Matta 27

Ɓe njahri Yeesu haa Pilaatu

(Markus 15:1; Luka 23:1-2; Yuhanna 18:28-32)

1Fajiri cub, mawɓe liman'en e ndotti'en Yahuudu'en fuu ndawri mbarugo Yeesu. 2Ɓe kaɓɓi mo, ɓe njahri mo haa ngomna Pilaatu.

Maayde Yahuuda

(Kuuɗe Nelaaɓe 1:18-19)

3Nde Yahuuda, zammbiiɗo Yeesu yi'i ɓe ndo'i Yeesu kiita, o mimsiti, o wartiri ceede cardi cappanɗe tati go haa mawɓe liman'en e ndotti'en. 4O wi'i ɓe: “Mi waɗi hakke, ngam mi zammbi goɗɗo mo walaa aybe.” Ammaa ɓe mbi'i mo: “Walaa ko yaali min! Ɗum haala maaɗa!” 5Yahuuda wudini ceede go nder haykaliiru. Nden o dilli, o ɓili hoore maako.

6Mawɓe liman'en koo'i ceede go, ɓe mbi'i: “Tawreeta duŋanaaki en nastingo ceede ɗe'e nder ndesaari haykaliiru, ngam ɗum ceede ƴiiƴam.” 7Ɓe ndawri, ɓe coodi ngesa mahoowo payanɗe bee maaje, ngam uwugo jananɓe ton. 8Ngam maajum ɓe ɗon ewno ngesa man Ngesa-ƴiiƴam haa wargo hannde#KN 1:18-19.. 9Bana nii ko annabi Yeremiya wi'i, hiɓɓi: “Ɓe koo'i ceede cardi cappanɗe tati, coggu ngu yimɓe Isra'iila ndarni ngam maako, 10ɓe coodi ngesa mahoowo payanɗe, bana Jawmiraawo umrino yam#Zek 11:12-13..”

Pilaatu linyi haala Yeesu

(Markus 15:2-5; Luka 23:3-5; Yuhanna 18:33-38)

11Ɓe ndarni Yeesu yeeso Pilaatu ngomnaajo. Nden o ƴami mo: “An woni laamiiɗo Yahuudu'en na?” Yeesu jaabi mo: “Nonnon, bana mbi'ɗa.” 12Ammaa yaake mawɓe liman'en e ndotti'en ngulli mo, o jaabaaki sam. 13Nden Pilaatu ƴami mo: “A nanaay gullaali ɗi ɓe ngulli ma fuu na?” 14Ammaa Yeesu jaabaaki mo koo wolde woore, haa ngomnaajo hayɗini masin.

Yeesu hiitaama kiita mbareego

(Markus 15:6-15; Luka 23:13-25; Yuhanna 18:39-40; 19:1-16)

15Nde juulde Paska waɗi fuu, ngomna woowi yoofango ummaatoore kaɓɓaaɗo gooto haa fursina#27:15 Fursina malla yaŋgada. mo yimɓe ngiɗi fuu. 16Saa'i man woodino kaɓɓaaɗo nanaaɗo, innde maako Barabbas. 17Nden Pilaatu ƴami yimɓe mooɓtiiɓe: “Moy on ngiɗi mi yoofana on? Barabbas naa malla Yeesu bi'eteeɗo Almasiihu?” 18Ngam o anndi ɓe njahri Yeesu haa maako daliila kaajal.

19Saa'i Pilaatu ɗon jooɗi haa leeso kiita, debbo maako neli goɗɗo haa maako, wi'i mo: “Taa waɗ gorko adiliijo oo koo ɗume. Ngam jemmaare nde'e mi hoyɗi dow haala maako, ɗum ɓilli yam masin.”

