Tcuh yaˇ li‸ 2

Da‸ ve kehˬ ve Awˬ ha hpu ya‸ la ve

1Peˍteˍkoˆteˍ pawehˇ awˬ nyi gaˬ la htaˇ, yawˇ hui hkʼa peu-eˬ teˇ kaˬ lo tiˉ hpawnˬ chehˇ taˍ ve yoˬ. 2Oˇ htaˇ, mvuhˇ haw lonˉ meuˆ ve hkʼa shuˍ shuˍ, teˇ cawˬ haˉ mvuhˇ naw ma lo awˬ hkawˇ bvuhˬ ya‸ la leh, yawˇ hui mui taˍ ve yehˬ teˇ yehˬ awˬ hkʼaw lo biˇ sheˬ ve yoˬ. 3Aˬ miˬ ha hkʼa shuˍ shuˍ, ha tehˍ teˇ hpaˍ hta‸ yawˇ hui gʼa mawˬ ve yoˬ. Ha tehˍ oˇ ve teˇ hpaˍ pehˬ taˍ leh teˇ gʼaˇ le le awˬ hkʼoˆ hta‸ jehˇ taˍ ve yoˬ. 4Yawˇ hui hkʼa peu-eˬ awˬ hkʼaw lo da‸ ve kehˬ ve Awˬ ha hpu biˇ la leh, Awˬ ha hpu yawˇ hui hta‸ kʼoˆ tcuh yaw tcuh ve hkʼe, awˬ kaˍ awˬ nu tawˇ laiˉ ceuˬ hkawˇ yaw ve yoˬ.

5Oˇ htaˇ, Gʼuiˬsha hta‸ yawˆ yan ve Yuˇda‸ chaw teˇ hpaˍ Yeˍruˆsaˍlehnˍ venˇ hkʼaw lo chehˇ taˍ ve yoˬ. Yawˇ hui lehˬ, miˬguiˬ hkʼoˆ mvuhˇmiˬ teˇ peˆ le le lo laˬ ve chaw teˇ hpaˍ hpeh‸ ve yoˬ. 6Awˬ hkawˇ oˇ ve hta‸ gʼa kaˇ htaˇ, chaw awˬ moˍ lonˉ hpawnˬ la leh, a shu yawˇ ve tawˇ hkawˇ shu yaw laˇ ve hta‸ gʼa kaˇ ve pa taw, yawˇ hui ka keh chehˇ ve yoˬ. 7Yawˇ hui anˇ jaˇ leh dawˇ maˇ tawˆ ve yoˬ. Yawˇ hui kʼoˆ ve, Nyi loˬ, tawˇ yaw chehˇ ve chaw chi hkʼa peu-eˬ lehˬ, Gaˍliˍlehˇ chaw maˇ heˆ laˇ. 8Ngaˬ hui teˇ gʼaˇ le le a shu yawˇ paw la kuiˬ mvuhˇmiˬ ve tawˇ hkawˇ hta‸ gʼa kaˇ ve, hkʼaˬ hkʼe le. 9Ngaˬ hui Paˍtiˆ chaw, Meˍdiˆ chaw, Eˇlanˍ chaw, Meˍsoˇpoˇtaˍmiˆ mvuhˇmiˬ lo chehˇ ve chaw, Yuˇda‸ leh Kaˍpaˍdawˇkiˆ mvuhˇmiˬ lo chehˇ ve chaw, Poˍtuˆ leh Aˍsiˆ mvuhˇmiˬ lo chehˇ ve chaw, 10Hpuˍgiˆ leh Paˍpuˇliˆ mvuhˇmiˬ lo chehˇ ve chaw, Eˇjiˇtu‸ leh Kuˇreˍneˍ mvuhˇmiˬ hta‸ caˉ da‸ ve Liˍbuˆ mvuhˇmiˬ lo chehˇ ve chaw, Roˉma‸ venˇ lo laˬ ve hkehˉ chaw teˇ hpaˍ, Yuˇda‸ chaw maˇ kʼoˆ, Yuˇda‸ awˬ liˇ hta‸ yuˬ ve chaw maˇ kʼoˆ, 11Kaˍreˍte chaw leh Aˍraˆ chaw, Gʼuiˬsha ve uiˍ jaˇ ve kanˉ teˇ hpaˍ awˬ lawn shu yaw laˇ ve hta‸ ngaˬ hui a shu yawˇ ve tawˇ hkawˇ gʼa kaˇ ve yoˬ teh‸ yawˇ hui kʼoˆ ve yoˬ. 12Yawˇ hui hkʼa peu-eˬ anˇ jaˇ leh dawˇ maˇ tawˆ ve awˬ hkʼaw lo, Aˬ hto‸ ma hpeh‸ ve leh naˍ teh‸, teˇ gʼaˇ leh teˇ gʼaˇ na nyi da‸ ve yoˬ.

