Sirasid 43
43
Asama e naaŋge
1Asama wooɗi masin, senndoode maaga boo laaɓi! Ndaa ko wooɗi to en ɗon ngi'a ɗum:
2To naaŋge fuɗi, waŋgi, nge anndinan no kuuɗe Allah Ɓaŋiiɗo ɗe kayɗiniiɗe.
3Naaŋge caka nyalawma ɗon yoorna lesdi. Moy waawata daraago yeeso nguleeŋga maage?
4Gudiijo fuufan yiite ngam waɗgo kuugal mum, ammaa naaŋge wulanŋge kooseeje ɓuran nge semmbe nde tati. Nge sakkinan wifre yiite, nge saŋkitan yiitere maage, nge ɗon wumna.
5Ooho, Jawmiraawo o mawɗo! kaŋko tagi nge, kaŋko ɗowata yahdu maage.
Lewru
6Lewru kayru boo, ndu wurtoto bee wakkati maaru, ndu tabitinan zamanuuji e anndinan wakkatiire saalotoonde.
7Tagdi ndi'i ɗon usta haa majjita, ɗon tinndina wakkatiiji juulɗe.
8Kayru hokkata lebbi inɗe maaji, to ndu ɗon waylito, ɗum kayɗiniiɗum. Ndu ɗon mawna, ndu laati annoora koode yaynanɗe haa asama.
Koode
9Njayawri koode, ɗum ŋarol asama. Njayawri maaje ɗelkanndi nyeynan asama Jawmiraawo.
10Bee umroore Allah Ceniiɗo, ɗe ndaroto haa babal ngal o taƴnori, koo woore maaje ɗalataa babal maare.
Booɗki duniyaaru
11Laar timotimooŋgal, nden yettu tagɗo ngal. Wooɗgo maagal ɓuri semmbe.
12Ngal diidan haa asama hownde yaynannde. Juuɗe Jawmiraawo Ɓaŋiiɗo diidi ɗum.
13Bee umroore woore, o toɓnan mallimalloore. To o umri, o sakkinan ma'e.
14Ngam maajum keeleeje maako ɗon maɓɓito e duule boo ɗon caŋkito bana colli piiranɗi.
15Baawɗe Allah caatinan duule nden ɗe ceekan, ɗe laatoto mallimallooje.
16Nde Jawmiraawo waŋgi, kooseeje ndimmbi. To o yerdake ɗum, o umminan henndu fombina
17malla naargewol woyla malla boo henndu saatundu. O toɓnan mallimallooje daneeje bana piirol colli koɗanɗi, ɗe njippoto bana piirol baɓɓatti paljanɗi dow lesdi.
18Booɗki daneejum mallimallooje hayɗinan gite, nden ɓernde boo seyoto to ɗe ɗon toɓa bana nii.
19Mallimallooje ɗe Allah ɗon saŋkita dow lesdi nanndi bee mannda, peewol laatinan ɗe bana gi'e cewɗe.
20To henndu feewndu woyla fuɗɗi wifgo, kattiniiɗam waɗan dow hoore ndiyam, ɗam ɗon yaaja dow weendu fuu, nden ɗam sudda ndu bana safaare.
21Henndu wulndu nyaamtan kooseeje, ndu yoornan lesdi. Bana yiite, ndu wulan haakooji e huɗooji fuu.
22Ammaa duule keewɗe ndiyam ngaddan kurgun maajum law. Ɓaawo nguleeŋga man, saawawre waddan seyo.
23Fodde nufaye maako, Allah jaali maayo maŋngo, nden waɗi duuɗe dow maago.
24Yahanɓe bee koommbowal dow maago limti sababu maago e kiistaaji maɓɓe ɗon kayɗina en.
25Haa maago woodi kuuje geete kayɗiniiɗe, booɗɗe, irin dabbaaji feere-feere e dabbaaji kulnanɗi nder ndiyam.
26Barka Allah, nelaaɗo maako ɗon yotto jam, barka wolde maako, ko mari yoŋki fuu ɗon tabiti nder kawtal.
27Min poti wolwugo ɗuuɗɗum, ammaa min timmidintaa ɗum. Min timminan bee wi'ugo: Ɗum fuu ɗum rowo Jawmiraawo.
28Min pamɗi masin ngam teddingo mo, o mawɗo ɓurɗo ko o tagi fuu.
29Jawmiraawo o kulniiɗo, o mawɗo, baawɗe maako ɗe kayɗiniiɗe.
30Ngam teddingo Jawmiraawo, mbaŋgine maŋngu maako bana no on mbaawri fuu, ammaa no on mbolwiri fuu o ɓurdan mawnugo. Kawte semmbe mon fuu ngam maŋgtugo mo, taa paasite sam, ammaa on timmidintaa teddingo mo sam.
31Moy yi'i Jawmiraawo haa o wolwa dow maako? Moy waawan teddingo mo bana no haani?
32Min ɗon ngi'a kuuɗe maako seɗɗa tan, ammaa woodi ɗuuɗɗe feere ɓurɗe mawnugo ɗe min ngi'ataa.
33Jawmiraawo tagi koo ɗume fuu, o hokki boo hikma haa hooliiɓe mo.
Currently Selected:
Sirasid 43: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.