Yoˇhanˬ li‸ 21
21
Yeˍsuˆ yawˇ awˬ to awˬ la‸ gʼawˇ suhˍ gʼaˇ hta‸ maw piˇ ve
1Oˇ ve awˬ hkʼaw‸ nawˉ Yeˍsuˆ lehˬ, Tiˍbeˍriˆ gʼuiˬ po awˬ paˇ lo awˬ la‸ gʼawˇ teˇ hpaˍ hta‸ yawˇ ve awˬ to teˇ pawˆ kʼaw‸ maw piˇ ve yoˬ. Yawˇ ve awˬ to maw piˇ ve lehˬ chi hkʼe yoˬ. 2Siˉmonˍ Peˍtruˆ, Yaˇ cehˬ kʼa teh‸ kʼoˆ ve Htoˉma‸, Gaˍliˍlehˇ mvuhˇmiˬ Kaˍnaˆ hkʼaˆ yaˇ Naˍtaˍneˍlaˆ, Zeˍbeˍdehˇ ve yaˇ paˍ nyiˇ gʼaˇ leh, Yeˍsuˆ ve awˬ la‸ gʼawˇ awˬ kaˍ awˬ nu nyiˇ gʼaˇ yawˇ hui geh teˇ geh chehˇ taˍ ve yoˬ. 3Siˉmonˍ Peˍtruˆ lehˬ, Ngaˬ ngaˇ ca-e shaˍ teh‸, yawˇ hui hta‸ kʼoˆ piˇ ve yoˬ. Yawˇ hui kʼaw‸ kʼoˆ ve, Ngaˬ hui ka‸ kʼai-a teh‸ yawˇ hta‸ kʼoˆ piˇ ve yoˬ.
Yawˇ hui kʼai leh, haw lo‸ kʼoˍ hkʼaw lo‸-e ve yoˬ. Oˇ ve teˇ haˉ yawˇ hui ngaˇ ca ve, teˇ hkeh ka‸ maˇ gʼa. 4Mvuhˇ htiˇ la ve teˇ yanˇ, Yeˍsuˆ lehˬ gʼuiˬ pfuhˍ paˇ lo huˉ taˍ ve yoˬ. Ya‸ hkʼaˇ, Yeˍsuˆ yoˬ teh‸ awˬ la‸ gʼawˇ teˇ hpaˍ maˇ shiˍ. 5Yeˍsuˆ kʼoˆ ve, Yaˇ teˇ hpaˍ-oˬ, ngaˇ gʼa-aw laˇ teh‸ yawˇ hui hta‸ na nyi htaˇ,
Maˇ gʼa teh‸ yawˇ hui yawˇ hta‸ kʼaw‸ kʼoˆ piˇ ve yoˬ.
6Oˇ htaˇ Yeˍsuˆ kʼoˆ ve, Haw lo‸ kʼoˍ la‸ sha paˉ lo geu‸ hpehˇ-oˆ. Oˇ hkʼe te ve kʼo, gʼa tuˬ yoˬ teh‸ yawˇ hui hta‸ kʼoˆ piˇ ve yoˬ. Hkʼe te leh yawˇ hui geu‸ hpehˇ leh, ngaˇ maˇ maˇ gʼa ve pa taw, geu‸ hta‸ gʼawˬ maˇ gʼaˇ.
7Oˇ htaˇ, Yeˍsuˆ ha‸ ve awˬ la‸ gʼawˇ teˇ gʼaˇ lehˬ, Peˍtruˆ hta‸ kʼoˆ piˇ ve, Jawˇmawˇ Yeˍsuˆ yoˬ. Jawˇmawˇ Yeˍsuˆ yoˬ teh‸ Siˉmonˍ Peˍtruˆ gʼa kaˇ htaˇ, yawˇ veu‸ kʼaˇ maˇ veu‸ taˍ ve pa taw, aˉ po‸ zuhˬ ma hta‸ deh sheˬ leh, gʼuiˬ po hkʼaw lo pawˆ lo‸-e ve yoˬ. 8Awˬ kaˍ awˬ nu awˬ la‸ gʼawˇ teˇ hpaˍ lehˬ, gʼuiˬ pfuhˍ hta‸ maˇ vuiˇ, ngaˇ chi loˬ hkʼe ceh tiˉ vuiˇ ve pa taw, ngaˇ hkʼa biˇ geh taˍ ve geu‸ hta‸ gʼawˬ leh, haw lo‸ kʼoˍ ciˇ laˬ ve yoˬ. 9Yawˇ hui pehˬ shaˉ lo gaˬ htaˇ, shiˉ gʼeu‸ aˬ miˍ ceh taˍ ve hta‸ gʼa mawˬ leh, ngaˇ piˬ taˍ ve hta‸ maˇ kʼoˆ, hkaoˍmonˇ teh taˍ ve hta‸ maˇ kʼoˆ, gʼa mawˬ ve yoˬ. 10Yeˍsuˆ kʼoˆ ve, Chi beu‸ nawˬ hui gʼa taˍ ve ngaˇ teˇ hpaˍ hpaˍ hta‸ yuˬ veu laˇ-oˆ teh‸ yawˇ hui hta‸ kʼoˆ piˇ ve yoˬ.
