Matta 13
13
Balndol dow demoowo
(Markus 4:1-9; Luka 8:4-8)
1Nyalaade man Yeesu wurti saare, yehi, jooɗi haa fomoonde weendu. 2Mooɓe ɗuuɗɗe ngari haa maako. Ngam man o nasti koommbowal#13:2 Koommbowal malla laanawal., o jooɗi nder maagal, mooɓre boo dari haa fomoonde#Lk 5:1-3.. 3O ekkitini nde kuuje ɗuuɗɗe bee balndi.
O wi'i ɓe: “Demoowo yehi ngesa ngam saakoygo. 4Nde o ɗon saaka, aawdi ngoɗndi soli dow laawol, colli ngari, cuɓti ndi. 5Aawdi ngoɗndi saami haa korka'e, haa lesdi ɗuuɗaay. Ndi fuɗi law ngam lesdi luggaay. 6Nde naaŋge fuɗi, nge wuli fuɗŋgooji, ɗi njoori ngam ɗi ngalaa ɗaɗi. 7Aawdi ngoɗndi soli caka gi'e. Gi'e mawnidi bee maari, ɓilli ndi. 8Ammaa aawdi ngoɗndi soli haa lesdi mboondi, ndi nafi, waɗi cammeeje: Goɗɗe ɗon bee gabbe teemerre, goɗɗe bee cappanɗe joweego, goɗɗe boo bee cappanɗe tati.” 9Mo woodi noppi fuu, nana!
Ngam ɗume Yeesu huuwtiniri balndi?
(Markus 4:10-12; Luka 8:9-10)
10Ɓaawoɗon pukara'en ngari haa Yeesu, ƴami mo: “Ngam ɗume a ɗon wolwana yimɓe bee balndi?” 11O jaabi ɓe: “Onon, Allah anndini on sirriiji laamu mum, ammaa kamɓe ɓe anndinaaka. 12Ngam marɗo huunde, ɓe ɓesdanan mo haa o wona nder jeynitaare, ammaa mo maraay koo ɗume, ɓe koocan koo peetum maako#Mat 25:29; Mk 4:25; Lk 8:18; 19:26.. 13Ngam man mi ɗon wolwana ɓe bee balndi. Ngam ɓe ɗon ndaara, ammaa ɓe ngi'ataa. Ɓe ɗon nana, ammaa ɓe paamataa sam. 14Bana nii annabaaku Esaaya gooŋɗiri ngam maɓɓe, o wi'no:
On nanan bee noppi mon, ammaa on paamataa sam,
on ndaaran bee gite mon, ammaa on ngi'ataa koo ɗume.
15Ngam ɓerɗe yimɓe ɓe'e maatataa koo ɗume,
ɓe cukki noppi maɓɓe,
ɓe maɓɓi gite maɓɓe, ngam taa ɓe ngi'a,
taa ɓe nana,
taa ɓe paama,
taa ɓe tuuba boo, ngam taa min mi yamɗitina ɓe#Esa 6:9-10..
16Ammaa onon, barka woodani gite mon ngam ɗe ɗon ngi'a, barka woodani noppi mon boo ngam ɗi ɗon nana. 17Gooŋga mbi'anmi on: Annabi'en e adili'en ngiɗno yi'ugo ko ngi'oton, ammaa ɓe ngi'aay, ɓe ngiɗno nanugo ko nanoton, ammaa ɓe nanaay#Lk 10:23-24..”
