Sirasid 50
50
Simon hooreejo liman'en
1Ɗum hooreejo liman'en Simon ɓii Oniyas wo'itini suudu Jawmiraawo saa'i o geeto. Zamanu maako, o semmbiɗini haykaliiru.
2O jo'ini caɓɓaaje mahol ɗiɗaɓol e caɓɓaaje towɗe taariiɗe haykaliiru.
3Saa'i maako, ɓe ngasi heeleewo ndiyam, ngo foti bee ngo haykaliiru hiindu.
4O haɓdi ngam hisnugo jama'aare maako diga sarru, o semmbiɗini berniwol ngam faddaago to kippol waɗi.
5Tedduŋgal maako ɗonno waŋga saa'i o ɗonno wurto nokkuure seniinde e o ɗonno taaro haykaliiru!
6Ɓe mbi'anno ɗum horre baɓɓol yaynannde caka duule malla ɗum leelewal wakkati juulde
7malla boo naaŋge yaynanŋge haykaliiru Allah Ɓaŋiiɗo malla timotimooŋgal ɗelkotooŋgal nder duule.
8O booɗɗono bana pinndi mboɗeeri yaake seeto malla bana pinndiiji puɗanɗi sera maayo malla boo bana haako hecco wakkati ceeɗu.
9Yimɓe ɗonno ciftora mo bana tamre uurnde wulannde dow hirsirde malla boo taasawo kaŋŋeeri fawnaaŋgo bee irin luuluuje fuu.
10Ɓe mbi'anno ɗum jaytunhi keewki ɓenndalooje malla boo lekki makki ki ɗon tiito asama.
11Saa'i o ɓornino limce hooreejo liman'en, saa'i o waɗi pawne maako booɗɗe, nden o ɗonno wa'o haa hirsirde nder haykaliiru, o ɗonno hebbina dalde haykaliiru fuu bee tedduŋgal.
12Nde o ɗonno dari yeeso huɓɓirde hirsirde, liman'en ɗonno ngaddana mo geɗal kirseteeɗi. Deerɗiraaɓe maako nder kuugal ɗonno taari mo bana meetaleewol, bana leɗɗe mawɗe ɗe Liban, bana hownde leɗɗe dibinooje.
13Liman'en iwɓe haa lenyol Haruna, fuu maɓɓe ɓe ɗonno bee limce maɓɓe booɗɗe, ɓe ɗonno njogi dokkal ngam Jawmiraawo yeeso jama'aare Isra'iila fuu.
14Simon ɗonno timmina dewal haa babal hirsirde bee jo'ingo dokke ngam Allah Ɓaŋiiɗo, Jawmiraawo Baawɗo.
15O ɗonno hoo'a jardugel, o ɗonno rufa inaboojam, iwɗam haa inabooje les hirsirde bana uurdi marndi uureeŋga mbooɗŋga ngam Ɓaŋiiɗo, laamiiɗo duniyaaru fuu.
16Nden liman'en puɗɗa gookaali, ɓe puufa luwe njamndi, ɗe ngurtina sonyo maŋngo ngam haa jama'aare siftora Allah Ɓaŋiiɗo.
17Law mooɓre fuu hawtaade tugga koppi haa lesdi ngam ɓe cujidana Jawmiraawo Baawɗo, Ɓaŋiiɗo.
18Nden yimɓe fuu ɓaŋgta gime, yimre welnde e ɗelemnde ɗonno hebbina haykaliiru.
19Mooɓre ɗonno toro Jawmiraawo, Ɓaŋiiɗo, ɓe ɗonno nder tornde yeeso Allah Booɗɗo haa timmoode dewal ngam Jawmiraawo.
20Nden Simon jippo hirsirde bee fortugo juuɗe dow mooɓre Isra'iila, bee hunnduko mum o ɗonno hokka nde barka Jawmiraawo. O ɗonno bee hormu ewnaago innde seniinde.
21Mooɓre tuuro haa tiinde meema lesdi ngam jaɓgo barka Ɓaŋiiɗo.
Tornde barkiɗinannde
22Ngette jonta Allah duniyaaru fuu, o ɗon waɗa koo toy kuuɗe mawɗe. O mawnini en diga danyeeki men e o ɗon woonani en fodde mbooɗeeŋga maako.
23O seyna en haa keɓen salaaman fodde ngeendam meeɗen bana ɓooyma nder Isra'iila!
24Sey mbooɗeeŋga maako wonda bee meeɗen tum e nga hisna en balɗe ngeendam meeɗen fuu!
Ummaatooje tati wanyaaɗe
25Woodi ummaatooje ɗiɗi nganymi, woodi tataɓre boo, nde nanndaay bee ummaatoore:
26Ɗum yimɓe lesdi Se'ir tawon, ɓaawoɗon Filisti'en, nden faataaɓe wonɓe haa Sikem.
Binndoowo e deftere mum
27Ɗum Yeesu, ɓii Sirak e taaniraawo El'aazaru mo Urusaliima, binnduɗo nder deftere nde'e ekkitinol marŋgol faamu e anndal. O ɗon sammina bana iyeende hikma ka heewi ɓernde maako.
28Barka laatanto lortanɗo haa ekkitinolji ɗi'i bilaa somgo e joganɗo ɗi ngam o laato hikmaajo!
29To o ɗon huuwtinira ɗi, o maran semmbe jaalaago torra fuu, ngam o ɗowtanan Jawmiraawo nde weeti fuu. Haa hulɓe Allah, o ɗon hokka hikma. Barka woodani Jawmiraawo haa foroy. Aamiina. Aamiina.
Currently Selected:
Sirasid 50: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.