13Ya‸ hkʼaˇ teˇ hpaˍ hpaˍ hkʼaiˉ leh kʼoˆ ve, Yawˇ hui lehˬ, a pehˉ meuˇ gʼuiˬ awˬ suhˉ dawˬ bvuhˆ ve yoˬ.

Peˍteˍkoˆteˍ awˬ nyi htaˇ Peˍtruˆ bon maˍ ve

14Oˇ htaˇ, Peˍtruˆ lehˬ tcuh yaˇ teˇ chi teˇ gʼaˇ hui geh huˉ taˍ leh, awˬ hkawˇ bvuhˬ chaweh kuˬ leh chaw chi ma ve hta‸ kʼoˆ piˇ ve, Yuˇda‸ mvuhˇmiˬ chaw leh Yeˍruˆsaˍlehnˍ venˇ hkʼaw lo hkʼa chehˇ ve chaw teˇ hpaˍ-oˬ, ngaˬ ve tawˇ hkawˇ hta‸ na leh awˬ lawn chi hta‸ shiˍ-o‸. 15Chaw chi teˇ hpaˍ lehˬ, nawˬ hui dawˇ taˍ ve hkʼe a pehˉ meuˇ gʼuiˬ dawˬ bvuhˆ ve maˇ heˆ. Awˬ lawn kʼo, chi beu‸ lehˬ mvuhˇ shawˉ kʼawˇ naˍ riˍ ceh tiˉ gaˬ sheˍ ve yoˬ. 16Awˬ lawn chi ve lehˬ, tcuh kaˍ paˍ Yawˇlaˆ kʼoˆ taˍ ve hkʼe hpeh‸ ve yoˬ.

17Gʼuiˬsha kʼoˆ ve, Awˬ leh meuˇ ve

awˬ nyi awˬ haˉ teˇ hpaˍ awˬ hkʼaw lo

chaw ceuˬ hkʼa peu-eˬ awˬ hkʼoˆ hta‸ ngaˬ ve

Awˬ ha hpu ngaˬ ngeuˍ pfuhˍ piˇ tuˬ yoˬ.

Nawˬ hui ve yaˇ paˍ yaˇ miˇ teˇ hpaˍ lehˬ bon maˍ tuˬ yoˬ.

Nawˬ hui ve chaw haˉ paˍ teˇ hpaˍ lehˬ, awˬ ha awˬ hkʼaw gʼa mawˬ tuˬ yoˬ.

Nawˬ hui ve chaw mawˇ teˇ hpaˍ htawˇ, zuh‸ maˆ mawˬ tuˬ yoˬ.

18Awˬ nyi awˬ haˉ oˇ ve teˇ hpaˍ awˬ hkʼaw lo,

ngaˬ ve awˬ ceˬ paˍ awˬ ceˬ ma teˇ hpaˍ awˬ hkʼoˆ hta‸ ka‸,

ngaˬ ve Awˬ ha hpu ngaˬ ngeuˍ pfuhˍ piˇ leh, yawˇ hui htawˇ bon maˍ tuˬ yoˬ.

19Awˬ na hpawˇ mvuhˇ naw ma lo anˇ tuˬ teˇ hpaˍ hta‸ maˇ kʼoˆ,

awˬ hawˉ hpawˇ miˬguiˬ hkʼoˆ lo, awˬ suhˍ,

aˬ miˍ leh mvuhˇ hkʼawˇ, awˬ heˆ chi teˇ hpaˍ hta‸ maˇ kʼoˆ, ngaˬ maˍ piˇ tuˬ yoˬ.

20Jawˇmawˇ Gʼuiˬsha ve uiˍ jaˇ da‸ jaˇ ve awˬ nyi maˇ gaˬ sheˍ htaˇ,

mvuhˇ nyi naˆ ho‸ hpeh‸ la leh, ha pa htawˇ awˬ suhˍ hpeh‸ la tuˬ yoˬ.

