Sirasid 36
36
Tornde ngam ummaatoore Allah
1Yurmin min yaa Allah, jaagorɗo duniyaaru fuu.
2Waɗ no ummaatooje fuu anndita an woni Allah.
3Sey juŋngo ma barro ummaatooje jananɗe ngam ɗe paama fakat an woni jaagorɗo.
4Bee hiitaago aybeeji amin a holli ɓe no a wa'i. Bee torrugo ɓe, a hollan min maŋngu ma.
5Sey ɓe ekkito anndugo ma bana no min ekkitori minin boo: Walaa Allah feere sey an Jawmiraawo!
6Hesɗitin kuuɗe maaɗa kayniiɗe, waŋgin kaayeefiiji ma fahin.
7Huuw, teddin juŋngo ma nyaamo.
8Tikkere ma fetta, sey nde saŋkito
9ngam wilgo konne'en amin, ngam namgo wanyɓe min!
10Waŋgin nii seɗɗa wakkati ragare, taa yejjitit, an darni wakkati man. Bana nii ɓe ngeewtan koo toy dow kuuɗe ma mawɗe.
11Yiite tikkere ma moɗa luttuɓe! Sey toskooɓe ummaatoore ma mbile dow laawol!
12Yaaɓ ko'e ardiiɓe konne'en, wi'anɓe: “Walaa goɗɗo feere, sey minin.”
13Hawtu le'i Yaakubu fuu,
16hokkitit ɗi lesdi ndi a hokkino ɗi diga fuɗɗam.
17Jawmiraawo, yurmin ummaatoore ma, kayre nden jogi innde ma. Yurmin Isra'iila, an laatini mo afo ma.
18Waŋgin mbooɗeeŋga ma ngam berniwol haykaliiru ma, ngam Urusaliima, pellel joonde ma.
19Sey Siyona heewa bee yimɓe maŋgtooɓe ma! Hebbin haykaliiru ma bee tedduŋgal maaɗa.
20Hollu Isra'iila woni ummaatoore ma, kayre tagɗa diga fuɗɗam. Nden timmitin iinaaji ɗi annabi'en ma mbaŋginino bee innde ma.
21Hokku hooliiɓe ma ko a iini ngam yimɓe paama annabi'en ma ke'i hooleego.
22Jawmiraawo, a enɗoowo ummaatoore ma, nan tornde huuwanooɓe ma ngam haa duniyaaru fuu anndita an woni Jawmiraawo, Allah haa foroy.
Anndititgo ko ɓuri wooɗgo
23Reedu ɗon jaɓa ko nyaamete fuu, ammaa woodi nyaamduuji feere ɓuran goɗɗi welgo.
24Hunnduko ɗon maata dakam kusel ladde. Bana non boo kakkilɗo heɓtirta to ɓe pewi ɗum.
25Saata-hooreejo saklan! Ammaa marɗo kirseeku hokkitan mo ko haanani mo.
Suɓgo debbo
26Debbo jaɓan gorko mo ɓe ndokkata mo, ammaa budurwa'en woɗɓe te'eteeɓe ɓuran woɗɓe wooɗgo.
27Ŋarol debbo seynan gite gorum: Walaa ko o ɓurata yerdaago fahin.
28To o anndi boo wolwugo bee laawol e bee hakkiilo, a tawataa gorko ɓuranɗo mo seyo.
29Mo te'i debbo, heɓi jawdi ɓurndi jawle fuu. O balloowo maako, daŋraŋgal maako.
30To kowaagol woodaa, ngesa yoofaama haa wuyɓe. To debbo walaa boo, gorko laatoto jurumɗo, o anndaa toy o yahata.
31Ɓe koolataako gujjo ƴoyɗo, giilotooɗo berniiji, non boo goɗɗo mo walaa saare, baalanɗo haa toy fuu haa jemma tawi mo.
Currently Selected:
Sirasid 36: FBDC
Highlight
Copy
Compare
Share
Want to have your highlights saved across all your devices? Sign up or sign in
DEFTERE ALLAH © Alliance Biblique du Cameroun, 1994.