Tcuh yaˇ li‸ 1

Awˬ ha hpu peu laˇ tuˬ ve awˬ lawn

1Htawˇhpiˇluˆ-oˬ, Yeˍsuˆ awˬ hkuiˉ puiˍ tanˬ te tanˬ maˍ ve hta‸ te leh, yawˇ mvuhˇ naw ma lo taˆ kʼo‸-e ve teˇ nyi hkʼa gaˬ ve awˬ lawn teˇ hpaˍ, li‸ awˉ lawˉ teˇ kʼoˆ awˬ hkʼaw lo ngaˬ nawˬ hta‸ bvuh‸ laˇ peuˬ. 2Yawˇ maˇ taˆ kʼo‸-e sheˍ htaˇ, da‸ ve kehˬ ve Awˬ ha hpu hta‸ cuˇ leh, yawˇ leuˆ yuˬ taˍ ve tcuh yaˇ teˇ hpaˍ hta‸ tawˇ piˇ taˉ ve yoˬ. 3Yawˇ hkanˍ suh peuˬ hkʼaw‸ nawˉ, awˇ chi nyi awˬ hkʼaw lo tcuh yaˇ hui hta‸ yawˇ awˬ to maw piˇ leh, Gʼuiˬsha ve mvuhˇmiˬ awˬ lawn kʼaoˍ maˍ piˇ ve yoˬ. Yawˇ awˬ to te‸ chehˇ ve hta‸ yawˇ hui hkʼa deh‸ yonˍ hpeh‸ tuˬ, yawˇ shaˉ hkiˆ laiˉ ceuˬ te maˍ piˇ ve yoˬ. 4Teˇ pawˆ yawˇ hui hpawnˬ da‸ chehˇ htaˇ, yawˇ yawˇ hui hta‸ kʼoˆ piˇ ve, Yeˍruˆsaˍlehnˍ venˇ awˬ hkʼaw lo taˇ tawˆ kʼai sheˍ. Ngaˬ geh nawˬ hui gʼa kaˇ taˍ peuˬ ve, Awˬ pa ve ka ti‸ tawˇ hkawˇ biˇ la htaˇ hkʼa gaˬ law taˍ sheˍ. 5Yoˇhanˬ lehˬ, iˉ kaˆ awˬ hkʼaw lo baˆtiˆsaˬ piˇ ve yoˬ. Ya‸ hkʼaˇ, nawˬ hui lehˬ maˇ maw maw kʼo, da‸ ve kehˬ ve Awˬ ha hpu awˬ hkʼaw lo baˆtiˆsaˬ gʼa hkanˍ yuˬ tuˬ yoˬ teh‸, Yeˍsuˆ yawˇ hui hta‸ kʼoˆ piˇ ve yoˬ.

Yeˍsuˆ mvuhˇ naw ma lo taˆ kʼo‸-e ve

6Hkʼe te leh yawˇ hui hpawnˬ da‸ chehˇ htaˇ yawˇ hui kʼoˆ ve, Jawˇmawˇ-oˬ, chi beu‸ nawˬ lehˬ Iˉsaˍreˍlaˆ chaw ceuˬ hta‸ mvuhˇmiˬ kʼaw‸ hkʼaw‸ piˇ tuˬ laˇ teh‸, yawˇ hta‸ na nyi ve yoˬ.

7Yeˍsuˆ kʼaw‸ kʼoˆ piˇ ve, Awˬ pa yawˇ hkʼaˇ yawˇ dawˇ cheˆ taˍ ve awˬ yanˇ teˇ hpaˍ hta‸ nawˬ hui shiˍ tuˬ maˇ loˍ. 8Ya‸ hkʼaˇ, da‸ ve kehˬ ve Awˬ ha hpu nawˬ hui awˬ hkʼoˆ lo ya‸ la htaˇ, nawˬ hui kanˇ paˆ gʼa tuˬ yoˬ. Oˇ htaˇ Yeˍruˆsaˍlehnˍ venˇ hta‸ tanˬ leh Yuˇda‸ mvuhˇmiˬ, Saˍmaˍriˆ mvuhˇmiˬ leh mvuhˇ leh miˬ leh hkʼa gaˬ, nawˬ hui ngaˬ ve shaˉ hkiˆ hkanˍ shehˍ hpaˇ gʼa hpeh‸ tuˬ yoˬ teh‸, Yeˍsuˆ yawˇ hui hta‸ kʼoˆ piˇ ve yoˬ. 9Yawˇ chi hkʼe kʼoˆ peuˬ hkʼaw‸ nawˉ, tcuh yaˇ hui yawˇ hta‸ nyi chehˇ htaˇ, Gʼuiˬsha yawˇ hta‸ chiˇ taˆ-e leh, yawˇ hui mawˬ leh htaˇ hkʼa gaˬ, moˬ yawˇ hta‸ yuˬ taˆ-e ve yoˬ.

