Sirasid 42
42
1Cemte lornugo ko on nani e waŋgingo sirriiji. Cemte kuuje ɗe'e fuu, nden koo moy fuu yerdoto on.
Taa cemte kuuje ɗe'e
Ammaa taa cemte kuuje ɗe'e, taa waɗ geldol ngam waɗugo hakke:
2Taa semtu ɗowtanaago Tawreeta e alkawal Allah Ɓaŋiiɗo malla waɗgo adilaaku haa geddo Allah mo walaa aybe
3malla waɗgo lisaafi bee soobaajo malla bee ɗoftanɗo ma dow laawol malla senndugo ndonŋgu ma bee woɗɓe
4malla boo margo kuuje poondirɗe gooŋgaaje malla jaɓgo bote seɗɗa malla ɗuuɗɗum
5malla boo riba filu. Taa semtu boo eltugo ɓikkoy ma bee caatal malla boo ɓoccugo haa ƴiiƴam kuuwanoowo ma kalluɗo haa becce.
6To debbo ma karammbaaniijo malla wuyɓe ɗon nder saare ma, taa semtu suuɗgo kuuje ma.
7To a halfini goɗɗo ceede, lim ɗe, foondu ɗe. Taa semtu winndugo nyamaande nde tokkuɗa goɗɗo malla ko ɓe tokkete.
8Taa semtu eltugo paataaɗo malla humakiijo malla nayeejo aybinaaɗo ngam daakaareeku. Non kollirta yimɓe a laati goɗɗo ne'iiɗo, koo moy fuu yerdoto ma fakat.
9Margo ɓiɗɗo debbo laati ngam baaba mum fofoodu ɓillaaje koo o wi'aay ɗum. Daliila maako o ɓilloto haa o heɓataa ɗaanaago. To o nyuufiiɗo, o hultoran taa o saalo duuɓi teegal. To o te'aaɗo, o hulan taa gorko maako wanya mo.
10To o budurwaajo tawon, baaba hulan taa ɓe esta mo nden o reeda haa saare. To o ɗon nder saare goriiko, taa o waalda bee gorko feere. To o wondi bee maako teema o waawataa danygo ɓikkoy.
11To ɓiɗɗo ma debbo semtataa, sey ɓesda aynugo mo. To naa non, joonde maako nyiddunde waddante kuudi konne'en maaɗa. Yimɓe berniwol mbolwan dow maako, ɓe mooɓtan daliila maako. Nden o semtinte caka jama'aare man.
12Taa ɓiɗɗo ma debbo holla yeeso mum haa goɗɗo, taa o nasta haa nokkuure rewɓe,
13ngam rewɓe accan halleende muuɗum'en wurta bana koowoowe ngurtorto diga limce.
Maŋngu Tagɗo
14Ndikka nganyaandi gorko dow mbooɗeeŋga debbo! Debbo mo semtataa semtinan.
KAƁƁOL WASUYEEJI JOWAƁOL
15Jonta mi yiɗi siftorgo ko Jawmiraawo waɗi fuu, mi yiɗi yeccugo ko mi yi'i. Bee bolle maako, Jawmiraawo tagi koo ɗume fuu. Ko o taƴnori fuu laatoto fodde muuyo maako.
16Bana naaŋge yaynanta kuuje fuu, non en ngi'an tedduŋgal Jawmiraawo nder ko o waɗi fuu.
17Koo malaa'ika'en Jawmiraawo mbaawataa yeccugo kuuɗe maako kayɗiniiɗe fuu. Jawmiraawo Baawɗo tabitini ɗe ngam haa duniyaaru yeeɗa yeeso maako bee tedduŋgal.
18Allah linyan haa luggeeŋga weendu e haa lugguɗum ɓerɗe, o waŋginan sirriiji maajum. Ɓaŋiiɗo anndi koo ɗume fuu. O linyan alaamaaji kollanɗi sannjuki wakkati.
19O anndinan ko saali e ko warata, o waŋginan sirriiji lugguɗi.
20Walaa numo koo ngoye daɗata mo, walaa wolde koo ndeye suuɗoto yeeso maako.
21O jo'ini kuuɗe maako mawɗe ɗe hikma maako taaskino. O waylitittaako haa foroy, walaa ko o ɓesdata malla ko o ittata dow ko o waɗi fuu, o maraay boo haaje sawariijo koo gooto.
22Ko o waɗi fuu, ɗum kayɗiniiɗum haa yotti feetere ɓurnde famɗugo nde goɗɗo waawaataa yi'ugo!
23Ɗum fuu ɗum ɗon yeeɗa e duumoto haa foroy, ɗum ɗowtan fodde haaje.
24Koo ɗume fuu bee ɗiɗaɓum mum, huunde nde'e yahda bee ndeya, walaa ko timmidaay.
25Huunde fuu ɗon waŋgina saman huunde feere. Moy saftata laargo tedduŋgal maako?
Currently Selected:
Sirasid 42: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.