Sirasid 39
39
1e mo ɗon ɗaɓɓa hikma moodiɓɓe ɓooyma'en e mo ɗon numa habaru annabi'en.
2Kaŋko, o aynan ciftorki geccaaji dow yimɓe tedduɓe, o haɓdan faamugo bolle hikmaaje ɗe paamataake.
3O tefan sirriiji balndi, o laartan ko nyukki nder bolle hikma.
4O foti huuwgo ɗakki yimɓe tedduɓe: Ɓe tawan mo kommbi ardiiɓe lesdi. Kaŋko ɓe nelata lesdi njananndi ngam o woodi kirseeku booɗɗum e kalluɗum neɗɗo.
5Fajiri cub, o yahan kommbi Jawmiraawo tagɗo mo, ngam o toro yeeso Allah Ɓaŋiiɗo. Sey haa Allah tan o wolwanta, nden o tuuban aybeeji maako.
6O toroto Jawmiraawo, Allah Baawɗo ngam o yerda hokkugo mo hakkiilo. Nden o waawan kaŋko boo waazingo habaru hikma maako e bee yettugo Jawmiraawo nder tornde.
7Bana nii marɗo hikma ɗowata muuyo mum e anndal mum, o sukloto faamgo sirriiji Allah.
8Hikmaajo hollan jaŋngirde teddunde nde o jaŋngi, o jo'inan seyo maako nder Tawreeta alkawal Jawmiraawo.
9Yimɓe fuu mantan faamu hikmaajo, ɓe ngejjitittaa mo sam. Ciftorki maako wilataake, innde maako boo jooɗoto haa ragare yidere ɓiɓɓe Aadama.
10Yimɓe ngeccan hikma maako makka, jama'aare jobbititto mo.
11To balɗe maako njuuti, o ɗalan ɓaawo maako innde teddunde nde ujineeje keɓaay. To wakkati maako yottake, o maayan o keƴnitiiɗo.
Ko Allah waɗi fuu booɗɗum
12Nde mi numi, mi nanndi bee lewru nayɓinndu. Mi heewi bee numooji ɗi mi yiɗi waŋgingo.
13Keɗiteeɗam, ɓikkoy am yiɗaakoy, mawne bana wardi baŋnge maayo.
14Uure uureeŋga mbooɗŋga bana ɗaccere alud uurnde, laate bana lekki cuddaaki bee pinndiiji. Ngime hawtaade, ngette Jawmiraawo dow ko o waɗi.
15Mbaŋgine maŋngu maako, kellane mo bee maŋgtooje mon, ngimane mo bee fiygo garayaaru. Ndaa no on maŋgtirta mo:
16Ko Allah waɗi fuu wooɗi jamum! Ko o umri fuu ɗon waɗa bee wakkati muuɗum.
17Taa ƴam hoore ma: “Ɗume ɗo? Ngam ɗume ɗu'um?” Ngam ƴamɗe fuu njaabete bee wakkati maaje. Allah umri wolde woore tan, nden ndiyamji fuu mooɓti nokkuure woore: Dow wolde maako woore fahin, ɗi kawti haa keeleeje.
18O umri, kuuje fuu laati bana o yiɗi. Walaa kaɗanɗo kisndam ɗam o waddata.
19O ɗon yi'a ko yimɓe mbaɗata fuu, walaa ko luutata gite maako.
20Gite maako ɗon ngi'a ko saali e ko laatoto fuu, walaa ko hayɗinta mo.
21Taa ƴam hoore ma: “Ɗume ɗo?” “Ɗume ɗum nafata?” Ngam o tagi koo ɗume fuu bee daliila.
22Barka maako ɗon hebbina lesdi fuu bana paccam maayo Niil, bana ilam yarnata lesdi.
23Non boo tikkere maako yottorto heefeerɓe bana en ngi'i saa'i o wartiri yayre harde non.
24Laawol ngol o diidani hooliiɓe mo, lelataa, ammaa ngol heewi joote ngam luutooɓe umroore maako.
25Diga fuɗɗam, Allah tagi kuuje booɗɗe ngam wooɗɓe e kuuje kalluɗe ngam halluɓe.
26Ngam yeeɗgo, neɗɗo mari kuuje kaanduɗe ɗe'e: Ndiyam, yiite, njamndi e mannda, kuroori, alkamaari, kosam e njumri, inaboojam waato ndiyam inabohi, nebbam e limce.
27Kuuje ɗe'e fuu ɗon nafa hooliiɓe Jawmiraawo, ammaa ɗon sarra heefeerɓe.
28Keni feere tagaama ngam torrugo halluɓe, ɓernuki maɓɓe ɗon ɓesda sarru man fahin. Wakkati darŋgal, ɓe ɗon mbaŋgina doolɗinki maɓɓe, nden ɓe nde'itina tikkere tagɗo ɓe.
29Yiite e mallimallooje, weelo e maayde tagaama kanje boo ngam torrugo halluɓe.
30Nyi'e dabbaaji ladde, jahe, poosokje, kaafahi mbaranki heefeerɓe,
31ɗum fuu ɗum ɗon seyo ɗowtanaago umrooje ma. Haa duniyaaru, ɗum ɗon taaski ngam muuyo maako. To wakkati yottanake ɗum, ɗum ɗowtanto wolde maako tan.
32Ɗum fuu ɗum laaɓɗum haa am diga fuɗɗam. Mi numi dow maajum, nden mi winndi ɗum fuu.
33Ko Jawmiraawo waɗi fuu ɗum booɗɗum. To ɗum haani, o jo'itinan ko ŋakki.
34Taa wi': “Ɗo tulli dow ɗo.” Ngam wakkati waran haa en anndita ɗum fuu ɗum booɗɗum.
35Jonta kam ngime bee ɓernde mon fuu e bee sawtu ngam yettugo Jawmiraawo.
Currently Selected:
Sirasid 39: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.