Matta 26

Sawari ngam naŋngugo Yeesu

(Markus 14:1-2; Luka 22:1-2; Yuhanna 11:45-53)

1Nde Yeesu timmini wolwugo bolle ɗe'e fuu, o wi'i pukara'en maako: 2“On anndi lutti nyalɗe ɗiɗi haa juulde Paska waɗa. Ɓe ndokkan Ɓii-neɗɗo ngam ɓilugo mo dow leggal gaafaaŋgal#Gurt 12:1-26..”

3Saa'i man mawɓe liman'en e ndotti'en ummaatoore kawti haa saare Kayafas, hooreejo liman'en. 4Ɓe carwootiri haa ɓe ƴoyra Yeesu, ɓe naŋnga mo, ɓe mbara mo. 5Ammaa ɓe mbi'i: “Taa en mbaɗa ɗum wakkati juulde, ngam taa ɗum ummina fitina caka ummaatoore.”

Debbo rufi nebbam dow hoore Yeesu

(Markus 14:3-9; Yuhanna 12:1-8)

6Yaake Yeesu ɗonno haa Baytaniya nder saare Simon, kuturuujo, 7debbo feere ɓaditi mo. O ɗon jogi faandu saɗndu heewndu uurdi marndi saman masin. O rufi ndi dow hoore Yeesu saa'i o ɗonno nyaama#Lk 7:37-38.. 8Nde pukara'en ngi'i ɗum, ɓe ɓerni, ɓe mbi'i: “Wonnuru meere, ko ɗum nafi! 9To ɓe coorrino uurdi man, ɓe keɓanno ceede ɗuuɗɗe, haa ɓe ndokka ɗe talaka'en.” 10Nde Yeesu anndi ko ɓe mbolwata, o wi'i ɓe: “Koni on ɗon pitina debbo oo? O huuwani yam kuugal booɗŋgal. 11Ngam talaka'en ngondan bee mooɗon foroy, ammaa min, mi wondataa bee mooɗon foroy#TT 15:11.. 12O rufi uurdi dow ɓanndu am ngam uweeki am. 13Gooŋga mbi'anmi on: Haa ɓe ngaazoto Linjiila ka'a nder duniyaaru fuu, ɓe mbolwan ko debbo oo waɗi, ngam siftorgo mo.”

Yahuuda zammbi Yeesu

(Markus 14:10-11; Luka 22:3-6)

14Nden gooto nder pukara'en sappo e ɗiɗo mo innde muuɗum Yahuuda Iskariyot, yehi haa mawɓe liman'en. 15O wi'i ɓe: “Ɗume on ndokkatammi to mi hokki on Yeesu?” Ɓe limani mo ceede cardi cappanɗe tati. 16Diga saa'i man Yahuuda fuɗɗi tefugo saa'iire fottannde haa o hokka ɓe Yeesu.

Yeesu nyaamdi bee pukara'en muuɗum nyaamdu Paska

(Markus 14:12-21; Luka 22:7-14,21-23; Yuhanna 13:21-30)

17Nder nyalaade go'oore juulde tamseeje ɗe ufnaaka, pukara'en Yeesu ɓaditi, ƴami mo: “Haa toy a yiɗi min mbaɗa taaskara kiirtaari Paska?” 18Nden Yeesu wi'i ɓe: “Njehe nder berniwol, haa wayne, mbi'e mo: Moodibbo wi'i: Wakkati am wari, mi yiɗi waɗugo juulde Paska bee pukara'en am haa saare maaɗa.” 19Pukara'en mbaɗi ko Yeesu umri ɓe, ɓe taaskitini kiirtaari Paska.

20Nde kiikiiɗe waɗi, Yeesu jooɗodi bee pukara'en muuɗum sappo e ɗiɗo ngam haa ɓe nyaama. 21Nde ɓe ɗon nyaama, Yeesu wi'i: Gooŋga mbi'anmi on: “Gooto mooɗon zammboto yam.” 22Ɗum suni pukara'en masin, koo moy maɓɓe fuɗɗi ƴamugo mo: “Naa ɗum min sika, Jawmiraawo?” 23Yeesu jaabi: “Mo ɗon suuwa juŋngo mum bee am nder le'al jonta, kaŋko zammboto yam#Jab 41:10.. 24Gooŋga Ɓii-neɗɗo maayan bana ko winnda dow maako. Ammaa bone laatanto mo zammboto Ɓii-neɗɗo, to o danyaakano, ɓurananno mo.” 25Yahuuda zammbotooɗo mo ƴami: “Naa ɗum min sika, Moodibbo?” Yeesu jaabi mo: “Bana mbi'ɗa, ɗum an!”