21Oˇ htaˇ, Jawˇmawˇ Gʼuiˬsha ve awˬ meh hta‸ peun leh kuˬ ve chaw hkʼaˬ ve teˇ gʼaˇ maˇ kʼoˆ, htaiˍ hkʼaw‸ ve hta‸ gʼa tuˬ yoˬ teh‸ Yawˇlaˆ kʼoˆ taˍ ve yoˬ. #Yla 2:28-32

22Iˉsaˍreˍlaˆ chaw hui-oˬ, tawˇ hkawˇ chi hta‸ na-o. Nawˬ hui shiˍ taˍ ve hkʼa shuˍ shuˍ, Gʼuiˬsha lehˬ Naˍzaˍrehˆ chaw Yeˍsuˆ hta‸ cuˇ leh kanˉ uiˍ ve teˇ hpaˍ, anˇ tuˬ teˇ hpaˍ leh awˬ heˆ teˇ hpaˍ hta‸ nawˬ hui mehˆ gʼuˇ suhˍ te ve awˬ hkʼaw lo yawˇ awˬ pon shaˉ hkiˆ hkanˍ ve yoˬ. 23Awˉ lawˉ htaˇ ka‸ Gʼuiˬsha shiˍ taˍ leh dawˇ cheˆ taˍ ve hkʼe Yeˍsuˆ chi teˇ gʼaˇ lehˬ, chiˇ a‸ piˇ ve hta‸ gʼa hkanˍ ve yoˬ. Nawˬ hui lehˬ, chaw haiˬ teˇ hpaˍ hta‸ cuˇ leh, yawˇ hta‸ la‸ ka hkʼoˆ lo hta‸ pehˍ peuˬ. 24Ya‸ hkʼaˇ, suh ve awˬ hkʼaw lo tu‸ ve hkanˍ ve teˇ hpaˍ hta‸ Gʼuiˬsha hpui baˬ piˇ leh, yawˇ hta‸ kʼaw‸ te‸ tu la piˇ peuˬ. Awˬ lawn kʼo, suh ve oˇ ve lehˬ, yawˇ hta‸ hpeh taˍ maˇ gʼa. 25Yawˇ awˬ lawn Daˍviˆ chi hkʼe kʼoˆ taˍ ve,

Jawˇmawˇ Gʼuiˬsha lehˬ, ngaˬ mehˆ gʼuˇ suhˍ lo

hkʼaˬ htaˆ ka‸ chehˇ taˍ ve hta‸ ngaˬ gʼa mawˬ ve yoˬ.

Ngaˬ hkʼaˬ htaˆ ka‸ yeˬ chehˇ tuˬ, yawˇ ngaˬ ve la‸ sha paˉ lo chehˇ taˍ ve yoˬ.

26Chi hta‸ pa taw ngaˬ ve nyi ma ha lehˬ leh, ngaˬ ve maw‸ kʼaw ha lehˬ chiˇ mvuh ve yoˬ.

Chi hkʼoˆ ka‸, ngaˬ ve awˬ to dawˇ law ve awˬ hkʼaw lo chehˇ tuˬ yoˬ.

27Awˬ lawn kʼo, nawˬ lehˬ ngaˬ ve co ha hta‸ suh mvuhˇ suh miˬ lo baˬ taˉ tuˬ maˇ heˆ.

Nawˬ ve da‸ kehˬ ve Chaw teˇ gʼaˇ hta‸ kuiˇ kʼai luˬ kʼai tuˬ nawˬ maˇ hpeh‸ piˇ.

28Co ha te‸ ve ya‸ kʼaw nawˬ ngaˬ hta‸ maˍ laˇ peuˬ.

Nawˬ ve mehˆ hpfuhˇ hta‸ gʼa mawˬ ve pa taw, ngaˬ ha lehˬ ve biˇ la tuˬ nawˬ te laˇ tuˬ yoˬ,