10Yeˍsuˆ taˆ-e chehˇ ve hta‸ tcuh yaˇ hui chiˇ nyi chehˇ htaˇ, hpu ve veu‸ kʼaˇ hta‸ veu‸ deh ve chaw nyiˇ gʼaˇ teˇ cawˬ haˉ tawˆ la leh, yawˇ hui awˬ paˇ lo huˉ chehˇ ve yoˬ. 11Yawˇ huiˉ maˬ kʼoˆ ve, Gaˍliˍlehˇ chaw teˇ hpaˍ-oˬ, aˬ hto‸ ma te nawˬ hui mvuhˇ naw ma lo chiˇ nyi chehˇ ve le. Nawˬ hui hta‸ hpaˆ da‸ leh mvuhˇ naw ma lo chiˇ taˆ-e ve Yeˍsuˆ chi teˇ gʼaˇ lehˬ, nawˬ hui mehˆ gʼuˇ suhˍ mvuhˇ naw ma lo taˆ kʼo‸-e ve hkʼa shuˍ shuˍ, teˇ pawˆ kʼaw‸ ya‸ la tuˬ yoˬ teh‸ kʼoˆ piˇ ve yoˬ.

Yuˇda‸ Iˉsaˍkaˍriˍoˆ ve awˬ tan te shehˍ hpaˇ hta‸ leuˆ yuˬ ve

12Oˇ htaˇ, tcuh yaˇ hui lehˬ Shaˍlonˍ meh ve hkʼaw lo tu leh, Yeˍruˆsaˍlehnˍ venˇ lo kʼaw‸ la ve yoˬ. Hkʼaw oˇ ve lehˬ, Yeˍruˆsaˍlehnˍ venˇ hta‸ maˇ vuiˇ da‸, shinˉ nyi teˇ nyi toˇ hpeh‸ ve ya‸ kʼaw hkʼe fui tiˉ cawˬ ve yoˬ. 13Yawˇ hui venˇ hkʼaw kʼaw‸ gaˬ la htaˇ, yehˬ awˬ hta‸ teˇ htai‸ yawˇ hui hpawnˬ da‸ jaw ve bawehˇ lo taˆ-e ve yoˬ. Yawˇ hui teˇ hpaˍ lehˬ, Peˍtruˆ, Yoˇhanˬ, Yaˍkoˆ, Anˍdrehˍ, Hpiˇliˇpuˆ, Htoˉma‸, Baˍhtawˇlaˍmehˇ, Ma‸htehˍ, Aˍlaˍhpehˇ ve awˬ yaˇ paˍ Yaˍkoˆ, Siˉmonˍ Seˍluˆ leh, Yaˍkoˆ ve awˬ yaˇ paˍ Yuˇda‸, chi teˇ hpaˍ yoˬ. 14Yawˇ hui hkʼa peu-eˬ leh yaˇ miˇ teˇ hpaˍ, Yeˍsuˆ ve awˬ e Maˍriˆ leh Yeˍsuˆ ve awˬ nyi paˍ teˇ hpaˍ geh teˇ geh nyi ma teˇ shiˍ tiˉ taˍ leh, hkʼaˬ htaˆ ka‸ bon lawˬ chehˇ ve yoˬ.

15Awˬ nyi awˬ haˉ oˇ ve teˇ hpaˍ awˬ hkʼaw lo, awˬ viˉ awˬ nyi teˇ ha nyiˇ chi gʼa hkʼe hpawnˬ da‸ chehˇ htaˇ, Peˍtruˆ yawˇ hui awˬ kʼaw ji lo tu huˉ leh kʼoˆ ve, 16Awˬ viˉ awˬ nyi teˇ hpaˍ-oˬ, Li‸ hpu hkʼaw bvuh‸ taˍ ve tawˇ chi teˇ hkawˇ gʼa biˇ la tehˬ tehˬ ve yoˬ. Hkʼaˬ ve teˇ hkawˇ le teh‸ kʼoˆ kʼo, Yeˍsuˆ hta‸ hpeh yuˬ ve chaw hui hta‸ ya‸ kʼaw maˍ piˇ paˍ Yuˇda‸ awˬ lawn awˬ gʼuˇ suhˍ htaˇ ka‸ da‸ ve kehˬ ve Awˬ ha hpu Daˍviˆ ve maw‸ kʼaw hta‸ cuˇ leh kʼoˆ taˍ ve tawˇ teˇ hkawˇ yoˬ. 17Yuˇda‸ lehˬ, ngaˬ hui ve awˬ moˍ awˬ hkʼaw lo chehˇ leh ngaˬ hui geh teˇ geh kanˉ te ve chaw teˇ gʼaˇ hpeh‸ ve yoˬ.