Kiirtaari ceniindi

(Markus 14:22-26; Luka 22:15-20; 1 Korintu'en 11:23-25)

26Nde ɓe ɗon nyaama, Yeesu hoo'i tamseere, o yetti Allah, o yewi nde, o hokki pukara'en maako, o wi'i ɓe: “Koo'e ɗum, nyaame, ɗum ɓanndu am.” 27Nden o hoo'i jardugel, o yetti Allah, o hokki ɓe, o wi'i: “Njare on fuu, 28ngam ɗum ƴiiƴam am, ndufaaɗam ngam yaafuye hakkeeji yimɓe ɗuuɗɓe, bee maajam Allah tabitiniri alkawal muuɗum#Gurt 24:8; Yer 31:31-34.. 29Mi ɗon wi'a on: Yeeso ɗo, mi meetataa yarugo inaboojam ɗa'am sam, haa nyannde njardanmi kesam bee mooɗon nder laamu Baabiraawo am.” 30Nden ɓe ngimi gime maŋgtooje, ɓe ndilli haa Hooseere Jaytunje.

Yeesu e Piyer

(Markus 14:27-31; Luka 22:31-34; Yuhanna 13:36-38)

31Dow laawol Yeesu wi'i pukara'en muuɗum: “Jemmaare nde'e on accatam on fuu. Ngam Deftere wi'i: Mi mbaran gaynaako, tokkere baali boo saŋkititto#Zek 13:7.. 32Ammaa to mi ummitake, mi aartan on yahugo lesdi Galiili#Mat 28:16..” 33Piyer wi'i mo: “Koo to yimɓe fuu acci ma, min kam mi accataa ma sam!” 34Yeesu jaabi mo: “Gooŋga mbi'anmaami: Jemmaare nde'e, hiddeko asgumri#26:34 Asgumri malla agugumri. u'a, a wi'an nde tati a anndaa yam.” 35Piyer wi'i mo: “Mi meeɗataa wi'go mi anndaa ma koo to doole mi maayda bee maaɗa.” Pukara'en luttuɓe fuu mbi'i non.

Yeesu haa Gecemane

(Markus 14:32-42; Luka 22:39-46)

36Nden Yeesu wardi bee pukara'en muuɗum haa nokkuure wi'eteende Gecemane, o wi'i ɓe: “Njooɗe haa ɗo, haa mi waɗoya do'a haa to.” 37O yahdi bee Piyer e ɓiɓɓe Zebede ɗiɗo, o fuɗɗi sunaago e maatugo torra nder ɓernde maako. 38Nden o wi'i ɓe: “Torra ɓernde am yiɗi mbarugo yam. Tokke jooɗaago haa ɗo, ayne bee am.” 39O yehi yeeso seɗɗa, o hippi yeeso maako haa lesdi, o waɗi do'a bana ni'i: “Baabiraawo am, to ɗum heɓoto, daaynanam jardugel torra nge'el. Ammaa waɗ ko ngiɗɗa, naa ko ngiɗmi.”

40O lori haa pukara'en tato go, o tawi ɓe ɗaanake. O wi'i Piyer: “On mbaawaay aynugo bee am koo saa'a ngoota! 41Ayne, tore, ngam taa on nasta jarribeeki. Ko ruuhu neɗɗo yiɗi, ɓanndu muuɗum waawataa waɗugo ɗum, ngam ndu tampundu.”

42O yehi ɗiɗawre, o waɗi do'a bana ni'i: “Baabiraawo am, to heɓataako jardugel ngel daayo, accammi, nden kam sey mi yara ngel, muuyo maaɗa laato.” 43O lorti haa pukara'en maako fahin, o tawi ɓe ɓe ɗon ɗaani, ngam gite maɓɓe teddi. 44O acci ɓe, o yehi fahin, o waɗi do'a kal-kal bana naane. 45Nden o lorti haa pukara'en maako, o wi'i ɓe: “On ɗon ɗaani haa jonta na? On ɗon ciwto na? Ndaa saa'i waɗi haa ɓe ndokka Ɓii-neɗɗo haa juuɗe marɓe hakke. 46Umme, ndillen! Ndaa zammbotooɗo yam ɓaditake.”

Naŋngeeki Yeesu

(Markus 14:43-50; Luka 22:47-53; Yuhanna 18:3-12)

47Diga Yeesu timminaay wolwugo tawon, Yahuuda, gooto nder pukara'en sappo e ɗiɗo wari. Yimɓe ɗuuɗɓe ngardi bee maako, ɓe ɗon njogi kaafaaje e cabbi. Mawɓe liman'en e ndotti'en Yahuudu'en neli ɓe. 48Yahuuda, zammbotooɗo Yeesu, hokkuno ɓe alaama, wi'i: “Mo mi hebbata, ɗum kaŋko, naŋnge mo.” 49Law Yahuuda ɓaditi Yeesu, wi'i mo: “Sannu, moodibbo!” Nden o hebbi mo. 50Yeesu wi'i mo: “Soobaajo, timmin ko waddu ma haa ɗo.” Nden yimɓe ɓaditi, ukki dow Yeesu, naŋngi ɗum. 51Gooto nder wonduɓe bee Yeesu losi kaafahi muuɗum, fe'i suka hooreejo liman'en, ta'i mo nofru. 52Ammaa Yeesu wi'i mo: “Waatu kaafahi maaɗa haa suudu maaki! Ngam hoosanɓe kaafahi kalkiran bee maaki. 53Malla a anndaa mi waawanno toraago Baabiraawo am ballal, kaŋko boo o neldanno yam mooɓe malaa'ika'en mawɗe sappo e ɗiɗi na? 54Ammaa to non kam, noy ko winnda nder Defte Ceniiɗe gooŋɗirta? Ngam ɗe mbi'i sey ɗum laato bana nii.”

