Sirasid 40
40
Bone ɓii Aadamaajo
1Allah waɗani neɗɗo fuu torraaji naawɗi. O roondani ɓiɓɓe Aadama doŋngal tedduŋgal diga saa'i ɓe ngurti reedu daada maɓɓe haa yotti nyalde loraaki maɓɓe nder reedu lesdi, daada yimɓe fuu.
2Ko suklata numooji maɓɓe e ko hulnata ɓe, ko ɓe ndeenata bee kulol, ɗum nyalaade timmoode maɓɓe.
3Ɓe fuu maɓɓe ɓe ɗon nder sirla ngoota, diga laamiiɗo mo jooɗi dow tedduŋgal koromwal laamu mum haa yotti laafuɗo maako ɓurɗo leesgo jooɗiiɗo haa lesdi dow ndoondi,
4diga ɓorniiɗo ngapaleewol boɗeewol e meetaleewol haa ɓorniiɗo limce gonnjo.
5Fuu maɓɓe ɓe anndi tikkere e kaajal, jiiɓre e saklere, kulol maayde, jogaago dugun e kaɓe. Saa'i ɓe ɗon dow leeso ngam ɓe ciwto, ɗoyŋgol jemma findinan numooji maɓɓe.
6Nde ɓe keɓaay siwtaago, ɓe torrorto bana nder cukle caka nyalawma, nder saklere ɗoyŋgol maɓɓe, ɓe ngi'an nder koyɗol, bana sooje'en luutanɓe haɓre.
7To haa ɓe kisa, wakkati man ɓe pina nden ɓe kayɗina ngam ɓe kultori meere.
8Sababu gooto ɗon torra tagle fuu, diga dabba haa ɓiɓɓe Aadama, ammaa ɗum ɓuran naawgo nde joweeɗiɗi ngam halluɓe.
9Ɗum waade malla mbar-hoore, kaɓe, konuuji, sarruuji malla boo weelo, winnde malla bononnda.
10Kuuje kalluɗe ɗe'e fuu tagaama ngam luutanɓe Tawreeta. Ilam tufaana waɗi ngam daliila aybe maɓɓe.
11Ko iwi haa lesdi loroto haa maari, ko iwi haa ndiyam loroto haa weendu.
Timmoode sooynde adilaaku
12Caahuuji ɗi yimɓe ngaɗata bana rusiya haa hiitooɓe, sooynde adilaaku, ɗum fuu ɗum timman, ammaa hoolaare duumoto.
13Jawle ɗe halluɓe mooɓti fuu laatoto bana maayo ɓeeɓanŋgo. Ɗe caaloto bana felmaaŋgo maŋngo wakkati waabiliire.
14Kaa'e ceyoto ngam sarru maaje. Bana non luutanɓe Tawreeta kalkan.
15Ruutu yimɓe ɓe ngalaa diina rimataa lice ɗuuɗɗe. Soɓɓe ɓe'e mbaawataa waɗgo ɗaɗi.
16Huɗo mawnuko sera ndiyam e fomoonde maayo, aartan huɗooji goɗɗi ɗoofeego,
17ammaa mbooɗeeŋga laati bana aljanna marka barka. Ballal gaɗanaaŋgal laafuɓe yejjitittaake sam.
Booɗɗum e ko ɓuri wooɗgo
18He'ango hoore mum e huuwugo kuugal, kanjum welnata joonde neɗɗo. Ammaa heɓgo ndesaari ɓuri ɗum seynugo.
19Margo ɓiɓɓe ɗuuɗɓe malla boo nyiɓugo berniwol, kanjum mawninta daraja neɗɗo, ammaa debbo marɗo hakkiilo ɓuri ɗum margo daraja.
20Yimre e inaboojam seynan ɓernde, ammaa yiɗgo hikma ɓesdan seyo.
21Fuufordu e garayaaru ngoodi sonyo welŋgo, ammaa wolde woonde ɓuran welgo.
22Mo'ere e ŋarol pottanan gite, ammaa haakooji kecci haa gese ɓuran ɗum fuu.
23Goɗɗo yahan haa soobaajo mum ndego ndego, ammaa debbo bee gorum pottan tum.
24Deerɗiraaɓe malla wallooɓe ngurtinte nder torra wakkati naawɗum, ammaa ko ndokkata laafuɓe ɓuri ɗum. 25Margo kaŋŋeeri e cardi ittan numooji duniyaaru, ammaa yimɓe ɓuri yerdugo sawari mboondi.
26To goɗɗo laatake diskuɗo malla cemmbiɗɗo, ɓernde maako waaloto, ammaa ko ɓuri ɗum fuu ɗum kulol Jawmiraawo. To non kam, walaa ko ŋakkanta en, en marataa haaje tefgo ballal goɗŋgal.
27To a ɗon hula Jawmiraawo, a yi'an hoore ma bana a ɗon nder aljanna, a aynaaɗo ko ɓuri baawɗe goɗɗe fuu.
Taa yeeɗ bana dookoowo
28Ɓiŋngel am, taa yeeɗ bee rookaago ko nyaamata, ngam ndikka maaygo dow rookaago!
29To goɗɗo suuni nyaamdu keeddiɗɗiraawo muuɗum, ngeendam mum he'aay ewneego ngeendam. O soɓnan hoore maako bee nyaamdu ndu o waawaay heɓgo bee hoore maako. Neɗɗo jaŋnguɗo e marɗo elto wooɗŋgo haɗan hoore mum waɗgo bana nii.
30Ngam goɗɗo mo semtataa, nyaamdu ndu o rooki laatoto welndu haa hunnduko maako, ammaa nder reedu maako, ndu wulan bana yiite.
Currently Selected:
Sirasid 40: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.