Sirasid 38
38
Kurgoowo e nyawu
1Teddin kurgoowo ngam o ɗon huuwana yimɓe ngam kaŋko boo Jawmiraawo tagi mo.
2Ɓaŋiiɗo hokki mo anndal hurgugo bana caahu ngu goɗɗo heɓi diga laamiiɗo.
3Kurgoowo mawnititto ngam anndal muuɗum, tedduɓe maŋgtan ɗum boo.
4Leɗɗe kurganɗe iwi haa lesdi: Jawmiraawo tagi ɗe. Kakkilɗo yawataako ɗe.
5Naa bee leggal Muusa laɓɓini ndiyam ngam yimɓe paama baawɗe Allah?
6Jawmiraawo hokki yimɓe anndal ngam ɓe maŋgta kaayeefiiji maako.
7-8Gal kuuɗe booɗɗe ɗe'e, gaɗoowo lekki jillindira leɗɗe man, nden kurgoowo hurgan e hoynan naawral. Fakat Allah huuwan bana nii: Nder duniyaaru fuu njamu iwi haa maako.
9Ɓiŋngel am, to a nyawi, taa yeeba hoore ma, ammaa tora Jawmiraawo, o yamɗitinte.
10Accu aybeeji ma, huuw bee laawol, nden laɓɓin ɓernde ma e aybeeji ma fuu.
11Hokku Allah tamndannde kuroori bee ɗaccere alud e nebbam to a woodi semmbe.
12Nden ɗal kurgoowo huuwa ngam kaŋko boo Jawmiraawo tagi mo. Sey kurgoowo jooɗo baŋnge ma ngam a ɗon bee haaje maako.
13Wapaka, hurgooɓe ngoodi dabareeji hurgaago.
14Ngam kamɓe boo ɓe toroto Allah duŋana ɓe ɓe koynana nyawɗo, ɓe njamɗitina mo haa o yeeɗa.
15To goɗɗo huuwi kalluɗum dow tagɗo ɗum, sey o nasta haa juuɗe kurgoowo!
Joonde nder maayiti
16Ɓiŋngel am, woy to goɗɗo maayi. Bana naawreeŋga maŋnga, siŋku bee gimol bojji. Aynu ɓanndu maayɗo bana no haani, taa yeeba yenaande maako.
17Sey bojji ma waŋgina naawreeŋga ɓernde ma! Fiy wiɓɓere ma bee semmbe. Neeɓ haa maayiti: Nyalaade malla balɗe ɗiɗi ngam hisgo peƴƴooje? Nden de'itin hoore ma e naawreeŋga maajum.
18Naawreeŋga maajum yerɓan haa maayde: Ɓernde mettunde timminan semmbe ma fuu.
19Laataago jurumɗo ɓesdan naawreeŋga ɓernde, goɗɗo numan o naalaaɗo ngam o laafuɗo.
20Taa ɗal hoore ma nder mettamɓeram, fartu ɗum, nden num garanɗum.
21Taa yejjitit: Maayɓe lorataako. Suno ma maŋngo nafataa maayɗo, hoore ma torrata.
22Siftor hoddiroore maako laatoto boo nde ma: Ɗum geɗal maako keenya, ngal ma hannde.
23To goɗɗo yottake siwtorde mum ragareere, siwta, accu numgo dow maako. Nde poofɗe maako timmi, de'itin hoore ma.
Saɗirmaaji kuuɗe e sanaa'aaji
24Binndoowo heɓan hikma wakkati pijirle, mo suklaaki jamum, laatoto hikmaajo.
25Ammaa noy demoowo heɓata ɗum? Huunde woore seynata mo: Jogaago baaneewo, ɓoccugo ga'i haa ɗi njaha, tiinaago nde weeti fuu dow kuuɗe ɗe'e. Ngeewta maako tum ngoota: Ga'i maako.
26Ko o numata tum: Waɗgo diŋiiji maako. Nden o hiiran tum nyaamnugo na'i maako.
27Bana nii boo cehoowo e mahoowo: Ɓe ɗon nder kuugal naaŋge e jemma fuu. Bana tafoowo kaatummeeje boo, o tiinoto feerɗindirgo suuraaji. O ɗon sukli ngam wooɗingo kuugal maako, ɗon hiira timmingo ngal.
28Non boo gudiijo, jooɗiiɗo baŋnge waylirde: O ɗon tiini dow njamndi ndi o tappata. Nguleeŋga yiite ɗon ilna gulɗum haa yeeso maako, ammaa doole o haɓdan bee nguleeŋga kaatinɗe. Haraka tappirɗum maako ɗon sukka mo noppi, gite maako sottataa dow huunde nde o waɗata. Bee tiinaare dow kuugal maako, o ɗon hiira ngam wo'ingo ngal.
29Non boo mahoowo payanɗe: O jiiɓan loope bee kosɗe maako, o cukliiɗo tum nder sanaa'a maako, o haɓdan bee semmbe maako fuu ngam mahgo payanɗe ɗuuɗɗe.
30Bee juuɗe maako, o ɗon takka loope ɗe kosɗe maako njiiɓi. O tiiniiɗo ngam waɗgo pawne, o nyallan wo'itingo huɓɓirde.
31Yimɓe ɓe'e fuu ɗon koolo kirseeku muuɗum'en, koo moy maɓɓe fuu laati mawɗo masin nder kuugal mum.
32To ɓe ngalaano, en mbaawataa nyiɓgo berniwol malla jooɗaago nder maagol malla yiilaago nder maagol. Ammaa to yimɓe mooɓtake ngam sawari, ɓe ƴamataa ɓe sam.
33Haa jama'aare, ɓe laatataako ardiiɓe. Ɓe ngalaa babal haa suudu kiita, koo ko ɓe paamata haa Tawreeta e kiitaaji. Walaa ko ɓe anndi dow haala jaŋngirde e kiitaaji, naa kamɓe boo ngaɗata balndi.
34Ammaa kamɓe ɓe tiinoto tefgo jawdi, ɓe toro sonaa ngam kuugal maɓɓe.
Nafuudaaji binndoowo
Ɗum yahdaay bee mo ɗon tiini tokkaago Tawreeta Ɓaŋiiɗo,
Currently Selected:
Sirasid 38: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.