Yimre Suleymaanu 8
8
Jobbitoore yiide e no paanyo debbo salori giɗaaɗo mum
1To a laatino deerɗam,
to a musinno enɗi daada am,
to mi tawno ma haa yaasi, mi hebboto ma,
walaa koo gooto boo yawoto yam!
2Suudu daada am njahranmaami.
To en nasti ton, a ekkitintam yiɗugo ma.
Inaboojam uurɗam mi hokkete,
rummaanooje am ɓiɗɗaaɗe mi yarnete.
3Nano maako ɗon sakki les hoore am,
nyaamo maako boo huufammi ɓanndu.
4Faanyɓe rewɓe Urusaliima, kunaneeɗam
bee lelji e kampure,
taa pindine yiide, taa ndaame nde,
sey to nde yelake!
Yimooɓe
5Moy debbo oo garanɗo diga ladde,
ɓaariiɗo giɗaaɗo mum?
Paanyo debbo
Ndaa, les lekki dimanki ɓiɓɓe ki'i mi findini ma,
haa nokkuure nde daada ma reedi e danyi ma.
6Waɗam bana ɓellere ɓernde ma,
bana jawe haa juŋngo ma,
Yiide semmbiɗi bana waade,
kaajal saati bana joonde maayɓe.
Yiide wulan bana yiite huɓɓanŋge,
bana ɗemɗe yiite hulniiŋge#8:6 Ɗemɗe yiite hulniiŋge malla bana ɗemɗe yiite Jawmiraawo. nde wa'i.
7Koo ndiyamji ɗuuɗɗi
ke'ataa nyifugo yiide.
Koo maaje keewɗe ndiyam boo mbaawataa moɗugo nde.
Goɗɗo gurtinɗo jawdi saare mum fuu,
ngam soodugo yiide bee maari,
fakat yimɓe njawoto mo.
Deerɗiraaɓe paanyo debbo
8Minyiraawo amin o heewtaay tawon,
enɗi maako boo pamɗi, mawnaay tawon.
Kadi ɗume min mbaɗanta deerɗiraawo oo
nyannde goɗɗo wari haddinango mo?
9To o laatake mahol berniwol,
nden bee tuutuuji cardi min lamsa ngol.
To o dammugal,
min palan ngal bee maɓɓoode leggal cemmbiɗŋgal.
Paanyo debbo
10Ndaa, mi nanndi bee mahol berniwol,
non boo enɗi am, cuuɗi maagol towɗi.
Kanjum mi laati keɓɗo hayru yeeso maako.
Sukaajo
11Suleymaanu woodino ngesa inabooje,
haa Ba'al-Hamoona.
O halfini ka haa remooɓe,
koo moy ɗon wadda ngam nafuuda maaka
ceede cardi ujineere.
12Ngesa inabooje am, min jeyi!
Ka ɗon yeeso am. An, Suleymaanu, ndaa ceede cardi ujineere,
non boo remooɓe teemeɗɗe ɗiɗo.
13An gonɗo nder jarne,
ngorgiraaɓe am ɗon keɗito,
townu sawtu ma, accu mi nana:
Paanyo debbo
14Doggu law, an giɗaaɗo am!
Sey a laato bana lelwa e ɓiŋngel hamfurde
dow kooseeje uurooje.
Currently Selected:
Yimre Suleymaanu 8: FB
Highlight
Share
Copy
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.
