Matta 28
28
Ummitineeki Yeesu
(Markus 16:1-10; Luka 24:1-12; Yuhanna 20:1-10)
1Ɓaawo nyannde siwtorde, Alat subaha, Mariyama mo Magdala e Mariyama goɗɗo njehi laarugo yenaande. 2Dimmbannde lesdi mawnde waɗi, ngam malaa'ikaajo Jawmiraawo jippi diga asama, ɓaditi, talli hayre go, jooɗi dow maare. 3Jaati maako ɗon yayna bana ma'ere, limce maako boo daneeje bana hottollo. 4Nde aynooɓe ngi'i mo, ɓe kultori masin, ɓe ndiwtori, ɓe laati bana maayɓe.
5Malaa'ikaajo wi'i rewɓe: “Taa kultore onon kam, ngam mi anndi on ɗon ɗaɓɓita Yeesu gaafaaɗo. 6O walaaɗon haa ɗo, o ummitake diga maayde bana o wi'no. Ngare, ndaare nokkuure haa o waalino. 7Nden njehe law, mbi'e pukara'en maako: O ummitake diga maayde, o aartan on yahugo lesdi Galiili, on ngi'an mo ton. Kanjum ngeccumi on!”
8Rewɓe ndilli diga yenaande bee jaawal, ɓerɗe maɓɓe keewi kulol e seyo maŋngo. Ɓe ndoggi, ɓe njahri habaru man haa pukara'en Yeesu. 9Nden Yeesu fotti bee maɓɓe, wi'i: “Mi hoofni on!” Rewɓe ɓaditi mo, naŋngi kosɗe maako, cujidani mo. 10Nden Yeesu wi'i ɓe: “Taa kultore! Njehe, anndine deerɗam'en, ɓe njaha haa lesdi Galiili, ton ɓe ngi'atammi!”
Nyo'ooɓe ummitineeki Yeesu
11Nde rewɓe go ɗon ndilla, woɗɓe nder sooje'en aynooɓe yenaande go njehi nder berniwol. Ɓe ngecci mawɓe liman'en ko waɗi fuu. 12Mawɓe ɓe'e carwootiri bee ndotti'en. Nde ɓe narri, ɓe ndokki sooje'en go ceede ɗuuɗɗe, 13ɓe mbi'i ɓe: “Mbi'e: Pukara'en maako ngari jemma, ɓe ngujji ɓanndu maako saa'i min ɗonno ɗaani. 14To ngomna nani haala ka, min keɓtan dabare de'itingo mo, min kisnan on bone fuu.” 15Sooje'en go njaɓi ceede man, mbaɗi bana ɓe tinndini ɓe. Geccawol ngol saŋkiti caka Yahuudu'en haa wargo hannde.
Yeesu waŋgani pukara'en muuɗum
(Markus 16:14-18; Luka 24:36-49; Yuhanna 20:19-23; Kuuɗe Nelaaɓe 1:6-8)
16Pukara'en sappo e go'o ndilli haa lesdi Galiili, haa hooseere nde Yeesu umruno ɓe ɓe njaha ton#Mat 26:32; Mk 14:28.. 17Nde ɓe ngi'i mo, ɓe cujidani mo, ammaa woɗɓe maɓɓe ceki. 18Yeesu ɓaditi ɓe, wi'i: “Baawɗe haa asama e dow lesdi fuu ndokkaama yam. 19Ndille haa yimɓe ummaatooje fuu, mbaɗe ɓe pukara'en am, mbaɗane ɓe baptisma bee innde Baabiraawo e Ɓiɗɗo e Ruuhu Ceniiɗo#KN 1:8.. 20Ekkitine ɓe haa ɓe tokko ko mi umri on fuu. Min mi ɗon wondi bee mooɗon nyalɗe fuu haa yotto timmuki duniyaaru.”
Currently Selected:
Matta 28: FB
Highlight
Share
Compare
Copy
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.