teh‸ Daˍviˆ kʼoˆ taˍ ve yoˬ. #Chi 16:8-11

29Awˬ viˉ awˬ nyi teˇ hpaˍ-oˬ, ngaˬ hui ve awˬ puˍ lonˉ Daˍviˆ awˬ lawn ngaˬ nawˬ hui hta‸ hkʼa deh‸ kʼoˆ laˇ hpeh‸ ve yoˬ. Yawˇ suh leh, shu yawˇ hta‸ tuˍ piˇ peuˬ. Chi hkʼoˆ ka‸, ya‸ nyi hkʼa gaˬ yawˇ ve tuˍ hpfuh ngaˬ hui geh cawˬ taˍ sheˍ ve yoˬ. 30Yawˇ lehˬ Gʼuiˬsha ve tcuh kaˍ paˍ hpeh‸ leh, yawˇ ve awˬ ceuˬ awˬ hkʼaˇ awˬ hkʼaw lo teˇ gʼaˇ hta‸ yawˇ ve kʼaw jaw hkʼoˆ lo mui tcuh tuˬ, Gʼuiˬsha yawˇ hta‸ ka ti‸ te leh hkanˍ taˍ ve hta‸ yawˇ shiˍ ve yoˬ. #Chi 132:11 31Chi hta‸ pa taw, Hkri‸ kʼaw‸ te‸ tu la tuˬ ve awˬ lawn yawˇ awˉ lawˉ htaˇ ka‸ dawˇ shiˍ dawˇ mawˬ leh, Hkri‸ hta‸ suh mvuhˇ suh miˬ lo maˇ baˬ taˉ ve awˬ hkʼoˆ ka‸, yawˇ ve awˬ to htawˇ kuiˇ ve luˬ ve hta‸ maˇ gʼa hkanˍ teh‸ Daˍviˆ kʼoˆ ve yoˬ. 32Yeˍsuˆ chi teˇ gʼaˇ hta‸ Gʼuiˬsha kʼaw‸ te‸ tu la piˇ ve yoˬ. Ngaˬ hui hkʼa peu-eˬ htawˇ awˬ lawn chi hta‸ shaˉ hkiˆ hkanˍ paˍ hpeh‸ ve yoˬ. 33Hkʼe te leh, Gʼui sha ve la‸ sha paˉ lo yawˇ hta‸ yuˬ uiˍ yuˬ mvuh piˇ leh, da‸ ve kehˬ ve Awˬ ha hpu piˇ tuˬ yoˬ teh‸, Awˬ pa kʼoˆ taˍ ve hkʼe Awˬ pa geh yawˇ gʼa ve yoˬ. Chi beu‸ nawˬ hui gʼa kaˇ gʼa mawˬ ve hkʼe, Awˬ ha hpu hta‸ yawˇ ngeuˍ pfuhˍ laˇ ve yoˬ. 34Awˬ lawn kʼo, Daˍviˆ lehˬ mvuhˇ naw ma hkʼoˆ lo taˆ-e ve maˇ heˆ. Ya‸ hkʼaˇ, yawˇ awˬ to kʼoˆ ve,

Jawˇmawˇ Gʼuiˬsha lehˬ ngaˬ ve Jawˇmawˇ hta‸ kʼoˆ piˇ ve,

35Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hkʼa ga,

ngaˬ ve la‸ sha paˉ lo mui chehˇ-oˆ,

teh‸ Daˍviˆ kʼoˆ taˍ ve yoˬ. #Chi 110:1 36Hkʼe te leh, Iˉsaˍreˍlaˆ teˇ yehˬ hkʼa peu-eˬ chi hta‸ hkʼa deh‸ shiˍ-o‸. Nawˬ hui la‸ ka hkʼoˆ lo hta‸ pehˍ ve Yeˍsuˆ chi teˇ gʼaˇ hta‸ Gʼuiˬsha lehˬ Jawˇmawˇ ka‸ Hkri‸ ka‸ hpeh‸ piˇ lawˬ peuˬ teh‸ Peˍtruˆ kʼoˆ ve yoˬ.

37Chaw oˇ ve teˇ hpaˍ tawˇ hkawˇ chi hta‸ gʼa kaˇ htaˇ, yawˇ hui ve nyi ma hta‸ heuˆ jaˇ leh, Awˬ viˉ awˬ nyi teˇ hpaˍ-oˬ, ngaˬ hui hkʼaˬ hkʼe gʼa te tuˬ le teh‸, Peˍtruˆ leh awˬ kaˍ awˬ nu tcuh yaˇ teˇ hpaˍ hta‸ na nyi ve yoˬ.