11Hkʼe te leh, Siˉmonˍ Peˍtruˆ lehˬ, haw lo‸ kʼoˍ hkʼaw lo‸-e leh, ngaˇ hkʼa biˇ cawˬ ve geu‸ oˇ ve hta‸ pehˬ shaˉ lo gʼawˬ veu laˇ ve yoˬ. Geu‸ oˇ ve awˬ hkʼaw lo uiˍ ve ngaˇ 153 hkeh cawˬ ve yoˬ. Ngaˇ chi taw taw gʼa maˇ ve htawˇ, geu‸ maˇ tzuh‸. 12Oˇ htaˇ Yeˍsuˆ kʼoˆ ve, Awˍ caˇ la-o teh‸, yawˇ hui hta‸ kʼoˆ piˇ ve yoˬ. Yawˇ lehˬ Jawˇmawˇ Yeˍsuˆ hpeh‸ ve yoˬ teh‸, awˬ la‸ gʼawˇ hui shiˍ ve pa taw, Nawˬ a shu le teh‸, teˇ gʼaˇ ka‸ yawˇ hta‸ na nyi maˇ haˆ. 13Yeˍsuˆ laˬ leh hkaoˍ monˇ hta‸ yuˬ leh awˬ la‸ gʼawˇ teˇ hpaˍ hta‸ pehˬ piˇ ve yoˬ. Ngaˇ shaˍ hta‸ htawˇ oˇ hkʼe te pehˬ piˇ ve yoˬ.
14Yeˍsuˆ yawˇ suh kuiˬ lo kʼaw‸ te‸ tu la peuˬ hkʼaw‸ nawˉ, yawˇ ve awˬ to awˬ la‸ gʼawˇ hui hta‸ maw piˇ ve lehˬ, chi teˇ pawˆ shehˆ pawˆ teˇ pawˆ hpeh‸ ve yoˬ.
Ngaˬ ve yawˬ teˇ hpaˍ hta‸ caˍ piˇ taw piˇ-oˆ
15Yawˇ hui awˍ caˇ peuˬ hkʼaw‸ nawˉ, Yeˍsuˆ lehˬ Siˉmonˍ Peˍtruˆ hta‸ kʼoˆ piˇ ve, Yoˇhanˬ ve yaˇ Siˉmonˍ-oˬ, chaw chi teˇ hpaˍ ha‸ ve a‸ kehˉ nawˬ ngaˬ hta‸ ha‸-aw laˇ teh‸ na nyi ve teˇ yanˇ, Ha‸ ve yoˬ, Jawˇmawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ kʼaw‸ kʼoˆ piˇ ve yoˬ.
Yeˍsuˆ kʼaw‸ kʼoˆ ve, Ngaˬ ve yawˬ ehˉ teˇ hpaˍ hta‸ caˍ piˇ taw piˇ-oˆ teh‸ yawˇ hta‸ kʼoˆ piˇ ve yoˬ. 16Yeˍsuˆ yawˇ hta‸ teˇ pawˆ kʼaw‸ kʼoˆ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ kʼaw‸ na nyi ve teˇ yanˇ, Ha‸ ve yoˬ, Jawˇmawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ kʼaw‸ kʼoˆ piˇ ve yoˬ.
Yeˍsuˆ kʼaw‸ kʼoˆ ve, Ngaˬ ve yawˬ teˇ hpaˍ hta‸ ha‸ shaˉ-oˆ teh‸ yawˇ hta‸ kʼoˆ piˇ ve yoˬ. 17Yeˍsuˆ yawˇ hta‸ shehˆ pawˆ teˇ pawˆ kʼaw‸ kʼoˆ piˇ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ na nyi ve yoˬ.
Nawˬ ngaˬ hta‸ ha‸-aw laˇ teh‸ shehˆ pawˆ hkʼa gaˬ Yeˍsuˆ yawˇ hta‸ na nyi ve pa taw Peˍtruˆ dawˇ haˍ leh kʼoˆ ve, Jawˇmawˇ-oˬ, nawˬ hkʼa peu-eˬ hta‸ shiˍ ve yoˬ. Ngaˬ nawˬ hta‸ ha‸ ve nawˬ shiˍ ve yoˬ teh‸ kʼaw‸ kʼoˆ piˇ ve yoˬ. Yeˍsuˆ kʼaw‸ kʼoˆ ve, Ngaˬ ve yawˬ teˇ hpaˍ hta‸ caˍ piˇ taw piˇ-oˆ.