18(Chaw oˇ ve lehˬ, maˇ hteˇ maˇ cawˇ ve kanˉ hta‸ te leh, gʼa ve awˬ hpfuhˇ miˬguiˬ teˇ peˆ vuiˬ taˍ ve yoˬ. Yawˇ oˉ kʼoˍ hpawˇ ce leh, gʼoˇ peˬ hkoˇ ve pa taw, awˬ gʼuˬ tehˆ hkʼa peu-eˬ tawˆ la ve yoˬ. 19Awˬ lawn oˇ ve hta‸ Yeˍruˆsaˍlehnˍ venˇ yaˇ hkʼa peu-eˬ gʼa shiˍ ve yoˬ. Hkʼe te leh miˬ guiˬ oˇ ve teˇ peˆ hta‸ yawˇ hui ve hkawˇ Aˍkeˍdaˍmaˆ teh‸ meh piˇ ve yoˬ. Tcuhˉ kuiˬ lehˬ, awˬ suhˍ miˬguiˬ teh‸ kʼoˆ ve yoˬ.)

20Awˬ lawn kʼo, Chiˇ mvuh ve li‸ awˬ hkʼaw lo chi hkʼe bvuh‸ taˍ ve

Yawˇ ve chehˇ kuiˬ hta‸ gawˬ cu gawˬ pehˆ ve chehˇ kuiˬ hpeh‸ piˇ-oˆ.

Teˇ gʼaˇ ka‸ taˇ chehˇ piˇ lawˬ-o‸. #Chi 69:25 Yawˇ ve aˉ yaˇ shu hta‸ kʼaw‸ piˇ-oˆ,

teh‸ bvuh‸ taˍ ve yoˬ. #Chi 109:8

21Hkʼe te leh, Yeˍsuˆ kʼaw‸ te‸ tu la ve awˬ lawn ngaˬ hui geh shaˉ hkiˆ ga hkanˍ tuˬ, chaw teˇ gʼaˇ loˍ ve yoˬ. 22Chaw oˇ ve teˇ gʼaˇ lehˬ, Jawˇmawˇ Yeˍsuˆ Yoˇhanˬ geh baˆtiˆsaˬ hkanˍ ve teˇ nyi hta‸ tanˬ leh, ngaˬ hui geh yiˬ yiˬ laˬ laˬ te toˇ ve awˬ yanˇ hkʼa peu-eˬ awˬ hkʼaw lo leh, ngaˬ hui hta‸ hpaˆ da‸ leh kʼaw‸ taˆ kʼo‸-e ve teˇ nyi hkʼa gaˬ, ngaˬ hui geh chehˇ taˍ ve chaw teˇ gʼaˇ gʼa hpeh‸ ve yoˬ teh‸, Peˍtruˆ kʼoˆ ve yoˬ.

23Hkʼe te leh, yawˇ hui chaw nyiˇ gʼaˇ ve awˬ meh hta‸ kuˬ ve yoˬ. Teˇ gʼaˇ lehˬ, awˬ meh awˬ suhˉ Yuˇtuˆ meh ve, Baˍsaˍbaˆ ve awˬ yaˇ paˍ Yoˇseh‸ yoˬ. Nyiˇ gʼaˇ teˇ gʼaˇ lehˬ Maˍhtiˆ yoˬ. 24Yawˇ hui bon lawˬ leh kʼoˆ ve, Chaw yaˇ hkʼa peu-eˬ ve nyi ma hta‸ shiˍ ve Jawˇmawˇ Gʼuiˬsha-oˬ, 25Yuˇda‸ lehˬ tcuh yaˇ ve aˉ yaˇ hta‸ baˬ taˉ leh, yawˇ ve chehˇ kuiˬ lo kʼo‸-e peuˬ. Yawˇ ve kanˉ hta‸ kʼaw‸ te leh tcuh yaˇ ve aˉ yaˇ hta‸ kʼaw‸ gʼa tuˬ, chi nyiˇ gʼaˇ awˬ hkʼaw lo nawˬ leuˆ yuˬ ve teˇ gʼaˇ hta‸ a ciˉ beˆ maˍ laˇ-oˆ teh‸ bon lawˬ ve yoˬ. 26Yawˇ huiˉ maˬ ve awˬ meh bvuh‸ keu leh hkaˆ yuˬ ve teˇ yanˇ, Maˍhtiˆ hta‸ cawˇ ve yoˬ. Hkʼe te leh, tcuh yaˇ teˇ chi teˇ gʼaˇ geh yawˇ lo‸-e ve yoˬ.

Currently Selected:

Tcuh yaˇ li‸ 1: LHBE

Highlight

Copy

Compare