20Mawɓe liman'en e ndotti'en irni mooɓe fuu haa ɓe ƴama o yoofa Barabbas, o mbara Yeesu. 21Ngomna ƴami ɓe fahin: “Moy caka yimɓe ɗiɗo ɓe'e on ngiɗi mi yoofana on?” Ɓe njaabi mo: “Yoofan min Barabbas!” 22O ƴami ɓe: “Ɗume mi waɗata Yeesu bi'eteeɗo Almasiihu kadi?” Ɓe njaabi ɓe fuu: “Ɓil mo dow leggal gaafaaŋgal!” 23Pilaatu ƴami ɓe: “Halleende ndeye o waɗi?” Ammaa ɓe ɓesdi wookugo bee sawtu, ɓe mbi'i: “Ɓil mo haa leggal gaafaaŋgal!” 24Nde Pilaatu yi'i o waawataa waɗugo koo ɗume, hoolo boo ɗon ɓesdo, o hoo'i ndiyam, o looti juuɗe maako yeeso mooɓre nde'e, o wi'i: “Mi laaɓɗo e ƴiiƴam goɗɗo oo, ɗum haala mooɗon#TT 21:6-9.!” 25Ummaatoore fuu wi'i: “Ƴiiƴam maako yowo dow amin e ɓiɓɓe amin!” 26Nden Pilaatu yoofani ɓe Barabbas, o umri ɓe, ɓe ɓocci Yeesu, o hokki mo haa juuɗe maɓɓe ngam haa ɓe ɓila mo haa leggal gaafaaŋgal.

Sooje'en njanci Yeesu

(Markus 15:16-20; Yuhanna 19:2-3)

27Sooje'en Pilaatu ngomnaajo njahri Yeesu haa laamorde, sooje'en wonɓe nder yeɓre woore fuu mooɓti dow maako. 28Ɓe ɓorti mo, ɓe moji mo mojaare woɗeere, 29ɓe mbaɗi meetaleewol gi'e, ɓe njo'ini ngol dow hoore maako, ɓe ndokki mo sawru haa juŋngo maako nyaamo. Nden ɓe tuggi koppi yeeso maako, ɓe njanci mo, ɓe mbi'i: “Allah woonane, laamiiɗo Yahuudu'en!” 30Ɓe tuuti mo tuuɗe, ɓe njaɓti sawru haa juŋngo maako go, ɓe piyi mo bee maaru haa hoore. 31Nde ɓe timmini jancugo mo, ɓe ɓorti mo mojaare go, ɓe ɓorni mo limce maako, ɓe njahri mo ngam haa ɓe ɓila mo dow leggal gaafaaŋgal.

Gaafeeki Yeesu

(Markus 15:21-32; Luka 23:26-43; Yuhanna 19:17-27)

32Nde ɓe ɗon ngurto, ɓe potti bee goɗɗo Sirene, innde maako Simon. Ɓe ndooli mo roondaago gaafaaŋgal Yeesu. 33Ɓe njotti haa nokkuure wi'eteende Golgota, bana wi'go Gumbal-hoore. 34Ton ɓe ndokki mo inaboojam njillindiraaɗam bee ndiyam kaaɗɗam, ngam haa o yara. Ammaa nde Yeesu metti ɗam, o sali yarugo.

35Ɓe ɓili mo haa leggal gaafaaŋgal. Ɓe cenndi limce maako hakkunde maɓɓe bee waɗugo kur'u#Jab 22:19.. 36Nden ɓe njooɗi ton, ɓe ayni mo. 37Ɓe mbinndi daliila kiita maako dow alluha, ɓe ɓili ka haa dow hoore maako: “Oo woni Yeesu, laamiiɗo Yahuudu'en.” 38Ɓe ɓildi fasooɓe ɗiɗo bee maako, gooto haa nyaamo maako, gooto boo haa nano maako.

39Saalotooɓe ton ndimmbini ko'e muuɗum'en, kuɗi mo#Jab 22:8; 109:25., 40mbi'i: “A wi'no a yibbinan haykaliiru, a mahtoto ndu nder nyalɗe tati. Hisnu hoore ma! To a Ɓiɗɗo Allah, jippa leggal gaafaaŋgal#Mat 26:61; Yuh 2:19.!” 41Mawɓe liman'en e moodiɓɓe tawreeta e ndotti'en boo njanci mo, mbi'i: 42“O hisni yimɓe feere, o waawataa hisnugo hoore maako. Naa o laamiiɗo Isra'iila na? Sey o jippo jonta diga leggal gaafaaŋgal haa en nuɗɗina mo. 43O ɗon hooli Allah, o wi'i o Ɓiɗɗo maako. Booɗɗum, sey en ndaara to Allah yiɗi hisnugo mo jonta#Jab 22:9.!” 44Fasooɓe ɓildaaɓe bee maako boo kallini mo bana non.

