suh ve

20Jawˇmawˇ Heˍroˆ lehˬ, Tuˇruˆ venˇ yaˇ leh Siˉdonˍ venˇ yaˇ hui hta‸ nyi ma zuhˆ jaˇ ve yoˬ. Hkʼe te leh, yawˇ hui lehˬ nyi ma teˇ shiˍ tiˉ te leh yawˇ geh laˬ ve yoˬ. Hkunˉ hawˉ hkanˇ zuh‸ kuiˬ bawehˇ hta‸ ha‸ shaˉ shehˍ hpaˇ Baˍlaˍtuˆ meh ve teˇ gʼaˇ hta‸ yawˇ hui jehˬ gʼa leh, hkunˉ hawˉ hkanˇ hta‸ kʼaw‸ cawˇ da‸ hui da‸ la tuˬ yawˇ hui lawˬ hkawˉ ve yoˬ. Awˬ lawn kʼo, yawˇ hui caˇ tuˬ dawˬ tuˬ awˬ pon, hkunˉ hawˉ hkanˇ ve mvuhˇ miˬ hta‸ gʼa cuˇ ve yoˬ.

21Jawˇmawˇ Heˍroˆ lehˬ, tinˍ taˍ ve awˬ nyi gaˬ la htaˇ, hkunˉ hawˉ hkanˇ ve veu‸ kʼaˇ hta‸ veu‸ deh leh, kʼaw jaw hkʼoˆ lo mui leh yawˇ hui hta‸ maˍ piˇ ve yoˬ. 22Oˇ htaˇ, chaw oˇ ve teˇ hpaˍ lehˬ, Awˬ hkawˇ chi ve lehˬ, chaw yaˇ ve awˬ hkawˇ maˇ heˆ, gʼuiˬsha ve awˬ hkawˇ hpeh‸ ve yoˬ teh‸, gʼaˇ hte‸ kuˬ ve yoˬ. 23Hkunˉ hawˉ hkanˇ Heˍroˆ lehˬ, Gʼuiˬsha hta‸ maˇ chiˇ uiˍ maˇ chiˇ mvuh ve pa taw, teˇ cawˬ haˉ Jawˇmawˇ Gʼuiˬsha ve mvuhˇ naw ma tcuh yaˇ yawˇ hta‸ ciˍ yanˍ piˇ ve yoˬ. Oˇ htaˇ, yawˇ awˬ to awˬ hkʼaw lo hawehˆ caˇ leh, yawˇ shaˉ cheˆ ve yoˬ.

24Ya‸ hkʼaˇ, Gʼuiˬsha ve tawˇ hkawˇ lehˬ, uiˍ la maˇ la ve yoˬ.

25Baˍnaˍbaˆ leh Sawˉlu‸ lehˬ, shu hta‸ ga piˇ ve kanˉ te peuˬ hkʼaw‸ nawˉ, awˬ meh awˬ suhˉ Maˍkuˆ teh‸ kʼoˆ ve Yoˇhanˬ meh ve teˇ gʼaˇ hta‸ shiˍ veu leh, Yeˍruˆsaˍlehnˍ venˇ lo tu leh, Anˍtiˆawˍ venˇ lo kʼaw‸ kʼo‸-e ve yoˬ.

Currently Selected:

Tcuh yaˇ li‸ 12: LHBE

Highlight

Copy

Compare