Sifa balndol dow demoowo
(Markus 4:13-20; Luka 8:11-15)
18“Onon, nane sifa balndol demoowo go. 19Yimɓe woɗɓe nani habaru laamu asamanji, ammaa ɓe paamaay. Kamɓe ɓe nanndi bee aawdi colndi haa laawol, ngam kalluɗo waran, wifto ko saaka nder ɓerɗe maɓɓe. 20Woɗɓe nanndi bee aawdi colndi haa korka'e. Kamɓe, to ɓe nani wolde Allah, law ɓe njaɓa nde bee seyo. 21Ammaa ɓe ngalaa ɗaɗi, ɓe tabitittaa, ngam to ɓillaare e toonyaare ukkanake ɓe daliila wolde Allah, ɓe accan nuɗɗinki law. 22Woɗɓe boo nanndi bee aawdi caka gi'e. Kamɓe, to ɓe nani wolde Allah, laruuraaji e esto risku ɓiɗɗan wolde man, nde waɗataa nafuuda sam. 23Ammaa woɗɓe nanndi bee aawdi colndi haa lesdi mboondi. Kamɓe, to ɓe nani wolde Allah, ɓe paami nde, ɓe mbaŋginan ɓenndalooje: Woɗɓe cowi teemerre, woɗɓe cappanɗe joweego, woɗɓe boo cappanɗe tati.”
Balndol geene caka alkamaari
24Yeesu wolwani ɓe balndol feere, o wi'i: “Laamu asamanji nanndi bee goɗɗo mo saaki aawdi mboondi waato alkamaari nder ngesa muuɗum. 25Jemmaare feere, nde yimɓe fuu ɗon ɗaani, ganyo maako wari, saaki aawdi geene caka alkamaari maako, dilli. 26Nde alkamaari mawni, waɗi cammeeje, geene boo mbaŋgi. 27Huuwooɓe jawmu ngesa ngari, mbi'i mo: Jaagorɗo, naa alkamaari a saaki nder ngesa maaɗa na? Ko waɗi geene boo mbaŋgi ton? 28O wi'i ɓe: Ganyo am waɗi ɗum. Huuwanooɓe ƴami mo: Nden kam a yiɗi min ɗoofa ɗe na? 29O jaabi ɓe: Aa'a, ngam to on ɗon ɗoofa ɗe, on ɗoofdan alkamaari bee maaje. 30Acce ɗum fuu ɗum mawnida haa wakkati codol. Saa'i man mi wi'an sodooɓe: Aarte mooɓtugo geene, kaɓɓe ɗe, ngule ɗe. Ammaa alkamaari kam, mooɓtaneeɗam ndi haa beembal am.”
Balndol aawdi citta
(Markus 4:30-32; Luka 13:18-19)
31Yeesu wolwani ɓe balndol feere boo, o wi'i: “Laamu asamanji nanndi bee gawel citta ndi goɗɗo hoo'i, saaki nder ngesa muuɗum. 32Ndi ɓuri aawdiiji fuu famɗugo, ammaa to ndi fuɗi, ndi ɓuran haakooji goɗɗi fuu mawnugo, ndi laatoto lekki, haa colli ngara, mbaɗa caɓɓe maaji dow lice maaki.”
Balndol ufnirɗum
(Luka 13:20-21)
33Yeesu wolwani ɓe balndol feere fahin, o wi'i: “Laamu asamanji nanndi bee ufnirɗum. Debbo hoo'i ɗum, waati ɗum nder kuroori etirɗe tati, kuroori man fuu ƴuufi.”
No Yeesu huuwtiniri balndi
(Markus 4:33-34)
34Kuuje ɗe'e fuu Yeesu wolwani yimɓe bee balndi, o wolwani ɓe koo ɗume fuu bee balndi, 35ngam hiɓɓingo annabaaku Esaaya. Kaŋko o wi'i:
“Mi wolwan bee balndi,
mi anndinan ɓe kuuje cuuɗiiɗe diga tageeki duniyaaru#Jab 78:2..”