Maayde Yeesu

(Markus 15:33-41; Luka 23:44-49; Yuhanna 19:28-30)

45Diga caka nyalawma nyiɓre waɗi dow lesdi fuu, haa yotti saa'a tati. 46Deydey saa'a tati Yeesu hooli bee sawtu, wi'i: “Eli, Eli, lema sabaktani?” Bana wi'go: “Yaa Allah am, yaa Allah am, ngam ɗume a wudini yam#Jab 22:2.?” 47Woɗɓe dariiɓe ton nani ɗum, mbi'i: “O ɗon ewno Eliya!” 48Gooto maɓɓe doggi law, hoo'i irin sooso, suuwi ɗum nder lammuɗam, o ɓaŋgti ɗum bee loosol haa hunnduko Yeesu haa o yara#Jab 69:22.. 49Ammaa woɗɓe mbi'i: “Sey en ndeena haa en ndaara to Eliya waran ngam hisnugo mo.” 50Yeesu hooli bee sawtu fahin, nden o maayi.

51Wakkati man wiirndallo nder haykaliiru seeki caka cak, diga dow haa les. Lesdi dimmbi, tapaaje ceeki#Gurt 26:31-33., 52genaale maɓɓiti, senaaɓe maaynooɓe ɗuuɗɓe ummiti diga maayde. 53Ɓe ngurti genaale ɓaawo ummitineeki Yeesu, ɓe nasti nder berniwol ceniiŋgol, ɓe mbaŋgani yimɓe ɗuuɗɓe.

54Nde ardiiɗo dow sooje'en Roma teemerre e aynooɓe woɗɓe wonduɓe bee muuɗum ngi'i dimmbannde lesdi bee ko waɗi fuu, ɓe kultori masin, ɓe mbi'i: “Fakat, kaŋko woni Ɓiɗɗo Allah!” 55Rewɓe ɗuuɗɓe ɗonno ton, ɓe ndari daayiiɗum, ɓe ɗon ndaara, ɓe tokkino Yeesu diga lesdi Galiili ngam huuwango mo. 56Mariyama mo wuro Magdala e Mariyama, daada Yaakuba e Yusufu e daada ɓiɓɓe Zebede ɗon nder maɓɓe#Lk 8:2-3..

Uweeki Yeesu

(Markus 15:42-47; Luka 23:50-56; Yuhanna 19:38-42)

57Nde kiikiiɗe waɗi, goɗɗo diskuɗo mo wuro Arimatiya wari. Innde maako Yusufu, kaŋko boo o pukaraajo Yeesu. 58O yehi haa Pilaatu, o ƴami mo ɓanndu Yeesu. Pilaatu umri ɓe ndokka mo ndu. 59Yusufu hoosi ndu, hasni ndu bee kasa kesa. 60Nden o wallini ndu nder yenaande hesre nde o wasino nder tapaare ngam hoore maako. O talli hayre mawnde, o maɓɓi yenaande go bee maare, o dilli. 61Mariyama mo Magdala e Mariyama goɗɗo ɗon njooɗi ton, ɗon tiiti yenaande.

Aynooɓe yenaande

62Jaŋngo man, ɓaawo nyalaade taaskara, mawɓe liman'en e Farisa'en kawti, njehi haa Pilaatu. 63Ɓe mbi'i mo: “Barkaama, min ciftori, nde pewoowo oo geetono, o wi'i: Ɓaawo nyalɗe tati mi ummititto diga maayde#Mat 16:21; 17:23; 20:19; Mk 8:31; 9:31; 10:33-34; Lk 9:22; 18:31-33.. 64Ndikka a umra ɓe ayna yenaande maako nyalɗe tati, ngam taa pukara'en maako ngara, ngujja ɓanndu maako, nden ɓe mbi'a ummaatoore: O ummitake diga maayde. Fewre ɓaawoore nde'e ɓuran aranndeere hallugo.” 65Pilaatu wi'i ɓe: “Ndaa sooje'en. Njehe, ayne yenaande bana on mbaawi fuu.” 66Ɓe njehi, ɓe ayni yenaande, ɓe mbaɗi lammba ngomna dow hayre nde ɓe maɓɓiri yenaande. Ɓe ndarni sooje'en aynooɓe ton.

Currently Selected:

Matta 27: FB

Highlight

Compare

Copy