38Peˍtruˆ yawˇ hui hta‸ kʼoˆ piˇ ve, Nawˬ hui ve venˇbaˆ hta‸ hpehˇ hkʼa laˇ tuˬ, venˇbaˆ dawˇ hpfuhˆ leh Yeˍsuˆ Hkri‸ ve awˬ meh awˬ hawˉ lo baˆtiˆsaˬ hkanˍ yuˬ-o‸. Chi hkʼe te ve kʼo, da‸ ve kehˬ ve Awˬ ha hpu hta‸ nawˬ hui gʼa tuˬ yoˬ. 39Awˬ lawn kʼo, ka ti‸ tawˇ hkawˇ chi lehˬ, nawˬ hui awˬ pon ka‸, nawˬ hui ve awˬ yaˇ awˬ duˬ awˬ pon ka‸, vuiˇ kuiˬ lo chehˇ ve chaw hkʼa peu-eˬ awˬ pon ka‸, ngaˬ hui ve Jawˇmawˇ Gʼuiˬsha hkʼa kuˬ yuˬ taˍ ve chaw hkʼa peu-eˬ awˬ pon hpeh‸ ve yoˬ teh‸ kʼoˆ piˇ ve yoˬ.

40Yawˇ awˬ kaˍ awˬ nu tawˇ maˇ maˇ yaw ve awˬ hkʼaw lo shaˉ hkiˆ hkanˍ leh kʼoˆ ve, Nyi ma kʼaw‸ ve chaw chi teˇ co awˬ hkʼaw lo gʼa ponˬ tuˬ te-o teh‸, yawˇ hui hta‸ gʼaˇ hte‸ awˬ gʼaˇ piˇ ve yoˬ. 41Hkʼe te leh, yawˇ ve tawˇ hkawˇ hta‸ na yuˬ ve chaw hui lehˬ, baˆtiˆsaˬ hkanˍ yuˬ ve yoˬ. Oˇ ve teˇ nyi awˬ hkʼaw lo chaw aˬ laˬ hkʼe shehˆ hinˉ gʼaˇ kʼaw‸ maˇ la ve yoˬ. 42Chaw oˇ ve teˇ hpaˍ lehˬ, tcuh yaˇ hui maˍ piˇ ve tawˇ hkawˇ hta‸ na yuˬ ve, awˬ chawˇ te da‸ ve, Jawˇmawˇ ve pawehˇ hta‸ caˇ ve leh bon lawˬ ve teˇ hpaˍ hta‸ hkʼaˬ htaˆ ka‸ te tcuhˉ taˍ ve yoˬ.

Hkri‸ yaˇ hui hkʼaˬ hkʼe te ve awˬ lawn

43Chaw teˇ gʼaˇ le le kawˆ jaˇ ve yoˬ. Tcuh yaˇ hui lehˬ, anˇ tuˬ leh awˬ heˆ teˇ hpaˍ maˇ maˇ te tawˆ la ve yoˬ. 44Hkʼa yonˍ ve chaw hkʼa peu-eˬ teˇ moˍ tiˉ te leh, mawˇ hkʼa peu-eˬ hta‸ teˇ geh yehˇ ve yoˬ. 45Yawˇ hui lehˬ a shu yawˇ ve mawˇ jeˬ teˇ hpaˍ hta‸ hawˇ leh, hkʼaˬ ve teˇ gʼaˇ hta‸ maˇ kʼoˆ, loˍ ve hkʼe chaw hkʼa peu-eˬ hta‸ pehˬ piˇ ve yoˬ. 46Teˇ nyi le le yawˇ hui teˇ geh bon yehˬ lonˉ lo taˆ-e ve awˬ hkʼoˆ ka‸, yawˇ hui ve yehˬ awˬ hkʼaw lo hkaoˍmonˇ hkʼeh‸ leh, ha lehˬ ha kʼa nyi ma teˇ shiˍ tiˉ taˍ ve awˬ hkʼaw lo yawˇ hui teˇ geh caˇ tuˬ caˇ ve yoˬ. 47Yawˇ hui Gʼuiˬsha hta‸ chiˇ mvuh leh, chaw hkʼa peu-eˬ yawˇ hui hta‸ nyi ma cawˇ ve yoˬ. Teˇ nyi le le Jawˇmawˇ Gʼuiˬsha lehˬ, htaiˍ hkʼaw‸ ve hta‸ gʼa ve chaw hui hta‸ yawˇ hui ve awˬ moˍ awˬ hkʼaw lo maˇ la piˇ chehˇ ve yoˬ.

Currently Selected:

Tcuh yaˇ li‸ 2: LHBE

Highlight

Copy

Compare