55Saa'i man, Yeesu wi'i ɓe: “On ngari naŋngugo yam bee kaafaaje e cabbi bana mi pasoowo! Tum mi ɗonno jooɗi nder haykaliiru, mi ɗonno ekkitina yimɓe, on naŋngaay yam#Lk 19:47; 21:37.! 56Ammaa ɗum fuu ɗum waɗi ngam haa ko winnda nder defte annabi'en ngooŋɗa.” Nden pukara'en fuu acci mo, ndoggi.

Ndotti'en kiiti Yeesu

(Markus 14:53-65; Luka 22:54-55,63-71; Yuhanna 18:13-14,19-24)

57Naŋnguɓe Yeesu njahri mo haa saare Kayafas, hooreejo liman'en. Moodiɓɓe tawreeta e Ndotti'en ɗon mooɓi ton. 58Piyer tokki Yeesu haa daayiiɗum, haa yotti daldal saare hooreejo liman'en. O nasti saare, o jooɗodi bee aynooɓe ton, haa o laara no ɗum timmirta.

59Mawɓe liman'en e hiitooɓe nder dawriinde fuu ɗaɓɓi wullaandu dow Yeesu haa ɓe ndo'a mo kiita maayde. 60Ammaa ɓe keɓaay, koo nde seedooɓe fewooɓe ɗuuɗɓe ngari. Ɓaawoɗon yimɓe ɗiɗo ngari, 61mbi'i: “Goɗɗo oo wi'no: Mi waawan yibbingo haykaliiru Allah, mi mahita ndu nder nyalɗe tati#Yuh 2:19..”

62Hooreejo liman'en ummi, wi'i Yeesu: “A jaabataako koo ɗume na? Ko mbi'ɗa dow gullaali wulliiɓe ma ɓe'e?” 63Ammaa Yeesu jeeɗi. Nden hooreejo liman'en wi'i mo: “Mi ɗon hunne bee innde Allah geeto, wi' min: An woni Almasiihu, Ɓiɗɗo Allah na?” 64Yeesu wi'i mo: “Nonnon, bana mbi'ɗa. Ammaa mi ɗon wi'a on: Yeeso ɗo, on ngi'an Ɓii-neɗɗo ɗon jooɗi haa nyaamo Allah Baawɗo. On ngi'an mo boo o ɗon wara dow duule asama#Dan 7:13..” 65Nden hooreejo liman'en seeki limce muuɗum, wi'i: “O wolwi kalluka dow Allah! En ngalaa haaje seedooɓe feere, kalluka ka on nani jonta he'i. 66Ko mbi'ɗon?” Ɓe njaabi mo: “O he'i mbareego#FL 24:16..”

67Nden ɓe tuuti mo tuuɗe haa yeeso, ɓe lukki mo bee juuɗe, ɓe maari mo, 68ɓe mbi'i: “An Almasiihu, heɓtu mo fiyi ma, to a annabiijo#Esa 50:6.!”

Piyer wi'i anndaa Yeesu

(Markus 14:66-72; Luka 22:56-62; Yuhanna 18:15-18,25-27)

69Piyer ɗonno jooɗi haa daldal saare go, nden korɗo hooreejo liman'en wari haa maako, wi'i mo: “An boo a ɗonno wondi bee Yeesu mo Galiili.” 70Ammaa Piyer yeddi ɗum yeeso yimɓe fuu, wi'i: “Mi anndaa ko a yiɗi wi'go.”

71Nde o yehi gal dammugal zawleeru, debbo feere yi'i mo, wi'i yimɓe wonɓe ton: “Goɗɗo oo ɗonno wondi bee Yeesu mo Nasaratu.” 72Piyer yeddi fahin, wi'i: “Mi hunake, gooŋga mi anndaa mo.” 73Yeeso seɗɗa, yimɓe dariiɓe ton ngari haa Piyer, ɓe mbi'i mo: “Fakat a gooto maɓɓe, ɗemŋgal maaɗa ɗon waŋgina ɗum bee laaɓɗum.” 74Nden Piyer wi'i: “Allah hiito yam to mi fewi. Mi hunake, gooŋga mi anndaa gorko oo!” Saa'i man nden, asgumri#26:74 Asgumri malla agugumri. u'i. 75Piyer siftori ko Yeesu wi'no mo: “Hiddeko asgumri u'a, a wi'an nde tati a anndaa yam.” O wurti haa yaasi, o woyi masin.

Currently Selected:

Matta 26: FB

Highlight

Compare

Copy