Sirasid 35
35
Keeddiɗɗiraawo e dokke
1Saman tokkaago Tawreeta foti bee saman dokke ɗuuɗɗe.
2Jogaago umrooje maako foti bee kirseteeɗi ngam kawtal Allah bee yimɓe.
3Waɗango goɗɗo mbooɗeeŋga nanndi bee dokkal kuroori ɗiggundi.
4Hokkugo huunde haa talakaajo, ɗum dokkal ngam maŋgtugo Allah.
5Ko fottani Jawmiraawo, ɗum daayaago halleende. Accugo ko o yerdaaki fotan bee dokkal ngam heɓgo yaafuye maako.
6Ammaa taa war yeeso Jawmiraawo juuɗe meere
7ngam kaŋko umri en kirseteeɗi ɗi'i fuu.
8Dokkal adiliijo ɗum dokkal timmididŋgal, uureeŋga maagal yottoto haa Allah Ɓaŋiiɗo.
9Allah jaɓan dokkal adiliijo, o yejjitittaa uurle ɗe ɓe ɗon ngula dow hirsirde.
10Laatoɗa caahiiɗo to a ɗon teddina Jawmiraawo. To a ɗon wadda ko gese ma ndimi, taa ustu sam nder ko haandani mo.
11To a ɗon waɗa dokkal fuu, sey moosa. Waddu zakka ma boo bee seyo.
12Hokku Allah Ɓaŋiiɗo fodde ko o hokki ma, laatoɗa caahiiɗo bee maako fodde jawdi ma.
13Jawmiraawo laataaki gettaro, o hokkititte ko ndokkuɗa mo cowi joweeɗiɗi.
Kiitoowo adiliijo
14Taa foondu soodgo ballal Allah ngam o saloto dokke ma.
15Taa foondu hokkugo dokkal bee jawdi ngujjaandi: Jawmiraawo o kiitoowo mo suklantaako kuuje dow-dowje.
16O wudintaa laafuɗo ammaa o jaɓan tornde toonyaaɗo.
17O yawataa atiimeejo torotooɗo mo malla debbo jurumɗo mo siŋkani mo,
18ammaa o yi'an gonɗi ilanɗi dow gole maako
19e o nanan wullaandu ndu o wullori boynuɗo mo.
20Kuuwananɗo Jawmiraawo fuu, Jawmiraawo jaɓɓoto mo kommbi muuɗum, tornde maako yottoto haa asama.
21Ooho, tornde laafuɓe yottan asama. Nde siwtataako sam sey to nde yottake Allah. Nde lorataako ɓaawo boo sey to Ɓaŋiiɗo ta'i kiita
22ngooŋɗuka ngam adili'en. Jawmiraawo neeɓataa jaabaago, o munyantaa halluɓe. Wakkati waran ngam o yewa keeci ɓen ɓe enɗataa koo moy,
23nden o tuurtan dow jama'aaje goɗɗe. Wakkati waran nde o wilan mawnitiiɓe ɗuuɗɓe ɓe'e, o fusan baawɗe maɓɓe cooyɗe adilaaku.
24O warjoto ɓiɓɓe Aadama fodde kuuɗe maɓɓe e anniyaaji maɓɓe boo.
25O ta'an kiita dow ummaatoore maako bee enɗam, o hokkan nde seyo maare.
26Mbooɗeeŋga waŋgan nder wakkati bone bana duule iyeende nder wakkati ceeɗu.
Currently Selected:
Sirasid 35: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.