18Ngaˬ nawˬ hta‸ awˬ tehˬ awˬ na kʼoˆ laˇ ve, nawˬ yaˇ nehˬ hpeh‸ ve teˇ yanˇ nawˬ hkʼaˇ nawˬ haˍ pi tsuh‸ leh, nawˬ kʼai gaˇ kuiˬ lo kʼai ve yoˬ. Ya‸ hkʼaˇ, nawˬ mawˇ la ve teˇ yanˇ, nawˬ ve la‸ sheh nyiˇ paˉ che leh, shu nawˬ hta‸ haˍ pi tsuh‸ laˇ peuˬ hkʼaw‸ nawˉ, nawˬ maˇ kʼai gaˇ kuiˬ teˇ kaˬ lo shu nawˬ hta‸ yuˬ kʼai tuˬ yoˬ teh‸ yawˇ hta‸ kʼoˆ piˇ ve yoˬ. 19(Yeˍsuˆ chi hkʼe kʼoˆ ve lehˬ, Gʼuiˬsha ve awˬ me‸ awˬ hponˇ tawˆ la tuˬ ve awˬ pon Peˍtruˆ hkʼaˬ hkʼe gʼa te suh tuˬ ve hta‸ kʼoˆ gaˇ ve yoˬ.) Yeˍsuˆ tawˇ oˇ ve teˇ hpaˍ hta‸ kʼoˆ peuˬ hkʼaw‸ nawˉ, Ngaˬ hkʼaˇ suh laˬ-o‸ teh‸ Peˍtruˆ hta‸ kʼoˆ piˇ ve yoˬ.
Yeˍsuˆ ha‸ ve awˬ la‸ gʼawˇ teˇ gʼaˇ awˬ lawn
20Peˍtruˆ hpfuhˆ nyi ve teˇ yanˇ, Yeˍsuˆ ha‸ ve awˬ la‸ gʼawˇ teˇ gʼaˇ awˬ hkʼaˇ suh laˬ chehˇ ve hta‸ gʼa mawˬ ve yoˬ. Awˬ la‸ gʼawˇ oˇ ve teˇ gʼaˇ lehˬ, ponˬ laˬ ve teˇ pawˆ yawˇ hui mvuhˇ hpeu‸ awˍ caˇ chehˇ ve teˇ yanˇ, Yeˍsuˆ ve nyi ma pui awˬ paˇ lo ngeh mui taˍ leh, Jawˇ mawˇ-oˬ, nawˬ hta‸ chiˇ a‸ piˇ tuˬ ve a shu le teh‸ na nyi shehˍ hpaˇ teˇ gʼaˇ yoˬ. 21Peˍtruˆ lehˬ, awˬ la‸ gʼawˇ oˇ ve hta‸ gʼa mawˬ ve teˇ yanˇ, Jawˇmawˇ-oˬ, chi hpaˇ hkʼaˬ hkʼe gʼa hpeh‸ tuˬ ve le teh‸ Yeˍsuˆ hta‸ na nyi ve yoˬ.
22Yeˍsuˆ kʼaw‸ kʼoˆ ve, Ngaˬ kʼaw‸ laˬ htaˇ hkʼa gaˬ ngaˬ yawˇ hta‸ chehˇ tcuh piˇ gaˇ ve kʼo, nawˬ hta‸ hkʼaˬ hkʼe caˉ da‸ le. Nawˬ awˬ to ngaˬ hkʼaˇ suh laˬ-o‸ teh‸, yawˇ hta‸ kʼoˆ piˇ ve yoˬ.
23Tawˇ hkawˇ oˇ ve hta‸ pa taw, awˬ la‸ gʼawˇ oˇ ve teˇ gʼaˇ maˇ gʼa suh teh‸, awˬ viˉ awˬ nyi teˇ hpaˍ awˬ hkʼaw lo bvuhˬ kʼai ve yoˬ. Ya‸ hkʼaˇ, awˬ la‸ gʼawˇ oˇ ve teˇ gʼaˇ maˇ gʼa suh teh‸ Yeˍsuˆ kʼoˆ ve maˇ heˆ. Ngaˬ kʼaw‸ laˬ htaˇ hkʼa gaˬ ngaˬ yawˇ hta‸ chehˇ tcuh piˇ gaˇ ve kʼo, nawˬ hta‸ hkʼaˬ hkʼe caˉ da‸ le teh‸ Yeˍsuˆ kʼoˆ ve yoˬ.
24Awˬ la‸ gʼawˇ oˇ ve teˇ gʼaˇ lehˬ, awˬ lawn chi teˇ hpaˍ hta‸ shaˉ hkiˆ hkanˍ leh bvuh‸ taˍ shehˍ hpaˇ hpeh‸ ve yoˬ. Yawˇ shaˉ hkiˆ hkanˍ ve lehˬ cawˇ ve yoˬ teh‸ ngaˬ hui shiˍ ve yoˬ.
Awˬ leh meuˇ ve tawˇ hkawˇ
25Yeˍsuˆ te ve kanˉ awˬ kaˍ awˬ nu laiˉ ceuˬ cawˬ sheˍ ve yoˬ. Yawˇ hkʼa te ve awˬ lawn teˇ ceuˬ le le hta‸ bvuh‸ taˍ ve hkʼe kʼo, bvuh‸ taˍ ve li‸ daw oˇ ve teˇ hpaˍ miˬguiˬ chi ka‸ maˇ daw teh‸ ngaˬ dawˇ ve yoˬ.
Currently Selected:
Yoˇhanˬ li‸ 21: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.