Matta 14

Maayde Yuhanna baɗoowo baptisma

(Markus 6:14-29; Luka 3:19-20; 9:7-9)

1Saa'i man Hirudus Antipas nani habaru Yeesu. 2O wi'i sukaaɓe maako: “Kaŋko woni Yuhanna baɗoowo baptisma, o ummitake diga maayde, ngam maajum o woodi baawɗe waɗugo kaayeefiiji.”

3Naane Hirudus umrino, ɓe naŋnga Yuhanna, ɓe kaɓɓa mo, ɓe nastina mo fursina#14:3 Fursina malla yaŋgada. daliila Hirudiya, debbo Filip deerɗum, 4ngam Yuhanna wi'no mo: “Haanaay a te'a Hirudiya#Lk 3:19-20.#FL 18:16; 20:21..” 5Hirudus yiɗino mbarugo Yuhanna, ammaa o huli mooɓre, ngam ɓe ɗon ndaara Yuhanna bana o annabiijo.

6Nyannde siftinorde danyeeki Hirudus, ɓiɗɗo Hirudiya debbo wami yeeso ewnaaɓe, ɗum fottani Hirudus. 7O hunani mo o hokkan mo ko o ƴami fuu. 8Daada maako loowi mo bolle, nden o wi'i: “Hokkam hoore Yuhanna baɗoowo baptisma nder le'al.” 9Ɗum suni laamiiɗo, ammaa daliila hunayeere nde o hunanino mo yeeso ewnaaɓe, o umri ɓe ndokka mo ko o ƴami. 10Hirudus neli goɗɗo haa suudu fursina, o yehi, o ta'i hoore Yuhanna. 11O waddi nde nder le'al, o hokki nde ɓiɗɗo debbo go, yahrani nde daada muuɗum. 12Pukara'en Yuhanna ngari, ɓe koosi ɓanndu maako, ɓe uwi ndu. Nden ɓe njehi, ɓe ngecci Yeesu ko laati.

Yeesu nyaamni yimɓe ujine njowo

(Markus 6:30-44; Luka 9:10-17; Yuhanna 6:1-14)

13Nde Yeesu nani habaru man, o ummi nokkuure man, o nasti koommbowal, o yehi ladde feere maako. Mooɓe nani ɗum, ɗe ngurti berniiji maaje, ɗe tokki mo bee kosɗe. 14Nde Yeesu wurti koommbowal, o yi'i mooɓre ɗuuɗnde, o yurmini nde, o yamɗitini nyawɓe maare.

15Nde kiikiiɗe waɗi, pukara'en Yeesu ngari haa maako, mbi'i mo: “Naaŋge hiiri, nokkuure nde'e boo nde ferewnde. Ndikka a jaɓɓito yimɓe, ɓe ndilla haa kawyeeji, ɓe coodana ko'e maɓɓe nyaamdu.” 16Yeesu jaabi: “Haanaay ɓe ndilla, ndokke ɓe nyaamdu, onon.” 17Ammaa ɓe mbi'i mo: “Min ngalaa koo ɗume, sey tamseeje jowi e liɗɗi ɗiɗi tan.” 18Yeesu wi'i ɓe: “Ngaddaneeɗam ɗum haa ɗo.” 19Nden o umri mooɓe njooɗo dow huɗo. O hoosi tamseeje jowi e liɗɗi ɗiɗi go, o tijji asama, o yetti Allah. O yewi tamseeje man, o hokki pukara'en, ɓe ndokka mooɓe. 20Ɓe fuu ɓe nyaami, ɓe kaari. Pukara'en mooɓti luttuɗum man, ɗum hebbini cilaaje sappo e ɗiɗi. 21Limgal nyaamɓe tamseeje dillani baakin worɓe ujine njowo, rewɓe e ɓikkoy limaaka.

Yeesu yehi dow ndiyam bee kosɗe

(Markus 6:45-52; Yuhanna 6:15-21)

22Nden law Yeesu dooli pukara'en muuɗum ɓe nasta koommbowal, ɓe aarta mo yahugo fomoonde gaɗaare, saa'i o ɗon jaɓɓito yimɓe. 23O jaɓɓiti ɓe, o wa'i dow hooseere ngam waɗugo do'a. Haa jemma waɗi, o ɗon ton feere maako. 24Nde koommbowal daayi masin bee fomoonde, henndu fuɗɗi ɓillugo ngal, ngam ngal ɗon fotta bee maaru. 25Gal subaha, Yeesu wari haa pukara'en muuɗum, o ɗon yaha dow ndiyam bee kosɗe. 26Nde pukara'en ngi'i mo o ɗon yaha dow ndiyam, ɓe cakli, ɓe mbi'i: “Ɗum ginnawol!” Ɓe ngooki ngam kulol. 27Law Yeesu wolwani ɓe, wi'i: “Tiɗɗine ɓerɗe mooɗon, taa kultore, ɗum min.” 28Piyer wi'i mo: “Yaa Jawmiraawo, to ɗum an kam, umru mi yaha haa maaɗa dow ndiyam.” 29Yeesu wi'i mo: “War.”

Piyer wurti koommbowal, fuɗɗi yahugo dow ndiyam, ngam haa o yotto haa Yeesu. 30Ammaa nde o yi'i henndu, o hultori, o fuɗɗi mutugo, o wooki: “Yaa Jawmiraawo, hisnam!” 31Law Yeesu forti juŋngo muuɗum, naŋngi mo, wi'i mo: “Hey an, famɗa-nuɗɗinkiijo, ngam ɗume a seki?”

32Nde ɓe nasti koommbowal ɓe ɗiɗo fuu, henndu de'iti. 33Nden pukara'en wonɓe nder koommbowal cujidani Yeesu, mbi'i: “Fakat a Ɓiɗɗo Allah.”

Yeesu yamɗitini nyawɓe haa Genesaret

(Markus 6:53-56)

34Ɓe eeri weendu, ɓe njotti lesdi Genesaret. 35Nde yimɓe lesdi man annditi Yeesu, ɓe ngeeyni habaru maako koo toy nder lesdi maɓɓe, ɓe ngaddani mo nyawɓe fuu. 36Ɓe tori mo o acca nyawɓe man meema gawargal limce maako tan, meemɓe ngal fuu njamɗiti.

Currently Selected:

Matta 14: FB

Highlight

Compare

Copy