Sifa balndol geene caka alkamaari
36Nden Yeesu acci yimɓe, nasti saare. Pukara'en ngari haa maako, mbi'i mo: “Sifana min balndol geene nder ngesa alkamaari go.” 37O wi'i ɓe: “Mo saaki aawdi mboondi, kaŋko woni Ɓii-neɗɗo. 38Ngesa ɗum duniyaaru, alkamaari ɗum yimɓe laamu asamanji, geene boo ɗum tokkiiɓe Kalluɗo. 39Ganyo mo saaki ɗe boo, ɗum Sayɗaanu, saa'i codol ɗum timmuki duniyaaru, sodooɓe boo ɗum malaa'ika'en. 40Bana ɓe mooɓtirta geene, ɓe ngula ɗe bee yiite, bana non ɗum laatoto haa timmuki duniyaaru boo. 41Ɓii-neɗɗo nelan malaa'ika'en muuɗum, ɓe ngurtina diga laamu maako nastinɓe yimɓe nder hakke e halluɓe fuu, 42ɓe ngudina ɓe nder yiite ɓolinirde. Haa ton ɓe mboyan, ɓe kirƴindiran nyii'e. 43Ammaa saa'i man adili'en njaynan bana naaŋge nder laamu Baabiraawo muuɗum'en. Mo woodi noppi fuu, nana!”
Balndol jawdi nyukkiindi
44“Laamu asamanji nanndi bee jawdi ndi ɓe nyukkini nder ngesa. Mo tawi ndi, nyukkini ndi fahin. O seyi masin, o yehi, o soorri mardi maako fuu, o soodi ngesa man.”
Balndol luuluuri
45“Fahin, laamu asamanji nanndi bee piloowo ɗaɓɓanɗo luuluuje booɗɗe. 46Nde o tawi luuluuri marndi saman masin, o yehi, o soorri mardi maako fuu, o soodi ndi.”
Balndol zubaawol
47“Laamu asamanji nanndi boo bee zubaawol ngol waawooɓe ngubi nder weendu, ngol naŋngi liɗɗi feere feereeji. 48Nde ngol heewi, ɓe pooɗi ngol haa fomoonde, ɓe njooɗi, ɓe ngurtini liɗɗi. Liɗɗi booɗɗi ɓe ndesi ɗi nder cilaaje maɓɓe, ammaa kalluɗi, ɓe ngudini ɗi. 49Bana non ɗum laatoto haa timmuki duniyaaru boo: Malaa'ika'en ngaran, cenndan adili'en bee halluɓe, 50ɓe nguboto halluɓe nder yiite ɓolinirde. Haa ton ɓe mboyan, ɓe kirƴindiran nyii'e.”
Kuuje kese e kiiɗɗe
51Yeesu ƴami pukara'en muuɗum: “On paami bolle ɗe fuu na?” Ɓe njaabi mo: “Ooho, min paami.” 52Nden Yeesu wi'i ɓe: “Ngam maajum koo moy moodibboojo tawreeta, laatiiɗo pukaraajo, annduɗo haala laamu asamanji, nanndi bee jawmu saare, gurtinanɗo kuuje kese e kuuje kiiɗɗe diga ndesaari muuɗum.”
Yimɓe Nasaratu nuɗɗinaay Yeesu
(Markus 6:1-6; Luka 4:16-30)
53Nde Yeesu timmini wolwango yimɓe balndi ɗi'i, o ummi nokkuure man, 54o yehi haa berniwol ngol o mawni. O fuɗɗi ekkitingo yimɓe nder suudu dewal maɓɓe. Wonɓe ton kayɗini, mbi'i: “Moy hokki mo hikma ka e baawɗe waɗugo kaayeefiiji ɗi'i? 55Naa kaŋko woni ɓii cehoowo na? Naa Mariyama woni daada maako na? Naa Yaakuba e Yoses e Simon e Yahuuda ngoni deerɗiraaɓe maako na? 56Naa deerɗiraaɓe maako rewɓe boo ɗon ngondi bee meeɗen haa ɗo na? Noy o waawri waɗugo kuuje ɗe fuu?” 57Ngam maajum ɓe cali nuɗɗingo mo.
Nden Yeesu wi'i ɓe: “Ɓe teddinan annabiijo koo toy fuu, ammaa nder wuro muuɗum e caka yimɓe saare muuɗum ɓe teddintaa mo#Yuh 4:44..” 58Ngam daliila sooynde nuɗɗinki maɓɓe, Yeesu waɗaay kaayeefiiji ɗuuɗɗi ton.
Currently Selected:
Matta 13: FB
Highlight
Share
Compare
Copy
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.
